Read Wano MARAKUT 3 Bible Online

MARAKUT 3 - Wano bible

MARAKUT 3

¹Peebi nen it Yakuri tamban eeko menggam oome nogome aap eenggi peenok kambak negen wonage me, at Yetut ugun unggwi nagagerak.

²Unggwi nage mbareegi, it aakumi nogome nen, ”Tamban eekwi paga aret aap yi obeelom eeke kaamun a, lek a?” yinuk, inoone at oba puwok nduk, inigen pik-pak ugu nogogwaarak.

³Inigen pik-pak ugwi iigak, at Yetut nogo nen aap eenggi kambak nogo yoge logonet, ”Mi'nage logominggindik, oolo ya'i mok o,” yinuk,

⁴yoge nagagirik, it nogo yorage logonet, ”Tamban eekwi paga obeelom eeginaburak ti op ilik, maluk eeginaburak ti op a? Aakumi ineebe inili yuurak op ilik, inooriyak ti op a?” yoragagerak kwe, inoone lek aret puk ogogwaarak.

⁵”Inogogun laakot, ai!” yinuk, at enegen abi inoorit nage nagagirik, aap eenggi kambak nogo yoge logonet, ”Keenggi ngingget o,” yoge mbareegi, ngginggage nagagirik, eenggi obeelom aret agagerak.

⁶Obeelom eeke mbareegi, it Pariti mendek nogo nen wundi nogo nogogwaarik, it Keroriyani mendek inom kuwak eeppunuk, ”Nonggop eerogo waruwi o?” yinuk, wone mbaneegwaarak.

⁷It aakumi ambik obeelom eeginabit nage logonet, it kugi andi kunik nogo Yetut ineenggi pigaawok nduk, panggi-panggo agan owagam wogwe iinok, obeelom eeginake, ndi, kugi inikime unggwagagerak nogo it kugi nen Yetut inigen kogo nogogwaarik, ”Ala aput kat aret o,” yinuk, kwa yogo logonet, tebe-tebe nogo nagaatik, wundi nogo mbareegwa, at Yetut nen it kugi nogo yorage logonet, ”Kinigen yelok neegotak me, aakumi yoraagup o,” yinuk, oone omaawi paga inaruk wake, eerit nage inaruk konembogo nogogwaarik, it aap o Yerutalem nen, Yureya nen, Irumeya nen, o yi Yoraran ene paga nen, Tut Tiron yi awi ndi awi time nen, abok aret at ambokan mugurok nogwe iinok, at Yetut oone waganggwi nogo inom yi yenggenak aa'nggi paga nogogwaarak kwe, kagak, mugurok nogo mbareegwa, at Yetut nen, ”It aakumi ambik yagabit ee'nakwi iyo, yiiro ogobakkigirogo panggoppani woraanip o,” yinuk, at oone waganggwi nogo yoragagerak.

¹³Yorage nagagirik, at Yetut nogo puurom lagangge nagagirik nogome logonet, at inom nege logorak nduk iniki koonogo pege nagagirik, woraawak nduk wiirage mbareegi, owagam kuwak ari wogogwaarak.

¹⁴Kuwak ari wogo mbareegwa, it aap ineebe 12 leenogo piige nagagirik, wone yorage logonet, ”Ninom lambunik nugu logowok nduk miirogo leengginakirak me, kit nen an noone yoranet nugwi,

¹⁵kugi inikime lik yimenggerak kenok an nendage paga nggiginogo wumbiigwi, eeko logobagip nduk nappinagagin o,” yinuk, leenogo mippiyareegerak.

¹⁶It leenogo mippiyareegerak nogo, at Timon endage peebi toonak Peterut nogo inom,

¹⁷Tabiri apuri Yakobut awuluk Yaya imbirak inendage it inoone paga Mbowanereget, ndi, nit ninoone paga Aap Nggurubu yogo monggoorak nogo inom,

¹⁸Andereyat inom, Piliput inom, Mbarotolomeyut inom, Matiyut inom, Tomat inom, Alipiyut aput Yakobut inom, Tareyut inom, at Timon aap Kanani mendek inom,

¹⁹at Yurat Ikariyot Yetut onggo mbaneegerak nogo inom, nogo aret leenogo mippiyareegerak.

²⁰Leenogo mippiinok, at ame nage nagagirik, time wonage me, peebi aakumi ambik at owagam kuwak ari wogo mbareegwa, ”Aakumi ambik me, mbi noorak meek o,” yogwe

²¹at owe-awot inaruk konembogo nogogwaarik, ”Aap yi kumili-kumili negen agan nege yi, piga nawok o,” yinuk, piga nawok nduk eereegwaarak.

²²Piga nawok nduk eekwi me, it aap liiru mbanak unde nogo o Yerutalem nen wogo nogogwaarik, ”Aap yi kugi Mbeeletebut inikime unggwagagerak. Kugi iyagalo endage nogo paga it aakumi kugi nggiginogo wumbiige menggerak o,” yinuk, yereegwaarak.

²³Yogo mbareegwa, at Yetut nen it aakumi nogo woraawak nduk wiirage nagagirik, at owagam kuwak ari wogo mbareegwa, wone eegu laarogo yorage logonet, ”At Ibilit nen Ibilit aret nonggop togon nggiginogo wumbuurak mbakop?” yinuk,

²⁴yorage nagagirik, ”It aap inabu'me menggaarak it-it ogooppunuk ma'nogwe kenok ti, it-it nogome menggaarak nogo obeelom logogun lek o.

²⁵Ndi, it kunu ambit wonogwe nogo it-it ogooppunuk mbaganggwi iinok ti inom inawi kunu ambit me time menggaarak nogo obeelom logogun lek o.

²⁶Ndi, it Ibilit abu'me menggaarak inom wim nggagambunuk ogoorak wonage kenok ti inom lambunik logorak lek o. Ogoorak aret logogun o,” yoragagerak.

²⁷Yorage nagagirik, ”Aap anini warak ambi awo keele maaka'lek kagak, ame unggunuk amendek ndinggo'nok wundi noorak ti meek o. Keele aa'nduk maappunuk perak, amendek ndinggola ungguurak op o,” yoragagerak.

²⁸Yorage nagagirik, ”Aakumi yi maluk ndi maluk eekwi inom, miyuk-meya eerogo piigwi inom, inomaluk ti at Ala nen mbo punuk lek eerogo piyoorak kwe,

²⁹kit Aberiniki miyuk-meya eerogo pugwi kiinok perak, at Ala nen lek eerogo pinagarak abu lek o. Ti maluk kinoba lenggenak mondok aret logogin o, yinuk, an wone abet aret yokkirage agagirik o,” yinuk, yoragagerak.

³⁰(Ti yoragagerak nogo ti, it nen, ”Kugi inikime unggwigerak o,” yereegwaarak kenok, togop aret yoragagerak.)

³¹Togop yorage wonage me, at agalo inom, awurilogwe inom, wogo nogogwaarik, endekem taati mi'ndak logonet, ”Yetut wundi woraawak nduk yo'nip o,” yorogogwaarak.

³²Yorogo mbareegwa, it aakumi ambik at owagam kuwak aago kwi'ndak wonogwe nogo nen, ”Yetut wae. Kagalo inom, kawurilogwe inom endekem logonet, Omok o, yokkugwi yi pegiyet o.”

³³Yinuk, yogo mbareegwa, at Yetut nogo nen, ”An nagalo, nawurilogwe ti taani mbakop?” yorage nagagirik,

³⁴at owagam kwi'ndak wonogwe nogo enegen yombooninake logonet, ”Lek o. An nagalo inom, nawurilogwe inom, it yi aret o.

³⁵At Ala iniki mbake nogo ndak-ndak eeko menggaarak kenok, ti, an nagalo, nawurilogwe nogo ti it aret o,” yoragagerak.