Read Wano YAYA 19 Bible Online

YAYA 19 - Wano bible

YAYA 19

¹Wone ti yogo mbareegwa, Yetut yawi waruwak nduk, Pilatut nen, it aap yigin unde nogo wogoragagerak.

²Wogoragagerak yawi wako nogogwaarik, alok komaarak waganogo Yetut anobak paga kwippunuk, mbogoyum maangga kunik negen yippereegwaarak.

³Yippogo nogogwaarik, ambi nen yogak eeko logonet, ”Aakumi Yakuri inowe endagembogut yi wa!” yinuk, ineenggi telak paga wako nogogwaarak.

⁴Wako mbareegwa, at Pilatut nogo nen ambinom endekem it aap Yakuri mendek iya wungge nagagirik, ”Wologwe! At maluk eekerak abu lek kagarak me, kit kineenu arubagip nduk, wonok wagi o.”

⁵Yorage mbareegi, at Yetut anobak paga alok komaarak mbogoyum maangga kunik negen yirik wundi wagagerak. Wundi wage mbareegi, at Pilatut nen, ”Aap nogo yi kaanip o.”

⁶Yorage mbareegi, it aap Ala unde inoweewi inom, aap keele maarinaka inom, nogo nen Yetut inigen kogo nogogwaarik, inoone nggwok paga yogo logonet, ”Eyo karo-karo paga nabenogo pu o! Eyo karo-karo paga nabenogo pu o!” Yogo mbareegwa, Pilatut nen, ”Lek o. At maluk eekerak abu lek kagarak me, kit kinombaalombok waganogo eyo paga nabenogo pi nanip o.”

⁷Yorage mbareegi, it aap Yakuri mendek nen, ”Lek o. Nit Ala wone lengganogo yo'niragagerak liiru mbanak mugurok nogo monggoorak me, aap yi, An Ala aput aret o, yereegerak kenok, at wariyak aret mbako o.”

⁸Yogwi at Pilatut aruk konengge nagagirik, abunuk agabiti agagerak.

⁹Agabiti age nagagirik, ne ambi inowak loonggo menggam nogo me unggwi nanuk, Yetut yoge logonet, ”Kat kawi alom ngga nen wagagindak o?” Yoreegerak kwe, at Yetut oone lek puk mban wonagagerak.

¹⁰Puk mban wonage mbareegi, at Pilatut nen, ”Kat onggo an yo'niriyak ambi mbaka'lek agandik? Piinogo teppagarak ilik, eyo paga nabenogo pagarak a, an unde nogo kat keenggo'lek agandik ya?”

¹¹Yoge mbareegi, at Yetut nen, ”At mbogut paga mendek nen kat an eeppaniyak nduk unde eeppaganetak lek en, kat nen an eeppaniyak meek aret logonetak me, kat eeke nogo ti, maluk mbuuluk negen, ndi, at an neebe wo'niret kiri wagaarak nogo perak, maluk iya tit eekerak o,” yinuk, yoreegerak.

¹²Wone ti yoreegerak nogo at Pilatut nogo konembunuk, abunuk Yetut keele piinogo teppuurak eereegerak mendek, it aap Yakuri mendek inoone nggwok paga yogo logonet, ”Aap ambi nen, Nendagembogut aret o, ari kenok, aap ti Kayitat imbirak ogookkolage me, kat aap yi, piinogo teppege kenok, kat Kayitat kimbirak kunik lek aret kombarugun o,” yinuk, yoreegwaarak.

¹³Yogwi nogo at Pilatut aruk konembunuk, Yetut wonok wungge nagagirik, wone inowak loonggo menggam endage, Yugum ndoonak o, yogo nogogwam nogome aret kwi'nagagerak. (Yugum ndoonak o, yogo nogogwam nogo ti, it Iberani wone paga Nggabata aret.)

¹⁴Kwi'nagagerak nogo ti, ko'lu Ala ndomba warogo Patika lariyak pipuk eekwi iigak, liingge jam 12 paga aret kwi'nagagerak. Kwi'nage nagagirik, Pilatut nen it aap Yakuri mendek yorage logonet, ”Wologwe! Kinogoba endagembogut yi kaanip o.”

¹⁵Yorage mbareegi, ”Lek o. Wonok noorak aret o! Wonok noorak aret o! At eyo karo-karo paga nabenogo pi noorak aret o!” Inoone nggwok paga yogo mbareegwa, at Pilatut nogo nen, ”An nen kinogoba endagembogut eyo paga nabenogo puurak mbakotak ya?” Yorage mbareegi, it aap Ala unde inoweewi nen, ”Ninogoba endagembogut ti, Kayitat alik aret o!”

¹⁶Yogo mbareegwa, at Pilatut nen Yetut eyo karo-karo paga nabenogo puwak nduk, wogoragagerak. Wogorage mbareegi, Yetut piginok nogogwaarak.

¹⁷Piginok nogwe iigak, Yetut nen at agayo karo-karo lombok aago nogo aret ko'nok, puurom ambi endage, Anobak Yelenak, nogo paga pati laganeegerak. (Puurom endage nogo ti, Iberani wone paga, Nggo'nggota aret.)

¹⁸Pati lagangge mbareegi, time aret Yetut oolo kagak, aap mbere ambi peenok ambi peenok inom eyo karo-karo paga nabenogo piyareegwaarak.

¹⁹Piigo mbareegwa, at Pilatut nen, ”Yetut Nataret mendek it aap Yakuri inogoba endagembogut yi o,” yinuk, liiru mbanogo eyo karo-karo aago paga nabembereegerak.

²⁰Liiru mbanogo eyo paga nabembege mbareegi, Yetut eyo paga nabenogo pereegwam nogome ti, o Yerutalem korok wonagagerak me, aakumi Yakuri mendek apit aret liiru mbanak nogo inigen pekkogogwaarak. Wone mbaneegerak nogo ti, Iberani wone paga inom, Oroma wone paga inom, ndi, Yunani wone paga inom, mbaneegerak.

²¹Inigen pekkogo mbareegwa, it aap Yakuri mendek inoweewi Ala unde nogo nen Pilatut yogo logonet, ”It aap Yakuri mendek inogoba endagembogut yi o, yinuk, liiru mbangge mage o. Ata, It aap Yakuri mendek inogoba endagembogut an aret yegerak o, yinuk, mbanu o.”

²²Yogo mbareegwa, at Pilatut nen, ”An liiru mbanggirak nogo ti, mondok mbanak aret logowak o,” yinuk, yoragagerak.

²³Yorage mbareegi, it aap yigin unde nogo nen Yetut eyo paga nabenogo punuk, ambogoyum nggoorak nogo aap ineebe 4 nen, yum nogo ineengge ndak-ndak aret punogo kologogwaarak. Punogo kologo nogogwaarik, Yetut ambogoyum endekem mendek ambit tabak wonagagerak nogo wappunuk,

²⁴it-it wone mbanggo logonet, ”Wologo wae! Ayum yi nibinogo alitak koloorak mage o. Ata, Ta koloorak kaamun? yinuk, yugum ogut wakkaawok o,” yereegwaarak. Ti yereegwaarak nogo ti, Ala yoge kagak aap ambi nen ari logonet, ”Nambogoyum nggoorak punogo kologwe, ndi, nayum endekem mendek nogo perak kolaawok nduk, yugum ogut wakkogwe, eereegwaarak o.” yinuk, Ala wone liiru mbaneegerak nogo a'me lik yuwak nduk, aret eereegwaarak o.

²⁵Eekwi iigak, at Yetut agalo inom, at agaloluk inom, kwe Mariya aap Kelopat akwe nogo inom, ndi, Mariya awi Magaralena mendek nogo inom, Yetut eyo karo-karo aago abu'me taati aret wonogogwaarak.

²⁶At Yetut nen at agalo inom, at oone wagangge mendek iniki kunik wonagagerak nogo inom, taati wonogwe enegen iige nagagirik, at agalo yoge logonet, ”Nagalo yi wae. Kaagaluk ti aret o.”

²⁷Yoge nagagirik, at oone wagangge mendek nogo yoge logonet, ”Wulaga yi wae. Kagalo ti aret o,” yoge mbareegi, wone ti yoragagerak nogo eyom paga aret at Yetut oone wagangge mendek nogo nen Yetut agalo wonok ame nagagerak.

²⁸Ti yorage nagagirik, at Yetut nen, ”Abok aret eeki,” mbake logonet, Ala wone liiru mbanak ambi a'me lik yuwak nduk, ”An yi abu o,” yereegerak.

²⁹Ari mbareegi, time togolowak ambi anggur amburu ale mendek toolak wonagagerak me, amburu iri'ngga paga tamombunuk, yirok kunogo Yetut ambeme nigireegwaarak.

³⁰Nigireegwaarak nogo nengge nagagirik, ”Abu eeki o,” yinuk, uut yuwak ari logonet, iniki woronggolage nagagirik, kambeegerak.

³¹Ala ndomba warogo Patika lariyak pipuk eekwi iigak, ko'lu it Yakuri mendek tamban nggwok iniki liippunuk togon eeriyak nduk wonogogwaarak me, tamban eekwi paga ineebe eyo karo-karo aago paga wonogwe iyo, inowak kalenogo ineebe wogoret noorak nduk, it aap Yakuri mendek nen Pilatut yori wogogwaarak.

³²Yori wogo mbareegwa, it yigin unde nogo, nogo nogogwaarik, it aap Yetut inom nabenogo piyareegwaarak nogo ambi peenok wonage nogo owak kalenggwi, ndi, peenok wonage nogo owak kalenggwi, eeko logonet,

³³Yetut pekkogo nogogwaarik, muk kambeegerak mbareegi, owak kalenulik.

³⁴Owak kalenulik kwe, aap yigin unde ambi nen perak, tuguwa paga Yetut obate ndanuk togon wake mbareegi, amiya niyo inom wundeegerak.

³⁵At ambi enegen kagak eereegerak nogo nen paganeegerak me, at enegen kenok paganeegerak nogo ti abet aret o. Ndi, kit kunduk, abet mbarubagip nduk, paganeegerak nogo ti, abet aret eenu me paganeegerak o.

³⁶Ti eereegwaarak nogo Ala nen yoge kagak aap ambi nen ari logonet, ”At owak ambi kalenigin mondok lek o,”

³⁷ndi, alik ambi nen ari logonet, ”At eebe ndanuk togon wareegwaarak nogo inigen pekkaagun o,” yinuk, yereegwaarak Ala wone liiru mbaneegwaarak nogo a'me lik yuwak nduk, eereegwaarak.

³⁸Ti eeppogo mbareegwa, aap endage Yutup awi Arimateya mendek nen Yetut eebe waakit nduk, Pilatut yori wagagerak. At yutup nogo ti, Yetut oone wagangge nagagerak kwe, aakumi Yakuri mendek agabiti nen kote negen wagangge nagagerak. Yetut eebe waakit nduk, Pilatut yoge nagagirik, at Pilatut nen, ”E o,” yoge mbareegi, Yutup nage nagagirik, Yetut eebe wonok nagagerak.

³⁹Wonok nage me, at Nikoremut aa'nduk oonikiya Yetut owagam nagagerak nogo nen iri'ngga obari abe mendek ambi eyo mut amburu inom, ndi, ambi nggo'nggop engga obari pogom nogo inom, nanggelak-kanggelak agago 40 kilo negen wonok Yutup imbirak nagagerak.

⁴⁰Imbirak nogo nogogwaarik, Yetut eebe wonok it aap Yakuri mendek nen aakumi kanggwi iinok, eeko mengga kwak, yum laambu paga iri'ngga nogo inom perenogo nggerembereegwaarak.

⁴¹At Yetut eyo paga nabenogo pereegwam taa'nogo yabu aago wonagagerak. Nogome ndo ambi aakumi piya naga'lek awo ngget nendaarak wonagagerak me,

⁴²ko'lu Ala andomba warogo Patika lariyak pipuk aago me, ndi, ndo ti korok aret wonagagerak me, Yetut eebe nogo time aret mambereegwaarak.