Read Wano YAYA 13 Bible Online

YAYA 13 - Wano bible

YAYA 13

¹Nogo ambit yinuk, Ala ndomba warogo Patika lariyak eeko logonet, at Yetut o nggween paga yime mbo punuk, at ogoba ka noorak eyom panggoni wagagerak eenu wonagagerak. At apuri at inom nggween paga wonogogwaarak nogo mondok iniki kunik kagak, eeppuurak eyom nogo aret ari nagagerak.

²At Yetut oone waganggwi mendek inom mbi nunggwi me, Ibilit nen Timon aput Yurat Ikariyot Yetut onggo mbanigin nogo, iniki muk nggagani wage mbareegi,

³at Yetut nogo ogoba nen yi mendek ndi mendek apit at unde logowak nduk, wogoreegerak nogo inom, ndi, Ala wonage me nen wagagim iyok paga ka noorak nogo inom, eenu wonagagerak me,

⁴mbi nunggwi me nen mi'na'nuk, ambogoyum nggoorogo punuk, ngguumo yum obate paga nggereneegerak.

⁵Nggerembunuk, yi niyowa'na toolak togolowa'na kombet wappege nagagirik, at oone waganggwi mendek iniyok koorinake, ti'nuk, ngguumo yum obate paga nggerenak nogo paga woloninake, eerit nagagerak.

⁶Ti eerit, Timon Peterut owagam panggo yi nage mbareegi, Peterut nen, ”Nogoba o. Kat an niyok koo'naburak mba'nuk eeke agandik?”

⁷Yogo mbareegi, at Yetut nen, ”Wulaga wae. An yogondak eeke yi nogo kat keenggo'lek aret kwe, peebi perak, keenu arumunggun o.”

⁸Yoge mbareegi, at Peterut nen, ”Kat nen an niyok koo'naburak mondok lek o.” Yoge mbareegi, at Yetut nen, ”An kiyok kookkaburak lek kenok, kat an noone waganggwi mendek logorak lek aret o.”

⁹Yoge mbareegi, at Timon Peterut nen, ”Ai, ti kenok, nogoba o. Niyok mban lek o. Ata, neenggi-niyok neebe apit aret koo'nabu o.”

¹⁰Yoge mbareegi, at Yetut nen, ”Kit ambi ngguumo warak wonogwe kiinok, kineebe abok muk koorak wonogwe me, ambinom ngguumo wappinagarak lek o. Ata, kiniyok mban kooriyak perak op o. Kit yi abok koorak wonogwe kwe, aap ambit iluk perak koorak lek wonage kagi o,” yinuk, yoragagerak.

¹¹At onggo mbanigin nogo eenu wonagagerak me, ”Kit abok koorak mban wonogwe lek kagi o,” yinuk, yoragagerak.

¹²At Yetut iniyok kooppiinuk, at ayum nggoorak nogo yikkolage nagagirik, obaane'me kwi'na'nuk, ”Wologwe! An eekkinakirak yi, kit liippogo ogotik ilik, lek a?

¹³Kit nen, Ninogoba Ngguru wae! yo'nogo monggotak nogo ti, an aret me, abet aret yo'nogo monggotak.

¹⁴Kinogoba an mamungginake minggirak nen aret kit kiniyok kookkinakirak kenok, kit togop aret at ambi iyok kookak eeko logorak op o.

¹⁵An eekkinakirak yi, kit ndak-ndak eeko logobagip nduk, eekkinakirak o.

¹⁶Ogoba tebenak kagak, ayeloman tiyanak wonageelik o. Ndi, at nappiige menggerak tebenak kagak, at nappi wagaatak tiyanak wonageelik mban o, yinuk, mondok abet aret yokkirage agarik o.

¹⁷An wone yokkirage yi nogo kineenu ogo logomonggotik, eeko logomunggup kenok, kiniki ale'nggen ambik mbako logomunggup o.

¹⁸Kit abok kiinok yokkirage lek o. An miirogo leengginabeegirak an neenu aret o. Ala yoge kagak, aap ambi nen ari logonet, At nimbirak mbi nengge nogo nen aret nooriyak koonggerak o, yinuk, yereegerak Ala wone liiru mbaneegerak nogo a'me lik yuwak nduk, agaarak me, a'me lik yigin o.

¹⁹Wone yi a'me lik ari kenok, kit nen, At iitok menggerak nogo yi aret kogo o, yinuk, kiniki noba panggombunuk, abet nombarubagip nduk, a'me lik yega'lek kagak, yogondak yokkirage agarik o.

²⁰Kit ambi nen it an nappiige minggirak nogo wogonakwi kiinok, an aret wo'nakwi, ndi, an wo'nakwi kiinok, at nappani wagagerak nogo aret waganggwi, eeko logomunggup o, yinuk, mondok abet aret yokkiragi o,” yoragagerak.

²¹Yetut nen wone togop yorage nagagirik, at iniki aaninggin ndugu agan nage mbareegi, paganogo yorage logonet, ”Kit ambi nen an nooruwak nduk yoraamunggup o, yinuk, mondok abet aret yokkiragi o.”

²²Yorage mbareegi, ”Ta nen eeriyak nduk yigi,” yinuk, inigen pet-pet yogo nogogwaarak.

²³Inigen pet-pet yogo logonet, aap at oone waganggwi mendek ambi Yetut iniki kunik wonage nogo Yetut imbirak tabonak kwi'ndak wonage me,

²⁴at Timon Peterut nen, ”Ta kenok yigi, yoru o,” yinuk, eenggi tik-tik paga yoreegerak.

²⁵Yoge mbareegi, at oone wagangge ambi nogo nen Yetut eraanu ambinom panggo yi nage nagagirik, yoge logonet, ”Nogoba o! Ti ta kenok yagan o?”

²⁶Yoge mbareegi, at Yetut nen, ”An nen mbi paga amburu tamunogo wogoge neenok, ti aret mbarumunggun o,” yoge nagagirik, mbi paga amburu tamunogo Timon aput Yurat Ikariyot nogo aret wogoreegerak.

²⁷Wogoge mbareegi, wagangge kagak, Ibilit Yurat inikime unggwage mbareegi, at Yetut nen, ”Yurat wae! Kat eeriyak mbakendak nogo mbet togon eeru o.”

²⁸Yoge mbareegi, it kwi'ndak mbi nunggwi nogo abok nen, ”Ti nonggop nduk yogi?” yinuk, it liippega'lek aret wonogogwaarak.

²⁹It ando nen aap Yurat inawu yonggolak porogo wonagagerak me, at Yetut nen laago lariyak yi mendek ndi mendek ambinom kuni nawak nduk, yoge ilik, aap inamendek lek kenok, ando wogoroorak nduk, yoge a? yinuk, yoge mbareegwaarak.

³⁰Mbakwi iigak, at Yurat nogo mbi wagangge nagagirik, mbet-mbet aret wundi nagagerak. O apit agagerak kagak aret wundi nagagerak.

³¹Wundi nage kagak, at Yetut nen it ando nogo yorage logonet, ”Wologwe! Yogondak Ala nen an aap aret nda'nagagirak nogo tiyappanigin o. Ndi, an eeke nogo paga Ala kunduk tiyak yigin o.

³²An eeriminggirak paga nen Ala tiyappege neenok, at Ala eeremenggerak paga an kunduk tiyappanigin o. Ndi, mbet-mbet aret tiyappanigin nduk, yagi o.

³³Ai, napuri o! An ne ambit iluk ninom logominggirik, nagin me, kit kwaa'nabit namonggotak kwe. An nawam time kit noorak meek o, yinuk, it aap Yakuri mendek yoragagirak nogo ndak-ndak, kit togop aret yokkirage agarik o.

³⁴Wone yogop ee'nu, ndogop ee'nu ngget mendek yokkirage nogo ti, niniki-kiniki kunik eeko logorak ti aret o. An nen kit niniki kunik eekkinake minggi kwak, kit nen niniki-kiniki kunik eeko logonip o.

³⁵Kit niniki-kiniki kunik eekwi paga aakumi abok nen kit an noone waganggwi mendek abet aret ineenu arugun o,” yinuk, yoragagerak.

³⁶Yorage mbareegi, at Timon Peterut nen, ”Kat nggeeme noorak nduk yagan o, nogoba?” Yoge mbareegi, at Yetut nen, ”An nawam time kat yogondak nimbirak noorak meek kwe, peebi perak, mu'neren namunggup o.”

³⁷Yoge mbareegi, at Peterut nen, ”Ai, nogoba o. An nonggop nduk nimbirak noorak meek yo'negen o? An kat kake kambuurak op mbake me.”

³⁸Yoge mbareegi, at Yetut nen, ”Wulaga! Kat abet aret an nake kambuurak op mbake agandik ya? Ayam oone awo yaga'lek kagak, Yetut an neenggo'lek o, ne kenagan paga ari keyaagin o, yinuk, mondok abet aret yokkege agarik o,” yoreegerak.