Read Wano YAYA 3 Bible Online

YAYA 3 - Wano bible

YAYA 3

¹It Yakuri mendek inowe aap Pariti mendek ambi endage Nikoremut aret wonagagerak.

²At nogo ne ambi paga oonikiya Yetut owagam wage nagagirik, ”Ngguru wae! Ala nen kat aakumi mamuninake logonok nduk, nappagi wagaarak keego o. Aakumi Ala inom kunik lek kenok, ineenu ariyak inagabiti warak mendek kat eerit nege menggendak nogo it nen eeriyak abu meek o.”

³Yoge mbareegi, at Yetut nen, ”Aap ambit-ambi ngget nda'naga'lek kenok, at Ala abu'me piige minggim enegen kaagin lek o, yinuk, mondok abet aret yokkigi o.”

⁴Yoge mbareegi, at Nikoremut nen, ”Ubi! Aap abu anggok a'nuk, peebi nonggop togon nda'nariyak mbaken? At agalo inikime unggunuk, ambinom ngget nda'nariyak op me yinuk, yagan a?”

⁵Yoge mbareegi, at Yetut nen, ”Aap ambit-ambi niyo paga inom, Aberiniki paga inom, ngget ndaka'lek kenok, Ala abu'me piige minggim unggwi nagin mondok lek o, yinuk, mondok abet aret yokkigi o.

⁶It aakumi nen ndaganakwi ti, it mendek aret o. Ndi, Aberiniki nen ndaganake nogo ti, at mendek aret o.

⁷Ngget nda'nariyak wone yokkigi yi nogo, Ie! yinuk, kagabiti mbarugun o.

⁸O wiya iniki nen aret warit nage kagak, oonebu ari mban kinaruk konenggwi kwe, alom ngga nen warit wage, nggeeme nen warit nage, nogo ti, kit kineenggo'lek ugun kobak monggotak nogo ndak-ndak, it aakumi Aberiniki nen ndaganake nogo ti, ti pogom aret o.”

⁹Yoge mbareegi, at Nikoremut nen, ”Ti yagandak ti, nonggop eeriyak me nduk yagan o?”

¹⁰Yoge mbareegi, at Yetut nen, ”Kat aakumi Iterali mendek mamunirage menggendak aret kwe, an wone yokkege yi, kat liippega'lek agandik?

¹¹Nineenu kenok mban yokkirogwe, ninigen kogoorak nogo paganggirogwe, eekwi kwe, paganogo yokkirogwe nogo kit wagangga'lek aret o, yinuk, mondok abet aret yokkiragi.

¹²An nggween paga wone yokkirage kit nen abet mbaka'lek me, mbogut paga wone yokkirage neenok, kit nonggop togon abet mbarumunggup mbakop?

¹³Aap alik ambi abu lek o. An mbogut paga nen wambi wagagirak aap aret nda'nagagirak nogo nalik mban mbogut paga lagi nagagirak.

¹⁴At Muta o karume logonet, waalo ogut wakkagak eerogo mippereegerak nogo kokwak, an aap aret nda'nagagirak nogo, it aakumi iniki noba panggombunuk, abet nombakwi nogo mondok-mondok ineenik logowak nduk, an togop aret mippaniyak.

¹⁶At Ala nen yi aap ndi aap abok inabuwa lombok mbareegerak me, kit kiniki noba panggombunuk, abet nombakwi kiinok, lek eerogo pinagarak lek o. Mondok-mondok kineenik logobagip nduk, at aput ambolom ndarak an aret nappani wagagerak.

¹⁷At Ala nen at aput an nogo kit aakumi abok kinowak loonogo maluk onggo kinoba pinagakit nduk, o nggween paga yime nappani woroolik o. Ata, kit aakumi abok kinagap ndarikit nduk, nappani wagagerak.

¹⁸It aakumi iniki an noba panggombunuk, abet nombakwi iinok, Ala nen inowak loonogo maluk onggo inoba piyaagin lek kwe, it iniki an noba panggombunuk, abet nombaka'lek iinok perak, it iniki Ala aput ambolom ndarak an nogo noba panggombunuk, abet nombaka'lek me, muk inowak loonogo maluk onggo inoba piigerak wonogwe o.

¹⁹Ala nen inowak loonogo maluk onggo inoba piyoorak alom nogo yi aret o. At eya eeginake menggerak nogo o nggween paga yime muk wambi wagagerak kwe, it aakumi ti, maluk mban eeko menggaarak me, At eya nogo ti, nineebi o, mba'nuk, o apit mban inikilom mbako menggaarak.

²⁰Yi aap ndi aap maluk eeko menggaarak nogo nen it maluk eekwi pagak ari kero, At eya nogo ti, nineebi o, yinuk, owagam wogolik kwe,

²¹it aap Ala ndogop menggerak wone nogo eeko menggaarak kenok perak, Ala inom kunik logonet, eeko menggaarak pagak yuwak nduk, at eya nogo owagam wogo menggaarak o,” yinuk, yoragagerak.

²²Ti yoge nagagirik, ti'nuk, at Yetut at oone waganggwi mendek inom o Yureya unggwi nogo nogogwaarik, time inom logonet, aakumi niyome wuppiigo nogogwaarak.

²³Wuppiigwi iigak, at Yaya nogo keele maarogo mambiigo menggam awo mambega'lek me, at Yaya kunduk o Talin korok kagak, o Ayinom niyo ambik wonage aruga'ne taati aakumi at owagam wogwe iinok, niyome wuppiige nagagerak.

²⁵Niyome wuppiigwi wonogwe me, aap Yaya oone waganggwi inom, aap Yakuri mendek ambi inom, nen yi mendek ndi mendek kooriyak wone nogo alelo wareegwaarak.

²⁶Alelo wappunuk, Yaya owagam wogo nogogwaarik, ”Ngguru wae. At kimbirak yi Yoreran enebaga logonet, abok paganogo yoragagindak nogo niyome wuppiige me, aakumi apit at ka nogo agaarik o.”

²⁷Yogo mbareegwa, at Yaya nen, ”Wologwe! Aap ambit-ambi mbogut paga nen eeppega'lek kagak, alik en iniki koombunuk eerit noorak op mbakop? Meek o.

²⁸Ala nen leenogo mippereegerak nogo ti, an lek o. At eebe peebi woroorak nduk, an we luulu naa'nduk nappani wagagerak o, yinuk, paganogo yokkiragagirak nogo kit aret konenggo nogogutak.

²⁹Kwe ambi aap wagangge kenok, aap ti kwe nogo ogonggelo aret o. At kwe kolage ore nogo we inom logonet, at kwe kolage nogo oone konengge kenok, ale'nggen ambik kage nogo pogom ti, an niniki ale'nggen ambik ee'nake o.

³⁰At tiyak ari kagak, an tebek yuurak agaarak o,” yinuk, yoragagerak.

³¹”It aakumi abok aret tebenak iigak, at agi nen wagagerak nogo mondok tiyanak wonage o. It nggween paga nen ndarak ti, nggween paga mendek me, nggween paga wone mban yogo menggaarak. It aakumi abok aret tebenak iigak, at mbogut paga nen wagagerak nogo, mondok tiyanak aret wonage o.

³²At enegen kagagerak inom, aruk koneneegerak inom, paganogo yorage kagak kwe, at paganogo yorage nogo aakumi abu waganggulik aret wonogwe o.

³³It aakumi at paganogo yorage nogo waganggwi paga Ala abet aret ari menggerak tena'me pogo menggaarak.

³⁴At Ala nen nappi wagagerak ti, Ala wone mban ari menggerak. Ala nen at Aberiniki wogoge logonet, ambi eeriyak kenok, abok endak mban eeke logowak nduk, wogoreegerak.

³⁵Ogoba ti, aput iniki kunik menggerak me, yi mendek ndi mendek apit aret at unde logowak nduk, wogoreegerak.

³⁶It aakumi iniki Ala aput oba panggombunuk, abet mbakwi iinok, mondok-mondok ineenik aret logogun. Ndi, it ando Ala aput oone konembunuk, eeka'lek iinok perak, ineenik logogun lek o. Ala anini inoba aret logogin o,” yinuk, yoragagerak.