Read Wano MARAKUT 8 Bible Online

MARAKUT 8 - Wano bible

MARAKUT 8

¹Ti eerit nage nagagirik nogome wonage me, aakumi ambik at owagam kuwak ari wogogwaarak. Kuwak ari wogogwaarak nogo, inambi noorak lek aret me, at oone waganggwi nogo wiiragagerak wogo mbareegwa, yorage logonet,

²”Wologo wae! It aakumi ambik yi, ninom nogo 3 yogo logonet, inambi abu lek agaarak me, inabuwa o.

³It ando inawi ndaanda nen wagaarak me, iname nappiige neenok, nogo logonet, mbi abu nen inambuluk pigin mbaki o.”

⁴Yorage mbareegi, at oone waganggwi nogo nen, ”O karume yime aakumi inawi wurik lek me, it aakumi ambik yi mbi ngga mendek wogoramonggoorak ndak nagun mbaken?”

⁵Yogo mbareegwa, at Yetut nen, ”Kit roti mbi larak mande porogo ogotik o?” Yorage mbareegi, ”Lek o. We 7 aret porogo ogoorik o,” yoreegwaarak.

⁶Yogo mbareegwa, at Yetut nogo nen aakumi ambik kuwak aago nogo kwi'naruwak nduk yorage nagagirik, roti mbi 7 nogo eenggim wappunuk, ”Ala wa!” yinuk, karerogo aakumi tumburiraawak nduk, at oone waganggwi nogo wogorage mbareegi, tumburirogogwaarak.

⁷Tumburirogo mbareegwa, ikan mbuulogwe mbereeluk aret wonage me, ”Ala wa!” yinuk, tamban eeke nagagirik, ”Ikan yi inom tumburiraanip o,” yinuk, wogoragagerak.

⁸Wogorage mbareegi, nonggo nogogwaarik, ndonggoppiyareegerak. Ndonggoppiige mbareegi, mbi karerak ando ndiinogo pereegwaarak nogo, yum 7 eno korok togon yonggologo pereegwaarak.

⁹It nunggugwaarak nogo, aakumi ineebe ambik 4000 negen aret nunggugwaarak me, iname nappiinok,

¹⁰at Yetut at oone waganggwi nogo inom yiiro paga unggwogo nogogwaarik, o Ndalamanuta aret wunda nogogwaarak.

¹¹O Ndalamanuta wunda nogo mbareegwa, it Pariti mendek nen at owagam wogo nogogwaarik, inom wone wako logonet, ”Nineenu ariyak mbogut paga mendek ambi eeke keyaawi o,” yinuk, at eeke abut mbanuwok nduk yoreegwaarak.

¹²Yogo mbareegwa, at Yetut nen, ”Ai!” yinuk, yorage logonet, ”Kit aakumi yogondak wonogwe yi, nonggop nduk, nineenu ariyak mendek ambi eeke keyaawi mban yo'nogo ogotik? Kineenu ariyak mendek ambi eeke neyaamunggup mondok lek o, yinuk, abet aret yokkirage agarik o,” yinuk, yoragagerak.

¹³Yorage nagagirik, it nogo teppiinok, yiiro paga unggwage nagagirik, wunda nawok nduk,

¹⁴inom yiiro paga wage logonet, roti mbi larak nogo inami a'nuk, we ambit aret wonok wogwe me.

¹⁵Yetut nen, ”It aap Pariti mendek inom, at Keroret inom, inoone ti, roti mbi piike menggerak nogo kokwak aret me, waganggwi kiyo, kiniki tum wako logonip o,” yinuk, inaruk wareegerak.

¹⁶Inaruk wake logonet yoragagerak nogo, it-it wone mbanggo logonet, ”Roti mbi larak lek kenok, yo'nirage kogo o,”

¹⁷yogwe at Yetut yelok iige nagagirik, ”Kit nonggop nduk, roti mbi lek wone yogo ogotik? Kit awo liippega'lek kobak logonet, yogo ogotik? An yokkiragarak nogo kiniki apit logonet, yogo ogotik?

¹⁸Kit kinigen wonage kwe, kaga'lek negen logonet, yogo ogotik? Kinaruk wonage kwe, konengga'lek logonet, yogo ogotik?

¹⁹Roti mbi 5 paga it yi aap ndi aap ambik 5000 aret kareriragagirak nogo kiniki abeka'lek logonet, yogo ogotik? Mbi karerak ndiinogo pegaarak nogo kuwak agago yum mande eno korok togon yonggokotak?” Yorage mbareegi, it nogo, ”Lek o. Yum 12 aret yonggokoorak o.”

²⁰Yogo mbareegwa, ”Ti'nuk, it yi aap ndi aap 4000 aret mbi roti nawak nduk karerogo wokkirage mbaki, karerak ndiinogo pegaarak nogo mbirim yum mande eno korok togon yonggokotak o?” Yorage mbareegi, it nogo nen, ”Yum 7 aret yonggokoorak o.”

²¹Yogo mbareegwa, at nen, ”Yogondak kunduk kit awo liippega'lek logonet yogo ogotik?” yoragagerak.

²²Yorage nagagirik, ti'nuk, o Mbetayira wogogwaarak. Wogo mbareegwa, it aakumi time nen aap enegen mbuk me at owagam wonok wogo nogogwaarik, Yetut nen at oba eenggi pigaawak nduk, inabuwa warak nggo-nggo logonet, Yetut yoreegwaarak.

²³Yogo mbareegwa, at Yetut nogo nen oore'nggam time nen eenggi piganok, wonok endekem wundi nagagerak. Nage nagagirik, woori enegen me lenggembege, eebe eenggi pigagangge, eeppege nagagirik, ”Yogondak yi mendek ndi mendek muk kagan a?”

²⁴Yinuk, yoge mbareegi, at enegen pagak yikit nduk eeke kagak, ”Aakumi negen iige kwe, eyo negen nugwi iigi o.”

²⁵Ari mbareegi, ti'nuk, at eenggi enegen me nobake mbareegi, aap nogo enegen looge logonet, abe aret pagak ari nagagirik, yi mendek ndi mendek abok aret tena'me enegen kagagerak.

²⁶Enegen obeelom eeppege nagagirik, ”Oore'nggam time unggugun o,” yinuk, ame nappereegerak.

²⁷Nappege nagagirik, Yetut at oone waganggwi inom o time nen o Kayitareya Pilipi o tini lombok time aret nugu nogogwaarak. Tu paga wogo logonet, at nen, ”It aakumi an ta nomba'nuk, yogo agaarik o?”

²⁸Yinuk, at oone waganggwi nogo yorage mbareegi, it nogo nen, ”It ando nen, kat Yaya Yiime Wuppiige Menggerak nogo aret yogwe, ndi, it ando nen, Kat Eliyat aret yogwe, ndi, ando nen, Aap ambi Ala wone yorogo menggaarak nabi nogo mendek aret yogwe, eeko agaarik o.”

²⁹Yogo mbareegwa, at nen, ”Kit perak, an ta nomba'nuk, yogo monggotak?” Yorage mbareegi, at Peterut nen, ”Lek o. Ala nen leenogo mippagareegerak Mesias kat aret o,” yoreegerak.

³⁰Yoge mbareegi, ”An nabok ti, aakumi ambi paganogo yoraagup o,” yinuk, inaruk wareegerak.

³¹Inaruk wappege nagagirik, wone yorage logonet, ”An aap aret nda'nagagirak nogo, mondok noba aaninggin-paaninggin agago panugun o. It aap inanggok inom, it Ala unde inoweewi inom, it Ala wone liiru mbanak unde inom ineebi nen nooko mbarumengga, nogo mbere yippunuk, neenik arigin o,” yinuk,

³²wone paganogo yoragagerak. Paganogo yorage mbareegi, at Peterut nen Yetut nomorogon wonok nage nagagirik, ”Togop yugun o,” yinuk, aruk warikit nduk eeke kagak,

³³at Yetut nen at oone waganggwi nogo ena logurogon pegiige nagagirik, Peterut mberege logonet, ”Kat Ibilit yi, Ala iniki mbake nogo eeka'lek aakumi iniki mbakwi mendek eeke menggendak me, mondok nak o,” yinuk, mberereegerak.

³⁴Mberege mbareegi, it aakumi kuwak aago inom, at oone waganggwi nogo inom, wiiragagerak wogo mbareegwa, yorage logonet, ”An ninom nugu logorak mbakwi kenok, kit yi mendek ndi mendek eeriyak mbakwi nogo mbo punuk, eyo karo-karo paga nabembinagarak nogo, ko'nok an ninom aret nugu logowok o.

³⁵Kineebe kinili yikkolamonggotak kenok, kineebe kobak aret arumunggup o. Ndi, an nendage inom, obeelom wone inom nggwok aruwak nduk, kineebe wondet agago patumonggotak kenok perak, kineebe kinili aago aret logomunggup o.

³⁶Kit yi awi ndi awi abok aret unde eekkologo logomonggotik, kineebe kobak arumonggotak kenok, ti paga nano eekkoloorak nduk agan nugu logomunggup mbakop?

³⁷Kineebe kobak arumonggotak kenok, obaane'me nano patiyak o?

³⁸It aakumi abok yi, Ala mbo punuk, maluk mban eerit nugu menggaarak kinom aret logonet, aakumi kinagabiti nen an noone mbo punuk, naane'le mbangga'lek logomonggotak kenok, an aap aret nda'nagagirak yi, peebi an nogoba amendik-amendek li'luk ee'nuk, it mbogut paga Ala yonggo nappiige menggerak melaikat ninom wogo logomonggoorik, an kunduk aakumi nagabiti nen kinaane'le mbanigin lek o,” yinuk, yoragagerak.