Read Wano YAYA 12 Bible Online

YAYA 12 - Wano bible

YAYA 12

¹Nogo 5 yippunuk, Ala ndomba warogo Patika lariyak eyom panggoni wage kagak, at Yetut o Mbetaniya aap Latarut kambeegerak me eenik agago mippereegerak nogo wonage me nagagerak.

²Nage mbareegi, it aakumi time nen anooniya lareegwaarak me, Mata nen laago tumburirage kagak, aakumi Yetut inom kwi'na'nuk mbi nunggwi me, Latarut inom nenggegerak.

³Nunggwi me, at Mariya nen iri'ngga narwastu amburu abe mban toolak onggo nggwok pogo menggaarak mendek waganogo Yetut iyok paga kilippege nagagirik, at eeruwak paga wolonggagagerak. Wolonggage kagak, amburu nogo obari oome endak wa'nagagerak.

⁴Endak wa'nage mbareegi, it Yetut oone waganggwi mendek ambi Timon aput Yurat Ikariyot Yetut onggo mbanigin nogo nen,

⁵”A puk! Amburu yi, 300 dinar paga onggo mbanogo aap inamendek lek kenok, wogoroorak mendek eekerak yi, nonggop nduk eeki mbakop?” yereegerak.

⁶Wone yereegerak nogo ti, it aap inamendek lek nogo inabuwa mba'nuk yereegerak ti lek o. Ata, at aap kiraaka mendek me, inawu yonggolak nogo at aret porogo logonet, ando kolagak eeke logokit nduk, yereegerak.

⁷Ari mbareegi, at Yetut nen, ”Lek o. It aap inamendek lek nogo ti, mondok kinom logomunggup kwe, an perak mondok ninom logogin lek me, kwe yi, an neebe kambunuk, ndoome mambaniyak me nduk, amburu yi eeppanggerak me, teppinip o,” yinuk, yoragagerak.

⁸

⁹Yorage mbareegi, it Yakuri apit nogo nen Yetut o Mbetaniya nogome wonage konenggo nogogwaarik, at Yetut mban inigen kaawok nduk noolik o. Ata, aap Latarut kambeegerak Yetut nen eenik agago mippereegerak nogo kunduk inigen kaawok nduk, nogogwaarak.

¹⁰Nogo mbareegwa, Yetut nen Latarut eenik agago mippereegerak paga it Yakuri mendek apit aret it inoweewi inoone mbo punuk, iniki Yetut oba panggombunuk, abet mbako mbareegwa, it aap Ala unde inoweewi nen Latarut kunduk waruwok nduk, wone mbaneegwaarak.

¹¹

¹²Ko'lu it aakumi apit laago lakome kuwak ogogwaarak nogo nen Yetut o Yerutalem wage konenggo nogogwaarik,

¹³eyo wono engga negen pendenogo wonok Yetut ka wunggo logonet, ”Otana o! Nit aap Iterali ninowe endagembogut Ala nen nappi wagagerak yi, wogoppuwok o,” yinuk, keekok agan nogogwaarak.

¹⁴Keekok agan nogwe iigak, at Ala nen, ”Kit o Tiyon monggotak nogo kinagabiti yugup o. Kit kinowe endagembogut keledai wam awooluk amborowak paga kwi'ndak wage yi kaanip o,” yinuk, yereegerak liiru mbaneegwaarak nogo ndak-ndak, at Yetut keledai wam awooluk ambi kwaakkage nagagirik, amborowak paga kwi'na'nuk nagagerak.

¹⁵

¹⁶Ti eereegerak nogo it Yetut oone waganggwi mendek kobak wonogogwaarak kwe, peebi at Yetut tiyappege mbareegi, at togop eeppuurak wone liiru mbanak nogo, ”Nit aret eeppogoorak kogo o,” yinuk, abereegwaarak.

¹⁷It aakumi ambik Yetut inom logonet, Latarut kambeegerak me, eenik agago mippege nagagirik, ndoome nen wundi woraawak nduk, ”Mok o,” yoge kogogwaarak nogo nen, ”Yetut togop eeke kogoorak o,” yinuk, aakumi paganogo yoranet nogogwaarak.

¹⁸Paganogo yoranet nogo mbareegwa, ineenu ariyak inagabiti warak mendek at eereegerak it aakumi apit konenggo nogogwaarik, ka wundeegwaarak.

¹⁹Ka wunggo mbareegwa, it Pariti mendek nen it-it wone mbanggo logonet, ”Wologo wae! Yi aakumi ndi aakumi abok aret at mugurok nogwe me, nit ambi eerugun kenok, abe eerugun lek yi kogo ogotik?” yinuk, yogogwaarak.

²⁰Ala alut eeruwok nduk, laago lakome nogogwaarak nogo ti, it aakumi Yunani mendek inom aret nogogwaarak me,

²¹Piliput o Nggalileya awi endage Mbetayira mendek nogo owagam nogo nogogwaarik, yogo logonet, ”Ninogoba wae! Nit Yetut kaawok nduk, wogo o.”

²²Yogo mbareegwa, at Piliput nen Andereyat yori nage nagagirik, ti'nuk, imbirak Yetut yori nogogwaarak.

²³Yogo mbareegwa, at Yetut nen, ”An aap aret nda'nagagirak tiyappaniyak eyom panggoni wagaarak o.

²⁴Mbato awi nggween paga yakaatak agabolo nggonengga'lek kagak, ambit aret menggerak o. Ndi, agabolo nggonengge nagaatik, awi mbilangge kenok perak, anggen ambik aret yege menggerak o.

²⁵Kit ambi nen kineebe kineenik logorak kinikilom mbakwi kenok, kineebe kobak arigin aret o. Ndi, o nggween paga yime logonet, kineebe kineenik logorak nineebi mbakwi kenok, kineenik mondok-mondok eekkinake kaamunggup o.

²⁶Kit ambi nen an nake eeriyak mbakwi kiinok, mondok mu'neret aret wogo logonip o. An logogin nogome nayeloman kunduk nimbirak time aret logogun o. Ndi, an nake eeke kenok, nogoba nen tiyappigin o, yinuk, mondok abet aret yokkiragi o,” yoragagerak.

²⁷Yorage nagagirik, at nen ari logonet, ”Yogondak niniki abu puru yegerak me, an nonggop yi o? Yogondak nooriyak nduk, eekwi me, Nogoba nagap ndaru o, yori ilik?” mbake nagagirik, ti'nuk, ogoba yoge logonet, ”Lek o. Yi eeppanuwak nduk aret wagagirak me,

²⁸Nogoba o. Kat kendage tiyappatu o,” yinuk, yoreegerak. Yoge mbareegi, mbogut paga nen oone ari logonet, ”Nendage muk tiyappakirak me, ambinom aret tiyappatigin o.”

²⁹Yinuk, it aakumi ambik nogo mbogut paga nen oone ari konenggo nogogwaarik, ”Ubi! Ti mbogut paga nggurubu ari,” yogwe, ndi, it ando nen, ”Lek o. Mbogut paga yonggo nege menggerak melaikat imbirak wone mbanggwi,” yogwe, eereegwaarak.

³⁰Eeko mbareegwa, at Yetut nen, ”Wologwe! Wone konenggotak nogo ti, an neenok ari lek o. Kit kiinok aret yigi o.

³¹It aakumi o nggween paga yime menggaarak inowak loonogo maluk inoba piyoorak nogo yogondak aret o. At o nggween paga yime unde menggerak tebenogo puurak yogondak aret o.

³²Ndi, aakumi nggween paga mendek nen an mippanugwi iinok, an nen yi aakumi ndi aakumi abok aret nowagam woraawak nduk, iniki kooninabikit o,” yinuk, yoragagerak.

³³Wone yoragagerak nogo ti, nonggop eerogo pugwi iinok, kambuurak ineenu aruwak nduk, yoragagerak.

³⁴Yorage mbareegi, it aakumi nogo nen, ”At Ala nen, An leenogo mippereegirak Keritut nogo mondok-mondok logorak o, yereegerak wone lengganak liiru mbaneegerak nogo, nit konenggwi kwe, at aap aret nda'nagagerak peebi mippuurak yagandak ti, nonggop yagan o? Aap aret nda'nagagerak ti, ta o?”

³⁵Yogo mbareegwa, at Yetut nen, ”Eya eekkinake menggerak nogo ne ambit iluk kinom logogin o. Kiniki o apit pogom eekkinake kero, eya eekkinake kagak, nogo logonip o. Kit ambi nen o apit paga nogwe kiinok, Ndime noorak, kit kineenggo'lek kagak, nogo monggotak.

³⁶At eya eekkinake nogo kinom logonet, at apuri pogom arubagip nduk, kiniki at oba panggombunuk, abet mba'nip o,” yinuk, yoragagerak. Wone nogo yorage nagagirik, at Yetut nogo aakumi mbo piinok, at kwaakkogwe iyo, kumaa'nari nagagerak.

³⁷It aakumi ineenu ariyak inagabiti warak mendek abok aret inenggaanom eeke nagagerak kwe, iniki at oba panggombunuk, abet mbaka'lek aret wonogogwaarak.

³⁸Abet mbaka'lek wonogogwaarak me, aap nabi Ala wone yorage nagagerak Yetaya nogo nen ari logonet, ”Ninogoba Ala o. Ninoone yorogo nogogurak nogo, taani nen abet mbareegwaarak o? Ndi, keenggi omaawi paga eeke menggendak nogo, taani nen inigen keyareegwaarak o? Lek aret me,” yinuk, wone yereegerak liiru mbaneegerak nogo a'me lik yereegerak o.

³⁹”At Ala nen ari logonet, An nen obeelom eeginaburak nduk, iniki kwaappatinuk, inigen yelok kogwe, iniki liippugwi, eekwi iyo, inigen mbuk eerogo piige, iniki apit eerogo piige, eereegirak o,” yinuk, at Yetaya nen yereegerak liiru mbanak nogo ndak-ndak iniki apit eerogo piyareegerak me, it iniki at oba panggombunuk, abet mbariyak abu meek aret kogo o.

⁴⁰

⁴¹At Yetaya wone yoragagerak nogo ti, Keritut abu tiyanak kagagerak me nduk, yoragagerak.

⁴²At Yetaya togop aret yoragagerak kwe, kagak, aakumi inoweewi apit aret iniki Yetut oba panggombunuk, abet mbareegwaarak. Abet mbareegwaarak kwe, it Pariti mendek nen tamban eeko menggam nen wumbiigwi iyo, inagabiti nen, ”Nit at oone waganggwi mendek aret o,” yinuk, pagangga'lek aret wonogogwaarak.

⁴³It aap pagangga'lek wonogogwaarak nogo ti, ”Ala nen obeelom ninombaruwak o,” yinuk, mbarulik. Ata, ”Aakumi nen obeelom ninombaruwak o,” yinuk, mbako nogogwaarak.

⁴⁴Togop mbakwi iigak, at Yetut oone nggwok paga it yorage logonet, ”Kit ambi kiniki noba panggombunuk, abet nombakwi kiinok, an mban abet nombakwi lek o. At nappani wagagerak nogo aret kiniki oba panggombunuk, abet ombako ogotik o.

⁴⁵Kit ambi nen kinigen an neegwi kiinok, at nappani wagagerak nogo aret kogo ogotik.

⁴⁶Kit ambi nen kiniki noba panggombunuk, abet nombakwi kiinok, o apit paga wonogwe kiyo, an eya pogom aret o nggween paga yime wagagirak.

⁴⁷Kit aakumi abok nggween paga monggotak nogo maluk kinoba pinagakit nduk, woroolik o. Kinagap ndarikit nduk aret wagagirak me, kit ambi nen an noone konembunuk, eekwi lek kiinok, an nen maluk kinoba pinagagin lek o.

⁴⁸Kit ambi nen an mbo panugo logonet, an noone waganggwi lek kiinok, maluk kinoba pinagarak nduk ambi wonage o. An niniki koombunuk nen wone yokkirage logolik o. Ata, an nogoba nappani wagagerak nogo nen, Yogop yu o, ndogop yu o, yinuk lengganogo yo'nege kenok, yokkirage minggirak me, o age yobok togon an wone yokkirage nagarak nogo paga maluk kinoba pinagagin o.

⁴⁹

⁵⁰Ndi, at wone, Yogop ee'nu, ndogop ee'nu, ari menggerak konenggwi kiinok, at nen mondok-mondok kineenik eekkinaburak an neenu aret o. An yokkirage minggirak ti, an nogoba nen yo'nege ndak-ndak aret ari minggirak o,” yinuk, yoragagerak.