Read Wano LUKAT 20 Bible Online

LUKAT 20 - Wano bible

LUKAT 20

¹Peebi ne ambi paga at Yetut Ala awi wurik me logonet, wone mamunirage, obeelom wone yorage, eeke me, aap Ala unde inoweewi inom, it Ala wone liiru mbanak unde inom, aap inanggok inom, at owagam wogogwaarak.

²Owagam wogo nogogwaarik, ”Kat yi eekak ndi eekak eeke menggendak nogo, ta oone paga eeke menggendak? Ta nen yokkereegerak paga eeke menggendak? Yo'niret o.”

³Yogo mbareegwa, at Yetut nen, ”An kunduk wone ambi kin wakkiya o.

⁴At Yaya yiime wuppiige nagagerak nogo ti, mbogut paga nen yoreegerak paga wuppiige nagagerak a, aakumi nen yoreegwaarak paga wuppiige nagagerak a? Yo'ninip nda!”

⁵Yorage mbareegi, it-it wone mbanggo logonet, ”Nit nen, Mbogut paga nen yoreegerak paga eeke nagagerak o, yogwi niinok, at nen, Ndi, ti kenok, kit kiniki at oba panggombunuk, abet mbaka'lek nonggop nduk, wonogogutak? yo'niraagin o.

⁶Ndi, nit nen, Aakumi nen yoreegwaarak paga eeke nagagerak o, yogwi niinok, iya! It aakumi abok aret, At Yaya Ala wone yorage menggerak nabi mendek aret wonagagerak, mbakwi me, yugum paga ninoorugun o,”

⁷yinuk, yogo nogogwaarik, at yogo logonet, ”Ta oone paga wuppiige nagagerak nit nineenggo'lek o.”

⁸Yogo mbareegwa, at Yetut nen, ”Ndi, ti kenok, an kunduk, ta nen yo'nereegerak paga eeke minggirak nogo yokkiraagin lek o,” yinuk, yoragagerak.

⁹Ti yorage nagagirik, wone eegu laarogo it aakumi apit yoragagerak nogo yi aret o. ”Aap ambi nen anggur awi yari nage nagagirik, at eyabu yarak me arum piinok, o nda time logonuk, woraakit nduk, nagagerak.

¹⁰Nagagerak time wonage kagak, anggur anggen yugu nogo kole age mbareegi, it at eyabu yarak arum piinok nagagerak nogo nen anggen yugu mbanogo wogoruwak nduk, ayeloman ambi inowagam nappi wagagerak. Nappi wagagerak wage mbareegi, it at eyabu yarak me arum wonogwe nogo nen ayeloman wagagerak nogo eebe yawi wappogo nogogwaarik, anggen mbanogo wogorulik aret we nappereegwaarak.

¹¹We nappereegwaarak ame nage mbareegi, ayeloman ambi alik nappi wagagerak. Nappi wagagerak wage mbareegi, at kunduk, eebe wappogo nogogwaarik, enggali warogo anggen mbanogo wogorulik aret we nappereegwaarak.

¹²Nappereegwaarak ame nage mbareegi, ayeloman alik ambi nappi wagagerak. Nappi wagagerak wage mbareegi, at nogo kunduk, yawi warogo wumbereegwaarak.

¹³Aap nappiya wagagerak nogo togop mban aret eeppiigo mbareegwa, aap yabu yarak unde nogo nen ari logonet, An nonggop eeri o? An naput niniki kunik yi, nappikit o. Nappege neenok, at ayuk wurogo waganggwi iyaamun ilik, lek a? yinuk, nappi wagagerak.

¹⁴Nappi wagagerak wage mbareegi, it aap at eyabu yarak arum wonogwe nogo nen aput wage inigen kogo nogogwaarik, it-it wone mbanggo logonet, Aput eyate koloorak yi aret me, eyate nit aret kolaawam, aput yi mondok waruwok o, yinuk,

¹⁵wulaga nogo wage mbareegi, eebe yabu yarak me nen mugogo endekem wumbunuk, mondok wareegwaarak. Ti eereegwaarak nogo at yabu yarak unde nogo nen it aap ti, nonggop eeginabigin mbakop?

¹⁶Lek o. Wage logominggirik, it eyabu arum wonogwe nogo inoorogo piinok, inobaane'me it aap alik arum logowak nduk, mippiya woraagin o,” yinuk, yoragagerak. Yorage nogo it konenggo nogogwaarik, ”Togop eeriyak mage o, nogoba.”

¹⁷Yoge mbareegwa, at Yetut nen it pegiige nagagirik, wone yorage logonet, ”It yugum o wuko menggaarak nogo nen, o wuko logonet, yugum ambi mbo pereegwaarak nogo yugum ogowa ndoonnaga o, yinuk, yereegerak Ala wone liiru mbanak nogo ti, ngge nduk mbaneegerak mbakop?

¹⁸It aakumi yugum ti paga ngginnari wogwe iinok, ineebe kalenak-pugunik eerogo wambugun o. Ndi, yugum ti nen abut loguk togon aakumi inoba ngginnari wage kenok perak, ineebe mondok yigirik-noonom eerogo piige logonet, liirubu aa'nggan pogom eerogo piyaagin o,” yinuk, yoragagerak.

¹⁹It Ala wone liiru mbanak unde inom, it aap Ala unde inoweewi inom, nen, ”Wone eegu laarogo yegerak ti, nit niinok yigi o,” yinuk, yelok kogo nogogwaarik, ne ti eyom lombok Yetut pigaawok nduk, eereegwaarak kwe, aakumi inagabiti nen puk ogogwaarak.

²⁰It Ala wone liiru mbanak unde inom, it aap Ala unde inoweewi inom, nogo nen Yetut inigen wonok nugu logowak nduk, inawuri nappiyareegwaarak. Aap nappiyareegwaarak nogo nen, ”Yetut oone ninggin yemenggerak paga yilumbunuk, eebe pigogo at aakumi inarum menggerak nggubereno nogo nen awone mbanuwak nduk, pi nawok o,” yinuk, ”Nit aap abet ninombaruwak,” mba'nuk, inoone abet ndom-ndom agan nugu nogogwaarak.

²¹Agan Yetut owagam nogo nogogwaarik, kin wakkogo logonet, ”Ngguru wae! Kat wone ari menggendak inom, mamunirage menggendak inom ti, abet mban ari logonet, aap ambi iya, ndi ambi meek, ti mbaka'lek nit eekwi paga Ala ari menggerak wone pagak togon mamunnirage menggendak nineenu me,

²²aap pemerintah endagembogut Kayitat ake puurak op a, mage a?”

²³Yogo mbareegwa, at Yetut nen it at ambokan laganggwi yelok iige nagagirik, yorage logonet,

²⁴”Mbuti wu ambi titi'ninip o,” yorage nagagirik, wogogo mbareegwa, ”Ta enete ogobakkigirik endage liiru mbanak mbakop?” Yorage mbareegi, it nen, ”Lek o. Ti Kayitat aret o.”

²⁵Yogo mbareegwa, at Yetut nen, ”Ndi, ti kenok, Kayitat amendek ti, Kayitat aret wogogwi, ndi, Ala amendek ti, Ala aret wogogwi, eeko logonip o,” yinuk, yoragagerak.

²⁶At wone yoragagerak nogo paga aakumi inenggaanom wone ambi yilunogo oba puurak meek kogo nogogwaarik, we, ”Wi!” yinuk, puk ogogwaarak.

²⁷Ti'nuk, peebi it aap Taruki aakumi kambunuk, ineenik a'nuk mi'narugun lek yogo menggaarak nogo mendek ando nen Yetut owagam wogo nogogwaarik,

²⁸at kin wakkogo logonet, ”Ngguru wae. At Muta nen, Aap ambi kwe wappunuk, apuluk ndaka'lek kagak kangge kenok, owe obaane'me apuluk ndagaruwak nduk, awot nen at owe togwe kolaawak o, yinuk, liiru mbanniragagerak me,

²⁹aap ambi apuri ineebe 7 aret ndaganabeegerak. At manggu ndarak nogo nen kwe wagangge nagagirik, aput ndaka'lek kagak kambeegerak.

³⁰Kangge mbareegi, awot manggu ambo'me mendek inom,

³¹ti'nuk, at awot ambokan mendek inom, ti'nuk, it ineebe 7 ndarak apit togop mban kwe nogo waganggwi, inapuri ndaganaka'lek iigak, kanggwi, mban eerit nogogwaarak.

³²Kanggo mbareegwa, peebi kwe nogo kunduk kambeegerak.

³³It aap ineebe 7 nogo nen kwe nogo waganggwi-kanggwi eeko nogogwaarak me, peebi aakumi kambunuk, ineenik agago mippiyoorak eyom nogo paga kwe ti, aap ta akwe arigin mbaken o?” yinuk, yoreegwaarak.

³⁴Yogo mbareegwa, at Yetut nen, ”It aakumi yogondak wonogwe yi nen aap nen kumi wogonakwi, kumi nen aap wogonakwi, eeko menggaarak kwe,

³⁵at Ala nen, It aap yi obeelom aret me, ninom logowok nduk, kambunuk nogo menggam nen ineenik agago mippiyaakit, mbake nogo perak, Ala nen mippiige mbariminggi inom logonet, aap nen kumi wogonakwi, kumi nen aap wogonakwi, eeko logogun lek aret o.

³⁶Ala nen it aap nogo ineenik agago mippiyamenggerak Ala apuri lombok logonet, mbogut paga yonggo nugu menggaarak melaikat nogo pogom arumenggaarak me, peebi kambugun mondok lek o.

³⁷It aakumi kambeegwaarak ineenik agago mippiyaagin nogo ti, at Muta kunduk eyo alokwi kani wunuk ari kagak ari koneneegerak wone nogo mbininogo liiru mbangge logonet, Ninogoba endagembogut ti, aap Abarakam inom, Itak inom, Yakup inom, inogoba Ala aret o, yinuk, liiru mbaneegerak ti paga it kambeegwaarak nogo Ala nen abet aret ineenik agago mippiige menggerak kogo o.

³⁸At Ala nen it aakumi abok ineenik wonogwe iige menggerak me, at ti, it aakumi kambunuk lek agaatak inogoba endagembogut lek o. Ata, ineenik menggaarak inogoba endagembogut aret o,” yinuk, yoragagerak.

³⁹Yorage mbareegi, it Ala wone liiru mbanak unde nogo nen wone ambinom kin wakkoorak inagabiti ogogwaarak me, we, ”E o, Ngguru. Op yagan o,” yinuk, yoreegwaarak.

⁴⁰

⁴¹At ambinom kin wakkoorak inagabiti mbako mbareegwa, at Yetut nen it yorage logonet, ”At Ala nen leenogo mippereegerak Mesias nogo ti, Ndawut ombooluk o, yogwe ti nonggop yogwe mbakop?

⁴²At Ndawut lombok nen mbuku Matimut paga wone liiru mbangge logonet, At ninogoba endagembogut nen an nogoba endagembogut yoge logonet,

⁴³Nogoba o. It kinom wim mbanak menggendak nogo aan lebenogo kabu'me piiga'lek neegak, neenggi abe'nggan logonok nduk, neya mok, yoreegerak o, yinuk, liiru mbaneegerak nogo ti,

⁴⁴at Ndawut nogo nen, Nogoba endagembogut o, yinuk yoreegerak nogo kwe, nonggop togon at ombooluk aret logorak mbakop? Kit yinip nda!” yinuk, yoragagerak.

⁴⁵Yorage nagagirik, aakumi apit konenggwi iigak, at oone waganggwi nogo yorage logonet,

⁴⁶”It Ala wone liiru mbanak unde nogo nen inambogoyum iyo'mot langgumbunuk nugwi, yi mendek ndi mendek kunggo menggam time aakumi nen nit mban keyage wappinaniyak mbakwi, it Yakuri tamban eeko menggam aap nggwok kwi'nogo menggam kwi'nogwe, laago lako logonet, aap nggwok kwi'nogo menggam kwi'nogwe, eeriyak inikilom mbako menggaarak me, kinambokan laganggwi iyo, kiniki tum wakkologo logonip o.

⁴⁷It aap ti, kumi togwe inamendek tigippugwi, aakumi iya inombaruwak nduk, tamban nggorek eekwi, eeko menggaarak me, it aakumi ando maluk onggo mbuuluk inoba piige logonet, it aap ti perak, maluk onggo nggwok aret inoba piyaagin o,” yoragagerak.