Read Wano LUKAT 22 Bible Online

LUKAT 22 - Wano bible

LUKAT 22

¹Roti mbi piika'lek mendek laago endage Patika lariyak eyom panggoni wagagerak me,

²it Ala unde inoweewi inom, it aap Ala wone liiru mbanak unde inom, aakumi inagabiti nen, ”Yetut nonggop agago waruwi o?” yinuk, koonit nugu nogogwaarak.

³Koonit nugwi me, at Ibilit nen it aap 12 nogo ambi endage Yurat Ikariyot inikime unggwagagerak.

⁴Unggwage mbareegi, it aap Ala unde inoweewi inom, it Ala awi wurik arum wako nogogwaarak inoweewi inom, ”Yetut warubagip nduk, nonggop agago wokkira o,” yinuk, inom wone mbani nagagerak.

⁵Inom wone mbani nage mbareegi, it iniki ale'nggen mbako logonet, ”Onggo wu wokkiruwok o,” yogo mbareegwa,

⁶at Yurat nogo nen, ”E o,” ari nagagirik, ”Aakumi lek me, o ngge eyom paga eebe pigogo wogoroorak koonnage kaamun?” yinuk, tokkage nagagerak.

⁷Tokkage me, roti mbi piika'lek mendek laago lako logonet, ne iyaalok ndomba warogo Patika lariyak eyom age mbareegi,

⁸at Yetut nen Peterut Yaya imbirak nappiige logonet, ”Ndomba warogo Patika larogo nit nawok nduk, pipuk eerogo pugwi a nanip o.”

⁹Yorage mbareegi, it nen, ”Nit nggeeme pipuk eerogo pugwi a nawi o?”

¹⁰Yogo mbareegwa, at Yetut nen, ”Kit o tini time unggwogo logomonggotik, aap ambi yugum yiiwak mendek yi toolak ambi wonok nage me, kinom abuk a'nuk, at ame unggwage kenok, kinom aret unggwi nanu o.

¹¹Kinom unggwogo logomonggotik, aap o unde nogo yogo logonet, At ninogoba Ngguru nen, An noone waganggwi ninom ndomba warogo Patika larogo noorak o ko ogoorak ngge? yo'nu o, yo'niragaarak me, yokkogo o.

¹²Yogwi kiinok, tilaabaga ko nggwok ogoorak ambi ndigik-ndegek aago me yokkirage kenok, time aret larogo pogo logonu o,” yinuk, nappiyareegerak.

¹³Nappiyareegerak nogo nogogwaarik, yoragagerak nogo ndak-ndak aret kogo nogogwaarik, time aret ndomba wam warogo Patika aret larogo pereegwaarak.

¹⁴Larogo pereegwaarak nogo noorak eyom panggoni wage mbareegi, Yetut nen nappiigak nduk leenogo piyareegerak nogo inom kwi'nogogwaarak.

¹⁵Kwi'nogo nogogwaarik, ”An noba aaninggin-paaninggin eeppanega'lek kagak, ndomba Patika larak yi, ninom nawok lak ao, lombok mbake minggirak o.

¹⁶Peebi Ala abu'me piige minggim logonet, Alom yi nduk nonggo nogogurak kagi, yinuk, kin koorak eyom a'me lik yi naga'lek kagak, an nagin lek me, yogondak aret ninom nawok lak ao, lombok mbake minggirak o, yinuk, abet aret yokkiragi o.”

¹⁷Ti yorage nagagirik, yiiwak eenggime wappunuk, ”Nogoba Ala wa!” yinuk, ”An yogondak kuli paga nen nok peebi Ala abu'me pinagarak eyom ari waga'lek kagak an eyoonggen amburu yi, nengga'lek aret logogin me, waganogo tumbukkolaanip o, yinuk, yokkiragi o.”

¹⁸

¹⁹Yorage nagagirik, roti eenggime wappunuk, ”Nogoba Ala wa!” yinuk, karerogo tumburirage logonet, ”An neebe kit kinake punik nogo yi aret me, noba abe'nako logonet, nonggo logonip o.”

²⁰Yorage nagagirik, nonggo mbareegwa, amburu toolak togop aret tumburirage logonet, ”Ala kinom lambumbinagarak nduk, wone ngget mendek abok yokkirage nogo kit abet mbarubagip nduk namiya kilirik kwak yi aret o,” yinuk, tumburiragagerak.

²¹Tumburirage nagagirik, ”Wologwe! Kinaruk logonip o. An nooruwak nduk, aakumi yoraagin nogo ninom mbi nengge yime agaarik o.

²²An aap aret nda'nagagirak nogo ee'naburak koonak nogo ndak-ndak aret ee'nabigin kwe, at nooruwak nduk aakumi yoraagin nogo perak abuwa o.”

²³Yorage mbareegi, ”Ta nen eeriyak kenok yigi o?” yinuk, it mban-mban kin wat-wat yereegwaarak.

²⁴Kit wat-wat yogo nogogwaarik, ti'nuk, ”An iya, kat iya,” yogo logonet, wone wako nogogwaarak.

²⁵Wone wakwi me, at Yetut nen it yorage logonet, ”It aakumi endekem mendek inoweewi endagembogut nen inoone omaawi paga inapuri lengganinakwi, ndi, it aap inapuri inarum menggaarak nogo nen, Ninogobamini o, yo'niroorak mbakwi, eeko menggaarak kwe,

²⁶kit perak, togop yogo logogup o. Aap nggwok ambi kinenggela'me wonage kenok, at wulaga mbuuluk pogom aret aruwak o. Ndi, at wone punggirage menggerak nogo kinayeloman aret aruwak o.

²⁷Ta nen aap nggwok wonage mbakop? At mbi nengge menggerak ti, iya ilik, at tumburirage menggerak ti, iya a? Lek o. At nengge menggerak iya nogo lek a? Togop kwe, an kinenggela'me logonet, kinayeloman pogom eeke agarik o.

²⁸Aaninggin-paaninggin noba age kagak, kit an mbo panulik mondok ninom wonogo monggotak me,

²⁹an nogoba nen an aakumi inarum logokit nduk, unde eeppaneegerak nogo ndak-ndak,

³⁰kit an nabu'me piige minggim mbi nunggwi, yi nunggwi, ndi, aakumi wone lengganinako menggam logonet, aakumi Iterali inanebunu 12 nogo inowak loonggwi, eeko logobagip nduk, unde eeppinagagi o,” yinuk, yoragagerak.

³¹Yorage nagagirik, ”Timon wae! Karuk logot o. Gandum eebe leennaruwak nduk, ameneno ndegenggo mengga kwa, at Ibilit nen kat togop aret eekkaburak nduk, Ala yoge mbaki, E o, yoreegerak kwe,

³²kat kiniki noba panggombunuk, abet nombake nogo lek age kero, an kake tamban eekirak o. Yungguninuk kiyok paga nowagam wage logominggindik perak, kawuri yi, inomaawi eeppiige logomunggun o,” yinuk, yoreegerak.

³³Yoge mbareegi, at Timon nen, ”Nogoba o. Keele maarogo mambiigo menggam mambagagwi, mondok kookwi, eekwi kenok, an nimbirak ee'naburak op aret mbakirak o.”

³⁴Yoge mbareegi, at Yetut nen, ”Peterut wae. Yogondak aret ayam oone yaga'lek kagak, kat ne kenagan paga, Yetut ti, an neenggo'lek ari, keyaagin o, yinuk, yokkigi o,” yoreegerak.

³⁵Yorage nagagirik, it apit yorage logonet, ”An nen kinawu nggerenak inom, wokkirogwe iinok yonggoliyak yum inom, kiniyogogut nggerenak sepatu inom, wonok noorak mage o, yokkirage mbareegi, nogo logonet, kit kinamendek ambi lek kenok, Ao, mbako nogogutak ilik, lek a?” Yorage mbareegi, it nen, ”Ambit iluk ambi, Ao, mondok mbarulik aret o, ninogoba.”

³⁶Yogo mbareegwa, at Yetut nen, ”Yogondak perak, kit ambi kinawu nggerenak wonage kenok waganggwi, wokkirogwe iinok yonggoliyak yum wonage kenok waganggwi, kit ambi tege wooluwak lek kenok, kinambogoyum endekem mendek paga ambi kunggologwe, eeko logonip o.

³⁷An eeriyak nduk, liiru mbaneegwaarak nogo a'me lik yuurak me, Ala nen ari logonet, At aap maluk mendek inom ineenggi linggininabeegwaarak o, yinuk, yereegerak liiru mbanak nogo an eeriminggirak nogo paga a'me lik yuurak kenok, yokkiragi o.”

³⁸Yorage mbareegi, it nen, ”Tege wooluwak mbere yi o, ninogoba.” Yogo mbareegwa, at Yetut nen, ”Abu yogo o,” yinuk, yoragagerak.

³⁹Yoraanuk nogome nen wundi nage nagagirik, puut Tayitun paga lagi nage nagagerak me, aret lagi nagagerak. Nage me, at oone waganggwi mendek nogo inom nogogwaarak.

⁴⁰Nogwe me, at noorak mbareegim nogome aret nogo nogogwaarik, it yorage logonet, ”Maluk eeriyak kiniki nggagani wage kero, tamban mban eeko logonip o.”

⁴¹Yinuk, yugum namburogo nappugwi nogo kwak, at tayo yi nage nagagirik, endobanggun yindumbunuk, tamban eereegerak.

⁴²Tamban eeke logonet, ”Ai, nogoba! An ee'naburak yiiwak toolak kwak nogo kat woorak mbakendak kenok, wamen o. Ndi, lek kenok, an eeriyak mbake nogo mbo punuk, kat eeriyak mbake nogo mban aret eerikit o.”

⁴³Yoge mbareegi, yonggo mbogut paga nugu menggaarak melaikat mendek ambi mbogut paga nen at owagam tena'me ari wage nagagirik, iniki eyak wappereegerak.

⁴⁴Eyak wappege mbareegi, iniki abu puru agan unggwage me, abuwa warak nggo-nggo tamban ambinom eeke kagak, liigak wuundamo eeke logonet, amiya anggen kilirik pogom nggween paga wambit nagagerak.

⁴⁵Tamban eeppunuk, mi'nage nagagirik, at oone waganggwi mendek inowagam wage nagagirik, iniki abu puru agan nage mbareegi, nogo yugwi me, iya wagagerak.

⁴⁶Iya wage nagagirik, ”Kit nonggop nduk nogo yugu ogotik o? Maluk eeriyak kiniki nggagani wage kero, mi'na'nuk, tamban mban eeko logonip o,” yinuk, yoragagerak.

⁴⁷Wone ti awo yorage me, it aap 12 mendek ambi endage Yurat nogo nen aa'nduk wage kagak, aap ineebe aago ambokan wogogwaarak. It wogwe iigak, at Yurat aa'nduk Yetut kambugiriyak nduk, owagam panggo yi wage mbareegi,

⁴⁸at Yetut nen, ”Yurat wae! Kat kambu'niriminggindak nogo paga an aap aret nda'nagagirak nogo aakumi nen nooruwak nduk, wogoroorak mbakendak ya?”

⁴⁹Yoge mbareegi, it at Yetut inom wonogogwaarak nogo nen it eeruwok nduk, wogogwaarak nogo yelok iigo nogogwaarik, ”Ninogoba wae. Tege wooluwak paga inooruwi a?”

⁵⁰Yogwi iigak, it ambi nen aap Ala unde inowe ayeloman aruk abe'nggan tabok togon nappereegerak.

⁵¹Tabok togon nappege mbareegi, at Yetut nen, ”Togop eeriyak mage o,” yinuk, wulaga nogo aruk eenggi pigagangge nagagirik, obeelom eeppereegerak.

⁵²Obeelom eeppege nagagirik, at Yetut nen it at pigaawok nduk wogogwaarak Ala unde inoweewi inom, it Ala awi wurik arum wako nogogwaarak inoweewi inom, it aap inanggok inom, nogo yorage logonet, ”Aap yogoot wagangga piginabi nogo mengga kwak, an togop aret pi'nabuwok nduk, tege wooluwak inom, yawi ogobakkigirik inom, wonok wogotak ya?

⁵³Ko'lu-kii'me Ala awi wurik me ninom neegak, pi'nabulik kwe, at o yumaak unde menggerak nogo kinom ee'naburak eyom yogondak yi aret me, ee'nip o,” yinuk, yoragagerak.

⁵⁴Yorage mbareegi, pigaganggo nogogwaarik, piginok, aap Ala unde inowe endagembogut ame pi nogogwaarak. Pi nogwe iigak, Peterut nogo inambokan yanabek nagagerak.

⁵⁵Ala unde inowe endagembogut nogo ame pi nogo nogogwaarik, at awoore'nggam kani kumbunuk, kwi'ndak wonage me, Peterut nogo inenggela'me aret kwi'nari nagagerak.

⁵⁶Kwi'nari nagagerak wonage me, kolaga ambi kani kunik eya paga Peterut eebe inom kwi'ndak wonage kage nagagirik, at enegen looge logonet, ”Aap yi kunduk, imbirak wonage kagarak o.”

⁵⁷Ari mbareegi, Peterut nen lik-lek eekkolage logonet, ”Kolaga! Aap ti, an neenggo'lek o,” yoreegerak.

⁵⁸Yoge mbareegi, peebi aap alik ambi nen Peterut kage nagagirik, ”Kat kunduk at mendek aret keegi o.” Yoge mbareegi, at Peterut nen, ”Wulaga! An abu lek ubi!”

⁵⁹Yoge mbareegi, ti'nuk peebi 1 jam negen eeppunuk, aap alik ambi oone panggok togon Peterut yoge logonet, ”Aap yi Nggalileya mendek me, at kunduk imbirak wonagaarak abet aret kagi o.”

⁶⁰Yoreegerak kwe, Peterut nen, ”Wulaga! Kat yagandak ti, an mondok neenggo'lek aret o.” Awo yoge kagak, ayam oone ku yereegerak.

⁶¹Oone ku ari mbareegi, ninogoba endagembogut ena logurogon Peterut pekkage mbareegi, Peterut nogo nen, ”Yogondak ayam oone awo yaga'lek kagak, kat ne kenagan paga, Yetut an neenggo'lek yumunggun yo'negerak nogo yi aret yigi,” yinuk, abeke nagagirik,

⁶²endekem wundi nanuk, le iniki apit agagerak.

⁶³It aap Yetut porogo wonogwe nogo nen Yetut agi'ndok kanggo logonet, yawi paga wako nogogwaarak.

⁶⁴At enegen nobappunuk, ambinom wako logonet, ”Ta nen kooke kagan? Yu nda!”

⁶⁵Yinuk, inoone apit wonggok togon yogo logonet, at miyuk-meya eerogo pogo nogogwaarak.

⁶⁶Ndi, o wege mbareegi, it Yakuri aap inanggok aap Ala unde inoweewi inom, aap Ala wone liiru mbanak unde inom, kuwak eereegwaarak. Kuwak eeppunuk, it wone amburu mbanggo menggam time Yetut wonok nogo nogogwaarik, at yogo logonet,

⁶⁷”Ala nen leenogo mippereegerak nogo kat aret kenok, yo'niret o.” Yogo mbareegwa, at Yetut nen, ”An yokkirage neenok, kit abet nombakwi,

⁶⁸ndi, an nen kit kin wakkiige neenok, kit nen onggo yo'nugwi, eerumunggup lek me an nonggop yokkira?

⁶⁹Yogondak en perak, an aap aret nda'nagagirak nogo Ala omaawi ambik menggerak eenggi abe'nggan mi'ndak wonage neyaamunggup o.”

⁷⁰Yorage mbareegi, it abok aret at yogo logonet, ”Ndi, ti kenok, kat Ala aput ilik?” Yogo mbareegwa, at nen, ”Ti kit nen aret yogop o.”

⁷¹Yorage mbareegi, it nen, ”At oone yegerak lombok nit muk konenggoorak me, wone ambi ngge yo'niraawak nduk, yogo ogoorik? Lek aret o!” yinuk, yereegwaarak.