Read Wano YAYA 7 Bible Online

YAYA 7 - Wano bible

YAYA 7

¹Ti yorage nagagirik, it Yakuri mendek nen Yetut mondok wariyak eeko mbareegwa, ”O Yureya yime eerit nege logorak neebi o,” yinuk, o Nggalileya time eerit nege logokit nduk, nagagerak.

²Nagagerak wonage me, it Yakuri ooliya-ooliya wureegwaarak abeppunuk, laago lariyak eyom panggoni wage mbareegi.

³Yetut awuri nen at yogo logonet, ”Aap ambi at endage nggwok aruwak nduk, eeke nogo ti, kote eekeelik me, kat eeke menggendak nogo it kat koone waganggwi nogo nen eeke inigen keyaawak nduk, o yi teppunuk, o Yureya inom eeri nak o. Kat eeke menggendak nogo eeke kenok, it aakumi abok aret inigen keyaawak nduk nggwok paga eerit nage logot o,” yinuk, yoreegwaarak.

⁴

⁵(Yoreegwaarak nogo ti, at awuri nogo kunduk iniki Yetut oba panggombunuk, abet mbaka'lek me yoreegwaarak.)

⁶Yogo mbareegwa, at Yetut nen, ”Kit eeriyak ti, yiyom-ndiyom ugun eeriyak op mban aret kwe, an eeriyak eyom perak awo panggoni waga'lek o.

⁷It aakumi nen kit ineebi kinombariyak meek kwe, an perak, it aakumi eeko menggaarak ti, Maluk aret o, yinuk, paganogo yorage minggirak me, ineebi nombako agaarik o.

⁸An eeriyak eyom awo panggoni waga'lek me, laago lakome time nagin lek o. Kit kinalik mban nanip o,” yinuk, yoragagerak.

⁹Ti yorage nagagirik, at o Nggalileya puk aret agagerak.

¹⁰Puk agagerak kwe, ti'nuk, at awuri nogo laago lakome nogo mbareegwa, at kunduk tu nggwok paga noolik kumaat-kumaat aret nagagerak.

¹¹Nagagerak wonage me, it Yakuri mendek nen laago lakome Yetut wonage kero inigen luk eeko logonet, ”At eebe yime wonage ilik lek a?” yinuk, kwaako nogogwaarak.

¹²It aakumi yagap wone paga Yetut abok ambik mbanggo logonet, ando nen, ”At aap obeelom aret o,” yogwe, ndi, ando nen, ”Lek o. At nen aakumi nomoninake menggerak aret o,” yogwe, eeko nogogwaarak kwe,

¹³it aakumi nogo aap Yakuri mendek inagabiti nen Yetut abok kenok, tena'me mbanggo logolik. Ata, yagap wone paga mban abok mbanggo nogogwaarak.

¹⁴Laago ne oolo lakwi paga Yetut Ala awi wurik me unggwi nage nagagirik, wone mamuniragagerak.

¹⁵Mamunirage kagak, it aap Yakuri nen, ”Wi!” yinuk, pi wako logonet, ”Aap yi tekola eerulik kwe, yi wone ndi wone alom nonggop togon eenu age nagaarik, ari mbakop?”

¹⁶Yogo mbareegwa, at Yetut nen, ”An wone mamunggirage minggirak nogo ti, an mbake paga mamunggirageelik o. Ata, at nappani wagagerak nogo nen yo'nege kagak, mamunggirage minggirak o.

¹⁷Kit nen Ala nen eeriyak mbake nogo, Eeruwok, mbakwi kiinok, an wone mamunggirage nogo ti, Ala nen yo'nege kagak, mamunggirage a, an mbake paga mamunggirage a, nogo ti, kineenu arumunggup o.

¹⁸It aakumi nen it mbakwi paga wone yorogwe nogo ti, tiyappatuwok nduk, yogo menggaarak kwe, at nappi wagagerak tiyappuurak nduk, wone yorage nogo ti, abet liirogon mban ari menggerak me, maluk inikime wonage abu lek aret o.

¹⁹Ala wone lengganak nogo at Muta nen liiru mbanggiragagerak nogo lek a? Mbanggiragagerak aret kwe, wone nogo kit abok eeka'lek aret ogotik o. Kit nonggop nduk an nooriyak nduk eeko ogotik?”

²⁰Yorage mbareegi, it aakumi nogo nen, ”Lek o. Kat kugi kinikime lik yegerak ya? Ta nen kooriyak eeke kenok, ari agandik?”

²¹Yogo mbareegwa, at Yetut nen, ”An we ne ambit paga iluk eeke neegotak paga kit abok tamban eekwi paga eeriyak mage kagak eeke yi wologo wae, yinuk, pi wako ogotik?

²²Muta nen yokkiroolik kinombomini nen aret yokkirogogwaarak kagak, Muta nen, Yogop yo'niragagerak o, yinuk, kit ugun tamban eekwi paga wologwe inagabolo mbaninako monggotak.

²³Kit togon, Muta wone yo'niragagerak lalennage kero, mba'nuk tamban eekwi paga wologwe inagabolo mbaninako monggotak kwe, an tamban eekwi paga aap ambi eebe obeelom eekirak paga nonggop nduk an mbe'nogo ogotik?

²⁴Alom liippega'lek kagak, eebe koorak paga mban maluk inoba piyoorak mage o. Ata, alom liippunuk, eekaarak onggo ndak-ndak aret inoba piyoorak op o,” yinuk, yoragagerak.

²⁵Ti yorage mbareegi, it aap Yerutalem mendek ando nen, ”Aap mondok wariyak nduk eekwi nogo yi aret ilik lek a?

²⁶At wone nggwok paga mamunirage kwe, mage yogwi lek yi kaanip o. It aap ninoweewi nogo nen mage yogwi lek yi, Ala nen leenogo mippereegerak Mesias nogo, yi abet aret mba'nuk puk wonogwe ilik?

²⁷At Keritut wage kenok, nggeeme nen woroorak nit abok nineenggo'lek kwe, aap yi nogo nggeeme nen wagagerak ti, nineenu aret o,” yinuk, yogogwaarak.

²⁸Yogo mbareegwa, at Yetut Ala awi wurik me nogome nen oone nggwok paga yorage logonet, ”An neebe inom, ndi, an ngga nen wagagirak nogo inom, kit abu kineenu aret o. An niniki mba'nuk woroolik o. Ata, at abet aret menggerak nogo nen an nappani wagagerak. Ndi, at kineenggo'lek aret kwe,

²⁹an nogo, at nappani wagagerak wonage me nen wagagirak me, an perak at eebe an neenu aret o.”

³⁰Yorage mbareegi, at pigaawok nduk, eereegwaarak kwe, at wariyak eyom awo panggoni waga'lek me, ineenggi abu pigoolik o.

³¹Ti eereegwaarak kwe, kagak, it aakumi ambik iniki at oba panggombunuk, abet mbareegwaarak. Abet omba'nuk, yogo logonet, ”Aap yi nineenu ariyak ninagabiti warak mendek eerit nege kogoorak nogo mbuuluk negen eerit nege, ndi, Ala nen leenogo mippereegerak nogo peebi wage logominggirik, at nggwok eerit nege koorak mbakop? Meek o,” yinuk, yereegwaarak.

³²Aakumi yagap wone paga Yetut abok mbanggwi it Pariti mendek konenggo nogogwaarik, it inom, it aap Ala unde inoweewi inom, nen Yetut pigaawak nduk, inawuri keele maarinaka mendek nappiyareegwaarak.

³³Nappiyareegwaarak Yetut ka nogo mbareegwa, at Yetut nen, ”An ne ambit iluk ninom logogin o. Ninom logominggirik, at nappani wagagerak nogo ka nagin o.

³⁴Ka naminggirak neegak, kit nen an kwaa'nabit namonggotak kwe, an nawam time kit noorak meek me, kwaa'neyaamunggup abu lek o.”

³⁵Yorage mbareegi, it Yakuri mendek inom wone mbanggo logonet, ”At nggeeme namenggerak me, nit kwaakkoorak meek me yigi mbakop? It Yakuri mendek aap Yunani inenggela'me mak aago wonogwe nogo iya nage logominggirik, inom logonet, it aap Yunani mendek mamunirage logokit mba'nuk, yigi mbakop?

³⁶Kit an kwaa'nabit namonggotak kwe, an nawam time kit noorak meek me, kwaa'neyaamunggup abu lek o, yo'niragaarak nogo, nonggop mba'nuk yo'nirage mbakop?” yogo nogogwaarak.

³⁷Yogo mbareegwa, ti'nuk, age yobok togon laago nggwok lombok lakwi paga at Yetut mi'nage nagagirik, oone nggwok paga yorage logonet, ”Wologo wae! Kit ambi niyo abu kenok, an nowagam na woraanip o.

³⁸Kit kiniki noba panggombunuk, abet nombakwi kiinok, Niyo kineenik eekkinake menggerak mendek kinikime nen eneeri kila-kila wungge logogin o, yinuk, Ala wone liiru mbaneegerak nogo ndak-ndak kinikime nen aret wungge logogin o,” yoragagerak.

³⁹(Ti yoragagerak nogo ti, it aakumi nen iniki Yetut oba panggombunuk, abet ombakwi iinok, Aberiniki wogoroorak me nduk yoragagerak. Yetut awo tiyappega'lek kenok, at Aberiniki wogoraga'lek me nduk, yoragagerak.)

⁴⁰It aakumi wone yoragagerak nogo inaruk konembogo nogogwaarik, it ando nen, ”Aap nabi Ala wone yo'nira woroorak nogo eebe yi abet aret kogo o.”

⁴¹Ndi, ando nen yogo logonet, ”Ala nen leenogo mippereegerak Keritut nogo yi aret kogo o,” yogwe iigak, it ando nen perak, ”At Ala nen leenogo mippereegerak Keritut nogo o Nggalileya nen woraagin mbakop? Lek o.

⁴²Aap ambi nen, Ala nen leenogo mippereegerak Keritut nogo ti, at ombo Ndawut wonagagim o Mbe'lekem aret nda'narigin o, yinuk, Ala wone liiru mbaneegerak nogo lek?”

⁴³Yogo mbareegwa, it aakumi nen Yetut awone wako logonet, ogoorak ka'let eekkologogwaarak.

⁴⁴Ogoorak ka'let eekkologo logonet, it ando nen Yetut pigaawok mbareegwaarak kwe, inagabiti nen pigagangga'lek aret wonogogwaarak.

⁴⁵It aap keele maarinaka nogo nen iniyok paga aap Ala unde inoweewi inom, it aap Pariti mendek inom, inowagam nogo mbareegwa, ”Kit nonggop nduk, at wonok woroolik o?”

⁴⁶Yorogo mbareegwa, it aap keele maarinaka nogo nen, ”Lek o. Aakumi togop ambi yogwe iigulik lombok at aap ti ari kogoorak me, iya!”

⁴⁷Yorogo mbareegwa, it Pariti mendek nen, ”Kit kunduk kinambokan laganggerak ya?

⁴⁸Kinoweewi nit inom, it Pariti mendek inom, niniki at oba panggombunuk, abet ombakwi ambi niigotak ilik?

⁴⁹It aakumi ambik ti, Muta wone yugu nogo ineenggo'lek me, kugi pulu aago negen aret wonogwe kwe, kinom eeriyak eekwi kiigi o.”

⁵⁰Yorogo mbareegwa, aap it mendek ambi aa'nduk Yetut owagam nagagerak Nikoremut nogo nen yorage logonet,

⁵¹”Wologwe. Ala wone lengganak wone eeko logonet, aap ambi eerit nage nagagerak nogo at oone ninaruk konembunuk, alom nineenu aga'lek niigak, maluk onggo eeppuurak ti op mbakop?”

⁵²Yorage mbareegi, it nen, ”Ubi! Aap ti, kimbirak o Nggalileya nen wagandak me ari keego. Ala wone liiru mbanak pekkage logot ubi! Pekkage logominggindik, it Ala wone yorogo menggaarak mendek o Nggalileya nen woraagin mbanak lek aret kaamunggun o,” yinuk, yogo nogogwaarik,

⁵³iname aret nogogwaarak.