Read Wano YAYA 11 Bible Online

YAYA 11 - Wano bible

YAYA 11

¹Aap ambi endage Latarut awi Mbetaniya, kwe Mariya awuluk Mata imbirak inawi ambit me aret wonogwe me, andi eereegerak.

²Kwe Mariya nogo ti, kwe ninogoba endagembogut iyok paga amburu mbenambunuk, eeruwak paga woloneegerak nogo aret. At oweeluk Latarut nogo andi eeke mbareegi,

³awurilogwe komologwe nogo nen wone agago nappiigo logonet, ”Ninowe o. Aap kat kiniki kunik nogo andi eekerak wonage o,” yinuk, Yetut yori nawuk nduk, nappiyareegwaarak.

⁴Nappiyareegwaarak nogo, nogo nogogwaarik, yogo mbareegwa, Yetut konengge nagagirik, yorage logonet, ”At Latarut andi eekerak nogo ti, kambuurak nduk eekerak lek o. Ata, an Ala aput ambi eeke neenok tiyappanumenggaarak paga Ala kunduk tiyanak kin kaawak nduk eekerak o,” yinuk, yoragagerak.

⁵At Yetut nen Mata inom, at oweeluk inom, Latarut inom, iniki kunik aret wonagagerak.

⁶Iniki kunik aret wonagagerak me, at Latarut andi eekerak nogo konengge nagagirik, iniki nen ne mbere time aret puk wonagagerak.

⁷Puk wonagagirik, at oone waganggwi mendek yorage logonet, ”Niniyok paga o Yureya nawok o.”

⁸Yorage mbareegi, it nen, ”Ie Ngguru! It aap Yakuri mendek nen awo ngget iluk yugum paga kooriyak eekwi iigom nogome kagak noorak mban ari agandik ya?”

⁹Yogo mbareegwa, at nen, ”Wologwe! O ne ambit wegetak wonage kagak, 12 jam age menggerak nogo lek a? Ndi, ti kenok, it aap o liingge paga nogwe iinok, o eya inigen kogo menggaarak me, iniyogobit lik togon egeraagin lek o.

¹⁰It aap oonikiya paga nogwe iinok perak, at eya eeginake menggerak nogo inikime eya eeginaka'lek me, iniyogobit lik togon egerage kagak, nogo logogun o.”

¹¹Ti yorage nagagirik, wone ambi yorage logonet, ”Ninoreeluk Latarut nogo yege me, an eenik eeppi naakit o.”

¹²Yorage mbareegi, it at oone waganggwi nen, ”Ninogoba o. At we nogo yege kenok ti, obeelom arigin o,” yinuk, yoreegwaarak.

¹³At Yetut nen Latarut kanggerak me nduk yoragagerak kwe, it nen, ”We nogo yege kagak ari,” mbako mbareegwa,

¹⁴at Yetut nen pagak togon yorage logonet, ”Latarut muk kanggerak o.

¹⁵Ndi, kit kiniki noba panggombunuk abet nombarubagip nduk an time logolik yime wonagarak nogo kit kinake aret wonagarak me, nale'nggen mbake agarik o. At wonage me nawok o.”

¹⁶Yorage mbareegi, at Tomat endage ambi Kulu'mbere toonak nogo nen oreewi yorage logonet, ”Nit at ninom aret kambuwok nduk, nawok o,” yinuk, yoragagerak.

¹⁷Yorage mbareegi, Yetut nage nagagirik, at Latarut kanggwi iinok, piigo menggam pereegwaarak kagak, nogo 3 yereegerak koneneegerak.

¹⁸O Mbetaniya o Yerutalem korotok tu noorak 3 kilometer negen wonagagerak me,

¹⁹it Yakuri mendek apit nen Mata Mariya imbirak inoweeluk kambeegerak me, iniki eyak wappiyaawok nduk, iya wogogwaarak.

²⁰Iya wogogwaarak wonogwe me, at Mata nen Yetut wage konengge nagagirik, Mariya oome kwi'ndak kagak, at endekem ka wundeegerak.

²¹Ka wungge nagagirik, Yetut yoge logonet, ”Ai nogoba o! Kat yime mbet-mbet wa'netak en, an noweeluk kambenetak lek kwe,

²²yogondak kat nen Ala ngginooge keenok, at wokkege menggerak nogo ti neenu o.”

²³Yoge mbareegi, at Yetut nen, ”Kat koweeluk nogo eenik a'nuk mi'narigin o.”

²⁴Yoge mbareegi, at Mata nen, ”E o! At peebi o age yobok aakumi ineenik agago mippiige eyom paga eenik a'nuk mi'narigin ti neenu o.”

²⁵Yoge mbareegi, at Yetut nen, ”Aakumi ineenik agago mippiige minggirak an aret me, kit ambi nen kiniki noba panggombunuk, abet nombakwi kiinok, kambumonggotak kwe, kineenik a'nuk, mi'narumunggup o.

²⁶Ndi, it aap ineenik logonet, iniki noba panggombunuk, abet nombakwi iinok, kambugun mondok lek o. Wone yi nogo abet mbaken a, lek a?”

²⁷Yoge mbareegi, at kwe Mata nen, ”E o, nogoba. Ala aput leenogo mippereegerak Keritut o nggween paga yime woroorak nogo kat aret kombake agarik o,” yinuk, yoreegerak.

²⁸Ti yoge nagagirik, at Mata oweeluk Mariya nogo mbabok wiiri nage nagagirik, wage mbareegi, yoge logonet, ”Mariya wae. Ngguru time logonet, wiigege agaarik o.”

²⁹Yoge nogo Mariya konengge nagagirik, pilak togon mi'na'nuk, Yetut owagam nagagerak.

³⁰Yetut nogo oome unggwaga'lek Mata imbirak lambuneegwam ta'nogo awo wonage me ka nagagerak.

³¹Ndi, it aap Yakuri mendek kwe Mariya inom oome logonet, iniki eyak wappugwi nogo nen kwe Mariya pilak togon mi'na'nuk, wungge inigen kogo nogogwaarik, ”At kanggerak pegam nogome le yi nage,” mba'nuk amugurok nogogwaarak.

³²Amugurok nogwe me, kwe Mariya Yetut wonage me ka nage nagagirik, Yetut abu'me tebe yinuk, ”Ai nogoba! Kat yime mbet-mbet wa'netak en, an noweeluk kambenetak lek o.”

³³Yoge mbareegi, Mariya inom, it aap Yakuri mendek Mariya mugurok nogogwaarak nogo inom, leenggup maakwi Yetut iige nagagirik, iniki aagi wo agan lagangge mbareegi, eebe nugurit wage logonet,

³⁴”Wologwe! At eebe nggeeme pogotak o?” Yorage mbareegi, ”Pekka mok o, nogoba.”

³⁵Yogo mbareegwa, at Yetut le yereegerak.

³⁶Le ari mbareegi, it aap Yakuri mendek nen, ”Wologwe! At Latarut iniki kunik lombok me le ari yi kaanip o.”

³⁷Yogwi iigak, it ando perak, ”Wologwe! Aap yi, enegen mbuk obeelom eereegerak nogo nen at Latarut kangge kero, eenik kagak, obeelom eeriyak meek nduk, wonagaarik ari mbakop?” yogogwaarak.

³⁸Yogo mbareegwa, Yetut ne ambinom iniki aagi wo agan lagangge mbareegi, eebe nugege kagak, kangge mbareegi, pereegwam nogome aret nagagerak. Kangge mbareegi, pereegwam nogo ti, ndoome yugum tu narak aret wonage me,

³⁹Yetut nen, ”Yugum tu narak ti, ponggonogo nappinip o.” Yorage mbareegi, at Latarut awuluk Mata nogo nen, ”Nogoba o. Kanggerak kagak nogo 3 yegerak me, muk obari agaarak o.”

⁴⁰Yoge mbareegi, Yetut nen, ”Kat kiniki noba panggombunuk, abet nombake keenok, Ala endage abu tiyanak logonet, eeke menggerak kaamunggun o, yokkigirak nogo lek a?”

⁴¹Yoge mbareegi, yugum ponggonogo nappogo mbareegwa, Yetut nogo ena ni'nage nagagirik, ”Nogoba o. Kat an noone muk konenggendak me wa yokkigi o.

⁴²Kat an noone mondok konengge menggendak nogo, an neenu aret kwe, it aakumi ugun mi'ndak wonogwe yi nogo, kat nen nappani wagagindak abet aret mbaruwak nduk, yokkigi o.”

⁴³Yoge nagagirik, at oone nggwok paga, ”Latarut wae! Wundi mok o.”

⁴⁴Yoge mbareegi, at kambeegerak nogo wundi wage logonet, at eenggi-iyok nggerenak, ndi, yum etenggen-ogobak pirik-perek eerak wundi wagagerak. Wundi wage mbareegi, at Yetut nen, ”Nege logowak nduk, yum perenak ti piinggaanip o,” yinuk, yoragagerak.

⁴⁵Yorage mbareegi, it Yakuri mendek Mariya mugurok nogogwaarak nogo nen Yetut eeke inigen kogo nogogwaarik, iniki Yetut oba panggombunuk, abet mbareegwaarak.

⁴⁶Ndi, it ando nen perak, Pariti mendek iya nogo nogogwaarik, Yetut eekerak nogo mbininogo yorogogwaarak.

⁴⁷Yorogo mbareegwa, it aap Ala unde inoweewi inom, it aap Pariti mendek inom, nen it aap wone amburu mbangga kuwak eeppiigo nogogwaarik, yorogo logonet, ”Aap ti, nineenu ariyak ninagabiti warak mendek apit aret eerit nage menggerak me, nit nonggop eerumun o?

⁴⁸Eerit nege logowak nduk teppugwi niinok, it aakumi abok aret iniki at oba panggombunuk, abet mbako logonet, amugurok nogo mbarumengga, it aap Oroma mendek nen wogo logomenggaarik, Ala awi wurik inom, nit aakumi nineebe inom, lek eerogo pinanugwi iyoorak me, nonggop eerumun o?” yinuk, yereegwaarak.

⁴⁹Yogo mbareegwa, aap it mendek ambi Ala unde inowe me, tahun ti paga Ala awi wurik me eeke nagagerak endage Kayapat nogo nen, ”Wologwe! Kit abu kineenggo'lek kobak wonogwe kiigi o.

⁵⁰Nit aakumi nineebe abok aret lek eerogo pinaniyak ti meek o. Ata, aap ambit nen nit aakumi abok ninake kambuurak perak, op yi kogo ogotik?” yinuk, yoragagerak.

⁵¹Wone yoragagerak nogo ti, at alik iniki koombunuk nen yoroolik o. Ata, tahun ti paga Ala unde inowe logonet, eeke nagagerak me, at Ala nen at eeppege kagak, peebi at Yetut aakumi Iterali mendek inake kambuurak me nduk, yoragagerak.

⁵²Aakumi Iterali mendek inake mban ti lek o. Ata, it aap Ala apuri yi awi ndi awi mak eerak wonogwe nogo ambit me kuwak eeppiyoorak inake kambuurak me nduk, yoragagerak.

⁵³Yoragagerak ti eyom paga it Yetut mondok wariyak nduk, wone mbaneegwaarak,

⁵⁴Wone togop aret mbaneegwaarak me, Yetut aap Yakuri inenggaanom nggwok paga ambinom noolik. Time nen o tini ambi Eperayim karume korok nogome nagagerak. Nage nagagirik, at oone waganggwi mendek inom time aret wonagagerak.

⁵⁵Wonogwe me, it Yakuri Ala ndomba warogo Patika lariyak eyom panggoni wage mbareegi, laka'lek iigak, it aakumi inabin kooppunuk, ugun nawok nduk, iname lombok nen o Yerutalem nogogwaarak.

⁵⁶Nogo nogogwaarik, it aap Ala unde inoweewi inom, it aap Pariti mendek inom, nen, ”At eebe nggeeme wonage nogo liippogo logomonggotik, eebe nit pigaawok nduk, yo'nira wa'nu o,” yinuk, wone lengganinabeegwaarak me, Ala awi wurik me inigen luk eeko logonet, ”At Yetut lakome woraagin a, lek a? Kit nonggop mbakop o?” yinuk, it-it wone mbaneegwaarak.