Read Wano YAYA 14 Bible Online

YAYA 14 - Wano bible

YAYA 14

¹Yorage nagagirik, wone ambinom yorage logonet, ”Kit kiniki piirik logogup o. Ala inom, an inom, kiniki ninoba panggombunuk, abet ninombako logonip o.

²An nogoba ame time aakumi logorak inake ogoorak ambik wonage o. Togop lek logonetak en, an kinawi ogobakkigirogo pinagakit nduk, nage o, yokkiranetak lek o.

³An kinawi ogobakkigirogo pinagi nage logominggirik, kit an wonage me ninom logowok nduk, peebi wokkinabi woraagin o.

⁴An tu ngge paga noorak nogo kit kineenu aret o.”

⁵Yorage mbareegi, at Tomat nen, ”Nogoba o! Kat nggeeme noorak nit nineenggo'lek me, tu nonggop togon nineenu arugun o?”

⁶Yoge mbareegi, at Yetut nen, ”Mbogut paga tu noorak inom, Ala ndogop menggerak, paganogo yokkirage inom, ndi, kineenik eekkinake minggirak inom, ti an mban aret o. Kit tu an paga nogwe lek kenok, an nogoba owagam namunggup lek aret o.

⁷Kit an kineenu ogogutak me, an nogoba kunduk kineenu arumunggup o. At eebe kinigen kogotak me, yogondak yi kuli paga nen at eebe kineenu aret o,” yinuk, yoragagerak.

⁸Yorage mbareegi, at Piliput nen, ”Nogoba o! Kat kogoba ninigen kaawok nduk ni'niyet o. Ni'niige kenok, niniki tayok yugun o.”

⁹Yoge mbareegi, at Yetut nen, ”Piliput wae! An o maan togon nimbirak wonage minggirak kwe, kat neebe awo liippanega'lek agandik? Kit kinigen an neegotak nogo ti, an nogoba aret kinigen kogotak o. Togop me, kat nen, Kogoba ni'niyet o, yagandak ti, nonggop nduk yagan o?

¹⁰An ti nogoba inikime wonage, ndi, nogoba ti, an ninikime wonage nogo ti, kat abet mbaka'lek agandik? Wone an yokkirage minggirak ti, an niniki koombunuk en yokkirage minggirak lek o. An nogoba ninikime wonage nen aret eeke menggerak o.

¹¹An nogoba inikime wonage, ndi, nogoba ti, an ninikime wonage nogo abet mba'nip o. Ndi, ti abet mbariyak meek kenok, an eeke minggirak yi nogo paga abet mba'nip o.

¹²Kit ambi nen kiniki noba panggombunuk, abet nombakwi kiinok, an eeke minggirak nogo kit aret eeko logomunggup o. An eeke minggirak yi mbuuluk negen o. Ndi, an nogoba ka naminggirak ti paga, abunuk, nggwok aret eeko logomunggup o, yinuk, mondok abet aret yokkirage agarik o.

¹³Kit nen an nendage kunogo, Ndogop eeppanu o, yinuk, nggino yo'nugwi kiinok, aput an eeriminggirak paga nogoba endage tiyak yuwak nduk, an nen aret eeppinagage neyaamunggup o.

¹⁴Ambi eeppinagarak nduk nendage kunogo nggino yo'nugwi kiinok, an nen aret eeppinagage neyaamunggup o,” yinuk, yoragagerak.

¹⁵Yorage nagagirik, ”Kit an niniki kunik mbakwi kiinok, an nen, Yogop ee'nu, ndogop ee'nu, yokkirage minggirak nogo aret eeko logomunggup o.

¹⁶An nogoba nggino yoge neenok, at alik ambi Ala ndogop menggerak paganogo yokkirage menggerak Aberiniki nogo mondok-mondok kinom logonet, kiniki eyak wappinagage logowak nduk, wokkiraagin o.

¹⁷It o nggween paga yime menggaarak nogo nen Aberiniki eebe kogwe, ineenu ogwe, eeka'lek me, at eebe woorak ti meek o. Kit perak, at kinom wonage, ndi, peebi, kinikime logomenggerak me, eebe kineenu aret o.

¹⁸Napurilogwe o! An elege wonabela negen mbo pinaganuk nagin lek o. Kiya woraagin aret o.

¹⁹An ne ambit iluk logonuk nagin me, it aakumi o nggween paga yime menggaarak ambinom neyaagun lek kwe, kit perak, neego logomunggup aret o. An neenik wonage me, kit kunduk kineenik logomunggup.

²⁰Ti eyom paga an nogoba inikime wonage, kit an ninikime wonogwe, ndi, an kit kinikime wonage nogo kineenu arumunggup o.

²¹Kit ambi nen an noone, Yogop ee'nu, ndogop ee'nu, yokkirage nogo waganogo eeko logomonggotak kenok ti, an kiniki kunik ee'nakwi aret o. Kit an kiniki kunik ee'nakwi kenok ti, an nogoba iniki kunik eekkinake logogin. Ndi, an kunduk, niniki kunik eekkinake logonet, kit neebe neyaabagip nduk, nikkiyaagin o,” yinuk, yoragagerak.

²²Yorage mbareegi, at Yurat Ikariyot nogo lek aap Yurat alik ambi nen, ”Nogoba o! It aakumi abok lek o. Nit mban keebe ni'niyoorak yagandak ti, nonggop mba'nuk yagan o?”

²³Yoge mbareegi, at Yetut nen, ”Kit ambi kiniki kunik ee'nakwi kiinok, an noone liirogon aret eeko logomunggup o. Ti eekwi kiinok, an nogoba iniki kunik eekkinabigin o. Ndi, an nogoba nimbirak kiya wogo logomonggoorik, ninom aret logogun o.

²⁴Kit an kiniki kunik ee'nakwi lek kiinok ti, an noone eekulik aret o. Wone kit konenggwi nogo ti, an noone lek o. Ata, an nogoba nappani wagagerak nogo oone aret o.

²⁵Wone yi yokkirage nogo ti, an awo ninom logonet, yokkiragi o.

²⁶Aberiniki kit kiniki eyak wappinagage logowak nduk, nogoba nen an nendage paga nappi woraagin nogo nen yi wone ndi wone apit aret mamunggirage, ndi, yi wone ndi wone yokkirage nagagirak nogo abok aret abekkirage, eeke logogin.

²⁷Kiniki piirik logonet, kinagabiti yugup o. Kiniki ugun tayenak logobagip nduk, eeppinaganuk nage agarik o. It aakumi o nggween paga yime menggaarak nen inoreewi inogut limbiigo mengga kwak, an togop eeppinagage lek o. Ata, an niniki ugun tayenak minggirak nogo aret eeppinagage agarik o.

²⁸An nage logominggirik, kiya woraagin o, yokkiragarak nogo muk konenggotak o. An ti mbuuluk negen. Ndi, an nogoba perak, nggwok aret me, kit kiniki kunik ee'nabenetak en, At Nogoba ka nage me, yinuk, kiniki ale'nggen nggwok mbako logonetak.

²⁹Wone yi yokkiragi nogo a'me lik ari kenok, kit kiniki noba panggombunuk, abet nombarumunggup nduk, awo aga'lek kagak, yokkiragi o.

³⁰It aap nggween paga menggaarak inowe nogo wage aret me, wone ambinom nggorek yokkiraagin lek o. Wage logominggirik, at nen wone ambit iluk ambi an yo'nirigin mondok lek o.

³¹It o nggween paga yime menggaarak nogo nen an nogoba niniki kunik minggirak ineenu aruwak nduk, an nogoba nen, Yogop ee'nu, ndogop ee'nu, yo'nege nogo ndak-ndak eeke minggirak o.” Yorage nagagirik, ”Yime mbo punuk, mbet-mbet nawi o,” yinuk, yoragagerak.