Read Wano LUKAT 13 Bible Online

LUKAT 13 - Wano bible

LUKAT 13

¹Nogo ti eyom paga aakumi ando nen, ”Aakumi Nggalileya mendek nen Ala aanggo warogo kani kumbugwi me, aap Pilatut nen inookerak o,” yinuk, Yetut yori wogogwaarak.

²Yori wogo mbareegwa, at Yetut nen, ”Kit nen mbako logonet, It aap Nggalileya mendek ando maluk eeka'lek kenok, teppiige, ndi, it inookerak ti, maluk nggwok eeko nagaarak me, inooke, eekerak mbakop?

³Lek o. Kit maluk eeko monggotak nogo kiniki koombunuk, mbo pugwi lek kiinok, kit kunduk togop aret eeppinagage kaamunggup o, yinuk, yokkirage agarik o.

⁴O Tilowam o nggorek wurik ngginnage logonet, it aap 18 aambeleninabeegerak nogo ti, it aakumi ugun Yerutalem wonogwe ti, maluk eekwi lek negen, ndi, it aambeleninabeegerak ti, maluk nggwok eereegwaarak me, aambeleninabeegerak mbakop?

⁵Lek o. Kit maluk eeko monggotak nogo kiniki koombunuk, mbo pugwi lek kiinok, kit kunduk togop aret eeppinagage kaamunggup o, yinuk, yokkiragi o,” yoragagerak.

⁶Yorage nagagirik, wone eegu laarogo yi yorage logonet, ”Aap ambi eyabu eerak me, eyo ara ambi yarak wonagagerak. Wonagagerak me, anggen yugu mbanikit nduk, wondekka nagaatak kwe, anggen yugu lek mban kage nagagerak.

⁷Yugu lek mban ka nage nagagirik, at ayeloman eyabu unde nogo yoge logonet, Eyo ara yi nogo anggen yugu mbanikit nduk, pekka wage neegak, 3 tahun eereegerak me, anggen yugu lek mban me, nggween aanom warogo logokwak, muurogo nappu o.

⁸Yoge mbareegi, ayeloman nogo nen, Nogoba! Tahun yi paga an nen wola yege, alom mogut mbangge, eeriyak mbakirak me, teppuurak o.

⁹Ndi, tahun ambi eeppunuk, anggen yege kenok ti op o. Ndi, anggen yege lek kenok perak, muurogo nappenok o, yinuk, yoreegerak o,” Yetut nen it aakumi yoragagerak.

¹⁰Yorage nagagirik, ti'nuk peebi at Yetut it Yakuri tamban eekwi paga wone mamunirage me,

¹¹kwe ambi kugi andi kagak, 18 tahun eereegerak me, amborowak kalenak mi'nariyak abu meek aret wonagagerak.

¹²Meek aret wonage me, at Yetut nen kwe nogo enegen kage nagagirik, wiige nagagirik, wage mbareegi, yoge logonet, ”Kwe yi wae! Andi nogo abu lek eekkaki o,” yinuk,

¹³eenggi awo pigagangge kagak, kwe nogo amborowak koonnage mbareegi, Ala endage wogoppereegerak.

¹⁴Ti eeke mbareegi, aap Yakuri tamban eeko menggam unde nogo nen Yetut tamban eekwi paga kwe obeelom eekerak kage nagagirik, anini nen aakumi apit yorage logonet, ”Yabu eeriyak nduk nogo 6 kuli wonage me, nogo 6 kuli ti paga ugun andi obeelom eekkinabuwak nduk, wogo logomunggup o. Tamban eekwi paga ti lek o.”

¹⁵Yorage mbareegi, ninogoba endagembogut nogo nen at yoge, ”Kit aakumi kiniki laakot logonet, yorogo monggotak yi wae! Kit abok tamban eekwi paga kinaanggo sapi a, keledai a, ngga'nggo'na narak me, yi na nawak nduk, tu paarogo wogoret nogo monggotak nogo lek a?

¹⁶Ndi, ti kenok, Abarakam ombooluk kwe yi, Ibilit nen keele maarogo porogo wonage kagak, 18 tahun eereegerak me, tamban eekwi paga piinogo teppuurak ti, mage me nduk, yogo ogotik?”

¹⁷Ti yoragagerak paga at inom ogoorak wonogwe nogo inenggali agago piyareegerak. Ndi, it aakumi abok at Yetut iya tit eerit nege nagagerak nogo paga inale'nggen mbako nogogwaarak.

¹⁸Togop mbareegerak me, at Yetut nen, ”Ala abu'me piyoorak ti, nano kokwak o? Ndi, nano paga wakka o?”

¹⁹Yinuk, ”Ala abu'me piige minggim ti, kulok anggen kokwak aret me, aap ambi kulok anggen nogo waganogo eyabu me yumbuneegerak me, laganeegerak. Lagangge logonet, eyo ambi nggwok lombok wiganeegerak me, eno'mbak paga yi towe ndi towe mbogut paga nugu menggaarak mendek inawi mbani unggwogo nogogwaarak o,” yoragagerak.

²⁰Ti yorage nagagirik, ambinom yorage logonet, ”Ala abu'me piige minggim nano paga wakka o?

²¹Ala abu'me piyoorak ti, roti mbi piike menggerak pogom aret me, kwe ambi nen roti piike menggerak nogo mendek waganogo mbato yigirik togolowa'na ne kenagan paga kilirogo wuppunuk, inom nombongge mbareegi, abok aret piireegerak o,” yinuk, yoragagerak.

²²Ti yorage nagagirik, ti'nuk, at Yetut nogo o Yerutalem nage logonet, o tini nggwok me inom, mbuuluk me inom, ambime unggwagak eerit nage logonet, wone mamuniranet nage nagagerak.

²³Nage me, aap ambi nen, ”Nogoba wae! Aakumi apit inagap ndariminggi ilik, ambitak mban inagap ndariminggi a?”

²⁴Yoge mbareegi, Yetut nen, ”Tu mbuuluk paga unggwi noorak nduk, lin wake logot o. It aakumi apit aret unggwi noorak nduk, eerumenggaarak kwe, meek tit kaagun o, yinuk, yokkege agarik o.

²⁵At o unde nen mi'na'nuk, tu nake mbariminggi, kit endekem tu pukpuk eeko logonet, Nogoba! Tu paa'niyet o, yorumonggotak kwe, at nen, Kit aap nggeeme nen wogop? Kit an neenggo'lek o, yokkirage kenok,

²⁶kit nen at yogo logonet, Lek o. Laago ninom nonggoorak nogo o. Lek o. Ninawore'nggam wone mamunniragandak nogo o, at yorumonggotak kwe,

²⁷at nen, Kit nggeeme nen wogop? Kit an neenggo'lek o. Kit maluk eeko monggotak yi, mbet mbaganinip o, yinuk,

²⁸endekem wumbinaga menggerak logonet, kit nen aap Abarakam kunduk, Itak kunduk, Yakup kunduk, ndi, aap Ala wone yorogo nogogwaarak abok aret Ala abu'me wonogwe iigo logomonggotik, leenggu maakwi, kineyak nggilik maakwi, eeko logomunggup o.

²⁹It aakumi o iru-ogwe nen, agi-ogu nen, Ala abu'me piige minggim laago noorak nduk, kuwak ari woraagun o.

³⁰Kuwak ari wogo logomenggaarik, yogondak it peebi wonogwe nogo ti, inaa'nduk ogwe, ndi, yogondak inaa'nduk wonogwe nogo ti, peebi ogwe, eekwi iyaamunggup o,” yoragagerak.

³¹Ti awo yorage kagak, it aap Pariti nogo mendek ando nen Yetut owagam wogo nogogwaarik, ”Aap Keroret kooriyak ari me, yime nen mbet mbaganu o.”

³²Yogo mbareegwa, Yetut nen, ”At aap nggeewo pogom ti, wone yi mbet yori nanip o. An yogondak inom, ko'lu inom, kugi aap inikime wonage kenok, nggiginogo wumbiige, andi kenok obeelom aganake, eeke logominggirik, nogo mbere yinuk, an eerikit nduk wagagirak nogo ti, abu worok togon aret eerigin o.

³³Togop eeriminggirak kwe, it Ala wone yorogo menggaarak mendek nabi ambi o Yerutalem kagak, o alik me kambuurak meek me, yogondak inom, ko'lu inom, ko'lu kwak inom, an nage logogin aret o.

³⁴Ai! Kit o Yerutalem mendek yi ao! Kit nen Ala wone yokkirogo menggaarak nabi-nabi inookwi, ndi, aap Ala nen yonggo nappiya wage menggerak ti, yugum paga togorit-tagarit inookwi, eeko monggotak me ao! An towe ayam iyagalo nen o'nuwe enaabit abu'me tebembiirogo minggi kwak, kit togop aret kuwak eeppinagarak mbake minggirak kwe, kit nen, Nineebi o, mbako monggotak me, ao!

³⁵Kit kinawi yime teppiminggirak o wogo aret logogin o. Kit nen, Ninogoba endagembogut endage paga wage yi, wogoppuwok o, yuurak eyom panggoni waga'lek kagak, kit kinigen abu neega'lek aret logomunggup o, yinuk, yokkiragi o,” yoragagerak.