Read Wano LUKAT 5 Bible Online

LUKAT 5 - Wano bible

LUKAT 5

¹Ti'nuk, peebi ne ambi paga at Yetut yi Nggenetaret yenggenak aa'nggi paga mi'ndak wonage me, it aakumi apit aret Ala wone inaruk konenuwok nduk, yagabit-kagabit kuwak eeri wogo mbareegwa,

²at Yetut nogo nen it aap ikan wagangga nen inaro mbo punuk, inayum ikan waganggo menggaarak nogo kooko logonet, inaro mbere yi aa'nggi paga pugu kage nagagirik,

³to ambi Timon aro nogo paga unggwage nagagirik, ”Yi aa'nggi paga nen we mbuuluk panggo yi ungguwok o,” yinuk, Timon yo'nuk, imbirak unggwogo nogogwaarik, yiiro paga kwi'ndak logonet, it aakumi apit kuwak eerak nogo wone mamuniragagerak.

⁴Mamunirage nagagirik, Timon yoge logonet, ”Yi alobok ambik me, aru taati ari unggwogo logomonggotik, ikan ambik woorak nduk, kinayum nogo wuppi nanip o.”

⁵Yoge mbareegi, Timon nen, ”Ai nogoba. O kii'me nen wuppugwi tit niigak wagangga'lek aret o wegerak kwe, yo'niragandak me, wuppi nawi o.”

⁶Yinuk, wuppi nogo nogogwaarik, ikan mondok iya tit waganeegwaarak me, yum nogo abu nibik yuurak eereegerak.

⁷Yum nibik yuurak eeke mbareegi, inoreewi to ore paga wonogwe nogo yeenggwaara woraawak nduk, ineenggi walok yorogogwaarak. Yorogo mbareegwa, wogo nogogwaarik, ikan waganogo to imbirak a'ne korok togon yonggoleegwaarak me, aaninggin nen yiiro nogo imbirak yi inikime tebenikit nduk, eereegerak.

⁸Timon nen yiiro nogo imbirak tebenikit nduk eeke kage nagagirik, Yetut abu'me tebe yinuk, ”Nogoba o. An aap abu maluk mendek me, nogole mbaganu o,” yinuk, yoreegerak.

⁹Ikan apit waganeegwaarak nogo paga at oreewi inom inagabiti ambik aganabeegerak me nduk yoreegerak.

¹⁰At Peterut oreewi Taberi apuri Yakobut Yaya imbirak nogo inom inagabiti mbakwi iigak, Yetut nen Timon yoge logonet, ”Kagabiti mbarugun o. Ikan wagangge menggendak kwak, o yogondak en aakumi wogonake logomunggun o,” yinuk, yoreegerak.

¹¹Yoge mbareegi, yiiro nogo yi aa'nggi paga pi wogo nogogwaarik, yi mendek ndi mendek mbo punuk, Yetut inom nogogwaarak.

¹²Ti'nuk, peebi ne ambi paga at Yetut o tini ambime wonage me, aap ambi awin aaga'ne oba kuurik lek aago wonagagerak. Aap nogo Yetut enegen kage nagagirik, abu'me tebe yinuk, oone nabek togon yoge logonet, ”Ai, nogoba. Kat nen obeelom ee'naburak mbake kenok, obeelom ee'naburak op o.”

¹³Yoge mbareegi, at Yetut eenggi nderogon pigagangge logonet, ”Obeelom eekkaburak mbakirak me, obeelom agago pagi o,” wone awo yoge kagak, at awin nogo lek aret agagerak.

¹⁴Lek aret age mbareegi, at Yetut nen, ”Aakumi abu yoraagun o. At Ala unde enegen keyaawak nduk, owagam nak o. Obeelom eekkakirak me, at Muta nen. Ala ake ndogop puurak o, yereegerak nogo it aakumi keyaawak nduk, pi nak o,” yinuk, aruk warogo nappereegerak.

¹⁵Aruk warogo nappereegerak kwe, Yetut eeke nagagerak wone nogo abunuk wigak ari mbareegi, yi aakumi ndi aakumi apit aret at oone konenggwi, andi-pandi kenok ineebe obeelom aganake, eeruwak nduk, at owagam kuwak eeri wagak mban eeko nogogwaarak.

¹⁶Togop aret eeko nogogwaarak kwe, at Yetut karume aakumi lek me time tayo yi nage nagaatik, tamban eekak eeke nagagerak.

¹⁷Ne ambi paga Yetut wone mamunirage me, it aap Pariti inom, it aap nggwok Ala lengganeegerak liiru mbanak wone mamunirogo nogogwaarak mendek inom, iname o Nggalileya nen, Yureya nen, Yerutalem nen, wogo nogogwaarik, we ugun kwi'ndak logonet, Yetut oone konenggo nogogwaarak. Aakumi andi obeelom eeginabuwak nduk, ninogoba endagembogut omaawi at Yetut eeppege kagak, eeke nagagerak.

¹⁸Nogome wonogwe me, aap ambi eenggi-iyok nggilik-nggelok aago me, aap nen eewu'nuk, Yetut owagam pi ungguwok nduk, eereegwaarak.

¹⁹Eereegwaarak mendek it aakumi apit yebet aago me, pi ungguurak meek age mbareegi, wonok o kirin paga laganggo nogogwaarik, pelan ndenenogo eewurik inaani aakumi apit inenggela'me Yetut owagam wuppereegwaarak.

²⁰Wuppogo mbareegwa, Yetut nen it iniki at oba panggombunuk, abet mbakwi yelok iige nagagirik, aap andi nogo yoge logonet, ”Wulaga! Kat komaluk lek eerogo pagagi o.”

²¹Yoge mbareegi, it aap Ala wone liiru mbanak unde nogo inom, it aap Pariti inom, nen iniki mbako logonet, ”Aap Ala miyuk-meya eerogo pege yi ta mbakop? Nit maluk eekwi at Ala nen mban lek eerogo pinanege menggerak nogo lek a?” yinuk, iniki mbareegwaarak.

²²Mbakwi Yetut yelok iige nagagirik, yorage logonet, ”Kit nonggop nduk kiniki togop mbako ogotik?

²³Komaluk lek eerogo pagagi, yoriyak ti, iya ilik, mi'na'nuk kame nak, yoriyak ti, iya? Kit yinip nda!”

²⁴Yorage nagagirik, ”An aap aret nda'nagagirak nggween paga yime logonet, aakumi inomaluk lek eerogo piyoorak unde Ala nen an aret mippaneegerak kit kineenu arubagip nduk, yogirak o,” yorage nagagirik, at eenggi-iyok nggilik-nggelok aago nogo yoge logonet, ”Mi'na'nuk, kat nogo yege menggendak kagare'ngga nogo ti ko'nok kame nak o, yinuk, yokkigi o.”

²⁵Awo yoge kagak, aap nogo it apit inenggaanom page mi'nage nagagirik, at nogo yege nagagerak agare'ngga nogo ko'nok ame nage logonet, Ala endage wogoppit nagagerak.

²⁶Nogo nage kagak, it eeke kogogwaarak nogo paga iniki lek age mbareegi, Ala endage wogoppogo logonet, ”Yogondak ninigen kogolik mendek kogoorak me, ninagabiti iya!” yinuk, yereegwaarak.

²⁷Ti eeppunuk, at Yetut endekem wundi nage nagagirik, aap pemerintah inake kuwak eeko menggaarak mendek ambi endage Leewi wu kuwak eeko menggam kwi'ndak wonage kagagerak. Kage nagagirik, ”Nimbirak nawok nduk, mok o.”

²⁸Yoge mbareegi, yi mendek ndi mendek abok aret mbo punuk, mi'na'nuk Yetut imbirak nagagerak.

²⁹Ti'nuk, aap Leewi nogo ame Yetut anoniya nggwok lareegerak. Lareegerak me, it aakumi kuwak aago apit aap pemerintah inake kuwak eeko menggaarak inom, aakumi ugun nogo mendek inom, laago noorak nduk, Yetut Leewi imbirak inom kwi'ndak wonogwe me,

³⁰it aap Pariti inom, aap Ala wone liiru mbanak unde inom, Yetut oone waganggwi mendek ineebi-ineeba inombako logonet, ”Kit nonggop nduk, it aap pemerintah inake kuwak eeka inom, it aap maluk eeko menggaarak inom, kinom mbi nonggo ogotik o?”

³¹Yorogo mbareegwa, at Yetut nen, ”It aap kugi andi lek kenok ti, Ndotet ka noorak mbakulik o. Ata, andi kenok mban obeelom aganabuwak nduk, Ndotet ka noorak mbako menggaarak.

³²An aakumi iniki koonak inayonggo pikit nduk woroolik o. Ata, maluk eeko menggaarak nen it maluk eekwi nogo iniki koombunuk, mbo puwak nduk, aret wagagirak o,” yinuk, yoragagerak.

³³Yorage mbareegi, it aap Pariti nogo nen at Yetut yogo logonet, ”It aap Yaya oone waganggwi ti, nabenak mban mbi nengga'lek inambe mage negen logonet, tamban eeko menggaarak. Ndi, nit aap Pariti ninoone waganggwi ti, togop aret eeko menggaarak kwe, kat koone waganggwi perak, we ugun mbi nunggwi, niyo nunggwi, eeko menggaarak.”

³⁴Yogo mbareegwa, at Yetut nen, ”Aap akwe kolage me, owe-awot inom laago lako logonet, Kit kinambe mage negen puk logonip o, yinuk, owe-awot nogo yoroorak op mbakop?

³⁵Owe-awot iigak, ogonggelo mban wonok noorak eyom panggoni wage nogo paga perak, mbi nengga'lek inambe mage negen puk logogun o,” yinuk, yoragagerak.

³⁶Yorage nagagirik, wone eegu laarogo yorage logonet, ”Mbogoyum ngget mendek ambi nibinogo mbogoyum maan mendek nogo paga nabenogo penggaakwi kenok, mbogoyum ngget nibinggwi nogo maluk age, ndi, yum ngget mendek nibinogo waganggwi nogo yum maan mendek nogo paga nabenogo penggaakwi kenok, enete imbirak ndak-ndak ageelik alik age, eeke menggerak me, mbogoyum ngget mendek ambi nibinogo mbogoyum maan mendek nogo paga nabenogo penggaakulik o.

³⁷Eyoonggen amburu ngget mendek yiiwak wam agabolo maan ogobakkigirik me tookwi kenok, amburu ngget mendek nen yiiwak maan mendek nogo tubunogo mappege logonet, amburu lek age, ndi, yiiwak nogo maluk age, eeke menggerak me, eyoonggen amburu ngget mendek yiiwak wam agabolo maan ogobakkigirik me, tookulik o.

³⁸Eyoonggen amburu ngget mendek ti, yiiwak wam agabolo ngget ogobakkigirik me aret tooko menggaarak.

³⁹Ndi, eyoonggen amburu maan mendek ti, Ombat abe o, yinuk, yogo menggaarak me, eyoonggen amburu maan mendek nenok, ngget mendek, Wo'niru o, yinuk, ti yogolik o,” yinuk, yoragagerak.