Read Wano YAYA 16 Bible Online

YAYA 16 - Wano bible

YAYA 16

¹Yorage nagagirik, ”Kit wone yi yokkiragarak paga, Nineebi o, yinuk, mbo panugwi kiyo, yokkiragi o.

²It aakumi tamban eeko menggam nen endekem wumbinagagun o. Ndi, it kinoorugun nogo nen, Nit Ala obaalombok eekwi o, yinuk, mbariyak eyom panggoni woraagin.

³Ti eekkinabugun nogo ti, an nogoba nimbirak ineenggo'lek me eekkinabugun o.

⁴Eekkinaburak eyom panggoni wage kenok, wone yokkiragarak yi, abeko logomunggup nduk, yokkiragi o,” yoragagerak. ”An aa'nduk kit ninom logonet, wone yi yokkirage logolik kwe,

⁵yogondak perak, at nappani wagagerak nogo ka nage logonet, yokkirage neegak, kit ambi nen, Kat nggeeme nage agandik o? yinuk, yo'nega'lek ogotik o.

⁶An wone yi yokkiragarak nogo paga kiniki abu puru yogo ogotik kwe,

⁷kit kinake aret nagin me, op aret o. An nagin lek kenok, at kiniki eyak wappinagarak kinowagam woraagin lek o. Nage kenok perak, kinowagam nappi woraagin o, yinuk, abet aret yokkiragi o.

⁸At ti wage logominggirik, aakumi maluk eekwi inom, an obeelom eeke nagarak inom, ndi, Ala nen maluk inoba piyoorak nogo inom, it aakumi nggween paga menggaarak nogo paganogo ineenu eeppiige logogin o.

⁹It maluk eekwi nogo ti, iniki noba panggombunuk, abet nombakulik ti aret o.

¹⁰Ndi, an obeelom eeke nagarak paga nogoba ka naminggirak me, kit ambinom an neyaamunggup lek o.

¹¹Ndi, Ala nen maluk inoba piyoorak nogo ti, at o nggween paga yime unde menggerak nogo, muk maluk oba pereegerak me, apuri kunduk inoba piyaagin o, yinuk, paganogo ineenu eeppiige logogin o.

¹²Noreewi o! Wone ando ambik yokkiroorak wonage kwe, kit yogondak woorak meek aret o.

¹³Ala ndogop menggerak paganogo yokkiraga Aberiniki nogo wage logominggirik perak, Ala ndogop menggerak o, yinuk, mamungginake logogin o. At iniki koombunuk en yokkirage logogin lek o. Ata, an nen yoge nogo mban konembunuk yokkirage, peebi eeriyak wone nogo at nen paganogo yokkirage, eeke logogin o.

¹⁴At nen an noone waganogo yokkirage logomenggerak paga an tiyappanege logogin o.

¹⁵Yi mendek ndi mendek an nogoba unde menggerak nogo ti, an namendek aret me, at Aberiniki nen an noone waganogo yokkirage logogin me nduk wone ti yokkiragarak o,” yinuk, yoragagerak.

¹⁶Yorage nagagirik, ”An neebe ne ambit iluk logonuk, lek neyaamonggotak kwe, ti'nuk, ne ambit iluk logonuk, aret neyaamunggup o,” yoragagerak.

¹⁷Yorage mbareegi, at oone waganggwi nogo konembunuk, it ando nen ambi nen ambi yogak yogo logonet, ”An ne ambit iluk logonuk, lek neyaamunggup o, ti'nuk, Ne ambit iluk logonuk, aret neyaamunggup o, ndi, ambi, An nogoba ka nagin o, yo'nirage yi, ngge nduk yo'nirage agaarik mbakop?

¹⁸Ne ambit iluk, yigi ti, nonggop mba'nuk yigi mbakop? At yo'nirage yi, nit kobak ee'ninake o,” yogogwaarak.

¹⁹Yogo mbareegwa, at Yetut nen it wone ambi at kin wakkoorak eekwi yelok iige nagagirik, yorage logonet, ”Ai, noreewi o! Ne ambit iluk logonuk lek neyaamunggup o, ti'nuk, Ne ambit iluk logonuk aret neyaamunggup o, yokkiragarak nogo ti, Nonggop mba'nuk yigi, yinuk, ti wone aret mbanggo ogotik ya?

²⁰Kiniki puru ari, leenggu maakwi, eekwi kiigak, it aakumi o nggween paga yime menggaarak nogo nen inale'nggen mbarugun. Kit kiniki puru yumonggotak kwe, peebi kiniki puru ari nogo lek age logonet, obaane'me ale'nggen nggwok eekkinake kaamunggup o.

²¹Kwe ambi aagaluk ndariyak eyom panggoni wagaatak paga enegen pagak ari kenok, andi nen iniki puru ari menggerak kwe, nda'nage kenok perak, Naagaluk muk nda'nagaarak o, yinuk, ale'nggen mbake logonet, andi kegetak nogo mari age menggerak.

²²Nogo ndak-ndak kit yogondak kiniki puru aago wonogwe kwe, peebi an ninom lambunggwi paga perak, kiniki ale'nggen age kaamunggup o. Kinale'nggen kaamonggotak nogo aakumi nen lek eerogo pinagarak mondok lek o, yinuk, mondok abet aret yokkiragi o.

²³Ti eyom paga kit nen wone ambi kin wa'neyaamunggup lek o. Ti mendek wo'niret o, yinuk, nogoba nggino yogwi kiinok, an nendage paga wokkirage kaamunggup o.

²⁴O maan nen nok, yogondak kuli nendage paga nogoba ambi nggino yoga'lek aret ogotik o. Kiniki ale'nggen nggwok lombok kaamunggup nduk, nggino yo'nip o. Nggino yogwi kiinok, aret wokkirage kaamunggup o, yinuk, mondok abet aret yokkiragi o,” yoragagerak.

²⁵”Wone yi yokkirage nogo eegu laarogo mban yokkirage kwe, an nogoba abok nogo tena'me paganogo yokkiroorak eyom panggoni woraagin nogo paga an wone eegu laarogo ambinom yokkiraagin lek o.

²⁶Kit kinake an nogoba yorikit o, yinuk, yokkirage lek o. Kit nen an kiniki kunik ee'nakwi,

²⁷ndi, an nogoba nappani wagagerak nogo kiniki oba panggombunuk, abet mbakwi, eereegutak paga nogoba iniki kunik eekkinake me, ti eyom paga kit nen aret an nendage paga at nggino yorumunggup o.

²⁸An nogoba wonage me nen o nggween paga yime wambi wagagirak. Ndi, yogondak an o nggween paga yi mbo punuk, nogoba ka nage agarik o,” yinuk, yoragagerak.

²⁹Yorage mbareegi, at oone waganggwi mendek nogo nen, ”Yogondak perak, wone eegu laarogo yo'nirage lek tena'me aret yo'nirage keego o.

³⁰Yogondak kat yi mendek ndi mendek abok keenu aret me, it aakumi ambi nen kat kin wakkeyoorak lek aret keego. Ti paga kat Ala wonage me nen wagagindak abet aret kombako o,” yoreegwaarak.

³¹Yogo mbareegwa, at Yetut nen, ”Kit yogondak abet aret nombako ogotik ya?

³²Wologwe! Kit apit an mbo paninuk, kiname lombok ma'nariyak eyom peebi kwe, yogondak muk panggoni wagaarak o. Kit an mbo paninuk mbaganumonggotak kwe, nalik logogin lek o. An nogoba nimbirak aret logogin o.

³³Wone yi yokkiragi nogo ti, kiniki an ninom kunik logonet, ugun tayenak lombok logobagip nduk, yokkiragi o. It aakumi nggween paga yime menggaarak mendek nogo nen piyakkinakwi kwe, an muk tebenogo piigirak me, kiniki kwippunuk, nu'lek logonip o,” yinuk, yoragagerak.