Read Wano LUKAT 11 Bible Online

LUKAT 11 - Wano bible

LUKAT 11

¹Peebi ne ambi paga at Yetut ambime tamban eeke nagagerak. Eeke nagagirik, at oone waganggwi mendek ambi Yetut yoge logonet, ”Nogoba o. Aap Yaya nen at oone waganggwi tamban eeruwak nduk, mamuniragagerak nogo pogom nit tamban eeruwok nduk, kat mamunniret o.”

²Yoge mbareegi, at Yetut nen, ”Kit tamban eeko logonet, Ninogoba wa! Kat kendage mondok abe alik leenak menggendak me, tiyappagago ogoorik o. Nit kat kabu'me logorak nduk, pinani mok o.

³Ninambi ko'lu-kii'me nonggo logorak nogo wo'nirage logot o.

⁴It aap nit maluk eerogo pinanugwi nogo mi eerogo pogo monggoorak me, kat nen nit ninomaluk lek eerogo pinanege logot o. Ndi, ninabut mbangge kero, ninarum logot o, yinuk, togop aret yogo logonip o,” yoragagerak.

⁵Yorage nagagirik, at oone waganggwi nogo yorage logonet, ”Aap kit mendek ambi nen nogo iniki mbere eeke paga at ore ambi owagam nage logominggirik, yoge logonet,

⁶Nore wae. An nore ambi nen ambime nage logonet, pe'neegak wagaarak kwe, mbi wogoriyak abu lek me, kat mbi larak kenagan wo'niru o, yoge kenok,

⁷at ore oome wonage nogo nen ari logonet, Nogo abu ninikilom agaarak me, piya'nake mage o. Tu ti, abu narak. Ndi, napuri ninom nogo yugwi me, mi'na'nuk wokkiriyak ti meek o, yinuk, togop yorigin mbakop?

⁸Lek o! At ore aret me wogoriyak op kwe, nogo inikilom agaarak me, wogoriyak eebi mbake kwe, agabiti mbaka'lek oone nabenak mban yoge paga at mi'na'nuk, Wo'niru o, yogerak nogo aret wogorigin lek mbakop? Wogorigin aret o, yinuk, yokkirage agarik o.

⁹Togop me, it aakumi nggino yorogwe iinok, aret wogorogwe, kwaakwi iinok, kwaakkologwe, Tu paa'niyet o, yorogwe iinok, paariigwi, eeko menggaarak me, nggino yogwi kiinok wokkirage, kwaakwi kiinok kwaakkirage, Tu paa'niyet o, yogwi kiinok paakkiige, eeke kaamunggup nduk, kit nen nggino yogwi, kwaarit nugwi, Tu paa'niyet, yogwi, eeko logonip o.

¹⁰

¹¹Kit kinaput ambi nen, Mbi wo'niru o, yokkirage kenok, yugum aret wogoriyak mbakop? Ikan wo'niru o, yokkirage kenok, waalo wogoriyak mbakop?

¹²Towe ako wo'niru o, yokkirage kenok, nggitamuru wogoriyak mbakop?

¹³Lek me, kit maluk eeko monggotak mendek nen kinapurilogwe obeelom mendek wogorogo monggotak me, kit kinogoba mbogut paga mendek Aberiniki wo'niru o, yogwi kiinok, at wokkiraagin lek mbakop? Wokkiraagin aret o,” yinuk, yoragagerak.

¹⁴Peebi ne ambi paga Yetut nen kugi ambi oone lek mendek aap inikime nen nggiginogo wumbege mbareegi, wundi nage kagak, aap oone lek nogo oone warak agagerak. Oone warak age mbareegi, it aakumi nen, ”Wi!” yinuk, pi wareegwaarak.

¹⁵Pi wareegwaarak kwe, it ando nen yogo logonet, ”At Yetut ti, kugi iyagalo Mbeletebut nogo endage paga kugi nggiginogo wumbiige menggerak o,” yogwe,

¹⁶ndi, it ando nen at iniki abut mbanuwok, mbako logonet, ”Mbogut paga nineenu ariyak ninagabiti warak mendek ambi eeru o,” yinuk, yogwi, eereegwaarak.

¹⁷It iniki mbakwi at Yetut yelok iige nagagirik, ”Aap inowe ambi at abu'me menggaarak inom it-it ogookko'nok ma'nogwe iinok, inawi ti o wuum aret arigin o. Ndi, kunu ambi it-it aret ogookko'nok mbaganggwi iinok, inom ambi'me lambunik logorak meek o.

¹⁸Kit nen an yo'nogo logonet, Kat nen kugi iyagalo Mbeletebut endage paga kugi nggiginogo wumbiige menggendak o, yo'nugwi me, at Ibilit nen at-aret ogookkolage kenok, at abu'me piige minggim ti, nonggop togon op logorak.

¹⁹Ndi, an nen kugi Mbeletebut paga kugi nggiginogo wumbiige neenok, kit kinapuri nen ta endage paga kugi nggiginogo wumbiigo menggaarak mbakop? Kinapuri nen eeko menggaarak kagak kit yogwe me, it nen aret kinenggali wappinagagun o.

²⁰An nen Ala eenggi omaawi paga kugi nggiginogo wumbiige neenok perak, Ala abu'me pinagarak muk kinowagam wagaarak aret mbako logonip o.

²¹Aap anini warak ambi tin yippunuk, wooluwak nutik awi lombok arum wonage kenok, at amendek ugun time op aret logogin kwe,

²²aap alik ambi anini ambik nen aap nogo wari unggwage nagaatik, at eebe tebenogo pege kenok perak, amendek arin eegin nogo paga iniki panggombunuk, logomenggerak nogo ndinogo punuk, agugun waganogo tumbuke menggerak.

²³It an ninom lambunik wonogwe lek iinok ti, ninom ogoorak aret wonogwe o. Ndi, an ninom kuwak eekulik nogo nen it ninom kuwak eeke minggirak nogo mappiigo menggaarak aret o,” yinuk, yoragagerak.

²⁴Yorage nagagirik, ”Kugi ogole warak mendek aap inikime nen wungge nagaatik, Nggeeme yanggonggola o, yinuk, niyo ero lek me, kwaarit niriminggi-niriminggi yanggonggolaawam lek kenok, Name wundi wagagim nogome niyok paga yungguninuk unggwi naakit o, yinuk,

²⁵unggwi wage nagaatik, wundi wagagim nogome liirubu koorak ndigik-ndegek aago kenok,

²⁶wundi nage nagaatik, at maluk aret kwe, kugi mondok maluk lombok ineebe 7 kuwak eeppiinok, wogoret iyok paga unggwi wage nagaatik, nogome inom aret menggerak me, aap nogo aa'nduk kugi ambiret iniki me wonage me mbuuluk op wonagagerak kwe, peebi apit yagabit ari unggwogwe iinok, aap nogo abu maluk aret logogin o,” yinuk, yoragagerak.

²⁷Wone ti yorage mbareegi, aakumi apit kuwak aago inenggela'me nen kwe ambi oone tiyarogon ari logonet, ”Kwe ndakkake nagagirik, elak kunggake nagagerak nogo iniki ale'nggen kombake logogin o.”

²⁸Yoge mbareegi, at Yetut nen, ”At nogo mban lek o. It Ala wone liirogon konembunuk, eerit nugu menggaarak iinok perak, iniki ale'nggen aret mbako logogun o,” yinuk, yoragagerak.

²⁹Ti yorage nagagirik, it aakumi apit aret kuwak eerit wogwe iigak, yorage logonet, ”Kit aakumi o yogondak wonogwe nogo kit maluk mban aret wonogwe o. Nineenu ariyak mendek ambi eeke keyaawi o, yinuk, mban yo'nugwi kwe, an nen alik ambi eeke neyaamunggup lek o. Ata, aap Yunut nogo nen ineenu ariyak mendek eereegerak nogo ti mban aret eeke neyaamunggup o.

³⁰Aap Yunut nogo aakumi o Niniwe ineenu agak wonagagerak nogo pogom, an aap aret nda'nagagirak nogo kit aakumi o yogondak wonogwe yi, kineenu agak aret agarik o.

³¹At Talomo ti aap mbuuluk negen kagak, kwe nggwok ambi o irip me selatan pa'nggwe nen at Talomo iniki warak logonet, wone koongge menggerak nogo aruk konenikit nduk wagagerak kwe, at ambi yime wonage yi perak, abu nggwok aret kagak, pekkaga'lek wonogwe me, peebi aakumi inowak looniyak eyom paga at kwe nggwok nogo nen mi'na'nuk, kit yogondak wonogwe yi, Kinenggali o, yinuk, yokkirage kaamunggup o.

³²At Yunut ti aap mbuuluk negen logonet, aakumi o Niniwe mendek Ala wone yorage mbareegi, it abok aret iniki koombunuk, inomaluk mbo pereegwaarak kwe, at ambi yime wonage yi perak, aap abu nggwok aret me, wone yokkirage nogo konembunuk, kinomaluk mbo puurak op aret kagak, kinogogumbuk wonogwe me, peebi aakumi inowak looniyak eyom paga it aap Niniwe mendek nogo nen mi'na'nuk, kit yogondak wonogwe yi, Kinenggali o, yinuk, yokkirogwe iyaamunggup o,” yinuk, yoragagerak.

³³Yorage nagagirik, ambinom yorage logonet, ”Ndi wuninogo punuk, ndik abu'me a, togolowak abu'me a, ti kiraappugulik o. Ata, wuninogo punuk, aakumi tu unggwi wogwe nogo eya kaawak nduk, tena'me tiyarogon pogo menggaarak.

³⁴Kit kineebe ndi wuninik pogom eya nogo ti, kinigen aret. Kit kinigen obeelom wonage kenok, kineebe abok aret eya aago logomunggup o. Ndi, kit kinigen maluk wonage kenok perak, kineebe abok aret o apit pogom logomunggup o.

³⁵Ti kenok, eya kinikime wonage nogo lek age logonet, o apit pogom age kero, liippogo logonip o.

³⁶Kit kineebe ando o apit pogom lek abok eya mban wonage kenok, ndi eya pindanggage logonet, kineebe eya agago pinagage minggi kwak, kineebe abok ndak-ndak abu eya aago logomunggup o,” yinuk, yoragagerak.

³⁷Wone ti yorage mbareegi, aap Pariti mendek ambi nen, ”Nimbirak mbi nawok nduk, mok o,” yinuk, Yetut yoreegerak. Yoge mbareegi, at Yetut aap nogo ame unggwi nage nagagirik, mbi naakit nduk, kwi'nagagerak.

³⁸Mbi naakit nduk, at eenggi kooka'lek logonet, we ugun kwi'nage aap Pariti nogo enegen kage nagagirik, ”Aap yi nonggop eeke iya!” mbareegerak.

³⁹Mbake mbareegi, at ninogoba endagembogut nogo nen, ”Kit Pariti mendek kinikime aakumi inamendek yumbu-lambu agago kologwe inom, yi maluk ndi maluk eekwi inom, apit yagabit aago kagak, kinagiwak-kinarenggap agabolo endekem mban kooko monggotak.

⁴⁰Kit wi negen aret eeko ogotik. At agabolo endekem ogobakkigireegerak nogo nen inikime inom ogobakkigireegerak lek nduk yogo ogotik?

⁴¹Lek o. Kinikime aken yonggolak nogo it aap inenggi lek wogorogwe kiinok perak, yi mendek ndi mendek abok koorak aret kaamunggup o.

⁴²Kit Pariti mendek yi, wone a'me mban koonggwi, Ala kinom kiniki kunik mbakwi, ti eeka'lek logonet, liibongga logwe, we numbuk engga logwe, mbiingga logwe, nogo mban nibinogo Ala ake pugwi me, kinabuwa! Nggwok ti eeko logonet, mbuulogwe-mbaalogwe yi inom nabenogo eeriyak me eeko monggotak o.

⁴³Kit Pariti mendek yi, aap Yakuri tamban eeko menggam oolo kwi'nogwe, yi mendek ndi mendek onggo kunggo menggam taati, Nit mban keyage wappinaniyak mbakwi, eeko logorak kinikilom mbako monggotak me, kinabuwa!

⁴⁴It aakumi kanggaatak inowak paga mbaka'lek iniyok ugun aan lebenogo pit nogo mengga kwak, kit aret me, kinabuwa!”

⁴⁵Yoge mbareegi, aap Ala wone liiru mbanak unde ambi nen Yetut yoge logonet, ”Ngguru wae. Yagandak nogo ti, nit ninom ninenggali wappinanege keego o.”

⁴⁶Yoge mbareegi, Yetut nen, ”Kit aap Ala wone liiru mbanak unde kunduk, aaninggin woorak meek nogo mendek kagak, inuum paga nggimbunuk, luwi aago nugwi iigak, yeenggooroorak mbaka'lek, kinigen pengge agan mbaganggo monggotak me, kinabuwa o!

⁴⁷Kinogobamini nen Ala wone yorogo nogogwaarak nabi-nabi inoorogo piyareegwaarak nogo, kit inombowologwe nen aret inabiriiwak yimbiigwi me, kinabuwa!

⁴⁸Kit kinogobamini nen it Ala wone yorogo nogogwaarak nabi-nabi inooreegwaarak nogo, inobaane'me kit aret inabiriiwak yimbiigwi me, kinombomini eereegwaarak nogo ti, Op aret eereegwaarak o, yogwe kiigi o.

⁴⁹O yi wakkagagerak kuli nen it aap an noone yorogo menggaarak aap Kaben amiya wambeegerak nogo kuli nen, nok-nok aap Takariya amiya Ala ake pugu kani kunggo menggam Ala awi wurik me oolo muundak wambeegerak kuli, it abok inamiya wambeegerak nogo inane'me kit aakumi yogondak wonogwe yi aret kinoorikit nduk, at yi abok ndi abok eenu menggerak Ala nen, ari logonet, An noone yorogo menggaarak nabi-nabi inom, yonggo nappiya wage minggirak inom, nappiya wage neenok, ando inookwi, ando piginabuwak nduk, muguret nugwi, eekwi kiyaagin o, yinuk, yereegerak nogo ti, it aap aa'nduk inamiya wambit nagagerak nogo ti, inane'me kit aakumi o yogondak wonogwe yi aret kinoorikit nduk, yereegerak me, yokkiragi o.

⁵⁰

⁵¹

⁵²Kit Ala wone liiru mbanak unde yi, yi wone ndi wone aakumi ineenu ogwe iyo, tu kunci kit aret kumaapporogo wonogwe me, kinabuwa! Nit aret wone nineenu aruwok, mbaka'lek logonet, it ando ineenu ariyak mbakwi nogo ineenu ogwe iyo, non mbambiigo ogotik o.”

⁵³Yorage nagagirik, o time mbo punuk, endekem wundi nage mbareegi, it Ala wone liiru mbanak unde inom, aap Pariti mendek inom, at oone nenggen yemenggerak paga yilunogo punuk, waruwok nduk, inanini nen eegwa'me liirit-laarit waganggo nogogwaarak.