Read Wano YAYA 20 Bible Online

YAYA 20 - Wano bible

YAYA 20

¹Hari minggu paga o wikit nduk apit aago kagak, at kwe Mariya awi Magaralena mendek ndoome nage nagagirik, yugum tu narak nogo pelenogo nappereegerak kagagerak.

²Kage nagagirik, puu'nuk Timon Peterut inom, aap Yetut oone wagangge iniki kunik wonagagerak inom, iya wage nagagirik, ”Ie! Ninogoba ndoome nen waganogo nggeeme pi nagaarak nit nineenggo'lek o.”

³Yorage mbareegi, at Peterut aap Yetut oone wagangge nogo imbirak wundi nogo nogogwaarik, ndoome pekka nogogwaarak.

⁴Imbirak puu'nuk nogo logonet, at Yetut oone wagangge nogo nen Peterut wuppunuk, at aa'nduk puu'nuk ndoome nogome nagagerak.

⁵Aa'nduk ndoome nage nagagirik, ena tebe yinuk, enegen mannage nagagirik, yum laambu nogo mban nggonenak kage nagagirik, unggulik puk agagerak.

⁶Puk agagerak wonage kagak, Peterut at ambokan nok-nok ndoome unggwi nage nagagirik, yum laambu nggonenak nogo inom,

⁷ndi, ambi yum at anobak me perenak wonagagerak nogo inom, enegen kagagerak. Yum at anobak me perenak wonagagerak nogo ti yum laambu yum nggonenak nogo inom lek, alik me taati pirik-perek eerak wonage kagagerak.

⁸Ti kenok wonage me, at Yetut oone wagangge mendek ambi ndoome aa'nduk nagagerak nogo nen unggwi nanuk, enegen kage nagagirik, abet mbareegerak.

⁹Ala nen, ”Yetut kambunuk, nogo menggam nen eenik a'nuk, mi'nariyak o,” yinuk, yereegerak liiru mbanak wonagagerak kwe, at oone waganggwi mendek nogo awo liippega'lek kobak aret wonogwe iigak, at ambi nogo nen perak, enegen kage nagagirik, abet mbareegerak.

¹⁰It nogo imbirak inigen kogo nogogwaarik, iname iniyok paga aret wogogwaarak.

¹¹Iname wogwe iigak, at kwe Mariya ndo ambe paga taati le ari nagagerak. Le ari logonet, ena tebe yinuk, enegen mannage nagagirik,

¹²mbogut paga yonggo nugu menggaarak melaikat mendek mbere yum laambu yirik Yetut eebe warogo pereegwam nogome ambi anobak wonagagim, ndi, ambi iyok wonagagim imbirak kwi'ndak wonogwe iyareegerak.

¹³Iige mbareegi, it yonggo nogo nen, ”Kolaga yi wae. Kat nonggop nduk le ari agandik o?” Yogo mbareegwa, at Mariya nen, ”Lek o. It aakumi nen an nogoba wonok nagaarak o. Ndi, at eebe nggeeme pi nagaarak an neenggolek me, le ari agarik o.”

¹⁴Yorage nagagirik, ena logurogon ambokan pe'nage nagagirik, at Yetut taati mi'ndak wonage kagagerak kwe, Yi at aret, mbarulik.

¹⁵Mbaka'lek mbareegi, at Yetut nen, ”Kolaga yi wae. Kat nonggop nduk le ari agandik o? Aap ta kwaake agandik?” Yoge mbareegi, at Mariya nogo nen, ”Aap yi, yabu yarak unde nogo ilik,” mbake logonet, ”Ai, nogoba. At eebe kat aret wonok nagandak kenok, ngga pi nagandak an wa naakit nduk, yo'niru o.”

¹⁶Yoge mbareegi, at Yetut nen, ”Mariya wae!” Yoge mbareegi, at ena logurogon pekkage nagagirik, Iberani wone paga, ”Raboni,” yoreegerak. (”Raboni” yoreegerak nogo ti, nit ninoone paga ”Ie! Nogoba Ngguru o,” yinuk, yoreegerak.)

¹⁷Yoge mbareegi, at Yetut nen, ”An nogoba wonage me awo ka lagangga'lek me, pi'nabugun o. An kit ninom ninogoba Ala ambit menggerak nogo, ka lagi nage me, noreewi ineenu logowak nduk, yora nak o.”

¹⁸Yoge mbareegi, at Mariya awi Magaralena mendek nen Yetut oone waganggwi mendek iya wage nagagirik, ”Wologwe! Ninogoba muk eenik mi'nagaarak nenegen kagarak o,” yinuk, Yetut nen at yoreegerak nogo mbininogo yoragagerak.

¹⁹Hari Minggu ti paga o apit agagerak kagak, it Yetut oone waganggwi nogo nen aakumi Yakuri mendek inagabiti nen oome tu nappunuk ugun wonogwe me, Yetut inenggela'me mi'nari unggwage nagagirik, ”Noreewi kiniki kwippinip o.”

²⁰Yorage nagagirik, at eenggi inom, obate mbanak inom, nigiyareegerak. Nigiige mbareegi, it Yetut oone waganggwi mendek nen inogoba at aret kogo nogogwaarik, iniki ale'nggen ambik mbareegwaarak.

²¹Iniki ale'nggen ambik mbakwi iigak, Yetut nen ambinom yorage logonet, ”Noreewi o. Kiniki kwippinip o. An nogoba nappani wagagerak nogo kwak, an nen kit nappinagage agarik o.”

²²Yorage nagagirik, ambe aagi inoba pu eerogo piige logonet, ”Kit Aberiniki kolaanip o.

²³Kit nen aakumi inomaluk lek eerogo piigwi kiinok, lek aret arigin o. Ndi, it inomaluk lek eerogo piigwi lek kenok ti, mondok iitok aret logogin o,” yinuk, yoragagerak.

²⁴Yetut wage nagagirik, wone yoragagerak nogo ti, at oone waganggwi mendek ambi endage Kulu'mbere ndarak Tomat nogo, eebe lek kagak wagagerak me,

²⁵it Yetut oone waganggwi mendek ando nogo nen Tomat yogo logonet, ”Tomat wae! Ninogoba muk eenik mi'nagaarak ninigen kogoorak o.” Yogo mbareegwa, at Tomat nen, ”Wologwe! An at eenggi pulu warak awinobam nenegen kage, ndi, eenggi pulu warak me inom, obate mbanak me inom, neenggi mambege, eeka'lek neegak, an abet mbarigin lek o,” yinuk, yoragagerak.

²⁶Yorage mbareegi, nogo 7 yinuk, 8 paga it aap Yetut oone waganggwi mendek Tomat inom oome tu narak kagak wonogwe me, Yetut inenggela'me mi'nari unggwage nagagirik, ”Noreewi kiniki kwippinip o.”

²⁷Yorage nagagirik, Tomat nogo yoge logonet, ”Wulaga Tomat wae. Keenggi an neenggi yi, pi'nake logonet, nawinobam pekkage, ndi, kobaak ngginogo nobate mbanak me keenggi mambege, ee'nake logominggindik, kiniki tiyak-tebek ari logonet, abet nombaka'lek logorak ti mage o. Ata, kiniki noba panggombunuk, abet nombake logot o,” yinuk, yoreegerak.

²⁸Yoge mbareegi, at Tomat nen, ”Ai! An nogoba Ala kat aret keegi o.”

²⁹Yoge mbareegi, at Yetut nen, ”Tomat wae! Kat kenegen neege nagandik, kiniki noba panggombunuk, abet nombakendak kwe, it aakumi ando inigen neega'lek logonet, iniki noba panggombunuk, abet nombakwi iinok perak, iniki ale'nggen ambik kogo logogun o,” yinuk, yoreegerak.

³⁰At Yetut nen at oone waganggwi mendek inenggaanom ineenu ariyak inagabiti warak mendek ando apit aret eeke nagagerak kwe, mbuku yi paga liiru mbanak lek o.

³¹Eeke nagagerak liiru mbanak yi nogo ti, at Yetut ti, Ala nen at aput leenogo mippereegerak Keritut aret kit abet mbakwi, ndi, abet mbakwi kiinok, at eekkinabemenggerak paga kineenik mondok mendek kologwe, eeko logomunggup nduk, wone yi liiru mbaneegirak o.