Read Wano YAYA 17 Bible Online

YAYA 17 - Wano bible

YAYA 17

¹Wone ti yorage nagagirik, at Yetut ena mbogut paga ni'na'nuk, ”Ai, nogoba o! An ee'naburak eyom panggoni wagaarak o. An kaput nen kat tiyappagakit nduk, kaput an naa'nduk tiyappanu o.

²An kaput, yi aakumi ndi aakumi abok tigitogon unde logonet, aakumi wo'nereegindak nogo mondok-mondok ineenik eeginabuwak nduk, mippaneegindak o.

³It aakumi mondok-mondok ineenik logorak nogo ti, kat Ala abet aret kalik menggendak inom, ndi, an Yetut Keritut kat nen nappani wagagindak inom, ineenu ogwe ti aret o.

⁴Eeriyak yo'nereegindak nogo abu worok togon eekirak me, an nggween paga yime logonet, tiyappagagirak o.

⁵Ndi, yogondak nogoba o! O awo wakkaga'lek kagak, kat nimbirak logonet, tiyanak wonagagirak nogo ndak-ndak yogondak kat wonage me time tiyappanu o.

⁶It aakumi o nggween paga yime menggaarak ando leenogo wo'nereegindak nogo, kat Ala eeke menggendak abok aret paganogo yoragagirak o. It aakumi yi nogo ti, kat kapuri kenok aret wo'nereegindak me, kat koone eeko menggaarak o.

⁷Yogondak yi eekak ndi eekak eeke minggirak nogo abok aret kat nen yo'nereegindak nogo abok aret ineenu agaarak o.

⁸Kat wone yo'nereegindak nogo abok aret yorage mbareegi, waganggo nogogwaarik, an kat wonage me nen abet aret wagagirak ineenu ogo nogogwaarik, kat nen an nappani wagagindak nogo it abet aret mbako agaarik o.

⁹An it inake tamban eeke agarik o. It aakumi o nggween paga yime menggaarak inake tamban eekeelik o. Ata, it kat wo'nereegindak nogo ti, kat kapuri aret me, inake tamban eeke agarik o.

¹⁰An napuri ti, kat kapuri, ndi, kat kapuri ti, an napuri aret o. It eekwi nogo paga an tiyappanugo menggaarak.

¹¹Yogondak an keya wage me, o nggween paga yime ambinom logogin lek kwe, it kapuri yi perak, o yime aret logogun o. Ai, nogoba! Kat maluk eekeelik mondok abe mban menggendak o. Kat nimbirak niniki ambit monggoorak nogo ndak-ndak, it kat nen wo'nereegindak nogo iniki ambit logowak o. Kat kendage nggwok logonet, komaawi ninikime liimbaneegindak nogo paga kapuri yi, ndegeninake logot o.

¹²It wo'nereegindak nogo an ninom logonet, kat komaawi ninikime liinik nogo paga ndegeninake nagarak o. Inarum neegak, ambi kobak arulik kwe, at ambi kobak ariyak nduk nda'nagagerak nogo perak, Ala wone liiru mbaneegerak nogo a'me lik yuwak nduk, kobak agaarak o.

¹³Yogondak perak, an keya wage agarik o. It aap yi nale'nggen nggwok inikime lombok kaawak nduk, an o nggween paga yime logonet, wone yi yokkege agarik o.

¹⁴Kat koone nogo an muk yoragagirak o. An it aakumi nggween paga mendek lek nogo pogom, it kunduk nggween paga mendek lek mban me, it nggween paga mendek nen, ineebi inombako agaarik o.

¹⁵It aap nggween paga yime menggaarak iigak, kat kapuri mban nggigininabenok nduk, yokkege lek o. Ata, at maluk eeke menggerak nogo nen maluk eeppiya wage kero, liirogon ndegeninake logonok nduk, yokkigi o.

¹⁶An it aakumi nggween paga mendek lek nogo pogom, it kunduk nggween paga mendek lek o.

¹⁷Kat koone ari nogo paga kat nonggop menggendak ineenu ogo menggaarak me, kat nen, An ndogop minggirak o, paganogo yorage logonet, it kapuri yi, leenogo patu o.

¹⁸Kat nen aakumi o nggween paga yime menggaarak inowagam nappani wagagindak nogo pogom, it kapuri yi, togop aret it aakumi nggween paga menggaarak inowagam nappigirak o.

¹⁹Kat nen, An ndogop minggirak o, wone paganogo yorage nogo paga, it kapuri yi abet aret kat kake leenak logowak nduk, an neebe inake aret punggolagarak o.

²⁰It inalik mban inake tamban eeke lek o. Ata, it nen wone yoramenggaarak paga iniki noba panggombunuk, abet nombarugun nogo inom aret inake tamban eeke agarik o.

²¹It abok aret inom iniki ambit logowak nduk, inake tamban eeke agarik o. Ai, nogoba! Kat nen an kiniki kunik, ndi, an nen kat niniki kunik monggo kwak, it nit ninom niniki ambit kunik wonogwe niinok, it aakumi o nggween paga yime menggaarak nogo nen kat nappani wagagindak abet nombaruwak nduk, it kapuri yi, inake tamban eeke agarik o.

²²Kat nimbirak niniki ambit wonogwe nogo kwak, it togop aret it iniki ambit aret logowak nduk, kat nen an tiyappaneegindak nogo kokwak, an nen it muk tiyappiigirak o.

²³It iniki abu ambit lombok aruwak nduk, it an iniki kunik, ndi, kat an kiniki kunik wonogwe niinok, it o nggween paga yime menggaarak nen kat abet aret an nappani wagagindak inom, ndi, kat kiniki kunik ee'nake kwak, it togop aret kiniki kunik eeginabeegindak nogo inom, ineenu arugun o.

²⁴Ai, nogoba o! It aap yi wo'nereegindak nogo nen kat mbogut-nggween yi awo wakkaga'lek kagak, kiniki kunik ee'nake logonet, tiyappaneegindak nogo, neyaawak nduk, an nawam time ninom logowak lak, ao, mbake agarik o.

²⁵Ai, nogoba! Kat kiniki mondok koonak mban menggendak o. It aakumi o nggween paga yime menggaarak nogo nen kat Ala ineenggo'lek kwe, an perak, kat neenu aret o. Ndi, kat abet aret nappani wagagindak nogo it aap yi muk ineenu agaarak o.

²⁶Kat kabok nogo it aap yi yorage nagarak me, kat an kiniki kunik ee'nake menggendak nogo kwak, it togop aret niniki-kiniki kunik eeko logonet, it an iniki kunik mondok logowak nduk, kat kabok ambinom yorage logogin o,” yinuk, yoreegerak.