Read Wano YAYA 18 Bible Online

YAYA 18 - Wano bible

YAYA 18

¹At Yetut nen tamban togop eeke nagagirik, at oone waganggwi mendek inom niyo Kiteron wunda nogo nogogwaarik, time yabu yarak ambime unggwi nogogwaarak.

²At Yetut at oone waganggwi mendek inom yabu yarak me nogome kulinik aret nogo nogogwaarak me, at Yetut onggo mbanigin Yurat nogo kunduk yarak me time eenu wonagagerak.

³Eenu wonagagerak me, it aap Ala unde inoweewi inom, aap Pariti mendek inom, nogo nen inawuri yigin unde ambi aago inom, aap keele maarinaka mendek inom, nappiigo mbareegwa, yigin waganggwi, togowa waganggwi, eeko mbareegwa, Yurat nen wogoren ndi paga yarak me nogome aret nogogwaarak.

⁴At Yetut nen at eeppuurak abok aret eenu wonagagerak me, it nogo nen Yetut ka nogo mbareegwa, Yetut iya wage nagagirik, ”Kit ta kwaarit wogop o?”

⁵Yorage mbareegi, ”Lek o. Yetut Nataret mendek kwaarit wogo o.” Yogo mbareegwa, Yetut nen, ”Ti an aret o,” yinuk, aap Yurat Yetut onggo mbanigin nogo inom aret me yoragagerak.

⁶”Ti an aret o,” yorage mbareegi, inakom niruk nogo logonet, nggween paga ngginnari nogogwaarak.

⁷Ngginnarit nogo mbareegwa, at Yetut ne ambinom yorage logonet, ”Kit ta kwaarit wogop ubi?” Yorage mbareegi, ”Lek o. Yetut Nataret mendek kwaarit wogo o.”

⁸Yogo mbareegwa, Yetut nen, ”Muk an aret yokkiragarak nogo! Kit an aret kwaa'nabit wogotak kenok, it noreewi yi nawak nen teppiyaanip o,” yinuk, yoragagerak.

⁹Ti yoragagerak nogo ti, aa'nduk Yetut nen, ”Kat wo'nereegindak nogo it ambi kobak arulik o,” yinuk, Ala yoreegerak nogo a'me lik yuwak nduk, yoragagerak.

¹⁰Nogo yorage mbareegi, Timon Peterut nen paloowi porogo wonage me, nggigik togon agago aap Ala unde inowe ayeloman endage Malukut nogo aruk abe'nggan tabok togon nappereegerak.

¹¹Aruk tabonggage mbareegi, at Yetut nen, ”Wulaga Peterut wae. Paloowi obaane'me yonggolu o. Niyo toolak kwak an ee'naburak nogoba nen koonogo paneegerak yi, an noorak lek nombakendak ya? Lek o. Nagin aret o,” yinuk, yoreegerak.

¹²Yoge mbareegi, it aap yigin unde ambi aago inowe komandan inom, ndi, it aap Yakuri mendek aap keele maarinaka mendek inom, nen Yetut pigogo keele maareegwaarak.

¹³Keele maako nogogwaarik, aa'nduk at Anat owagam wonok nogogwaarak. Aap Anat ti, aap Ala unde inowe tahun ti paga eeke nagagerak aap Kayapat arugelo nogo aret o.

¹⁴Aap aa'nduk it aakumi Yakuri mendek yorage logonet, ”Aap ambit nit aakumi ninake kambuurak perak op o,” yoragagerak nogo ti, Kayapat nen aret yoragagerak.

¹⁵Aap Anat owagam wonok nogo mbareegwa, Timon Peterut inom, aap Yetut oone wagangge ambi inom, Yetut ambokan nogogwaarak. Ambokan nogo nogogwaarik, Peterut endekem tu nggambe paga kagak, Yetut oone wagangge ambi aap Ala unde inowe eenu wonagagerak me, Yetut imbirak aap Ala unde inowe nogo awore'nggam unggwi nogogwaarak.

¹⁶Unggwi nogo nogogwaarik, ti'nuk, Yetut oone wagangge ambi aap Ala unde inowe eenu nogo nen, kolaga tu arum wonagagerak nogo yoge nagagirik, kolaga nogo nen, ”E o”, yoge mbareegi, wundi woraanuk, Peterut wonok oome unggwi nagagerak.

¹⁷Wonok oome unggwi nage mbareegi, kolaga tu arum wonagagerak nogo nen Peterut yoge logonet, ”Wulaga! Kat kunduk at oone wagangge mendek nogo lek a?” Yoge mbareegi, Peterut nen, ”An lek o,” yoreegerak.

¹⁸Yoge mbareegi, o time togwi wonagagerak me, aap Ala unde inowe ayeloman mini inom, aap keele maarinaka mendek inom, kani kumbunuk, togwi worakkologwe me, at Peterut inom togwi worakkolage nagagerak.

¹⁹Togwi worakkologwe iigak, at aap Ala unde inowe nogo nen Yetut kin wakkage logonet, ”Koone waganggwi mendek ti taani o? Ndi, wone mamuninake nagandak nogo ti, nonggop o?” yinuk, yoreegerak.

²⁰Yoge mbareegi, at Yetut nen, ”An nen it aakumi o nggween paga yime menggaarak nogo wone mamuninake logonet, kote mamuninake logolik o. An nen tena'me mban yorage nagarak o. An nen tamban eeko menggam inom, Ala awi wurik me inom, it aakumi Yakuri mendek komaako menggam abok aret mamuninake nagarak kwe,

²¹kat nonggop nduk, an kin wa'nege agandik? An wone ngge mendek yorage nagarak nogo, it konenggo nagaarak ineenu me, yokkiruwak nduk, kin wagiyet o.”

²²Wone ti, yoge mbareegi, aap keele maarinaka mendek ambi taati mi'ndak wonagagerak nen eenggi telak paga Yetut wake logonet, ”Aap Ala unde inowe nen wone yokkege me, togop yoriyak op mbaken?”

²³Yoge mbareegi, at Yetut nen, ”An maluk ari neegendak kenok ti, Maluk yagandak, yo'niriyak kwe, abet aret ari neegak, kat nonggop nduk, nooken o?”

²⁴Yoge mbareegi, at Anat nen Yetut keele maarak aret aap Ala unde inowe Kayapat nogo owagam nappereegerak.

²⁵Owagam nappege mbareegi, nage kagak, at Timon Peterut nogo togwi worakkolage me, it aap nogo nen at yogo logonet, ”Kat kunduk at oone wagangge mendek nogo lek a?” Yogo mbareegwa, at nen, ”An lek ubi!”

²⁶Yorage mbareegi, aap Ala unde inowe ayeloman aap Peterut nen aruk tabonggagagerak nogo ore ambi nen Peterut yoge logonet, ”Kat kimbirak yabu yarak me taati keegirak nogo lek a?”

²⁷Yoge mbareegi, at Peterut nen ambinom lik-lek ari mbareegi, ayam oone ku yereegerak.

²⁸Oone ku ari mbareegi, it aap nogo nen Yetut piginok aap Kayapat ame nen aap inowak loonggo menggam wonok nogogwaarak. O awo wigangga'lek kagak wonok nogogwaarak. Wonok nogo nogogwaarik, Ala ndomba warogo Patika lariyak ugun noorak me, ”Nit maluk eekkolookwak,” mba'nuk, inowak loonggo menggam unggwi noolik, endekem puk ogogwaarak.

²⁹Endekem puk wonogwe me, at Pilatut nogo iya wungge nagagirik, ”Wologwe! Aap yi, nonggop eekerak kenok, yogo ogotik o?”

³⁰Yorage mbareegi, it nen, ”Lek o. Aap yi maluk eeke logonetak lek nen, nit wonok kiri wa'netak lek o.”

³¹Yogo mbareegwa, at Pilatut nen, ”Kit nen aap yi wonok Ala nen wone lengganogo yokkiragagerak liiru mbanak nogo ndak-ndak owak looni nanip o.” Yorage mbareegi, it aap Yakuri mendek nen, ”Lek o. Nit nen aakumi mondok inooriyak mage me, aap yi owak looniyak lek o,” yoreegwaarak.

³²Wone yoreegwaarak nogo ti, Yetut nonggop eerogo nookwi iinok, kambigin, yoragagerak nogo a'me lik yuwak nduk, yoreegwaarak.

³³Togop aret yogo mbareegwa, at Pilatut nogo nen inowak loonggo menggam ambinom unggwi nanuk, Yetut wiige nagagirik, wage mbareegi, yoge logonet, ”Aakumi Yakuri mendek inogoba endagembogut kat yi aret ilik?”

³⁴Yoge mbareegi, at Yetut nogo nen, ”Kat yo'negendak ti, kat kalik kiniki mba'nuk nen yo'negen ilik, it ando nen an nabok yokkegaarak paga yo'negen a?”

³⁵Yoge mbareegi, at Pilatut nogo nen, ”Kat an aap Yakuri mendek nombakendak ya? Kat kowe-kawot inom, aap Ala unde inoweewi inom, nen keebe waganogo wo'negaarak me, nonggop eekendak o?”

³⁶Yoge mbareegi, at Yetut nen, ”An nendagembogut logonet, nabu'me piige minggim nogo ti, o nggween paga yime lek o. Nabu'me piige minggim o nggween paga yime logonetak en, an neebe waganogo it aap Yakuri wogorogwe iyo, an nawuri inom wim nambuko logonetak o. An nabu'me piige minggim nogo ti, o yime mendek lek o.”

³⁷Yoge mbareegi, at Pilatut nen, ”Ti kenok, kat aap kendagembogut aret ilik?” Yoge mbareegi, at Yetut nen, ”An nendagembogut ti, kat nen aret yagandak o. An togop logokit nduk nda'nagagirak. Ndi, Ala ndogop menggerak wone paganogo yokkirage logokit nduk, o nggween paga yime wambi wagagirak nogo o. It aap wone yi waganggwi iinok, Ala apuri aret me, an noone konenggo menggaarak o.”

³⁸Yoge mbareegi, at Pilatut nen, ”Ti nano wone paganogo yo'niroorak yagan o?” yinuk, yoreegerak. Yo'nuk, aap Yakuri mendek endekem iya wungge nagagirik, ”Wologwe! Aap yi maluk eekerak abu lek aret kagi o.

³⁹Ala ndomba warogo Patika lako logonet, aap ambi piinogo teppuwak nduk, yo'nogo monggotak me, kit aap Yakuri mendek kinowe endagembogut yi, piinogo wokkiroorak mbako ogotik ilik, lek a?”

⁴⁰Yorage mbareegi, it inoone nggwok paga yogo logonet, ”Aap yi lek o. Aap Mbarabat perak, piinogo wo'niret o,” yoreegwaarak. At Mbarabat nogo at yogot iyagalo wonagagerak kagak, yoreegwaarak.