Read Wano LUKAT 17 Bible Online

LUKAT 17 - Wano bible

LUKAT 17

¹Yorage nagagirik, Yetut nen at oone waganggwi mendek yorage logonet, ”Kit maluk eerubagip nduk, kinikime mambinagi woramenggerak kwe, at kinikime mambinagi wage nogo perak, abuwa o.

²Aap ambi nen elege-aabologwe yi, maluk eeruwak nduk, inikime manabi wagaatak paga maluk eekwi iinok, yugum nggwok paga enggaanok keele yilinogo yiime mbo mambiyoorak op o.

³Kiniki tum wakkologo logonip o. Kit kinore ambi maluk eeke kenok, aruk wariyak o. Aruk wappunuk, maluk eekerak nogo iniki koombunuk, mbo pege kenok, at omaluk ti, mi eerogo mbo pogo logomunggup o.

⁴Ndi, aap ambi nen ne ambi paga ne 7 maluk eeppinagage logominggirik, iniki koombunuk, An maluk eeppinagagirak o, yinuk, eekerak ndak-ndak ne 7 paga yokkira wage kenok, kit nen ne 7 paga aret omaluk mi eerogo mbo pogo logonu o,” yinuk, yoragagerak.

⁵Yorage mbareegi, it nappiyareegerak nogo nen, ”Ninogoba o. Niniki koba panggombunuk, abet kombakwi nogo ambinom kole aruwak nduk, eeʼninabu o.”

⁶Yogo mbareegwa, at ninogoba endagembogut nen it yorage logonet, ”Kit kiniki noba panggombunuk, abet nombakwi nogo mbuuluk kulok anggen pogom kinikime logonetak en, eyo kilu nggwok yi, Kalom kinogo yi inikime yaʼnari nage keyaagin o, yogwi kiinok, yaʼnari nage aret kaʼnetak o,” yinuk, yoragagerak.

⁷Yorage nagagirik, ambinom yorage logonet, ”Kit kinayeloman ambi nen yabu wagangge ilik, kinaanggumi ndegeninake a, eerit nege logominggirik, endekem nen, awo kiname unggwi wage kenok, Kambi mbet-mbet na mok o, yinuk, yoriyak mbakop?

⁸Lek o! Kit nen kinayeloman nogo yogo logonet, An nambi larogo paninuk, kayum yikkolage logominggindik, an nengge neegak, kat an nake yi wa nagak ndi wa nagak eeke logot o. Ndi, an abu nengge neenok perak, kat na waʼnu o, yinuk, togop yogo monggotak nogo lek a?

⁹Ogoba nen ayeloman wone, Yogop eeʼnu, ndogop eeʼnu, yogetak mban eeke kenok, ogoba nen, Wa! yoge menggerak mbakop?

¹⁰Ndi, ti kenok, nogo ndak-ndak kit wone, Yogop eeʼnu, ndogop eeʼnu, yokkirage nogo abu eeppogo logomonggotik, Lek o. Nit aap inayeloman mban ogoorik o. Ninaburen eerulik o. Ata, yoʼniragaarak kenok mban eekoorak yogo logonu o,” yoragagerak.

¹¹Peebi ne ambi paga at Yetut o Yerutalem nage logonet, o Tamariya wukkagak, o Nggalileya nikkagak, tu oolo paga nagagerak.

¹²Nage logonet, aakumi iname ambime unggwage kagak, aap ineebe 10 inawin aagaʼne kunik nogo mendek nen Yetut nage inigen kogo nogogwaarik, tayorogon taati nen

¹³inoone nggwok paga yogo logonet, ”Ninogoba Yetut wae! Ninabuwa mbaru o.”

¹⁴Yogo mbareegwa, Yetut enegen pegiige nagagirik, ”It aap Ala unde nen inigen kiyaawak nduk, kineebe nigiya nanip o.” Yorage mbareegi, it nogo, nogo logonet, inawin obeelom agagerak.

¹⁵Inawin obeelom age mbareegi, it nogo ambi awin obeelom agaarak nogo kage nagagirik, yungguninuk, iyok paga wage logonet, oone nggwok paga Ala endage wogoppit wagagerak.

¹⁶Ala endage wogoppit Yetut abuʼme tebe yi wage nagagirik, ”Wa!” mban yoreegerak. Aap ti, aap Tamariya mendek aret o.

¹⁷Aap nogo Yetut, ”Wa!” mban yoge mbareegi, at Yetut nen, ”Aap ineebe 10 obeelom agaarak nogo lek a? Ineebe 9 nogo nggeeme naga o?

¹⁸It ando nogo lek aap nggiru yi mban Ala endage wogoppuurak nduk, iyok paga yungguninuk wagaarak ya?”

¹⁹Yinuk, Yetut nen aap nogo yoge logonet, ”Kiniki noba panggombunuk, abet nombakendak paga obeelom agandak me, miʼnaʼnuk kame nak o,” yinuk, nappereegerak.

²⁰Tiʼnuk, peebi it Pariti nen at Yetut yogo logonet, ”At Ala nen nit mandenom abuʼme pinani woraagin o?” yinuk, Yetut eegwaʼme waganeegwaarak paga Yetut nen it yorage logonet, ”At Ala abuʼme pinagi woroorak nogo ti, aakumi yelok kaawak nduk, eekaʼlek kagak woraagin aret o.

²¹It aakumi nen kunduk, Yime wonage yi kaanip o. Time wonage ti kaanip o, yokkiragaʼlek kagak aret woraagin o. Ala abuʼme pinagarak ti, muk kit kinenggelaʼme wonage mbako logonip o,” yoragagerak.

²²Ti yorage nagagirik, at oone waganggwi nogo yorage logonet, ”An aap aret ndaʼnagagirak nogo, At eeke menggerak mendek ambi eeke kaawok lak, ao, nombaru monggotak kwe, kinigen koorak lek eyom aret panggoni woraagin o.

²³It aakumi nen, Eebe yime wonage me, pekka woraanip o. Time wonage me, pekka nanip o, yokkirogwe iinok, muguret noobok o.

²⁴O yabok mbogut paga nen pindanggage kenok, o irip-irip abok aret eya eeke minggi kwak, an aap aret ndaʼnagagirak woroorak nogo eyom paga togop aret eerigin o.

²⁵Togop aret eerigin kwe, aaʼnduk, aakumi nen mondok noba aaninggin-paaninggin agago panugwi, aakumi yogondak wonogwe nogo nen an mbo panugwi, eerugun aret o.

²⁶Aap Nu wonage kagak, eerit nugu nogogwaarak nogo pogom, an aap aret ndaʼnagagirak woroorak eyom paga togop aret eerit nugu logogun o.

²⁷It aakumi mbi nunggwi, amburu nunggwi, aap nen kumi kologwe, kumi nen aap kologwe, eerit nugwi iigak, aap Nu yiiro wurik me unggwage mbareegi, yi yenggenit lagangge logonet, it ineebe abok aret ndonggoninabeegerak nogo o.

²⁸At Lot wonage kagak, eereegerak nogo ndak-ndak aakumi nen mbi nunggwi, amburu nunggwi, inamendek kunggologwe, inageerok onggo mbanggologwe, yabu waganggwi, o wukwi, ugun eerit nugwi iigak,

²⁹aap Lot o Torom nen wundi nage mbareegi, Ala mbogut paga nen yugum anggen kani inom wuppit wage logonet, it ineebe abok aret pup eerogo piyareegerak.

³⁰It maluk ugun eerit nugwi me, pup eerogo piyareegerak nogo ndak-ndak an aap aret ndaʼnagagirak nogo tenaʼme ari woroorak eyom paga togop aret eerit nugwi me, woraagin o.

³¹Kinamendek tilaabaga wonage kagak, kineebe nggween paga wonogwe me, an wage neenok, kinamendek tilabaga wonage nogo kola lagi nogwe, ndi, kit ando yabume wonogwe nogo kiniyok paga yungguninuk, kiname nogwe, eeriyak ti mage o.

³²At Lot akwe eereegerak nogo abeʼnip o.

³³Kit kineebe kinili yikkolamonggotak kenok, kobak aret arumunggup o. Ndi, kineebe wondet agago patumonggotak kenok, kinili aago aret logomunggup o.

³⁴Ti eyom paga oonikiya aap mbere tilaabaga nogo yugwi me, ambi wagangge, ambi teppege,

³⁵kumi mbere mbi worakwi me, ambi wagangge, ambi teppege,

³⁶ndi, aap mbere yabume wonogwe, me, ambi wagangge, ambi teppege, eeke kaamunggup o, yinuk, yokkiragi o,” yoragagerak.

³⁷Yorage mbareegi, at oone waganggwi nen, ”Ninogoba o. Ti nggeeme eeriyak yagan o?” Yogo mbareegwa, at Yetut nen, ”Wam pili agaatak wonage me time aret tiʼneebon ninggiko menggaarak o,” yinuk, yoragagerak.