Read Wano LUKAT 7 Bible Online

LUKAT 7 - Wano bible

LUKAT 7

¹At Yetut aakumi inenggaanom wone abu yorage nagagirik, o Kaperenaum unggwi wagagerak.

²Unggwi wage nagagirik, wonage me, it aap yigin unde inowe ambi ayeloman iniki kunik mendek me, andi warak abu kambuurak eeke wonagagerak.

³Aap nogo Yetut eerit nage nogo konengge nagagirik, at ayeloman obeelom eeri woraawak nduk, aap Yakuri inoweewi yonggo nappiyareegerak.

⁴Nappiyareegerak Yetut owagam wogo nogogwaarik, inoone nabek togon yogo logonet,

⁵”At aap ti, aakumi nit mendek ninom niniki kunik ee'ninake, ndi, at lombok nit tamban eeko monggom o wuppinanege, eereegerak me, ayeloman obeelom eeri noorak ti op o.”

⁶Yogo mbareegwa, Yetut inom nagagerak. Aap nogo ame awo wok yi nage kagak, aap yigin unde nogo nen oreewi yonggo at Yetut owagam nappiya wagagerak. Nappiya wagagerak Yetut owagam wogo nogogwaarik, ”Ai ninogoba! Aap ninore yigin unde nen, Iyok aanom warogo woraagurik o. An aap mbuuluk me, at nen an name unggwi woroorak meek o.

⁷Ndi, at owagam noorak kunduk, an mbarulik mban o. Oone mban yemenggerak paga nayeloman obeelom arigin o.

⁸An kunduk noweewi inabu'me logonet, inoone konengge, ndi, an nawuri yigin unde nogo nabu'me logonet, an noone konenggwi, eeko logonet, ambi, Nak o, yoge neenok, nage, ambi, Mok o, yoge neenok, wage, ndi, nayeloman ambi, Yi eeru o, yoge neenok eeke, aret eeko menggaarak me, yori nanip o, yinuk, nappinani wagaarak me yokkogo o,” yinuk, yoreegwaarak.

⁹Yoreegwaarak Yetut aruk konengge nagagirik, ”Wi!” yinuk, pi wake nagagirik, aakumi mugurok wogwe nogo ena logurogon pegiige logonet, ”It aakumi Iterali mendek nogo kunduk, at iniki noba panggombunuk, abet nombake yogop ambi an kaga'lek aret agarik o, yinuk, yokkiragi o.”

¹⁰Yorage mbareegi, yonggo wogogwaarak nogo iname iniyok paga nogo nogogwaarik, ayeloman andi warak nogo muk obeelom agagerak me, ka nogogwaarak.

¹¹Ti'nuk, peebi Yetut o tini ambi endage Nayin nage me, at oone waganggwi inom, aakumi apit inom, nogogwaarak.

¹²O tini tu pak ambe mbanak me wok yi nage me, kwe togwe ambi aagaluk aap ambolom ndarak me kangge mbareegi, eewu'nuk nogwe iigak, it aakumi apit o tini time menggaarak inom, agalo inom, wogwe iyareegerak.

¹³Ninogoba endagembogut kwe nogo kage nagagirik, abuwa ambik ombake logonet, ”Le ari mage o.”

¹⁴Yoge nagagirik, aap eewurik wonok wogwe me panggo yi nage nagagirik, eenggi pigaganeegerak. Eenggi pigagangge mbareegi, aakumi eewurik wonok wogwe nogo puk ogo mbareegwa, at Yetut nen, ”Wulaga! Mi'na'nok nduk, yokkege agarik o.”

¹⁵Yoge mbareegi, wulaga kanggerak nogo mi'nage nagagirik, oone aret yereegerak. Oone ari mbareegi, Yetut nen wulaga nogo agalo wogoreegerak.

¹⁶Wogoge mbareegi, it aakumi apit inagabiti ambik a'nuk, Ala endage wogoppogo logonet, ”Aap Ala wone yorogo menggaarak nabi nggwok ambi ninenggela'me nen mi'naga o,” ndi, ambi, ”At Ala nen at apuri wonde'niya waga o,” yinuk, yereegwaarak.

¹⁷Yetut eereegerak wone nogo o Yureya enaagan-ambokan abok aret wigak yereegerak.

¹⁸Agan nugwi nogo at Yaya oone waganggwi nen Yaya yoreegwaarak.

¹⁹Yogo mbareegwa, at Yaya nen at oone waganggwi mendek mbere wiirage nagagirik, wogo mbareegwa, yorage logonet, ”At woroorak nogo kat aret wagandak ilik, alik ambi woraagin nduk tokkogo logomun a? At ninogoba endagembogut nogo yori nanip o,” yinuk, nappiyareegerak.

²⁰Nappiyareegerak nogo Yetut owagam nogo nogogwaarik, Yetut yogo logonet, ”At Yaya Yiime Wuppiige Menggerak nen, Woroorak nogo kat aret wagandak ilik, alik ambi woraagin nduk, tokkogo logomun a? yokkiruwak nduk, yonggo nappinani waga o,” yinuk, yoreegwaarak.

²¹Ti eyom paga at Yetut nen it apit kugi andi kunik inom, kugi andi yagan warit nugwi inom, kugi ogole warak mendek inikime unggwagagerak inom, nogo apit aret obeelom eeginake, inigen mbuk nogo apit obeelom eeppiige, aganake me, wogogwaarak.

²²Wogogwaarak nogo nen wone nogo Yetut yogo mbareegwa, at Yetut nen, ”Eeke kinigen kogotak inom, kinaruk konenggotak inom ti, Yaya yori nanip o. Inigen mbuk mendek inigen obeelom ogwe, inendop maluk mendek tu op nogwe, inawin aaga'ne kunik mendek lek ogwe, inaruk logu mendek inaruk konenggwi, kanggaarak ineenik agago mippiige, ndi, aap inamendek lek nogo obeelom wone yorogwe, eeke nogo yori nanip o.

²³Kit an eeke minggirak paga kineebi nombakulik kiinok ti, kinale'nggen aret logomunggup o,” yinuk, yoragagerak.

²⁴Yorage mbareegi, it Yaya yonggo nappiya wagagerak nogo nen iname nogwe iigak, Yetut nen Yaya abok aakumi yorage logonet, ”Kit nano mendek kaawok nduk, karume aakumi lek me nogotak? Piinde nogo o wiya nen nage-wage eeke kaawok nduk, nogotak ya?

²⁵Nano mendek kaawok nduk nogotak? Aap ambi yum kigirikwe yirik kaawok nduk, nogotak? Wologwe! Yum kigirikwe yikwi, obeelom mban wonogwe, eekwi nogo ti, aap inendagembogut iname nogome mban menggaarak o.

²⁶Nano kaawok nduk, nogotak? Aap Ala wone yorage menggerak nabi mendek kaawok nduk, nogotak? Wologwe! At Ala wone yorogo menggaarak nabi mendek aret kwe, at mondok nggwok tiyanak lombok aret o, yinuk, yokkirage agarik o.

²⁷At Ala nen, Kat noorak tu yaruwak nduk, an nen yonggo aa'nduk nappege neyaamunggun o, yinuk, an yo'nereegerak wone liiru mbanak nogo ti, at Yaya aret yinuk, yereegerak o.

²⁸Aap Yaya endage warak lombok nda'nagagerak kokwak it kumi inaagalogwe togop ti, ambi ndaganakulik kwe, Ala abu'me piige minggim time it tebenak wonogwe nogo Yaya tiyanak irimbaga lombok aret logogun o, yinuk, yokkiragi o.”

²⁹Yoragagerak nogo it aakumi abok aret aap pemerintah inake kuwak eeko menggaarak inom konenggo nogogwaarik, at Yaya nen it yiime wuppiyareegerak me, ”Ala ti, abu obeelom eeke menggerak o,” yinuk, yereegwaarak.

³⁰Ndi, it aap Pariti mendek inom, Ala wone liiru mbanak unde inom, nogo perak, Yaya nen it yiime wuppiiyoolik me, Ala nen it eeko logorak inombareegerak wone nogo mbo pereegwaarak.

³¹At Yetut nen, ”It aakumi o yogondak wonogwe yi, nano pogom wakka o? It ngge ndak-ndak eeko menggaarak?

³²Wologwe-mbuulogwe aakumi kuwak eeko menggam yini kunit it mban-mban wone onggo-onggo agan nugu logonet, Nit ndawi tiyanggirogoorak kwe, kit eebe wakwi lek. Ndi, lendawi tiyanggirogoorak kwe, kit le yogwe lek, agan nugwi nogo pogom kit aret agan nugwi kiigi o.

³³Yaya Yiime Wuppiige Menggerak nogo nen mbi inom, eyoonggen anggur amburu inom, nenggeelik aret wagagerak kwe, kit nen, Kugi inikime unggwagagerak o, yogo monggotak.

³⁴Ndi, an aap aret nda'nagagirak nogo mbi inom, amburu inom, ugun nenet wagagirak me, kit nen, Wologwe! Mbi inom, anggur amburu inom, lagap agan mban nenet nege logonet, it aap pemerintah inake kuwak eeko menggaarak inom, aap maluk eeko menggaarak abok inom, iniki kunggo'net nage yi kaanip o,

³⁵yogo monggotak kwe, Ala iniki warak nen koonit nage nogo ti, it eeko menggaarak abok aret eekwi paga obeelom aret kogo logogun o,” yinuk, yoragagerak.

³⁶Yorage mbareegi, aap Pariti mendek ambi nen Yetut imbirak mbi noorak nduk, ”Mok o,” yoreegerak. Yoge mbareegi, Yetut nen at ame unggwage nagagirik, mbi naakit nduk, kwi'nagagerak.

³⁷Kwi'nage mbareegi, o tini time mendek kwe maluk eeka ambi nen Yetut aap Pariti ame kwi'ndak mbi nengge konengge nagagirik, amburu obari abe mendek yugum yiiwak mendaarak me, toolak wonok wagagerak.

³⁸Wonok wage nagagirik, Yetut iyok anggu'me ambokan taati mi'nari wage nagagirik, le ari logonet, ale amburu paga Yetut iyok miin eeke, ti'nuk, eeruwak paga wolombege, eeppege nagagirik, aganak paga pirik-perek ari logonet, amburu nogo iyok paga kilippereegerak.

³⁹At Pariti Yetut nimbirak mbi noorak yoreegerak nogo nen kwe nogo eeke kage nagagirik, iniki mbake logonet, ”Kwe yi, maluk eeke menggerak me, aap yi nogo Ala wone yorage menggerak nabi nogo mendek abet aret logonetak en, Kwe yi maluk eeke menggerak nen aret pi'nake kagi, yinuk, ti maan yelok kaanetak o,” mbareegerak.

⁴⁰Mbake kagak, at Yetut nen, ”Timon wae. An wone ambi yokkirikit mbakirak me yokkiri o.” Yoge mbareegi, aap nogo nen, ”Yo'niru o, nogoba.”

⁴¹Yoge mbareegi, at Yetut nen, ”Aap mbere nen aap ambi anomat mbanak wonogogwaarak. Ambi wu 500 mbanak, ndi, ambi wu 50 mbanak wonogogwaarak.

⁴²Imbirak anomat mbanak onggo wogoriyak meek me, inabuwa nen, Onggo lek we aret kolaanip o, yoragagerak. At onggo lek we wogoragagerak nogo ti, ineebe mbere aret me, ta nen iniki kunik nggwok mbareegerak mbaken?”

⁴³Yoge mbareegi, Timon nen, ”Lek o. Aap wu nggwok wogoreegerak nogo nen iniki kunik nggwok mbareegerak mbaki o,” yoge mbareegi, Yetut nen, ”Yagandak ti aret o.”

⁴⁴Yoge nagagirik, Yetut nen kwe nogo ena logurogon pekkage logonet, ”Timon wae. Kwe yi, kagan ilik, lek a? An nen kame unggwi wage mbaki, niyok koorikit nduk, kat nen yi wo'nirulik kwe, at yi perak, ale amburu paga niyok miin eeke, eeruwak paga wolonnake, ee'nakerak o.

⁴⁵Kat nen an kambu'nirulik kwe, at perak, an unggwi wagarak kuli nen yogondak kuli puk aga'lek naganak paga pirik-perek mban ari agaarik o.

⁴⁶Kat nen amburu nanobak paga kilirogo panulik kwe, at perak, amburu obari abe mendek niyok paga kilippanegerak.

⁴⁷Ti paga nen kwe yi, maluk iya tit eeke nagagerak kwe, omaluk lek eerogo pigirak me, iniki kunik nggwok lombok ee'nakerak o. Nit maluk mbuuluk eeko nogogurak nogo Ala nen lek eerogo pinanggerak o, mbakwi iinok ti, we mbuuluk Ala iniki kunik eeko menggaarak o.”

⁴⁸Yoge nagagirik, kwe nogo yoge logonet, ”Komaluk lek eerogo pagagi o,” yoreegerak.

⁴⁹Yoreegerak nogo, it mbi noorak nduk inom kwi'ndak wonogogwaarak nogo wone mbanggo logonet, ”It aakumi inomaluk lek eerogo piige nogo yi ta mbakop?”

⁵⁰Yogwe iigak, at Yetut nen kwe nogo yoge, ”Kat kiniki noba panggombunuk abet nombakendak paga kagap ndakkolagandak me, kinikiigun kame nak o,” yinuk, yoreegerak.