Read Wano MARAKUT 7 Bible Online

MARAKUT 7 - Wano bible

MARAKUT 7

¹It Yerutalem nen wogogwaarak aap Pariti mendek inom, it Ala wone liiru mbanak unde ando inom, Yetut owagam kuwak ogogwaarik,

²at Yetut oone waganggwi nogo ineenggi niyo kooka'lek we ugun aret mbi nunggwi inigen iyareegwaarak.

³(It Pariti mendek nogo inom, it Yakuri mendek nogo inom, it abok aret inombomini nen eeko nogogwaarak mamunik eeko logonet, ineenggi kooka'lek mbi nunggwi, mbi kunggo menggam nogome nen wogo nagaatik, inabin kooka'lek logonet, mbi nunggwi, eeko logolik o. It inombomini eeko nogogwaarak mamunik me eeko logonet, yiiwak mbuulogwe inom, yo'nggok inom, mbutiiwak inom, kooko menggaarak.)

⁵Togop eeko menggaarak me, it Pariti mendek nogo inom, it Ala wone liiru mbanak unde nogo inom, Yetut yogo logonet, ”Kat koone waganggwi yi, ninombomini eeko nogogwaarak wone mamunik nogo eeka'lek logonet, nonggop nduk ineenggi kooka'lek ugun aret mbi nonggo agaarik o?”

⁶Yogo mbareegwa, at Yetut nen yorage logonet, ”Kit aakumi yi, kinambe paga an wogoppanugwi kwe, kiniki perak, ninom ogoorak aret wonogwe o.

⁷Kit mamunirogo monggotak ti, aakumi inoone yugu kagak, mamunirogo monggotak me, aanom warogo alut ee'nako ogotik o, yinuk, Ala yereegerak nogo, at Yetaya nen kit kiniki laakot logonet eekwi kiinok, abet aret liiru mbaneegerak o.

⁸At Ala wone lengganak nogo tebenogo punuk, kit kinombomini eeko nogogwaarak mamunik me eeko monggotak kiigi o,” yinuk, yoragagerak.

⁹Yorage nagagirik, ”Kit kinombomini eeko nogogwaarak mamunik me eeko logorak mba'nuk, at Ala nen yereegerak wone mbo pugwi yi, kit obeelom aret kiigi o.

¹⁰At Muta nen. Kinagalo-kinogoba inoone liirogon konenggo logonet, inayuk wuko logonip o. Ndi, kinagalo-kinogoba inoone taganggwi kiinok ti, kambumunggup aret o, yinuk, yereegerak kwe,

¹¹kit nogo kinagalo-kinogoba yorogo logonet, Namendek wokkiriyak mbakirak kwe, Koraban o, yinuk, yagarak o. Ti, Ala ake wogogirak o, yinuk, yogwe kiinok,

¹²kinagalo-kinogoba inake agago piyoorak lek nduk, Koraban o, yinuk, yogwe kiigi o.

¹³Kinombomini nen eeko nogogwaarak mamunik me aakumi yorogo monggotak nogo eerit nogwe paga, Ala wone ti taganogo mbo pugwi kiigi. Ti eeko menggaarak kwak, kit togop ambik aret eerit nogo monggotak kiigi o,” yoragagerak.

¹⁴Yorage nagagirik, it aakumi ambik wiiragagerak nogo, abok wogo mbareegwa, yorage logonet, ”Kit abok aret an noone kinaruk liirogon konembunuk, waganggo logonip o,”

¹⁵yorage nagagirik, ”Nonggo monggotak ti paga maluk eekkinakeelik o. Ata, wone kinikime nen wunggetak paga mban maluk eekkinake menggerak o.

¹⁶Kinaruk wonage kenok, liirogon aret konenggo logonip o,” yinuk, yoragagerak.

¹⁷Yorage nagagirik, aakumi nogo teppiinok, oome unggwage mbareegi, at oone waganggwi nogo nen, ”Kat eegu laarogo negen yo'niragandak nogo ti, liirogon yo'niret o,”

¹⁸yogo mbareegwa, at nogo nen, ”Kit kunduk kiniki liippega'lek logonet, yogo ogotik? Yi mendek ndi mendek nonggo monggotak nogo kinikime unggwageelik o. We, kinaanogum me wangge nagaatik, mbo pi nogo monggotak me, yi mendek ndi mendek nonggo monggotak paga maluk eekkinakeelik yi kogo ogotik?” yoragagerak. (Wone ti yoragagerak nogo, nonggo menggaarak mendek abok aret mage lek nduk yoragagerak.)

²⁰Yorage nagagirik, ti'nuk, ambi yorage logonet, ”Kinikime nen wunggetak paga maluk aret eekkinake menggerak.

²¹Kinikime nen maluk eeriyak koonggwi, komologwe tawe ugun yogot wuginakwi, yogot waganggwi, aap wakwi,

²²mbabi eekwi, aap inamendek uugwe-ugwe agan nugwi, maluk mban eekwi, inambokan laganggwi, iniki kumi paga mban luunik logonet kumili negen ugun-ugun eerit nugwi, kiniki aagi wungge, inabok mbanggwi, wogoppatit nugwi, kiniki mbanak negen eerit nugwi,

²³ti, eerit nugu monggotak ti abok aret kinikime nen aret wunggetak paga mban maluk eekkinake menggerak o,” yoragagerak.

²⁴Yoraanok, o time mbo punuk, o Tirut unggwi wagagerak. Unggwi wage nagagirik, o ambi wurik me unggwagagerak nogome logonet, ”Aakumi neegwi iyo, kumaarak logokit,” mbareegerak kwe, meek agagerak.

²⁵Meek age mbareegi, kwe ambi eebe Yunani mendek kwe, nda nagagim awi alom o Penitiya Tiro mendek me, aagaluk kolaga nogo kugi maluk mendek inikime unggwagagerak nogo Yetut wage aruk konembunuk, at owagam nagagerak. Nage nagagirik, abu'me tebe yinuk, abuwa warak nggo-nggo logonet, ”Ai, nogoba,” yinuk, ”An naagaluk kugi inikime unggwagagerak me, nggiginogo nappenok nduk yokkigi o,” yoreegerak.

²⁷Yoge mbareegi, at Yetut nen, ”It elege-aabologwe inambi ndonggorogon nawak o. Nengga'lek iigak, inake aago ndinogo nggeewo wogoriyak ti mage o.”

²⁸Yoge mbareegi, at kwe nogo nen, ”Aret kwe, nogoba. Elegeaabologwe inambi nunggwi iigak, anggen yumbu-yumbu eyo ndoonak mbi nonggo menggam abu'me wanggetak ti, nggeewo aret nonggo menggaarak o,” yoreegerak.

²⁹Yoge mbareegi, at nen, ”Kat wone obeelom togop aret yagandak ti paga kugi kaagaluk inikime unggwagagerak nogo muk nggigik togon wunggerak me, kame nak o.”

³⁰Yoge mbareegi, ame nage nagagirik, aagaluk nogo kugi inikime wungge nagaarik, obeelom agaarak windak minggim windak wonage me ka nagagerak.

³¹Ti eeppege nagagirik, at Yetut nogo nen o Turut teppunuk, o Ndekapolit tu paga nen o Tiron unggwagak niyo Nggalileya aa'nggi paga ari nagagerak.

³²Ari nagagerak me, it aakumi time nogo nen aap aruk logu oone lek me wonok, at Yetut owagam pi nogo nogogwaarik, Yetut nen eenggi oba pigaawak nduk, inabuwa warak nggonggo logonet, yoreegwaarak.

³³Yogo mbareegwa, it aakumi ambik aago nogo teppiinok, at aruk logu nogo, ”Omok o,” yo'nuk, imbirak inalik nogo nogogwaarik, aruk me eenggi mambege logonet, awoori waganogo amili paga nabembege,

³⁴eeppege nagagirik, ena mbogut paga ni'nage logonet, ”Ai!” mbake nagagirik, ”Epata o,” yoreegerak. (Ti yoreegerak ti, nit ninoone paga, ”Karuk paa'naru o,” yoreegerak.)

³⁵Yoge mbareegi, aruk paa'nage, oone lek nogo oone warak age, age nagagirik, oone abe aret yereegerak.

³⁶Oone abe ari mbareegi, at Yetut nen aakumi time wonogwe nogo inaruk wake logonet, ”Aakumi abu yoraagup o,” yoragaatak kwe, kagak, oone tagambunuk, yoranet negak mban eeko nogogwaarak.

³⁷Yoranet nugwi nogo inaruk konenggo nogogwaarik, yogo logonet, ”Inaruk logu nogo inaruk paarogo piige, inoone lek nogo inoone warak agago piige, eeginabit nege logonet, yi eekak ndi eekak obeelom mban eerit nege yi, wi!” yinuk, inagabiti ogo nagaatik, pi wako nogogwaarak.