Read Wano LUKAT 18 Bible Online

LUKAT 18 - Wano bible

LUKAT 18

¹Ti yorage nagagirik, aakumi iniki anggon-panggon eeginakaʼlek tamban mban eeko logowak nduk, Yetut wone yi eegu laarogo at oone waganggwi nogo yorage logonet,

²”O tini ambime aap wone owak loongga mendek ambi wonagagerak. Aap ti nen Ala agabiti mbake, ndi, aakumi inayuk wuke, eekaʼlek aret wonagagerak.

³Ndi, kwe togwe ambi time wonagagerak mban. Kwe ti nen nabenak mban aap wone owak loongga nogo yori nagak mban eeke logonet, At nimbirak ogoorak nogo an nobaalombok ugun eerit nege logokit nduk, kat nen non mbambaninuk logot o, yoge nagagerak.

⁴Yoge nagagerak nogo aap nogo nen aaʼnduk eebi mbareegerak kwe, peebi iniki koombunuk, An Ala nagabiti mbake, ndi, aakumi inayuk wuke, eekeelik kwe,

⁵kwe togwe yi, nabenik-nabenak mban ari me, piyaʼnabi wage logokwak, nggaruk togon noone non mbambunuk, logokit, mbareegerak o,” yoragagerak.

⁶Yorage nagagirik, at ninogoba endagembogut nogo nen, ”Aap wone owak loongga nen wone abe owak loongge logolik kwe, yereegerak nogo koneninip o.

⁷At Ala nen at apuri miirinabeegerak nogo inoone koʼlu-kiiʼme at yogwi iinok, inowak loonogo inawone abe amburu mbanigin lek mbakop? Logonuk negen inawone mbaniyak mbakop?

⁸Lek o. Mbet-mbet aret inowak loonogo inawone amburu mbanigin o, yinuk, yokkiragi. Togop aret eeginaburak kwe, an aap aret ndaʼnagagirak wage neenok, it aakumi nggween paga yime iniki noba panggombunuk, abet nombakwi iyaamun ilik, lek a?” yinuk, yoragagerak.

⁹Yorage nagagirik, it aakumi ando iniki nen, ”Aakumi ando ti, abu meek o, ndi, nit perak, obeelom aret o,” mbako nogogwaarak me, Yetut nen wone yi eegu laarogo yorage logonet,

¹⁰”Aap mbere ambi tamban eeruwok nduk, Ala awi wurik me unggwi nogogwaarak. Ambi ti, Pariti mendek, ndi, ambi ti, aap pemerintah inake kuwak eeka mendek wonogogwaarak.

¹¹Ala awi wurik me unggwi nogo nogogwaarik, aap Pariti nogo nen miʼnaʼnuk, tamban eekkolage logonet, Ai nogoba Ala! It aakumi ugun yogoot wagangga inom, maluk eeka inom, mbabi eeka inom, ndi, aap pemerintah inake kuwak eeka yi nogo inom, an togop kwak lek me, wa yokkege agarik o.

¹²An tamban ambi eerak paga ne mbere mbi nenggaʼlek nambe mage negen aret minggirak o. Namendek wonage kenok, ando mogonogo kat Ala kake pege minggirak o,

¹³yinuk, yoreegerak kwe, aap pemerintah inake kuwak eeka nogo nen perak, tayorogon miʼnage nagagirik, ena mbogut paga niʼnagaʼlek eebe wakkolage logonet, Ai, nogoba Ala! An maluk eeke minggirik me, nabuwa mbaru o, yinuk, yoreegerak.

¹⁴Imbirak tamban togop aret eereegwaarak kwe, tamban aaʼnduk eereegerak nogo lek o. Ata, peebi eereegrak nogo mban Ala nen iniki obeelom eeppege mbareegi, ame nagagerak. Aap ambi iniki tiyappake kenok, tebembege, ndi, iniki tebeppake kenok perak, tiyappege, eeke menggerak o, yinuk, yokkiragi o,” yoragagerak.

¹⁵Tiʼnuk, peebi aakumi nen elege-aabologwe nogo kunduk Yetut eenggi piginabuwak nduk, at owagam wogoret wogogwaarak. Wogoret wogwe at oone waganggwi nogo nen iigo nogogwaarik, mberirogogwaarak.

¹⁶Mberirogo mbareegwa, at Yetut nen elege-aabologwe nogo woraawak nduk, wiirage nagagirik, wogwe iigak, at oone waganggwi mendek nogo yorage logonet, ”It elege-aabologwe an nowagam wogwe me, teppiyaanip o. Ala abuʼme logorak ti, it yogop yi aret me, non mbambiigwi ti, mage o.

¹⁷It elege-aabologwe Ala abuʼme logorak nduk, unggwi nogo mengga kwak, kit togop aret unggwi nagaʼlek kiinok ti, unggwi namunggup lek aret o, yinuk, abet aret yokkiragi o,” yoragagerak.

¹⁸Ti yorage mbareegi, it aap Yakuri inowe ambi nen Yetut yoge logonet, ”Ngguru wae! Kat obeelom mban menggendak yi, an mondok-mondok neenik logokit nduk, nonggop eeri o?”

¹⁹Yoge mbareegi, at Yetut nen, ”Yi aap ndi aap lek o. Ata, at Ala alik aret obeelom mban menggerak me, kat nonggop nduk, Kat obeelom mban menggendak o, yo'negen?”

²⁰Yoge nagagirik, ”Wone yogop ee'nu, ndogop ee'nu, yokkirage logonet, Mbabi eeriyak mage o. Aap wariyak mage o. Aap inamendek yogoot woorak mage o. Pilit wone aap inoba piyoorak mage o. Kinagalo-kinogoba inoone konenggo logonip o, yinuk, yereegerak wone nogo kat keenu aret o.”

²¹Yoge mbareegi, aap nogo nen, ”An wone ti, abok aret wulaga mbuuluk paga nen liirogon aret eeke minggirak o.”

²²Yoge nogo at Yetut konengge nagagirik, ”Ti abok eeke menggendak kwe, ambit iluk ambi eeka'lek keegirak nogo yokkiri o. Kat kamendek abok aret onggo mbanogo it aap inamendek lek nogo tumburira nak o. Tumburira nage keenok, kamendek mbogut paga wonage kaamunggun o. Ti eeke logominggindik, nimbirak nugu logowok nduk, wa'nu o,” yinuk, yoreegerak.

²³Aap nogo nen Yetut yoge nogo aruk konengge nagagirik, eenggi warak lombok me, iniki abu wakkolagagerak.

²⁴At Yetut nen iniki wakkolage kage nagagirik, ”It aap ineenggi warak iinok, at Ala abu'me piige minggim unggwi noorak meek negen kagi o.

²⁵Unta wam liiru eno pelenak me unggwi noorak op negen kwe, aap ineenggi warak nogo perak, Ala abu'me piige minggim unggwi noorak ti, meek negen kagi o,” yoragagerak.

²⁶Yoragagerak it koneneegwaarak nogo nen Yetut yogo logonet, ”Ndi, ti kenok, taani inagap ndariyak o?”

²⁷Yogo mbareegwa, at Yetut nen, ”It aakumi nen eeriyak meek aret kwe, Ala nen eeriyak perak op o,” yinuk, yoragagerak.

²⁸Yorage mbareegi, at Peterut nen, ”Nit ninamindik-ninamendek mbo punuk, kat ninom nugu logorak nduk, wogoorak nogora?”

²⁹Yoge mbareegi, at Yetut nen, ”Aap ambi Ala abu'me logokit nduk, agalo-ogoba inom, owe-awot inom, akwe inom, aaganapuri inom, awi wurik inom, abok aret mbo piige kenok perak,

³⁰yogondak obaane'me apit aret wogorigin o. Ndi, peebi age yobok eyom nogo paga at mondok-mondok eenik aret logogin o, yinuk, abet aret yokkiragi o,” yoragagerak.

³¹Yorage nagagirik, ti'nuk, aap 12 nogo wogoret tayo yi nage nagagirik, ”Wologwe wae! Nit o Yerutalem wambi nogo ogoorik o. Wambi namonggoorak wonogwe me, it aap Ala wone yorogo nogogwaarak nabi-nabi nen an aap aret nda'nagagirak eeppaniyak liiru mbaneegwaarak nogo abok aret time aret a'me nggelok ari kaamunggup o.

³²Ala nen kooneegerak paga an aap aret nda'nagagirak nogo nooruwak nduk, aakumi endekem mendek wogoraagin o. Wogorage mbariminggi, an nenggali wakwi, miyuk-meya eerogo panugwi, inawoori noba lenggenogo panugwi, eerugun o.

³³Eeppaninuk, luulu yawi paga nooko logomenggaarik, neebe mondok aret noorugun o. Nooko mbarumengga, nogo mbere yinuk, neenik age logominggirik, mi'narigin o,” yinuk, yoragagerak.

³⁴Wone alom nobarak negen yoragagerak me, wone nogo abok aret it yelok kaga'lek kobak aret wonogogwaarak.

³⁵At Yetut o Yeriko wok yi nage kagak, aap ambi enegen mbuk me, tu nggwok ambet paga kwi'ndak ambe nggino ari nagagerak.

³⁶At aap nogo it aakumi apit inoone agan wogwe aruk konengge nagagirik, ”Yi nano agan wogwe agaarik ubi?”

³⁷Yorage mbareegi, it aakumi nen, ”Lek o! Yetut awi Nataret mendek nogo tu yi paga wage agaarik o.”

³⁸Yogo mbareegwa, aap nogo oone nggwok paga ari logonet, ”Yetut wae. Kat Ndawut ombooluk yi, nabuwa mbaru o!”

³⁹Yoge mbareegi, it inaa'nduk nogwe nogo nen aap nogo oone puk logowak nduk, mberereegwaarak kwe, kagak, abunuk oone nggwok nabenak mban ari logonet, ”Ndawut ombooluk yi, nabuwa mbaru o.”

⁴⁰Yogak mban ari mbareegi, at Yetut puk age nagagirik, aap nogo at owagam wonok woraawak nduk, yoragagerak. Yorage mbareegi, wonok at owagam pi wogo mbareegwa, Yetut nen aap nogo yoge logonet,

⁴¹”Kat an nonggop eekkaburak mba'nuk, ari agandik?” Yoge mbareegi, aap nogo nen, ”Nogoba o. Nenegen obeelom ee'naburak nduk, yokkigi o.”

⁴²Yoge mbareegi, Yetut nen, ”Kat kiniki noba panggombunuk, abet nombakendak paga kenegen obeelom agaarak me, kenegen pagak yu o.”

⁴³Nogo awo yoge kagak, at enegen pagak yereegerak. Enegen pagak ari mbareegi, Yetut imbirak nage logonet, Ala endage wogoppit nagagerak. Ndi, it aakumi abok eereegerak nogo kogo nogogwaarik, Ala alut eereegwaarak.