Read Wano LUKAT 1 Bible Online

LUKAT 1 - Wano bible

LUKAT 1

¹Nogoba Teyopilut wae. It aap apit nen yi wone ndi wone nit ninenggela'me eerit nagagerak nogo mbininogo liiru mbanuwok nduk eereegwaarak.

²Eereegwaarak me, it obeelom wone yoranet nugu nogogwaarak nogo nen iyaalok nen eerit wage inigen kogo nogogwaarik, mbininogo nit yo'nirogogwaarak nogo ndak-ndak,

³an kunduk, iyaalok nen eerit wage abok aret nenegen mondok liippit wagarak me, kat yi wone ndi wone mamunggereegwaarak nogo, ”Yi abet aret,” mba'nok nduk, mbininogo liiru mbanggiriyak ee'nake kenok, mbanggege agarik o.

⁴

⁵Aap Keroret o Yureya endagembogut wonage kagak, aap Ala unde ambi endage Takariya anebunu Abiya mendek wonagagerak. Ndi, at akwe ti, Karun ombowologwe wiganak mendek endage Elitabet aret wonagagerak.

⁶It imbirak ninogoba endagembogut nen, ”Yogop ee'nu, ndogop ee'nu,” yegetak wone inom, lengganinaketak wone inom, alik eerulik mondok ndak-ndak aret eerit nugu nogogwaarak me, Ala nen iniki mondok koonak aret iige nagagerak.

⁷Iniki koonak aret wonagagerak kwe, kwe Elitabet nogo, wubili aret wonagagerak me, elege abu ndaka'lek kagak imbirak abu kweegelo-aakelo aret ogogwaarak.

⁸It aap Ala unde nen, ”Ala awi wurik me iri'ngga obari abe mendek nogo ta nen kani kuni ungguurak kaamun?” yinuk, yugum ogut wakkogo nogogwaarak me, ne ambi paga it aap Takariya anebunu mendek Ala unde eeko nogogwaarak nogo nen eeko logonet, aap Takariya nogo nen Ala enggaanom paga eeke kagak, yugum ogut wakkogo nogogwaarik, at Takariya aret wagangge mbareegi, at aret mippereegwaarak.

⁹

¹⁰Mippogo mbareegwa, aap Takariya nogo nen iri'ngga obari abe mendek kani kunikit nduk, unggwage nagagirik, kungge kagak, it aakumi apit kuwak aago nogo endekem logonet, tamban eereegwaarak.

¹¹Tamban eekwi iigak, iri'ngga nogo kani kungge me, it mbogut paga Ala yonggo nappiya wage menggerak melaikat mendek ambi iri'ngga obari abe mendek kungge minggim abe'ngganggwe tena'me taati mi'ndak mban wonage kagagerak.

¹²Kage nagagirik, ogut na'nuk, agabiti ambik eeke mbareegi,

¹³at melaikat nogo nen, ”Takariya wae. Kagabiti mbarugun o. Kat tamban eeke nagagindak nogo Ala muk aruk koneneegerak me, kakwe Elitabet nogo kapuluk ndakkirigin o. Ndakkege kenok, at endage Yaya aret toonenu o.

¹⁴Kat kiniki ale'nggen kage logonet, keyage ambik wake logomunggun o. Ndi, at nda'naremenggerak paga aakumi apit aret iniki ale'nggen ombako logogun o.

¹⁵At ninogoba endagembogut nen at aap nggwok aret kaagin o. Ndi, anggur amburu inom, amburu omaawi kumili aganake mendek inom, at nengge logogin mondok lek aret o. At awo agalo inikime nen mondok Aberiniki at inikime aret nda'narigin o.

¹⁶At nen aakumi Iterali mendek apit yungguninuk inogoba endagembogut Ala owagam ka woraawak nduk, eeppiige logogin o.

¹⁷Aberiniki aap Eliya oba age nagagirik, omaawi paga eerit nege nagagerak nogo, at Yaya oba a'nuk, inapuri-inogobamini inom lambuninake, it aakumi inogogumbuk menggaarak nogo, obeelom menggaarak iniki ndak-ndak logowak nduk, eeppiige, ndi, ninowe endagembogut awuri logowak nduk, ake pipuk eerogo piige, at nen aa'nduk eeppiinet nege logogin o,” yinuk, yoreegerak.

¹⁸Ti yoge mbareegi, at Takariya nogo nen, ”An aap abu aakelo agarak o. Ndi, nakwe kunduk togop mban me, yo'negendak nogo abet aret eeriyak nano eeke page neenu arigin o?”

¹⁹Yoge mbareegi, melaikat nogo nen, ”Ala ake eeke minggirak Nggabiriyen nogo an aret me, wone obeelom wone yi, wonok, Yori nak o, yo'nege mbaki, yokkiri wagi o.

²⁰An nen wone yokkigirak nogo eebe eeriyak eyom paga ndak-ndak eeriyak aret kwe, kat abet mbarulik me, eebe eeriyak eyom a'me lik yi waga'lek kagak, yogondak aret koone mondok lek age logominggirik, wone mbaniyak meek aret kaamunggun o,” yinuk, yoreegerak.

²¹Ti yogwe iigak, aakumi endekem Takariya tokkogwe nogo nen yogo logonet, ”Ala awi wurik me nen wundi waga'lek mban yi, nonggop aga. Iya!” yinuk,

²²yogwe me, Takariya wundi wage mbareegi, oone yoroorak meek aret kogo nogogwaarik, ”Ala awi wurik me logonet, abinggaanggo kage nagaarik, oone lek eekerak ilik?” mbakwi iigak, at nogo oone lek we eenggi paga mban yelok-walok ari nagagerak.

²³At Takariya nogo yabu togop eeruwak nduk, mippereegwaarak nogo abu eeppege nagagirik, ame aret nagagerak.

²⁴Ame nage nagagirik, wonage me, ti'nuk, peebi akwe Elitabet nogo aret abila agagerak. Abila age nagagirik, ”Nogoba endagembogut nen nabuwa mbake logonet, nenggali mbakak nege nagarak nogo lek eeruwak nduk, yogondak ee'nakerak o,” yinuk, kumaarak kagak, tut 5 aret peneneegerak.

²⁵

²⁶Kwe Elitabet nogo abila agagerak kagak, tut 6 penengge mbareegi, at Ala nen mbogut paga yonggo nage menggerak melaikat Nggabiriyen nogo o Nggalileya tini ambi endage Nataret time nappi wagagerak.

²⁷Kwe tawe ambi aap agap mondok mbangga'lek endage Mariya Ndawut ombooluk endage Yutup miireegerak nogo wonage me, nappi wagagerak.

²⁸Nappi wagagerak nogo kolaga owagam wage nagagirik, ”Niri Mariya wa! Nogoba endagembogut kimbirak logonet, ale'nggen nggwok koba pagagerak me, wa!”

²⁹Yoreegerak nogo, kwe Mariya nogo iniki aaninggin a'nuk, koongge logonet, ”Nonggop nduk togop yo'nigi?”

³⁰Mbake mbareegi, at melaikat nogo nen, ”Mariya wae. Kagabiti mbarugun o. Ala kabuwa mbake logonet, ale'nggen koba pagarak koonggerak me,

³¹wone yi liirogon karuk konengge logot o. Kabila aret age logominggindik, aap aret ndarumunggun o Ndappunuk, at endage Yetut aret toonenu o.

³²At aap nggwok aret logogin o. Aakumi nen, Ala tiyanak lombok menggerak aput yi aret o, yogo logogun. At ombo Ndawut endagembogut logonet, aakumi inarum wonagagerak nogo obaane'me ninogoba endagembogut Ala nen at aret mippigin o.

³³At Yakup ombowologwe wiganak inowe endagembogut inarum mondok-mondok aret logogin o. Ndi, at abu'me piige minggim nogo lek arigin lek mondok-mondok aret logogin o.”

³⁴Yoge mbareegi, at Mariya nen melaikat nogo yoge logonet, ”An aap awo nagap mbangga'lek me, yo'negendak nogo ti, nonggop agago ee'naburak o?”

³⁵Yoge mbareegi, melaikat nogo nen, ”Aberiniki koba wambi wage kagak at tiyanak lombok menggerak omaawi nobakkabi wage mbariminggi, kabila aret age logominggindik, at mondok abe Ala ake leenak ndaremenggendak nogo aakumi nen, Yi Ala aput aret o, yogo logogun o.

³⁶Ndi, koweeluk Elitabet nogo abu kweegelo kagak at kunduk abila agaarak o. Kwe wubili o, yogo nogogwaarak nogo kwe, abila agaarak kagak, tut muk 6 penenggerak me, yokkigi o.

³⁷Ala nen ambi eeriyak meek ti, mondok lek o,” yinuk, yoreegerak.

³⁸Yoge mbareegi, at Mariya nen, ”E o. Nogoba endagembogut ayeloman an aret me, yo'negendak nogo ti, mondok ndak-ndak aret ee'nabuwak o,” yoge mbareegi, melaikat nogo nen kolaga nogo teppunuk, nagagerak.

³⁹Nage mbareegi, ti'nuk, kwe Mariya nogo ame nen nage nagagirik, o Yureya nggelok-nggobok tini ambime puu'nuk nagagerak.

⁴⁰Nage nagagirik, aap Takariya ame unggunuk, akwe Elitabet nogo keyage wappereegerak.

⁴¹Elitabet nen kwe Mariya keyage wappege oone aruk konengge kagak, elege inikime nogo nen nugu'lik yereegerak. Nugu'lik ari mbareegi, Aberiniki nogo kwe Elitabet inikime unggwage mbareegi,

⁴²at oone nggwok paga ari logonet, ”It kumi ando wonogwe iigak kwe, Ala ale'nggen kat mban koba wonage o. Ndi, kaagaluk kinikime wonage nogo kunduk, ale'nggen oba wonage o.

⁴³An ta me nduk nogoba endagembogut agalo nen an neya wagandak o?

⁴⁴Keyage wappanege nogo koone naruk konengge neegak, elege ninikime nen ale'nggen mbake logonet, nugu'lik ari kagarak o.

⁴⁵Nogoba endagembogut yokkegerak nogo a'me lik yigin abet aret mbakendak me, ale'nggen ambik kaamunggun yokkigi o,” yinuk, yoreegerak.

⁴⁶Yoge mbareegi, at kwe Mariya nogo nen ari logonet, ”An niniki paga nogoba endagembogut tiyappege agarik o.

⁴⁷Nagap ndaka Ala nen ee'nakerak kenok, ale'nggen ambik mbake agarik o.

⁴⁸An at ayeloman tebenak wonage neegak, liippanggerak me, it aakumi abok aret yogondak kuli nen peebi mondok-mondok iniki ale'nggen nombako logogun o.

⁴⁹At abu omaawi lombok menggerak nogo nen iya tit ee'nabeegerak o. At endage mondok abe alik leenak aret menggerak.

⁵⁰It aakumi at inagabiti mbakwi iinok, muk ndarak ngget ndarak abok aret inabuwa nen obeelom eeppiinet wundi wage logogin o.

⁵¹At eenggi omaawi ambik eeke paga it aakumi iniki tiyappatiyak koonit nugwi nogo mappiige,

⁵²it aap nggwok inendagembogut inarum menggaarak nogo tebeppiige, ndi, it iniki tebenak menggaarak nogo tiyappiige,

⁵³it abu wonogwe nogo abe mendek kalo logonogo wogorage, it aap ineenggi warak nogo wogoraga'lek we nappiige, eeregerak o.

⁵⁴Ndi, wone maan ninombomini Abarakam at ombowologwe inom mondok-mondok inabuwa nen obeelom eeppiyoorak yoragagerak nogo, abeke logonet, at ayeloman Iterali yeenggwaara wagagerak o,” yinuk, yereegerak.

⁵⁵

⁵⁶Ari nagagirik, kwe Mariya nogo Elitabet imbirak wonage kagak, tut kenagan penengge mbareegi, ti'nuk, ame iyok paga lagi wagagerak.

⁵⁷Ti'nuk, kwe Elitabet aagaluk ndariyak enegen pagak ari nagagirik, aagaluk aap aret ndareegerak.

⁵⁸Ndake mbareegi, at inom menggaarak inom, at owe-awot inom, ninogoba endagembogut abuwa nen abu obeelom eeppegerak konenggo nogogwaarik, at inom iniki ale'nggen eeko nogogwaarak.

⁵⁹Eeko mbareegwa, nda'nagagerak kagak, nogo 7 yippunuk, wulaga nogo agabolo mbanuwak nduk, wonok nogogwaarak. Nogo nogogwaarik, endage ti, ogoba Takariya endage ndak-ndak toonuwok, mbareegwaarak kwe,

⁶⁰agalo nen, ”Lek o. At endage ti, Yaya aret o.”

⁶¹Yorage mbareegi, it nen, ”Kowe-kawot inendage togop ambi toonak lek me, endage Yaya ti, nano nduk tooniyak yagan?”

⁶²Yogo nogogwaarik, ineenggi paga yelok-walok ogoba yogo logonet, ”Endage ngge tooniyak mbakendak o?”

⁶³Yogo mbareegwa, Takariya nen batu tulis ambi ngginoorage nagagirik, wogogo mbareegwa, ”At endage Yaya aret o,” yinuk, liiru mbaneegerak. Mbangge mbareegi, aakumi apit nen, ”Wi!” yinuk, pi wareegwaarak.

⁶⁴Awo pi wakwi iigak, ogoba nogo oone paa'nage mbareegi, Ala alut eereegerak.

⁶⁵Ti eereegerak paga it inom menggaarak nogo inagabiti ambik aganabeegerak. Ndi, eerit wagagerak nogo abok aret it aakumi o Yureya nggelok-nggobok me mbininerenet nugu nogogwaarak.

⁶⁶Wone agan nugwi nogo inaruk konenggo nogogwaarik, liippunuk, ninogoba endagembogut eenggi ndoonak paga wonage kogo nogogwaarik, ”Wulaga yi, tawe age logominggirik, nonggop logomunggwi,” yinuk, yogo nogogwaarak.

⁶⁷At Yaya ogoba Takariya nogo Aberiniki inikime unggwage mbareegi, Ala nen yoge kagak, wone ari logonet,

⁶⁸”Nit aakumi Iterali ninogoba endagembogut Ala nogo nen niya wage nagagirik, wondet agago pinaneegerak me, alut eeko logowok o.

⁶⁹Ninagap nda'ninabuwak nduk, at ayeloman Ndawut ombowologwe wiganak omaawi warak mendek ambi mippereegerak o.

⁷⁰Ti eereegerak nogo maan aa'nduk Ala nen it aap at ake leenak Ala wone yorogo nogogwaarak nabi-nabi nogo yorage kagak, it nen aakumi yorogo logonet, It ninom wim mbanak ineenggi me nen ndinogo ninagap ndake,

⁷¹it aakumi abok ineebi lombok ninombakwi nogo ineenggi me nen piinogo pinanege, eerigin o, yogo nogogwaarak nogo ndak-ndak aret eereegerak o.

⁷²At nen ninombomini inabuwa nen obeelom eeppiyoorak, yoragagerak nogo aret eeppiige, ndi, wone mondok alik leenak at endage kumbatinuk, ninombo Abarakam yoreegerak nogo, a'me lik yuurak nduk, abeke, eerikit nduk, eereegerak o.

⁷³

⁷⁴Ti eereegerak nogo ti, it ninom wim mbanak ineenggi me nen ndinogo pinaninuk,

⁷⁵ninagabiti mbaka'lek nineenik logonet, at obaalombok mban eekwi, ndi, at enegen kagak, nit maluk eeka'lek at ake leenak niniki abu koonak wonogwe, eeko logowak nduk, eereegerak o.

⁷⁶Ndi, naput kat yi perak, ninowe endagembogut eerit nage logorak tu yarit nage logonok nduk, kaa'nduk nage logonet, aakumi inomaluk lek eerogo piige kenok, inagap ndariyak wone nogo ineenu aruwak nduk, yoranet namenggendak paga kendage, At Tiyanak Lombok Menggerak Oone Yorage Menggerak nogo yi aret o, yinuk, yokkogo logogun o.

⁷⁷

⁷⁸Ninogoba Ala nen mbo pinanege lek liirogon aret ninabuwa nen obeelom eeppinanege me, o kilim nagake minggi kwak, eya agi nen niya wage logonet,

⁷⁹it o apit me logonet, kambuurak inagabiti mbakwi nogo eya eeppiige, ndi, Iniki ale'nggen ugun obeelom logonet, nogo menggam tu nogo yi aret o, yinuk, yo'nirage, eerigin o, yinuk, yokkigi o,” yinuk, yoreegerak.

⁸⁰Ndi, wulaga nogo tawe age logonet, iniki mondok kole agagerak. At nen aakumi Iterali inigen kaawak nduk, naga'lek logonet, karume aakumi lek me time nege nagagerak.