Read Wano MARAKUT 4 Bible Online

MARAKUT 4 - Wano bible

MARAKUT 4

¹Peebi ambinom niyo Nggalileya yenggenak aa'nggi paga wone mamuniragagerak. Wone mamunirage wonage me, yi aakumi ndi aakumi ambik aago aret at owagam kuwak ogogwaarak me, it aakumi nogo niyo yenggenak aa'nggi paga wonogwe iigak, at Yetut nogo niyo yenggenak ogombaga niyooro paga kwi'nari unggwage nagagirik logonet,

²yi wone ndi wone apit aret wone eegu laarogo negen mamuniragagerak. Wone mamunirage logonet,

³”Kinaruk logonip,” yorage nagagirik, ”Aap awi yumbungge menggerak nen awi yumbunikit nduk aret nagagerak.

⁴Yumbunit nage kagak, ando tu paga wambit nagagerak. Tu paga wambit nagagerak nogo ti, towe wogo logonet, nenet nogogwaarak.

⁵Ando yugum eeri paga nggween ameneno mbuuluk mban wonage me wambit nagagerak. Yugum eeri paga wambit nagagerak nogo ti, mbilaneegerak mendek, nggween ameneno mbuuluk me,

⁶omanggen yaka'lek kagak, mo nen teebat age nagagirik, mbuk agagerak.

⁷Ndi, ando iri'ngga alokwi enggela'me wambit nagagerak. Iri'ngga alokwi enggela'me wambit nagagerak nogo ti, mbilaneegerak kwe, alok nogo lagangge logonet, mbanogo wurabeegerak me, anggen yega'lek aret wonagagerak.

⁸Ando nggween mili paga wambit nagagerak. Nggween mili paga wambit nagagerak nogo mbilangge nagagirik, kwit agan lagangge nagagirik, ti'nuk, anggen aret yi'nage logonet, ero ando nen 30 yege, ero ando nen 60 yege, ero ando nen 100 yege, eerit nagagerak o,” yinuk, yoragagerak.

⁹Yorage nagagirik, ”Wologwe! Kinaruk koneniyak kenok ti, liirogon aret konenggo logonip o,” yoragagerak.

¹⁰Yorage nagagirik, alik wonage me, at inom wonogwe nogo inom, it aap 12 inom, it nogo nen Yetut kin wakkogo logonet, ”Kat wone laarogo negen yo'niragandak nogo, liirogon yo'niret o,” yinuk,

¹¹yogo mbareegwa, at Yetut nogo nen, ”Ala abu'me pinagarak wone inikime lubuk wonagagerak nogo, Ala nen kilikkiroorak mbareegerak kwe, it weelek perak, yi wone ndi wone laarogo mban yorage agarik o.

¹²Iniki koombunuk, it yi maluk ndi maluk eekwi nogo at Ala mbo punuk, lek eerogo piige kero, inigen kogwe kwe, yelok kogwe, inaruk konenggwi kwe, inikime nen waganggwi, eeko logokwak nduk, an nen wone eegu laarogo mban yorage agarik o,” yoragagerak.

¹³Yorage nagagirik, ”Wone eegu laarogo yokkiragarak yi, wagangga'lek logonet yogo ogotik? Wagangga'lek kiinok, peebi wone eegu laarogo yokkirage neenok, nonggop togon waamunggup mbakop?”

¹⁴yorage nagagirik, ”At aap awi yumbungge menggerak nogo nen awi yumbunit nagagerak nogo kwak ti, wone obeelom wone yoranet nugwi ti aret o.

¹⁵Ndi, awi tu paga wambit nagagerak nogo ti, it aakumi obeelom wone waganggwi kwe, at Ibilit wage nagaatik, wone inikime waganggaatak ndininuk nage menggerak nogo aret o.

¹⁶Yugum eeri paga wambit nagagerak nogo kwak ti, it aakumi obeelom wone nogo konenggo logonet, iniki ale'nggen paga waganggo nagaatak kwe,

¹⁷peebi nen inikime omanggen yaka'lek me, ne ambit logonuk, wone waganggwi nogo paga inoba aaninggin-paaninggin eerogo piigwi, piyak-payak eeginakwi, eekwi iinok, Wone yi, nineebi o, yinuk, mbo pogo menggaarak nogo aret o.

¹⁸Ndi, iri'ngga alokwi enggela'me wambit nagagerak nogo ti, it wone inaruk konenggwi kwe,

¹⁹nggween paga mendek mban iniki aberit nugwi, inamendek lek ariyak kagak inikilom mbarit nugwi, yi mendek ndi mendek iniki uugwe mbarit nugwi, ti eerit nugwi paga nen, Ala wone waganeegwaarak nogo mbanogo wuppugwi me, ti, anggen yega'lek nogo pogom aret menggaarak o.

²⁰Ndi, nggween mili paga wambit nagagerak nogo ti, it wone konembunuk waganggaatak me, anggen yi'nage logonet, ando anggen 30 yege, ando anggen 60 yege, ando anggen 100 yege, eeke menggerak nogo aret o,” yoragagerak.

²¹Yorage nagagirik, it nogo yorage logonet, ”Ndi wuninogo togolowak abu'me kiraappugwi, nogo yogo menggam abu'me mambugwi, eeriyak mbakop? Lek o. Tena'me tiyarogon wuninogo pogo menggaarak nogo lek a?

²²Yi mendek ndi mendek kumaarak wonage ti, tena'me age, ndi, yi wone ndi wone inikime tebenak wonage ti, pagak ari, eerigin o.

²³Kinaruk koneniyak kenok ti, liirogon aret konenggo logonip o.”

²⁴Yorage nagagirik, ”Kit kinaruk konenggwi nogo, kiniki liippogo logonip o. Wakkagak nogo paga wakkenok, aakumi wogorogo monggotak nogo ndak-ndak wakkenok wokkirage kaamunggup o. Ti'nuk, ambinom oba luunogo wokkirage kaamunggup o.

²⁵Kit kinamendek wonage kenok ti, ambinom oba luunogo wokkirage, ndi, kinamendek lek kenok ti, mbuuluk wonage nogo aret ndinogo kolage, eeke kaamunggup o,” yoragagerak.

²⁶Yorage nagagirik, ”Ala abu'me piyoorak nogo ti, aap ambi awi yumbunit nagagerak nogo kwak aret o.

²⁷Aap nogo o kiip age kenok nogo yege, o wege kenok yi eekak ndi eekak eeke, eerit nage kagak, engga mbilangge nagaatik, ero nggwok age menggerak. Ero nogo, nonggop togon agago nggwok age menggerak at eenggo'lek aret o.

²⁸Nggween paga yumbunik me, aburen aret wungge menggerak o. Wungge logonet, engga mbere agago ero lagangge nagaatik, anggen yege menggerak.

²⁹Ndi, anggen yugu nogo, kole agaatak mbaniyak eyom age kenok perak, aap nen paloowi paga mbanit nage menggerak nogo kwak ti, at Ala abu'me piyoorak wone ti aret o,” yoragagerak.

³⁰Yorage nagagirik, ”At Ala abu'me piyoorak nogo ti, nano paga wakka o? At abu'me piyoorak nogo ti, wone ngge paga laarogo yokkira o?”

³¹yorage nagagirik, ”Lek o. Ala abu'me piyoorak nogo ti, kulok anggen kwak aret o. Yi awi ndi awi anggen ti nggwok negen, ndi, kulok anggen ti abu mbuuluk aret kwe, awi yakwi kenok,

³²yi mendek ndi mendek lagangge ti, mbuuluk negen lagangge menggerak kwe, kulok anggen perak, mbuuluk aret kwe, lagangge logonet, ero nggwok aret kwit agan lagangge nagaatik, eno'mbak wiganggetak me, yi towe ndi towe ngguuna'me time aret inawi wuri unggwogo mengga kwak, Ala abu'me piyoorak nogo ti ndak-ndak aret o,” yoragagerak.

³³It aakumi nogo yi wone ndi wone yorage nogo liippunuk waganggwi iinok, Ala wone eegu laarogo negen yorage nagagerak.

³⁴Wone eebe liirogon ambi yorage logolik o. Ata, eegu laarogo negen mban yorage nagagerak kwe, it at oone waganggwi at inom inalik logonet perak, yi wone ndi wone yoragagerak nogo kenom aret paganogo yorage nagagerak.

³⁵Yorage nagagirik, o kiip age kagak, at Yetut nen at oone waganggwi nogo yorage logonet, ”Yi ene pagan wunda nawok o,”

³⁶yorage nagagirik, aakumi ambik aago nogo teppiinok, it at oone waganggwi nogo mban Yetut yiiro paga wonage me ka unggwogo nogogwaarik, at inom aret wunda nogogwaarak. To ando inom aret wunda nogogwaarak.

³⁷Wunda nogwe me, o wiya koba'le nabuninuk wage logonet, yi muninuk, yiiro nogo punggagak eeke logonet, yiiro enoona nogome niyo abu yenggeni ungguurak eeke kagak,

³⁸at Yetut nogo to akom me time yum anep mbanogo punuk nogo yege me, it nogo nen eenik eeppogo nogogwaarik, ”Ninogoba Ngguru wae. Nit niyo abu ndonggon-ninaburak eeke kagak, kat nonggop nduk, ninabuwa mbaka'lek nogo yege agandik o?”

³⁹Yogo mbareegwa, eenik age nagagirik, wiya nogo, ”Mage o,” yoge nagagirik, niyo nogo, ”Kabolok lek puk aru o,” yoge mbareegi, wiya nogo inom, niyo nogo inom abolok lek puk aret agagerak.

⁴⁰Lek age mbareegi, ”Kit nonggop nduk kinagabiti yogo ogotik? Kit kiniki an noba panggombunuk abet nombaka'lek me yogo ogotik?”

⁴¹Yorage mbareegi, it nogo inagabiti ogo nogogwaarik, ambi nen ambi yagak eeko logonet, ”Iya! Aap yi, niyo inom, wiya inom, at oone konengge yi, ta mbakop?” yinuk, pi wareegwaarak.