Read Wano YAYA 6 Bible Online

YAYA 6 - Wano bible

YAYA 6

¹Ti yorage nagagirik, ti'nuk, at Yetut yi yenggenak Nggalileya endage ambi Tiberiyat nogo enebaga wunda nagagerak.

²Enebaga wunda nage me, it aakumi ambik at Yetut ineenu ariyak inagabiti warak mendek eeke logonet, andi warak obeelom eeginabit nage inigen kogo nogogwaarik, Yetut amugurok nogogwaarak.

³Amugurok nogwe iigak, at Yetut puurom lagi nage nagagirik, at oone waganggwi inom time aret kwi'nogogwaarak.

⁴Ne ti eyom paga Ala ndomba warogo Patika lariyak eyom panggoni wagagerak.

⁵Ndi, Yetut nogo kwi'na'nuk, enegen tiya ari logonet, aakumi ambik at owagam kuwak ari wogwe iige nagagirik, Piliput yoge, ”Piliput wae! Aakumi yi, mbi noorak nduk onggo nggeeme kuni nawi o?” yoreegerak.

⁶Yoreegerak nogo ti, at eeriyak eenu logonet, Piliput abut mbanikit nduk, yoreegerak.

⁷Yoge mbareegi, at Piliput nen, ”It aap inalitak lombok mbuuluk-mbuuluk nawak nduk, 200 rupiah paga mbi onggo mbani namonggoorak kwe, endak noorak meek mbaki o.”

⁸Yoge mbareegi, at oone waganggwi ambi Timon Peterut awot Andereyat nogo nen Yetut yoge,

⁹”Nogoba wae! Wulaga mbuuluk ambi roti mbi 5, ndi, ikan mbuulogwe 2 porogo wonage kwe, aakumi ambik me endak noorak meek mbaki o.”

¹⁰Yoge mbareegi, at Yetut nen, ”Aakumi yi, kwi'naruwak nduk, yoraanip o.” Yorage mbareegi, time iri'ngga ambik wonage me, aap ineebe 5000 iri'ngga paga kwi'nogogwaarak.

¹¹Kwi'nogo mbareegwa, at Yetut nen roti mbi waganogo, ”Ala wa,” yinuk, tamban eeke nagagirik, it aap kwi'nogogwaarak nogo tumburiragagerak. Tumburirage nagagirik, ikan inom togop aret tumburirage logonet, inikime tenak kenok, ambinom wogorage, eereegerak.

¹²Tumburiragagerak nogo nonggo nogogwaarik, ndonggoppiige mbareegi, at Yetut nen at oone waganggwi nogo yorage, ”Ando ndiinik ti, mbo pugwi iyo, ambime kuwak agago pi woraanip o.”

¹³Yorage mbareegi, it roti mbi nonggo logonet, ando ndiinogo pereegwaarak nogo kuwak eerogo mbirim yum 12 eno korok togon yonggologo pereegwaarak.

¹⁴Yonggologo pogo mbareegwa, aakumi nen ineenu ariyak inagabiti warak mendek eeke kogo nogogwaarik, ”At Ala wone yorage menggerak o nggween paga yime woraagin nogo, yi abet aret wagaarak kogo.”

¹⁵Yogo mbareegwa, ”It aakumi wogo logomenggaarik, inogoba nendagembogut logorak pigogo mippaniyak eekwi,” yelok iige nagagirik, alik puurom time lagi nagagerak.

¹⁶Lagi nagagerak kagak, o kiip age mbareegi, Yetut oone waganggwi mendek yi yenggenak aa'nggi paga wambi wogo nogogwaarik,

¹⁷to paga unggunuk, o Kaperenaum wogogwaarak. Wogwe iigak, o kiip agagerak me, Yetut iya waga'lek awo kagak,

¹⁸o wiya omaawi ambik wake logonet, yi muninuk nagagerak.

¹⁹Yi muninuk nage kagak, it unggorak mbanit nogo logonet, 4 kilometer ilik, 5 kilometer a, agan nogwe me, at Yetut yi ogombaga iyok pit inowagam panggo yi wage inigen kogogwaarak. Kogo nogogwaarik, inagabiti ambik ogogwaarak.

²⁰Inagabiti ogo mbareegwa, Yetut nen, ”Noreewi o! An aret me kinagabiti yugup o.”

²¹Yorage mbareegi, ”To paga unggwi woraayok ubi,” mbakwi iigak, yi yenggenak aa'nggi enebaga it noorak mbareegwam nogome aret muk ari nogogwaarak kogogwaarak.

²²Ko'lu o wege mbareegi, it aakumi nen kii'me yiiro ambiret mban wonage, ndi, Yetut at oone waganggwi yiiro nogo paga inom lek inalik mban nogwe iyareegwaarak me nduk, yi aa'nggi paga taati aret wonogogwaarak.

²³Wonogwe me, yiiro ando alik o Tiberiyat nen ninogoba tamban eeppunuk aakumi roti mbi tumburiragagerak nonggo nogogwam nogome aret nogogwaarak.

²⁴Nogo nogogwaarik, Yetut inom, at oone waganggwi mendek inom, ineebe lek aret iigo nogogwaarik, yiiro paga unggunuk, Yetut kwaarit o Kaperenaum wogogwaarak.

²⁵O Kaperenaum woraanuk, Yetut yi yenggenak yi paga wonage me kwaakkogo nogogwaarik, ”Ngguru wae! Kat yime mandom wagandak?”

²⁶Yogo mbareegwa, at Yetut nen, ”Kineenu ariyak kinagabiti warak mendek eeke neegotak paga kwaa'nabi woroolik. Ata, kit mbi ndonggorogon nonggotak paga kwaa'nabit wogotak kiigi o, yinuk, mondok abet aret yokkirage agarik o.

²⁷Mbi lek ariyak mendek nogo mban yabu eeko logogup o. Aap aret nda'nagagirak an nogo nogoba Ala nen leenogo paneegerak me, mbi mondok-mondok logorak mendek an nen wokkirage nogo yabu mban eeko logonip o.”

²⁸Yorage mbareegi, it nen at yogwi, ”Ala nen eeriyak mbake nogo eeruwok nduk, nit nonggop eeko logowi o?”

²⁹Yogo mbareegwa, at Yetut nen, ”Lek o. Ala nen eeriyak mbake nogo ti, at nappi wagagerak kiniki at oba panggombunuk, abet ombakwi nogo aret o.”

³⁰Yorage mbareegi, ”Eeke ninigen keenok, niniki koba panggombunuk, abet kombaruwok nduk, nineenu ariyak ninagabiti warak mendek ambi nano eeke keyaawi? Ndi, kat eeke menggendak nogo ambi ngge eerumunggun o?

³¹Mbi naawak nduk, mbogut paga nen wurira wagagerak o, yinuk, liiru mbanak nogo ndak-ndak, nit ninombomini karume wonogwe me, mbi mbogut paga nen wurira wage mbareegi, aret nonggo nogogwaarak.”

³²Yogo mbareegwa, at Yetut nen, ”Mbi mbogut paga mendek wokkirage nagagerak nogo ti, Muta nen wokkirage logolik. Ata, an nogoba nen aret mbi abe mbi mbogut paga mendek aret wokkirage menggerak.

³³Mbi Ala nen wokkirage nogo ti, mbogut paga nen wambi wage nagagirik, aakumi nggween paga menggaarak ineenik eeginake menggerak aret o, yinuk, mondok abet aret yokkiragi o.”

³⁴Yorage mbareegi, it nen, ”Ai ninogoba. Mbi ti mendek mondok wo'nirage logot o.”

³⁵Yogo mbareegwa, Yetut nen, ”Mbi kineenik eekkinake minggirak an aret o. Kit ambi nen an nowagam wogwe kiinok, abu eekkinabigin mondok lek o. Ndi, kit kiniki an noba panggombunuk, abet nombakwi kiinok, yi abu eekkinabigin mondok lek mban o.

³⁶Kit an neego nogotak aret kwe, kiniki noba panggombunuk, abet nombaka'lek aret ogotik o, yinuk, yokkiragarak nogo o.

³⁷It an nogoba nen wo'nege nogo abok aret an neya woraagun o. Ndi, it aap an neya wogwe nogo ti, mbo piyaagin lek o.

³⁸An niniki mba'nuk eeke logokit nduk, mbogut paga nen wambi woroolik. Ata, at nappani wagagerak eeriyak mbake nogo mban eerikit nduk wagagirak o.

³⁹At nappani wagagerak eeriyak mbake nogo ti, it an wo'nege nogo ambit kobak ariyak lek, o age wobok paga it abok ineenik agago mippiyoorak mbake menggerak aret o.

⁴⁰An nogoba nen eeriyak mbake nogo ti, kit Ala aput an kinigen liippaninuk, kiniki noba panggombunuk, abet nombakwi kiinok, mondok-mondok kineenik logorak mbake menggerak ti aret o. Ndi, peebi o age wobok paga an nen kineenik agago mippinagagin o,” yinuk, yoragagerak.

⁴¹At Yetut nen, ”Mbi mbogut paga mendek wambi wagagirak an aret o,” yoragagerak nogo paga it aap Yakuri nogo nen ineebi-ineeba ombako logonet,

⁴²”A puk! Aap yi, Yutup aput endage Yetut agalo-ogoba nineenu nogo nen aret ari yi lek a? An mbogut paga nen wambi wagagirak o, yo'nirage yi, nonggop yo'nirage mbakop?”

⁴³Yogo mbareegwa, at Yetut nen, ”Kineebi-kineeba yogo logonet, laakot nombakwi ti mage o.

⁴⁴At nogoba nappani wagagerak nogo nen kiniki koongginake lek kenok, an neya woroorak mondok meek o. Ndi, neya woroorak kiniki koongginake kenok perak, o age wobok paga kineenik agago mippinagagin o.

⁴⁵It aap Ala wone yorogo menggaarak nabi-nabi nen liiru mbanggo logonet, Ala nen yi aakumi ndi aakumi abok aret wone mamunirage logorak o, yinuk, liiru mbaneegwaarak me, yi aap ndi aap an nogoba nen wone mamunirage nogo konembunuk, kologwe nogo ti, an neya wogo menggaarak aret o.

⁴⁶Wone yokkiragi yi nogo ti, it aap nen ninogoba eebe inigen kogogwaarak me nduk yokkirage lek o. Ata, an Ala wonage me nen wagagirak nalik mban nenegen kagagirak.

⁴⁷Kit kiniki noba panggombunuk, abet nombakwi kiinok ti, mondok-mondok kineenik aret logomunggup o, yinuk, mondok abet aret yokkirage agarik o.

⁴⁸Mbi kineenik eekkinake minggirak an aret o.

⁴⁹Kit kinombomini karume logonet, mbi mbogut paga nen wambi wagagerak nogo nonggo nogogwaarak kwe, kagak, kambit nogo nogogwaarak.

⁵⁰Mbi mbogut paga nen wambi wage yi nogo nunggwi kiinok perak, kambumunggup lek o.

⁵¹Mbi kineenik eekkinake minggirak mbogut paga nen wambi wagagirak an aret. Kit mbi yi nogo nunggwi kiinok, mondok-mondok kineenik aret logomunggup o Kit aakumi nggween paga monggotak kineenik eekkinabuwak nduk, mbi kinake pigin nogo ti, an neebe aret o,” yinuk, yoragagerak.

⁵²Ti yoragagerak paga it aap Yakuri mendek it mban-mban wone wako logonet, ”Wologwe! Aap yi, at eebe nit nawak nduk nonggop togon wo'niroorak me yigi mbakop?”

⁵³Yogo mbareegwa, at Yetut nen, ”An aap aret nda'nagagirak neebe inom, namiya inom, nengga'lek kiinok, kineenik logomunggup mondok lek aret o, yinuk, mondok abet aret yokkirage agarik o.

⁵⁴Kit ambi nen an neebe inom, namiya inom, nunggwi kiinok ti, mondok-mondok kineenik logobagip nduk, o age yobok paga kineenik agago mippinagagin o.

⁵⁵An neebe nogo ti, mbi abe mbi aret o. Ndi, namiya nogo ti, amburu abe amburu aret o.

⁵⁶Kit ambi nen an neebe inom, namiya inom, nunggwi kiinok ti, an nen kit ninom kunik, ndi, kit nen an ninom kunik aret logogun o.

⁵⁷Nogoba eenik menggerak nogo nen nappani wage nagagirik, at eeppanege paga an neenik minggirak nogo kokwak, kit ambi an neebe nunggwi kiinok ti, an nen eekkinake paga kineenik aret logomunggup o.

⁵⁸Mbi mbogut paga nen wambi wagagirak yi ti, kinombomini nonggo nogogwaarak kwe, kagak, kambit nogo nogogwaarak nogo pogom lek o. Ata, mbi yi, kit ambi nunggwi kiinok, mondok-mondok kineenik aret logomunggup o,” yinuk, yoragagerak.

⁵⁹Wone yoragagerak nogo ti, o Kaperenaum tamban eeko menggam logonet, yoragagerak.

⁶⁰Yoragagerak it at oone waganggwi mendek ando ambik konenggo nogogwaarik, ”Wone yi aaninggin ambik me, ta nen koneniyak mbakop?”

⁶¹At Yetut wone ti yoragagerak paga ineebi-ineeba ombakwi yelok iige nagagirik, ”Wone yokkiragarak nogo paga, Nineebi o, yinuk, mbo paniyak eekkinake ya?

⁶²An aap aret nda'nagagirak wonagagim niyok paga lagangge kinigen neego logomonggotik, kit nonggop nombarumunggup o?

⁶³At Aberiniki nen aakumi ineenik eeginake menggerak aret. It aakumi nggween paga ndarak nen ambi eekkoloorak lek aret o. At Aberiniki nen wone an yokkirage nogo paga kineenik eekkinake minggirak kwe,

⁶⁴kit ando perak, kiniki noba panggombunuk, abet nombaka'lek kiigi o,” yinuk, yoragagerak. (Yoragagerak nogo ti, at Yetut aa'nduk nen it aap iniki at oba panggombunuk, abet mbaka'lek inom, ndi, at onggo mbanigin nogo inom, eenu wonagagerak me, togop aret yoragagerak.)

⁶⁵Yorage nagagirik, ”An nogoba nen kiniki koongginaka'lek kenok, an neya woroorak mondok meek o, yokkiragarak nogo alom ti kenok aret yokkiragarak o,” yinuk, yoragagerak.

⁶⁶Ti yorage mbareegi, it at oone waganggwi mendek ando ambik Yetut inom ambinom nugu logolik mbo punuk mbaganeegwaarak.

⁶⁷Mbaganggo mbareegwa, at Yetut nen at oone waganggwi 12 nogo yorage logonet, ”Kit kunduk mbaganiyak mbaka'lek ogotik?”

⁶⁸Yorage mbareegi at Peterut nen, ”Ai nogoba! Nit ta ka noorak me nduk yagan o? Mondok-mondok nineenik ee'ninaburak wone kat aret yo'nirage menggendak nogo o.

⁶⁹Nit niniki koba panggombunuk, abet kombako nogoorik, at ambi maluk eekeelik abu obeelom mban eeke Ala nen nappi wagagerak nogo kat aret keegoorak o.”

⁷⁰Yogo mbareegwa, at Yetut nen, ”An nen kit aap 12 miikkinabeegirak kwe, kit ambi Ibilit aput aret kagi o,” yinuk, yoragagerak.

⁷¹(Ti yoragagerak nogo ti, aap Timon Itikariyot aput Yurat it aap at oone waganggwi 12 ambi nogo kwe, peebi Yetut onggo mbanigin at aret me nduk yoragagerak.)