Read Wano LUKAT 2 Bible Online

LUKAT 2 - Wano bible

LUKAT 2

¹Ti eyom paga aap endage Kayitat Agutut nen it aakumi yi awi ndi awi abok aret inendage liiru mbanuwak nduk, wone lengganeegerak.

²Inendage aa'nduk liiru mbaneegwaarak nogo ti, aap Kireniyut o Tiriya nggubereno wonage kagak, mbaneegwaarak.

³Inendage liiru mbanuwak nduk, it aakumi abok aret inawi alom paga lombok nogogwaarak.

⁴At Ndawut ombowologwe wiganak mendek Yutup nogo o Nggalileya tini Nataret nen o Yureya Ndawut nda'nagagim tini Mbe'lekem nogome aret nagagerak.

⁵Kwe Mariya Yutup miireegerak abila agagerak nogo imbirak inendage liiru mbanuwak nduk, nogogwaarak.

⁶Nogo nogogwaarik, wonogwe me, ndariyak enegen pagak ari mbareegi,

⁷aagaluk manggu aap aret ndareegerak. Ndake nagagirik, o aakumi nogo yugu menggam yagabit age mbareegi, elege nogo yum perenogo wam iname wam elak-lak paga wimbereegerak.

⁸O Mbe'lekem ando kundugu time it aap ndomba inarum menggaarak nogo nen oonikiya paga endekem karume inaanggumi inarum wonogwe me,

⁹it mbogut paga Ala yonggo nappiya wage menggerak melaikat ambi nu'lek me inowagam mi'nari wage kagak, ninogoba endegembogut eya pindambiige mbareegi, inagabiti ambik aganabeegerak.

¹⁰Inagabiti ambik aganake mbareegi, melaikat nogo nen, ”Kinagabiti mbarugup o. It aakumi abok aret iniki ale'nggen nggwok mbariyak obeelom wone nogo wonok yokkira wagarak me, kinaruk konenggo logonip o.

¹¹Kinagap ndaka ninogoba endagembogut Keritut nogo Ndawut nda'nagagim amulok paga nogome kinake aret yogondak nda'naga o.

¹²Elege ambi ayum perenogo andi'me wam elak-lak paga wi'ndak wonage kinigen ka nogo logomonggotik, Nogo yi aret, mbarumunggup o,” yinuk, yoragagerak.

¹³Awo yorage me, it mbogut paga yonggo nugu menggaarak melaikat apit aago nu'lek me kuwak ari wogo nogogwaarik, inom Ala endage alut eeko logonet,

¹⁴”At mbogut irimbaga lombok menggerak Ala nogo endage tiyappogo logowok o. Ndi, nggween paga yime it aap Ala inikilom inombake menggerak nogo iniki ugun tayenak aret logowak o,” yinuk, yogogwaarak.

¹⁵Yogo nogogwaarik, melaikat nogo nen it ndomba inarum menggaarak nogo teppiinok, iniyok paga mbogut paga laganggo mbareegwa, it aap ndomba inarum menggaarak nogo at ambi nen at ambi yogak eeko logonet, ”Eekerak ninogoba endagembogut nen yo'niragaarak nogo o Mbe'lekem pekka nawok o.”

¹⁶Yogo nogogwaarik, puu'nuk Mariya Yutup nogo nen elege nogo andi'me wam elak-lak paga wimbunuk, wonogwe me, pegiya nogogwaarak.

¹⁷Pegiya nogo nogogwaarik, melaikat nogo nen elege ndarak abok yoragagerak wone nogo mbininogo yorogogwaarak.

¹⁸Wone mbininogo yorogogwaarak nogo, it aakumi konenggo nogogwaarik, it abok aret, ”wi!” yinuk, pi wareegwaarak.

¹⁹Pi wareegwaarak kwe, at Mariya perak, wone agan nugwi nogo inikime liippatinuk, iniki koongge nagagerak.

²⁰Ndi, it aap ndomba inarum menggaarak nogo iniyok paga wogo logonet, melaikat nen it yorogogwaarak nogo ndak-ndak aret inaruk konenggwi, inigen kogwe, eeko nogogwaarik, Ala endage alut eerogo wogoppit wogogwaarak.

²¹Nogo 7 yinuk, elege nogo agabolo mbanggo mbareegwa, at agalo awo abila aga'lek kagak at mbogut paga yonggo nege menggerak melaikat nogo nen, ”Endage Yetut toonenu o,” yoreegerak nogo aret endage Yetut tooneegwaarak.

²²Endage toombunuk, Muta nen, ”Kumi inaagalogwe ndaganakwi kenok, Nogo ndogop yinuk, wundiyak o,” yinuk, Ala wone lengganeegerak liiru mbaneegerak nogo ndak-ndak, nogo yinuk, elege ninogoba endagembogut wogoruwok nduk, wonok o Yerutalem wogogwaarak.

²³Wonok wogogwaarak nogo ti, ninogoba endagembogut nen wone lenggangge logonet, ”Aap manggu nda'nage kenok ti, an kinogoba nendagembogut nake leenogo paniyak o.”

²⁴Ndi, ambi ari logonet, ”Towe muumayo negen ngguunok-kooli mbere'ndak ilik, towe merpati mbere a, warogo an kinogoba endagembogut wo'niriyak o,” yinuk, yereegerak liiru mbaneegerak nogo ndak-ndak eeruwok nduk, wonok wogogwaarak.

²⁵Aap Yerutalem mendek ambi endage Timeyon aret wonagagerak. At aap ti, iniki mondok koonak Ala wone liirogon aret eeke nagagerak. Eeke logonet, it aakumi Iterali mendek iniki eyak wappiya woroorak nogo tokkage nagagerak. Aberiniki at oba wonagagerak.

²⁶Aberiniki at oba wonage logonet, ninogoba endagembogut nen leenogo mippemenggerak Keritut nogo enegen kaga'lek kagak kambigin lek eenu eeppereegerak me,

²⁷Aberiniki nen Timeyon iniki kooneegerak paga Ala awi wurik me unggwage nagagirik, wonage me, Yetut agalo-ogoba nen Ala wone lengganeegerak liiru mbanak eeko nogogwaarak nogo ndak-ndak eeruwok nduk, elege Yetut wonok unggwi wogogwaarak.

²⁸Unggwi wogo mbareegwa, at Timeyon nogo nen elege eebe ogome waganogo Ala endage alut eeke logonet,

²⁹”Nogoba wa! Kat eerit nage nogo it endekem konenggulik mendek eya aganake, ndi, kapuri Iterali mendek inendage tiyappiige, eeruwak nduk, it yi aakumi ndi aakumi abok inake pipuk eerogo pereegindak ninagap ndaka nogo an lombok nenegen kagarak me, yogondak aret yo'nereegindak nogo ndak-ndak kat kayeloman an nogo niniki kwi'ndak logonet, keya woraakit nduk, teppanu o,” yinuk, yereegerak.

³⁰

³¹

³²

³³Elege abok yereegerak nogo agalo-ogoba nen konenggo nogogwaarik, ”Wi” yinuk, pi wareegwaarak.

³⁴Pi wakwi iigak, at Timeyon nogo nen ale'nggen agalo-ogoba inoba piige logonet, at agalo Mariya nogo yoge, ”Karuk logot o. At Ala nen elege yi, it aakumi Iterali mendek apit aret tiyappiige-tebeppiige, eeke logowak nduk, mippereegerak o. At nogo aakumi ineenu aruwak nduk, mippereegerak kagak, aakumi apit, Nineebi o, yinuk, yogwe nogo paga inikime mbakwi nogo tena'me age logogin o.

³⁵Ndi, kat kunduk, tege wooluwak paga kiniki ndanuk togon kooke negen kaamunggun o,” yinuk, yoreegerak.

³⁶Kwe Ala wone yorogo nogogwaarak mendek ambi aap Panuwen apuluk endage Kana anebunu Atiyet mendek aret wonagagerak. Kwe nogo ogonggelo wagangge nagagirik, imbirak wonage kagak 7 tahun aret eeke nagagirik,

³⁷ti'nuk, togwe kagak 84 tahun eereegerak me, abu kweegelo aret agagerak. Ala awi wurik me nen wundi naga'lek mondok time aret Ala obaalombok eeke logonet, liingge-oonikiya nen mbi nengga'lek ambe mage negen eeppunuk, tamban mban eeke nagagerak.

³⁸Ne ti eyom paga lombok kwe nogo wage nagagirik, ”Nogoba Ala wa!” yinuk, at ambi nen aakumi Yerutalem mendek piinogo piya woroorak tokkogwe nogo elege ndarak nogo abok paganogo yoragagerak.

³⁹Ninogoba endagembogut wone lengganeegerak liiru mbanak nogo agalo-ogoba nen abok aret li'luk eerogo pogo nogogwaarik, iniyok paga iname o Nggalileya tini Nataret aret wogogwaarak.

⁴⁰Ndi, wulaga nogo tawe age, yi wone ndi wone eenu age, eeke logonet, iniki warak lombok agagerak. Ndi, Ala ale'nggen at oba aret wonagagerak.

⁴¹Yetut agalo-ogoba nogo nen tahun ambi wage paga ndomba wam warogo Patika laruwok nduk, o Yerutalem nagak eeko nogogwaarak.

⁴²It wologwe ndarak iigak, 12 tahun ogwe kenok, Patika laruwok nduk, nagak eeko nogogwaarak me, wulaga Yetut nogo ndarak kagak 12 tahun age mbareegi, inom Patika laruwok nduk, nogogwaarak.

⁴³Laago larak nogo nenok, agalo-ogoba iname ugun wogwe iigak, wulaga Yetut nogo inom woroolik o Yerutalem aret puk agagerak.

⁴⁴Agalo-ogoba nogo ineenggo'lek logonet, aakumi komaarak inenggela'me inom wage mbakak wogo nogogwaarik, nogo yuurak nduk eeko logonet, wulaga nogo eebe lek mbareegi, owe-awot a, oreewi a, inom wonage kero, kwaareegwaarak.

⁴⁵Kwaareegwaarak mendek, eebe lek aret mbareegi, iniyok paga o Yerutalem kwaari nogogwaarak.

⁴⁶Kwaari nugwi iigak, nogo mbere yinuk, Ala awi wurik me, it aap ngguru-ngguru inenggela'me kwi'ndak logonet, inoone konengge, at nen it ineegwa'me wagangge, eeke wonage me kwaakkogogwaarak.

⁴⁷It aap apit at oone koneneegwaarak nogo nen at wone abok eenu logonet, wone onggo yorage nogo kogo nogogwaarik, ”Wulaga yi abok eenu logonet, ari wi!” yinuk, pi wareegwaarak.

⁴⁸Agalo-ogoba nogo nen wulaga nogo kwaakkogo nogogwaarik, ”Iya!” yinuk, agalo nen, ”Naagaluk o. Kat nonggop nduk, togop eeppinanggendak o? Kogoba nimbirak niniki piirik logonet, kwaakkabit wogoorak yi, niyet o.”

⁴⁹Yoge mbareegi, at nen, ”Kit nonggop nduk, an kwaa'nabit wogotak? An nogoba awi wurik me logorak agaarak ti, kit kineenggo'lek me kwaa'nabit wogotak?”

⁵⁰Yoragagerak kwe, it yelok kaga'lek aret wonogogwaarak.

⁵¹Ti'nuk, at inom o Nataret wogo nogogwaarik, at agalo-ogoba inabu'me logonet, inoone liirogon konengge kagak, at agalo nogo nen perak, it aakumi agan nugwi nogo inikime liippake nagagerak.

⁵²Ndi, at Yetut perak, iniki warak age, eebe tawe age, eeke kagak, Ala inom, aakumi inom, iniki ale'nggen ombako nogogwaarak.