Read Wano YAYA 5 Bible Online

YAYA 5 - Wano bible

YAYA 5

¹Ti eeke nagagirik, ti'nuk, it Yakuri mendek laago lakwi me, Yetut o Yerutalem wambi nagagerak.

²O Yerutalem tu ambi ndomba wogoret unggwogo menggam taati niyo ambi yenggenak wonagagerak. Niyo yenggenak ti, Iberani wone paga Mbetera, yogo nogogwaarak. Niyo yenggenak nogo aa'nggi paga yengget-wangget o 5 wurik me tigitogon awe aago mban wonagagerak.

³Nogome aakumi ambik kugi andi wonogogwaarak inom, inigen mbuk inom, inendop maluk inom, ineenggi-iniyok nggilik-nggelok aago inom, time mban wi'ndak wonogogwaarak.

⁴

⁵Wonogwe me, aap ambi andi kagak 38 tahun eereegerak nogo inom time aret wonagagerak.

⁶Aap nogo, o maan togon nen togop aret wi'ndak wonagagerak Yetut nen yelok kage nagagirik, yoge logonet, ”Wulaga wae! Kat obeelom eekkaburak mbakendak ilik, lek a?”

⁷Yoge mbareegi, aap andi warak nogo nen, ”Ai nogoba! Yi abolok eeke kenok, an wo'neret yiime wuppani noorak noreewi ambi lek me, an awo wambi nage neegak, it ando mban peleppanegak wanggo menggaarak o obak!”

⁸Yoge mbareegi, at Yetut nen, ”Wulaga! Mi'na'nuk ndoonak nogo yege menggendak nogo ko'nok nak o.”

⁹Awo yoge kagak, aap nogo obeelom age nagagirik, ndoonak nogo yege nagagerak nogo ko'nok nagagerak. Ti eereegerak nogo ti, it Yakuri tamban eekwi paga aret eereegerak.

¹⁰Tamban eekwi paga eereegerak me, it Yakuri mendek nen aap obeelom agagerak nogo yogwi, ”Wulaga! O yogondak tamban eekwi paga me, kat ndoonak nogo yege menggendak nogo wonok nage ti mage ubi!”

¹¹Yogo mbareegwa, at aap nogo nen, ”Lek o. Aap an obeelom ee'nakerak nogo nen, Ndoonak nogo yege menggendak ko'nok nak o, yo'negerak me tit yogwe a?”

¹²Yorage mbareegi, it nen, ”Ta nen, Ndoonak nogo yege menggendak ko'nok nak, yokkegerak?”

¹³Yogo mbareegwa, Yetut aakumi ambik time kuwak aago inenggela'me kobak ari nagagerak me, aap obeelom eereegerak nogo nen, ”Ndogop nen obeelom ee'nakerak o,” yinuk, paganogo yoroolik o.

¹⁴Peebi aap nogo Ala awi wurik me wonage Yetut enegen kage nagagirik, ”Wulaga! Kat keebe obeelom aret agandak me, andi abunuk nggwok eekkake kero, maluk ambinom eerugun o,” yinuk, yoreegerak.

¹⁵Yoge mbareegi, aap nogo wundi nage nagagirik, ”Lek o. Aap an obeelom ee'nakerak nogo ti, Yetut aret o,” yinuk, aap Yakuri mendek paganogo yoragagerak.

¹⁶Yorage mbareegi, at Yetut nen it aap Yakuri tamban eekwi paga eereegerak me, it Yakuri mendek nen Yetut piyak-payak eerogo pit nogogwaarak.

¹⁷Eeppit nogwe iigak, at Yetut nen it yorage, ”An nogoba nen o yogondak yi kuli paga eeke menggerak me, an kunduk togop aret eeke minggirak o,” yoragagerak.

¹⁸At Yetut nen tamban eekwi paga eeriyak mage yugu kagak, eereegerak paga mban lek o. Ata, ”Ala ti, an nogoba lombok aret o,” ari logonet, Ala imbirak ndak-ndak eekkolagagerak paga it aap Yakuri mendek nogo nen abunuk at wariyak nduk, eeko nogogwaarak.

¹⁹Eekwi me, at Yetut nen, ”Ala aput nalik niniki koombunuk nen eeriyak meek o. An nogoba eeke nenegen kenok mban eeke minggirak o. Nogoba nen yi mendek ndi mendek eeke nogo ti, at aput an ndak-ndak aret eeke minggirak.

²⁰An nogoba ti, at aput an iniki kunik ee'nake, ndi, at yi mendek ndi mendek eeke menggerak abok aret at aput an yo'nege, eeke menggerak. Eeke neegotak nogo ti, mbuuluk negen, ndi, peebi kit, Wi! yubagip nduk, abunuk nggwok, Eeru o, yo'nege kenok, eeke neyaamunggup o.

²¹Nogoba nen aakumi kanggaatak ineenik agago mippiige minggi kwak, at aput an niniki nen aap ambi eenik eeppuurak mbake neenok ti, eenik agago mippuurak aret o.

²²Nogoba nen aakumi inowak loonogo maluk onggo eeppiigeelik o. Aakumi abok inowak loonogo maluk onggo eeppiyoorak ti, nogoba nen aput an aret mippaneegerak.

²³Aakumi nen Ala tiyappogo mengga kwak, aput an kunduk ndak-ndak tiyappanugo logowak nduk, mippaneegerak. It aap nen Ala aput an tiyappanugwi lek iinok ti, nogoba nappani wagagerak nogo tiyappugwi lek o, yinuk, mondok abet aret yokkiragi o.”

²⁴Yorage nagagirik, ambi ari logonet, ”It aap an noone konembunuk iniki at nappani wagagerak nogo oba panggombunuk, abet ombakwi nogo ti, mondok-mondok ineenik aret logogun o. Ndi, it aap nogo kanggo menggam nen muk ineenik eeginake minggim unggwi wogogwaarak me, Ala nen inowak loonogo maluk onggo eeppiyaagin lek o, yinuk, mondok abet aret yokkiragi.

²⁵It aap kanggo menggaarak mendek nen Ala aput an noone koneniyak eyom peebi kwe, yogondak muk panggoni wagaarak me, it aakumi nen an noone konenggwi iinok, mondok-mondok ineenik aret logogun o.

²⁶An nogoba aakumi ineenik eeginake menggerak alom unde minggi kwak, aput an togop aret ineenik eeginake logokit nduk, alom unde eeppaneegerak.

²⁷Nogoba nen aput an aap aret nda'nagagirak me, aakumi inowak loonogo maluk onggo eeppiyoorak awone kili'nereegerak o, yinuk, mondok abet aret yokkiragi o.”

²⁸Yorage nagagirik, ambi ari logonet, ”It aakumi kanggaatak piigo menggam wonogwe nogo abok aret an noone konembunuk, mi'nariyak eyom panggoni woraagin me, wone yokkiragarak nogo, Wi! yugup o. Ti eeri woroorak nogo ti, it obeelom eeko nogogwaarak nogo mondok-mondok ineenik logowak nduk, mipiige, ndi, it maluk eeko nogogwaarak nogo inowak loonogo maluk onggo eeppiyaakit nduk, mippiige, eerigin o,” yinuk, yoragagerak.

²⁹

³⁰”An nalik niniki koombunuk nen ambi eeriyak meek o. Ata, Ala oone konembunuk mban inowak loonogo maluk onggo eeppiige minggirak. An niniki mbake paga eekeelik o. Nogoba nappani wagagerak iniki mbake nogo mban eeke minggirak me, an aakumi inowak loonogo maluk onggo eeppiige nogo ti, a'me liirogon aret eeppiige minggirak.

³¹An nalik nen mban nabok paganogo yokkirage neenok ti, pilit wone aret ari nombariyak kwe,

³²at ambi alik en an nabok paganogo yokkirage menggerak. Ndi, at yokkirage nogo ti, abet aret yokkirage menggerak an neenu aret o.

³³Kit yonggo Yaya owagam nappiyareegutak nogo, nogo mbareegwa, wone abet lombok paganogo yokkiragagerak.

³⁴An nabok it aakumi nen paganogo yokkiroorak an mbake lek kwe, kit kinagap ndarikit nduk, wone yi yokkirage agarik o.

³⁵Aap Yaya ti, ndi wuninik abinak ambik eeke minggi kwak wonagagerak me, eya eekkinake kwak yokkirage nagagerak paga kiniki ale'nggen ne ambit iluk mbakotak kwe,

³⁶at Yaya nen nabok paganogo yokkirage ti, meek negen. An nogoba nen an eeke logokit nduk, yo'nereegerak eeke minggirak nogo paga nogoba nen nappani wagagerak nabok pagak ari nogo ti, mondok iya lombok aret o.

³⁷An nogoba nappani wagagerak kunduk nabok paganogo yokkiragagerak kwe, kit at oone kinaruk mondok konengga'lek, ndi, at enete inom kinigen kaga'lek aret ogotik o.

³⁸At nappani wagagerak an nogo, kiniki noba panggombunuk, abet nombaka'lek me, at oone ti, kinikime wonage abu lek o.

³⁹Kit Ala wone liiru mbanak paga, Mondok nineenik ee'ninabigin, mba'nuk, liirogon malenggo monggotak. Ala wone liiru mbanak ti, an nabok paganak nogo liiru mbanak aret kwe,

⁴⁰kit kineenik eekkinabikit nduk, an nowagam woroorak op aret kwe, nineebi mbako monggotak.

⁴¹An aakumi nen tiyappaniyak ti mbakeelik o.

⁴²Kit perak, Ala kinom kiniki kunik mbakulik ti, an abu neenu minggirak o.

⁴³Nogoba nen nappani wagagerak an nogo, kit wa'naka'lek kwe, aap alik ambi at iniki mba'nuk wage kenok perak, aret waamunggup kiigi o.

⁴⁴Wologo wae! It kinoreewi nen tiyappinagagwi iinok ti, kinikilom mbako monggotak kwe, Ala alik mban menggerak nen tiyappinaniyak ao, mbakwi lek me, kit nonggop togon kiniki noba panggombunuk, abet nombarumunggup o?

⁴⁵An nen nogoba enggaanom paga ninenggali warogo yo'niraagin mbarugup o. At kinenggali warogo yokkirage ti, kit kiniki luunik monggotak aap Muta nogo aret o.

⁴⁶Kit kiniki Muta oba panggombunuk abet mba'netak en, at nen an nabok paganogo liiru mbaneegerak me, kiniki muk an noba panggombunuk, abet nomba'netak o.

⁴⁷Aap Muta wone liiru mbaneegerak nogo kit abet mbakwi lek kenok, an noone yokkirage ti, nonggop togon abet mbarumunggup o?” yinuk, yoragagerak.