Read Wano LUKAT 16 Bible Online

LUKAT 16 - Wano bible

LUKAT 16

¹Tiʼnuk, peebi at Yetut nen at oone waganggwi nogo yorage logonet, ”Aap eenggi warak ambi ayeloman o arum wonagagerak. Arum wonage me, aakumi nen, Lek o. Kayeloman nogo nen kamendek abu tigippit nage o,

²yogo mbareegwa, ayeloman nogo wiireegerak wage mbareegi, Kat eerit nage konenggirak ti, nonggop eerit nage me, yoʼnega o? Kat yogondak name o arum ambinom logorak lek me, logonet, eerit nage nagandak nogo mbininogo yoʼniru o.

³Yoge mbareegi, ayeloman nogo iniki koongge logonet, Nogoba nen o arum logorak lek, yoʼnegerak me, an nonggop eeri o? Nggween kabungge logorak ti, meek o. Ndi, nggino yoranet nege logorak ti kunduk, nagabiti o.

⁴Ata, endekem wumbanege kenok, aakumi nen an woʼnaburak perak, op o, yinuk, koongge nagagirik,

⁵it aakumi at ogoba anomat mbanak wonogogwaarak nogo ambit nggigik woraawak nduk, wiirage mbareegi, ambi aaʼnduk wagagerak nogo yoge logonet, An nogoba anomat mbanak mande wonage o?

⁶Yoge mbareegi, aap nogo nen, Amburu 100 toolak mbanak wonage o Yoge mbareegi, ayeloman nogo nen, Anomat liiru mbanak yi, waganogo obaaneʼme liiru 50 toolak mban mbet-mbet mbanu o.

⁷Yoge nagagirik, at ambi yoge logonet, Ndi, kat perak, kogoba anomat mbanak mande wonage? Yoge mbareegi, aap nogo nen, Gandum yum 100 yonggolak mbanak wonage o. Yoge mbareegi, ayeloman nen, Anomat liiru mbanak yi, waganogo obaaneʼme liiru 80 mban mbanu o, yoge nagagirik, it ando apit togop mban yoragagerak.

⁸Ayeloman eereegerak ogoba nogo konengge nagagirik, ayeloman at ambokan laganeegerak kagak, iniki mondok iya koonggerak mbareegi, Wi! ireegerak. It aakumi inikiigun nggween paga mendek yogondak wonogwe nogo inom eeko logonet, iniki ngget paga iya negen koonggo menggaarak kwe, it Ala apuri iniki eya aganabeegerak nogo perak, iniki lek logonet, meek negen koonggo menggaarak iigi o.

⁹Nggween paga mendek aakumi ineenggi warak eekkologo menggaarak nogo paga aakumi yeenggooranet nogo logonet, lek age kenok, Ala nen mondok minggim time keyage warogo wokkinabuwak nduk, nggween paga mendek nogo paga kinoreewi kinom kunik eeginabit nugu logonip o, yinuk, yokkirage agarik o.”

¹⁰Yorage nagagirik, ambinom yorage logonet, ”Aap ambi mbuuluk eeriyak mendek liirogon aret eeke kenok, nggwok eeriyak mendek ndak-ndak liirogon aret eeke logogin o. Ndi, aap ambi mbuuluk eeriyak mendek abe eekaʼlek kenok, nggwok eeriyak mendek ndak-ndak abe eerigin lek aret o.

¹¹Ti kenok, yi mendek ndi mendek nggween paga mendek nogo liirogon unde wonogwe lek kenok, abe mendek unde logobagip nduk, ta nen wokkiraagin mbakop?

¹²Kit nen aap ambi amendek liirogon porogo wonagaʼlek kenok, kit lombok kinamendek unde logobagip nduk, ta nen wokkiraagin mbakop?

¹³Aap ambi nen ogobamini mbere inayeloman aʼnuk, inake eeke logorak meek o. Imbirak inake eerit nage kenok, ambi eebi ombake logonet, ambi iniki kunik ombake, ndi, ambi nen eeriyak yoge nogo yanggorogon eeke logonet, ambi nen eeriyak yoge nogo eebi ombake, eerigin o. Kit nen at Ala inom, nggween paga mendek kineenggi warak eekkologwe nogo mendek inom, imbirak lambumbunuk, mugurok noorak ti, meek o,” yinuk, yoragagerak.

¹⁴Yorage mbareegi, it aap Pariti nogo Yetut oone konenggo nogogwaarik, wu inikilom me, Yetut meek agago pereegwaarak.

¹⁵Meek agago pogo mbareegwa, at Yetut nen, ”Kit nen aakumi obeelom kinombaruwak nduk, kinaanaʼle mbanggoʼnet nugwi kwe, Ala nen kiniki eenu menggerak. It aakumi nen, Wi! yinuk, iya mbakwi nogo at Ala abu eebi mbake menggerak.

¹⁶Aap Yaya wagaʼlek kagak, Ala lengganeegerak wone liiru mbanak nogo inom, it Ala wone yorogo nogogwaarak nabi-nabi inoone nogo inom, eerit nugu nogogwaarak Ndi, aap Yaya wagagerak kuli paga perak, Ala abuʼme piige minggim obeelom wone yoranet nugwi me, it aap abok aret lin wako logonet, unggwi wogo agaarik.

¹⁷Togop eekwi kwe, mbogut inom, nggween inom, lek ariyak ti, op kwe, Ala lengganeegerak wone liiru mbanak nogo perak, ando mbuuluk ambi lek arigin ti abu lek aret o.

¹⁸Aap ambi akwe mbo punuk, alik ambi wagangge kenok ti, mbabi aret eeke o. Ndi, aap ambi kwe mbo pugu nogo wagangge kenok, at kunduk mbabi aret eeke o,” yinuk, yoragagerak.

¹⁹Yorage nagagirik, wone ambi yorage logonet, ”Aap ambi eenggi warak lombok me, ayum laambu kigirikwe mban yikkolage nagagerak. At koʼlu-kiiʼme paalo aago mban logonet, aleʼnggen paga mban wonagagerak.

²⁰Ndi, aap alik ambi endage Latarut eebe paga awin kunik me, windak logonet, ambe nggino ari logowak nduk, aap eenggi warak aru nggaʼnggi paga taati pi nogo nogogwaarak.

²¹Aap nogo nen, Aap eenggi warak nogo ambi nengge kagak, ameneno wangge nogo naakit lak ao, mbake nagagerak. Ndi, nggeewo wogo nagaatik, at awin nogo inamili menak nonggo nogogwaarak.

²²Ne ambi paga aap ambe nggino ari nagagerak nogo kambeegerak. Kangge mbareegi, mbogut paga yonggo nugu menggaarak melaikat nogo nen wonok Abarakam owagam pi nogogwaarak. Pi nogo mbareegwa, tiʼnuk, peebi aap eenggi warak nogo kunduk kambeegerak. Kangge mbareegi, oreewi nen eebe nggween me taambereegwaarak.

²³Kambunuk, nogo menggam ari nanuk, time yagan wake logonet, ena niʼnage nagagirik, o nda time aap Latarut Abarakam imbirak wonogwe iyareegerak.

²⁴Iige nagagirik, at oone nggwok paga ari logonet, Nogoba Abarakam wae! An kani omoonuʼme yime yagan wake me, nabuwa nombake logonet, aap Latarut nogo eenggi irip paga niyo lambumbunuk, namili yawek yuwak nduk, nappi mok ubi!

²⁵Yoreegerak kwe, Abarakam nen at yoge logonet, Naput o. Kat keenik logonet, paalo aago mban wonagagindak nogo o. Ndi, Latarut yi perak, ninggin-nanggen wonagagerak nogo kiniki aberu o. Yogondak Latarut yime logonet, iniki teyok yegerak kwe, kat perak, yagan yobak-nggolak wake agandik o.

²⁶Ndi, ambi, it aap yime nen kat keya nogwe, time nen nit niya wogwe, eeriyak mbakwi nogo meek kaawak nduk, oolo time yigeebu nggwok pereegerak o.

²⁷Yoge mbareegi, aap eenggi warak nogo nen, Ndi, ti kenok nogoba o.

²⁸An nowenawot name wonogwe me, yagan wako menggam yime wogwe iyo, an nogobamini iname kurumbi yora nawak nduk, aap Latarut ti, nappenok nduk, yokkege agarik o obak!

²⁹Yoge mbareegi, Abarakam nen at yoge logonet, Muta wone inom, it Ala wone yorogo nogogwaarak nabi-nabi inoone inom, yorogwe nogo aret konenggo logowak o.

³⁰Yoge mbareegi, aap nogo nen, Meek o, nogoba Abarakam. Aap ambi kanggo menggam nen yora nage kenok perak, it maluk eekwi nogo iniki koombunuk, mbo pogo logogun o obak!

³¹Yoge mbareegi, Abarakam nen, It kogobamini nogo nen Muta wone inom, it Ala wone yorogo nogogwaarak nabi-nabi inoone inom, konenggulik kenok, aap ambi kanggo menggam nen eenik aʼnuk, yora nage kenok kunduk, it iniki abet mbarugun lek yoreegerak o,” yinuk, at Yetut nen at oone waganggwi nogo yoragagerak.