Read Wano LUKAT 19 Bible Online

LUKAT 19 - Wano bible

LUKAT 19

¹At Yetut o Yeriko unggwi nage nagagirik, nok-nok nage me,

²aap ambi endage Takeyut pemerintah inake kuwak eeka inowe eenggi abu warak lombok wonagagerak.

³At nogo nen, ”Yetut ti, nonggop kwe?” yinuk, pekkaakit nduk, eereegerak mendek anggup kuwagaluk, ndi, aakumi ambik kuwak eerak wonogwe me, pekkoorak meek agagerak.

⁴Meek age mbareegi, Yetut tu yi paga wage kagi, yinuk, kaakit nduk, at aa'nduk mbe agan nage nagagirik, eyo paga laganeegerak.

⁵Laganeegerak wonage me, at Yetut wok yi nage nagagirik, ena nikkage logonet, ”Takeyut wae. Yogondak kat kame nimbirak nogo yi noorak me, mbet wambi mok o.”

⁶Yoge mbareegi, Takeyut nogo nen mbet-mbet eyo paga nen wambi wage nagagirik, keyage wappunuk, ale'nggen mbakak imbirak aret at ame nogogwaarak.

⁷Yetut imbirak nage it aakumi nen kogo nogogwaarik, ineebi-ineeba yogo logonet, ”Aap maluk eeke menggerak imbirak ame nogo yuurak nduk, nogwe yi kiraap!”

⁸Yogo mbareegwa, at Takeyut nen it apit inenggaanom paga Yetut yoge logonet, ”Nogoba o. An namindik-namendek mogonogo aap ineenggi lek kenok, wogorage, ndi aap wi-wi aganake nagarak kero, obaane'me onggo 4 aret wogorage, eerikit o.”

⁹Yoge mbareegi, at Yetut nen, ”Kat kunduk Abarakam ombooluk aret me, kat kapuri kinom yogondak aret kinagap ndakkologop o.

¹⁰An aap aret nda'nagagirak yi, it aakumi kobak ogogwaarak nogo kwaarogo inagap ndarikit nduk, wambi wagagirak o,” yinuk, yoreegerak.

¹¹It aakumi nogo nen inaruk konenit nogwe iigak, at Yetut nen wone yoranet inom o Yerutalem wok yi wambi nogo nogogwaarik, it aakumi nen Ala abu'me piige minggim mbet-mbet tena'me ariyak mbakwi yelok iige nagagirik, wone ambi eegu laarogo yorage logonet,

¹²”Aap nagawan aput ambi nen o nda time nage neenok, aap nggwok nendagembogut mippanugwi iinok, woraakit o, yinuk,

¹³naakit nduk, eeke logonet, at ayeloman ineebe 10 wiirage nagagirik, wogo mbareegwa, awu 10 aret inalitak wogorage logonet, An waga'lek neegak, nawu yi nogo paga yi mendek ndi mendek kunit nogo logonet, ambinom nabenggo'net nogo logonip o.

¹⁴Yorage nagagirik, nagagerak. Nage kagak, at owe-awot nen at ineebi lombok ombako logonet, Kat yi ninowe kendagembogut ninarum logorak nineebi o, yori nawak nduk, inawuri nappiyareegwaarak.

¹⁵Nappiyareegwaarak yori nogogwaarak kwe, kagak, aap nogo endagembogut mippogo mbareegwa, ame wage nagagirik, Nawu nogo paga it mande nabenggolaarak kaamun? yinuk, ayeloman awu wogoragagerak nogo wiiragagerak.

¹⁶Wiirage mbareegi, ayeloman aa'nduk wagagerak nogo nen, Nogoba o. Kawu nogo paga 10 ambinom nabenggolagarak o.

¹⁷Yoge mbareegi, ogoba nen, Naput wa! Nayeloman obeelom kat aret me, abu op lombok eekendak o. Mbuuluk eeriyak mendek kwe, kagak, liirogon eerit nege nagandak me, yogondak o tini 10 unde logonok nduk, mippagi o.

¹⁸Yoge mbareegi, ambi ambokan wage nagagirik, Nogoba o. Kawu nogo paga 5 ambinom nabenggolagarak o.

¹⁹Yoge mbareegi, ogoba nen, Ndi, kat o tini 5 aret unde logonu o.

²⁰Yoge mbareegi, ambi ambokan wage nagagirik, Nogoba o. Kat kogogumbuk aret menggendak me, ndi, kogogumbuk logonet, kat nen puulik kwe, wagangge, ndi, awi yumbunulik kwe, anggen yugu mbanggolage, eeke menggendak me, nagabiti nen kawu nayuma nggerenak porogo wonagarak nogo yi o, yinuk, yoreegerak.

²¹

²²Yoge mbareegi, ogoba nogo nen ayeloman nogo yoge logonet, An eeriyak yokkege kwe, kobak menggendak kat nayeloman yi, koone yagandak nogo paga kenggali wappagi o. Nogogumbuk logonet, puulik kwe, wagangge, ndi, awi yumbunulik kwe, anggen yugu mbanggolage, eeke minggirak kat keenu menggendak kwe,

²³an wage neenok, nawu inom, porogo logomenggaarak onggo inom, an wa woraakit lak, it aakumi inawu nggwok aruwak nduk, eeko menggaarak nogo nonggop nduk, wogoraga'lek wonagagindak?

²⁴Yoge nagagirik, aakumi at inom wonogwe nogo yorage logonet, Nawu ambi at porogo wonage nogo ndinogo aap wu 10 nabenggolegerak nogo wogo'nip o.

²⁵Yorage mbareegi, it nen, Nogoba o. At ti, muk wu 10 wonage ti.

²⁶Yogo mbareegwa, at nen, It aakumi inamendek wonage kenok, ambinom luunogo wogorage, ndi, inamendek lek kenok, mbuuluk porogo wonage nogo aret ndingge, eeke kaamunggup o.

²⁷Ndi, it ninom ogoorak logonet, an inowe endagembogut inarum logorak, Nineebi o, yagaarak nogo perak, wogoret wogo logomonggotik, nenegen neegak, inoo'nip, yoragagerak o,” yinuk, Yetut nen aakumi nogo yoragagerak.

²⁸Yetut nen wone ti yorage nagagirik, at aa'nduk o Yerutalem nage me, oone waganggwi inom nogo logonet,

²⁹puut endage Tayitun eegwa'me o tini Mbetapage inom, Mbetaniya inom, imbirak panggo yi nogo nogogwaarik, at oone waganggwi mbere nappiige logonet,

³⁰O tini iruguna time nanip o. Awo mbo unggwi nogo logonet, keledai wam awo iluk aakumi amborowak paga kwi'naga'lek mberenak aret kinigen kogo logomonggotik, nogo aret piinogo wonok wa'nu o.

³¹It aakumi time nen, Kit nonggop nduk keledai wam piinggo ogotik o, yokkirogwe iinok, kit nen yorogo logonet, Nit ninogoba keledai wam lek me, wa nanip o, yo'nirage mbaki, wa wogo, yoraanu o,” yinuk, nappiyareegerak.

³²It nappiyareegerak nogo, nogo nogogwaarik, yoragagerak nogo ndak-ndak aret kogogwaarak.

³³Kogo nogogwaarik, keledai wam nogo piinggwi me, it aap inaanggo unde nogo nen, ”Keledai wam ti, nonggop nduk, piinggo ogotik o?”

³⁴Yorogo mbareegwa, it nen, ”Nit ninogoba keledai wam lek me, wa nanip o, yo'nirage mbaki, wa wogo o,” yorogo nogogwaarik,

³⁵wonok Yetut owagam pi wogogwaarak. Pi wogo nogogwaarik, inambogoyum endekem mendek nggoorogo wam amborowak paga lenggembogo nogogwaarik, Yetut amborowak paga kwippereegwaarak.

³⁶Kwippogo nogogwaarik, Yetut nage kagak, inambogoyum tu nggwok paga mbiganogo ndoombit nogogwaarak.

³⁷O Yerutalem panggo yi nogwe iigak, tu puut Tayitun wambi nogo menggam nogome aakumi at oone waganggwi mendek abok nen eerubok mendek ambik eerit nage nogo inigen kogo nogogwaarak me, inale'nggen nen keekok agan nogo logonet, Ala endage alut eerit nogogwaarak.

³⁸Keekok agan nogo logonet, ”Ala nen ninowe endagembogut nappi wagaarak yi, endage wogoppuwok o. It mbogut paga menggaarak nogo iniki tayenak logonet, ale'nggen mbakwi, ndi, it mbogut irimbaga lombok menggerak nogo Ala tiyappugwi, eeko logowak o,” yinuk, agan nogogwaarak.

³⁹Agan nogwe me, it Pariti mendek ando nen aakumi apit kuwak eeri wogogwaarak nogo inenggela'me logonet, Yetut yogwi, ”Ngguru wae. Koone waganggwi yi, mbereret o.”

⁴⁰Yogo mbareegwa, Yetut nen, ”It aap yi inoone puk logonetak en, yugum yi, inoone yogo logonetak o, yinuk, yokkiragi,” yoragagerak.

⁴¹Yorage nagagirik, o tini Yerutalem panggo yi nage nagagirik, enegen kage logonet, le yereegerak.

⁴²Le ari logonet, ”Kit aakumi Yerutalem mendek yi, yogondak yi eyom paga kit nonggop agago kiniki ugun obeelom logomunggup nduk, eeppinagarak nogo, Ineenu agabok agarak me, ao, kinombake kwe, yogondak kinigen kogwe kiyo, noberak wonage o.

⁴³Ala yi eyom aret niya wagaarak o, yinuk, yelok koolik me, kiname nen wundi nogwe kiyo, it kinom wim mbanak nen yagat wurogo pinagagwi, wanggekkinakwi, agi-ogu nen, iru-ogwe nen, yigikkinaburak nduk, panggo yi wogwe,

⁴⁴kinawi yugum paga wurik yi, yugum ambi obaga lu'luk agago logogin lek o. Langgonogo pogo logonet, kinapuri kinom abok aret mondok pup eerogo pinagagwi, eeriyak eyom panggoni woraagin o,” yinuk, yoragagerak.

⁴⁵Ti yoranuk, Ala awi wurik me unggwi nage nagagirik, it aakumi yi mendek ndi mendek onggo kunggologwe nogo mugogo wumbiige logonet,

⁴⁶”An nawi wurik yi, Tamban eeko menggam logorak o, yinuk, liiru mbaneegerak kwe, kit perak, aap yogoot wappunuk, kiraa'nari nogo menggam negen eekotak o,” yoragagerak.

⁴⁷Yetut ko'lu-kii'me Ala awi wurik me wone mamunirage nagagerak. Mamunirage nagagerak kwe, it Ala unde inoweewi inom, it Ala wone liiru mbanak unde inom, it aap paambanak inom, at Yetut nogo wariyak nduk,

⁴⁸eereegwaarak kwe, aakumi nen inikilom paga inigen at mban pik-pak ungwi me, ”Nonggop waruwi kwe?” yinuk, puk ogogwaarak.