Read Wano YAYA 15 Bible Online

YAYA 15 - Wano bible

YAYA 15

¹”Eyo abe ero ti, an aret o. Ndi, eebe unde ti, nogoba aret,

²Eyo eno'mbak ambi an nimbirak kunik logonet, anggen yegeelik kenok, nogoba nen mbanogo mbo nappege, ndi, eyo eno'mbak anggen yege kenok, ambinom yi'nage logowak nduk, mbeenogo teppege, eeke menggerak.

³An wone yokkirage nagagirak nogo paga mbeenogo pinagareegirak.

⁴Kit an ninom kunik, ndi, an kit ninom kunik logowok o. Eno'mbak eyo ero paga kunik lek logonet, alik en anggen yi'nageelik nogo kwak, kit an ninom kunik lek kenok, anggen yi'nogo logomunggup lek o.

⁵Eyo ero ti, an aret o. Ndi, eno'mbak ti kit o. Kit an ninom kunik, ndi, an kit ninom kunik logonet, anggen ambik yugu logomunggup. An lek neegak, kit ambi eeriyak ti abu meek aret o.

⁶Eno'mbak mbanogo mbo nappegaatak mbuk age kenok, aakumi nen kuwak eerogo kani kunik me mbo mambugwi iinok, kani nengge minggi kwak ti, kit an ninom kunik lek kiinok, togop aret eeppinagagin o.

⁷Kit an ninom kunik logonet, an noone kinikime wonage kenok, Nit ti mendek wo'niraawak, mba'nuk, nggino yo'nugwi kiinok, nogo aret wokkirage neyaamunggup o.

⁸Kit anggen ambik yi'nogo logomonggotak paga an nogoba tiyappugwi, ndi, kit abet aret an noone waganggwi mendek ogwe, eerumunggup o.

⁹Nogoba nen iniki kunik ee'nabeegerak kwak, an kunduk togop aret niniki kunik eekkinabeegirak o. Ndi, an niniki kunik eekkinabeegirak me, ninom kunik aret logonip o.

¹⁰Nogoba nen, Yogop ee'nu, ndogop ee'nu, yo'nereegerak nogo an eeke nagagirak me, iniki kunik ee'nabeegerak nogo kwak, an noone, Yogop ee'nu, ndogop ee'nu, yokkirage nogo eekwi kiinok, niniki kunik eekkinabigin me, ninom kunik aret logomunggup o.

¹¹Wone yi yokkirage nogo ti, niniki ale'nggen mbake logonet, abunuk kit kiniki ale'nggen nggwok aret kaabagip nduk, yokkiragi.

¹²An niniki kunik eekkinabeegirak nogo pogom, kit niniki-kiniki kunik eeko logobagip nduk, wone ambit ti aret yokkiragi o.

¹³Aakumi nen inoreewi we iniki kunik eeginakwi ti, meek negen kwe, aap ambi nen oreewi inagap ndarogo inake kangge kenok ti perak, oreewi mondok iniki kunik nggwok lombok mbake logonet, eeke me, iya mbariyak o.

¹⁴Kit an noone, Yogop ee'nu, ndogop ee'nu, yokkirage nogo aret eekwi kiinok ti, kit an noreewi aret wonogwe mbariyak o.

¹⁵Ogoba eeke nogo ayeloman ineenggo'lek menggaarak kwe, an yi wone ndi wone abok nogoba nen yo'nereegerak nogo yokkiragarak me, yogondak yi kuli paga nen, Nayeloman mini o, yinuk, yokkiraagin lek o. Ata, noreewi aret o, yinuk, yokkirage logogin o.

¹⁶Kit nen an mii'nabulik o. An nen aret kit miikkinake nagagirik, kit anggen ambik mondok logorak mendek yi'nogo logobagip nduk, leenogo pinagareegirak o. Leenogo pinagareegirak me, Ti mendek wo'niraawak o, yinuk, an nendage paga nogoba nggino yogwi kiinok, at nen wokkiraagin aret o.

¹⁷Niniki-kiniki kunik eeko logobagip nduk, wone ambit ti aret yokkiragi o,” yinuk, yoragagerak.

¹⁸Yorage nagagirik, ambinom yorage logonet, ”It o nggween paga yime menggaarak nogo nen ineebi kinombakwi iinok, an aa'nduk ineebi nombako nogogwaarak nogo kiniki abe'nu o.

¹⁹Kit nen it aakumi o nggween paga yime menggaarak nogo mendek logonetak en, it muk iniki kunik eekkinabenetak kwe, kit it mendek lek me, ndi, it nogo iigak, an miirogo leengginabeegirak me, ineebi kinombako agaarik o.

²⁰Ogoba tebenak kagak, ayeloman tiyanak menggerak lek o, yokkiragagirak nogo abe'nip o. It nen an piya'nako nogogwaarak me, kit togop aret piyakkinako logogun o. Ndi, it nen an noone waganggo nogogwaarak me, kit togon kinoone waganggo logogun o.

²¹At nappani wagagerak nogo it ineenggo'lek me, ti eekkinabemenggaarak nogo ti, alom an paga aret eekkinako logogun o.

²²An iya wage nagagirik, wone yorage logonetak lek en, it maluk ineenggo'lek ugun aret logonetak kwe, yora wagagirak me, yogondak it maluk eekwi nogo ti, nonggop togon, Lek o, yuurak.

²³It aakumi nen an ineebi nombakwi iinok ti, an nogoba kunduk ineebi ombakwi aret o.

²⁴An it inenggela'me logonet, eekulik mendek eeke logonetak lek en, it maluk ineenggo'lek ugun aret logonetak kwe, yogondak perak, an eeke nagagirak nogo, it muk neego nagaarik, an nogoba nimbirak aret ineebi ninombako agaarik o.

²⁵Ineebi nombakwi nogo ti, Ala nen wone lengganogo yorage logonet, Alom lek kagak ineebi nombareegwaarak o, yinuk, liiru mbanak nogo a'me lik yuwak nduk, ineebi ninombako agaarik o.

²⁶Ala ndogop menggerak o, yinuk paganogo yokkirage logonet, kiniki eyak wappinagage logowak nduk, Aberiniki an nogoba wonage me nen nappi woraaminggirak wage logominggirik, an nabok paganogo yokkirage logogin o.

²⁷Kit o aa'nduk nen ninom wonogogutak me, kit kunduk an nabok paganogo yorogo logomunggup o,” yinuk, yoragagerak.