Read Wano LUKAT 6 Bible Online

LUKAT 6 - Wano bible

LUKAT 6

¹Ne ambi it aap Yakuri tamban eekwi paga at Yetut oone waganggwi inom gandum yarak me tu paga nogo logonet, at oone waganggwi mendek nen gandum parum negen wa'nuk, ineenggi paga arinom mondenogo mbo pegak nenet nogo nogogwaarak.

²Nenet nogwe iigak, it Pariti mendek ando nogo nen, ”Tamban eekwi paga togop eeriyak mage yugu kagak, kit nonggop nduk eerit nogo ogotik?”

³Yorogo mbareegwa, at Yetut nen, ”At Ndawut inom, at inom nogogwaarak inom, mbi abu mbareegi,

⁴Ala awi wurik me unggwage nagagirik, roti mbi Ala ake pugu nogo it weelek noorak lek Ala unde kenok mban nonggo logorak yugu kagak, waganogo nengge nagagirik, ando at inom nogogwaarak wogoragagerak nogo kit liiru mbanak pekkaga'lek ogotik?”

⁵Yorage nagagirik, ”Tamban eekwi paga eerit nogo logorak unde nogo ti, aap aret nda'nagagirak an aret o,” yinuk, yoragagerak.

⁶Ti'nuk, peebi ne ambi it aap Yakuri tamban eekwi paga Yetut tamban eeko menggam unggwi nage nagagirik, wone mamuniragagerak. Wone mamunirage me, aap eenggi abe'nggan kambak negen taati wonagagerak me,

⁷Yetut mamunirage kagak, it aap Ala wone liiru mbanak unde inom, it aap Pariti mendek inom, nen, inoone at oba puwok nduk, ”Yetut tamban eekwi paga aap obeelom eeke kaamun ilik?” yinuk, inigen pik-pak agago pogo nogogwaarak.

⁸Inigen pik-pak agago pugwi iigak, it mbakwi nogo at Yetut yelok iige nagagirik, aap eenggi kambak negen nogo yoge logonet, ”Mi'nage logominggindik, oolo yayi mok o,” yoge mbareegi, aap nogo mi'na'nuk, oolo aret mi'nari nagagerak.

⁹Nage mbareegi, Yetut nen it yorage logonet, ”Tamban eekwi paga obeelom eeginaburak ti, op ilik, maluk eeginaburak ti op a? Aakumi ineebe inili yuurak ti, op ilik, inooriyak ti, op a? Kit yinip nda!” yinuk,

¹⁰at enegen pegiinet nage nagagirik, aap nogo yoge logonet, ”Keenggi nggingget o.” Yoge mbareegi, ngginggage nagagirik, eenggi obeelom aret agagerak.

¹¹Eenggi obeelom aret agagerak kwe, it perak, iniki inanini arit unggwage logonet, ”Yetut nonggop eerogo puwi o?” yinuk, wone mbaneegwaarak.

¹²Ti eyom paga Yetut tamban eerikit nduk, puurom lagi nagagerak. Lagi nage nagagirik, oonikiya Ala yoge tit kagak, o wereegerak.

¹³O wege mbareegi, at oone waganggwi nogo woraawak nduk, wiiragagerak. Wiiragagerak wogo mbareegwa, aap ineebe 12 miirogo leeninake nagagirik, inanebunu, ”Nappiigak,” aret tooninabeegerak.

¹⁴Leenogo piyareegerak nogo ti, Timon endage ambi Peterut tooneegerak nogo inom, at Timon awuluk Andereyat inom, Yakobut Yaya imbirak inom, Pilitut Mbarotolomeyut imbirak inom,

¹⁵Matiyut Tomat imbirak inom, Alipeyut aput Yakobut inom, Timon aap Telot mendek yogo nogogwaarak nogo inom,

¹⁶Yakobut aput Yurat inom, ndi, Yurat Ikariyot Yetut onggo mbaneegerak nogo inom, leenogo piyareegerak.

¹⁷At Yetut leenogo piyareegerak inom puurom paga nen wambi wogo nogogwaarik, kobak paga time puk ogogwaarak. Puk ogo mbareegwa, at oone waganggwi apit inom, aakumi ambik o Yureya mendek inom, o koota Yerutalem mendek inom, o Tirut Tiron yi aa'nggi paga wonagagerak nogome mendek inom, at Yetut oone konenggwi, kugi andi kunik obeelom eeginake, eeruwak nduk, at owagam kuwak ari wogogwaarak.

¹⁸It aakumi kugi ogole warak mendek inikime unggwagak mban eeko nogogwaarak nogo inom obeelom eeginabeegerak.

¹⁹At Yetut omaawi inikime liinik wonage nogo wundi nage logonet, aakumi obeelom eeginabit nege me, it aakumi abok aret Yetut pigaawok nduk, eereegwaarak.

²⁰Togop eekwi me, at Yetut nen at oone waganggwi nogo enegen pegiige nagagirik, yorage logonet, ”Kit aap kinamendek lek yi, Ala abu'me pinagarak me, kiniki ale'nggen mbako logonip o.

²¹Kit yogondak abu wonogwe yi, ndonggoppinagarak me, kiniki ale'nggen mbako logonip o. Kit yogondak le yogwe yi, i'ndok kambuurak eekkinabigin me, kiniki ale'nggen mbako logonip o.

²²It aakumi yi, inombomini nen Ala wone yorogo nogogwaarak eeppiyareegwaarak pogom, an aap aret nda'nagagirak nogo noone waganggotak paga ineebi kinombako logonet, leenogo mbo pinagagwi, miyuk-meya eerogo pinagagwi, Aap yi maluk o, yinuk, kinendage tebembinagagwi, eekwi iinok, kiniki ale'nggen mbako logonu o.

²³Kinake aago mbogut paga ambik wonage me, ti eeppinagagwi nogo eyom paga keyage wako logonet, kiniki ale'nggen nen ndawi lubuk yogo logonu o.

²⁴Ndi, kit kineenggi warak wonogwe yi perak, kit kiniki muk ugun tayenak wonogwe me, kinabuwa o.

²⁵Kit yogondak mbi ndonggoppinagagerak yi, peebi abu eekkinabigin me, kinabuwa o. Kit yogondak i'ndok kanggwi yi, peebi kiniki puru ari logonet, le yumunggup me, kinabuwa o.

²⁶It aakumi yi, inombomini nen aap pilit wone yorogwe iigak kwe, tiyappiigo nogogwaarak nogo ndak-ndak, it aap abok en kinendage tiyappinagagwi iinok, kinagabiti mbako logomunggup o,” yinuk, yoragagerak.

²⁷Yorage nagagirik, at Yetut nen, ”Kit an noone konenggwi yi, wone ambi yokkira o. It kinom ogoorak monggotak ti, kiniki kunik eeginakwi, ineebi kinombakwi nogo obeelom eeppiigwi,

²⁸it inanini nen kugi pulunogo pinagagwi nogo kiniki ale'nggen inoba piigwi, it maluk eeppinagago menggaarak nogo inake tamban eekwi, eeko logonip o.

²⁹Ndi, kinagandin peenok paga kinookwi iinok, peenok aret wogorogwe, kinayum togwi yum waganggwi iinok, kinayum agi yirika ili yugup o. Ata, inom aret wogorogwe,

³⁰nggino yokkirogwe iinok, aret wogorogwe, eeko logonip o. Kinamendek waganggwi iinok, Wo'ninip o, yoroorak ti mage o.

³¹Aakumi nen, Ndogop eeppinaniyak ao, mbako monggotak nogo ndak-ndak eeppiigo logonip o.

³²It aap maluk eeka nogo nen iniki kunik eeginakwi iinok mban iniki kunik eeginako menggaarak me, it eekwi ti mban eekwi kiinok, onggo koloorak mbakop?

³³Ndi, it aap maluk eeka nogo nen it obeelom eeppiigwi iinok mban obeelom eeppiigo menggaarak me, it eekwi ti mban eekwi kiinok, ambi koloorak mbakop?

³⁴It aap maluk eeka nogo nen, Peebi ndak-ndak wo'niraagun o, yinuk, inoreewi wogorogo menggaarak me, kit nen, Peebi wo'niraagun o, mbako logonet, wogorogwe kiinok, ti paga nonggop eekkoloorak mbakop? Mondok lek o, noreewi.

³⁵Kit perak, at tiyanak lombok menggerak nen it aap maluk mendek iniki lambek-nggoonak menggaarak nogo iniki kunik aganake menggerak me, kit nen it kinom ogoorak monggotak kiniki kunik eeginako logonet, obeelom eeppiigwi, Peebi wo'niraagun, mbaka'lek logonet, ugun wogorogwe, eekwi kiinok, kit an napuri aret o, yinuk, kinake pugu iya tit wokkirage kaamunggup o.

³⁶Kinogoba nen aakumi inabuwa mbake logonet, obeelom eeppiige minggi kwak, kit ndak-ndak inabuwa mbako logonet, obeelom eeppiigo logonip o,” yinuk, yoragagerak.

³⁷Yorage nagagirik, ”Kit nen kinoone omaawi paga perak togon aakumi yorage logonet, Kit maluk o, yinuk, yoraagup o. Kinoone omaawi paga perak togon yorogwe lek kiinok, Ala nen perak togon, Kit maluk o, yinuk, yokkiraagin lek o. Kit nen aakumi inenggali wappiyaagup o. Inenggali wappiiga'lek kiinok, Ala nen kit kinenggali wappinagagin lek o. Kit nen it aakumi maluk eeppinagagwi nogo mi eerogo pogo logonip o. Mi eerogo pugwi kiinok, Ala nen kit kinomaluk lek eerogo pinagagin o.

³⁸Ugun wogorogwe kiinok, ugun wokkirogwe kaamunggup o. Togolowa'na eno korok togon yonggoppunuk, nggwik-nggwik eeke, tebenogo wuppege, eeppunuk, a'nggan ngginu-ngginu wangge kagak, kinabu'me ngginggirogo mengga kwak, ndak-ndak wokkirage kaamunggup o. Wakkagak nogo paga wakkaanuk aakumi wogorogo monggotak nogo ti, ndak-ndak wakkaanuk wokkirage kaamunggup o,” yoragagerak.

³⁹Yorage nagagirik, wone ambi eegu laarogo yorage logonet, ”It aap inigen mbuk mban-mban ineenggi pit-pit noorak op mbakop? Imbirak yigeebu wambuurak lek mbakop?

⁴⁰It wone mamunirogo menggaarak nogo tebenak iigak, waganggo menggaarak nogo tiyanak wonogolik o. It mamunggologo menggaarak nogo abu mamunggologo logomenggaarik perak, mamunirogo menggaarak ndak-ndak aret logogun o.

⁴¹Eyo nggwok mbanak kinigen me milinik wonage nogo maloppega'lek logonet, kit kinore enegen anggup nonggop nduk maloppogo ogotik?

⁴²Ndi, eyo nggwok mbanak kit kinigen me worekkaga'lek logonet, Nore. Kenegen anggup worekkeya, ti nonggop togon yoriyak mbakop? Aap pilit pugungga kit aret! Eyo nggwok mbanak kit kinigen me milinik wonage nogo aa'nduk mbo nappunuk, kinore enegen anggup worekkoorak op kaamunggup o,” yinuk, yoragagerak.

⁴³”Eyo obeelom nen anggen maluk mendek yegeelik o. Ndi, eyo maluk nen anggen obeelom mendek yegeelik mban.

⁴⁴Yi eyo ndi eyo eebe anggen yege paga ineenu ogo menggaarak. Kit eyo ara anggen nogo eyo poondo alokwi paga yugume waganggulik o. Ndi, anggur anggen nogo keele tagana'le paga yugume waganggulik mban.

⁴⁵Aap abe mendek inikime yugu abe mendek nogo paga obeelom mban eeke menggerak. Ndi, aap maluk mendek inikime yugu maluk mendek nogo paga maluk mban eeke menggerak. Inikime uum kilu-kilu wungge logonet, ambe paga nen ari menggerak o,” yoragagerak.

⁴⁶Yorage nagagirik, ”Kit an yokkirage minggirak nogo eeka'lek logonet, nonggop nduk, Ai nogoba! Ai nogoba! mban yo'nogo ogotik?

⁴⁷It aakumi an nowagam wogo nagaatik, an noone konembunuk, eerit nugu menggaarak pogom yokkira o.

⁴⁸Aap o wukwi nogo pogom it aret o. Aap ambi nggween taberogon lombok kabungge nagagirik, yugum abena ndoonak paga lombok o eyak kwippi wambeegerak. Kwippi wambeegerak me, peebi yi wu'nuk wage logonet, o wurik langgonikit nduk eereegerak mendek o omaawi ambik wurik me, nu'lek wonagagerak.

⁴⁹Ti nu'lek wonagagerak kwe, it aap an noone konembunuk, eekulik nogo perak, aap ambi o eyak nggween teberogon wurabulik, we obaga aret kwippunuk, o wureegerak me, yi wu'nuk wage logonet, langgok togon ee'nuk wungge logonet, yigiriknonom mondok iya tit eerit nagagerak nogo pogom it aret o,” yinuk, yoragagerak.