Read Wano YAYA 8 Bible Online

YAYA 8 - Wano bible

YAYA 8

¹Iname lombok nogwe iigak, at Yetut puurom Tayitun paga lagi nagagerak.

²Ti'nuk, ko'lu kubondendok iyok paga wambi wage nagagirik, at Ala awi wurik me unggwi wagagerak Unggwi wage nagagirik, wonage me, aakumi apit at owagam wogo mbareegwa, kwi'na'nuk, wone mamunirage nagagerak.

³Mamunirage wonage me, Ala wone liiru mbanak unde inom, it Pariti mendek inom, nen kwe ambi mbabi eeke me kwaakkogogwaarak nogo, wonok Yetut owagam wogo nogogwaarik, kwe nogo oolo punuk.

⁴Yetut yogo logonet, ”Ngguru wae! Kwe yi, mbabi eeke me kwaakkogoorak o.

⁵At Muta nen Ala wone lengganak paga yo'nirage logonet, Kwe yogop eeke kenok ti, yugum paga mondok toguurit wariyak o, yo'niragagerak kwe, kat perak, nonggop yo'niraamunggun o?” yinuk, yoreegwaarak.

⁶(Wone ti yoreegwaarak nogo ti, Yetut nano paga yilumbunuk enggali wappuwok nduk, abut mbanggo logonet, yoreegwaarak.) Yogo mbareegwa, at Yetut wone onggo yoraga'lek ena wu'nage logonet, eenggi paga nen nggween paga liiru mbaneegerak.

⁷Liiru mbangge me, it nen, ”Yu ubi!” nabenak mban yogo mbareegwa, at mi'na'nuk, it yorage logonet, ”Aap kinenggela'me yime ambi maluk eekeelik kenok, at nen aa'nduk yugum paga kwe yi wariyok o.”

⁸Yorage nagagirik, kwi'na'nuk, ena wu'nage logonet, eenggi paga ambinom nggween paga liiru mbaneegerak.

⁹Wone yoragagerak nogo konenggo nogogwaarik, kwe nogo alik taati mbo punuk inoweewi inaa'nduk nggigik-mbonok nogwe, inawuri peebi togop aret nogwe, eeko mbareegwa,

¹⁰at Yetut nogo uut pila ari nagagirik, kwe nogo yoge logonet, ”Kwe yi wae! Aakumi nogo ngge o? It nen kat maluk eekendak onggo ambi eeppagagaarak ilik lek a?”

¹¹Yoge mbareegi, kwe nen, ”Abu lek o, nogoba.” Yoge mbareegi, at Yetut nen, ”An kunduk maluk ambi eeppagagin lek me, kame nak o. Yogondak yi kuli paga nen maluk ambinom eeke logogun o,” yinuk, yoreegerak.

¹²Yorage nagagirik, ti'nuk, at Yetut nen aakumi ambinom yorage logonet, ”Aakumi o nggween paga menggaarak eya eeginake minggirak an aret o. Kit an ninom nogwe kiinok, eya ineenik eeginake minggirak an nogo nen kit kiniki eya eekkinabigin me, o apit paga nogo logomunggup lek o.”

¹³Yorage mbareegi, it Pariti mendek nen, ”Wulaga! Kat nen mban kabok paganggo'net nage me, koone ti pilit aret keego o.”

¹⁴Yogo mbareegwa, at Yetut nen, ”An nen aret nabok paganggo'net nage kwe, an ngga nen wagagirak, ndi, nggeeme nagin nogo an neenu aret me, noone ti abet aret o. An ngga nen wagagirak, ngge me nagin nogo, kit kineenggo'lek aret o.

¹⁵Kit nen aakumi eeko mengga kwak, maluk noba panugwi kwe, an nen maluk kinoba pinagage mondok lek o.

¹⁶An nen maluk kinoba pinaganetak en, nalik eeke lek at nappani wagagerak nimbirak eeko monggoorak me, eeke logonet, kit abet aret eekwi kiinok, maluk kinoba pinaganetak o.

¹⁷Ala nen wone lengganogo yokkirage logonet, Aap ineebe mbere nen ineenu logonet, paganogo yogwe iinok ti, inoone abet aret o, yinuk, liiru mbaneegerak wonage o.

¹⁸An eeke minggirak nabok paganogo yokkirogwe nogo ti, ambi an nen aret yokkirage, ndi, ambi ti, at nappani wagagerak nogoba nogo nen aret yokkirage, eeko monggoorak.”

¹⁹Yorage mbareegi, it nen at yogo logonet, ”Kogoba eebe ngge o?” Yogo mbareegwa, at nen, ”Lek o. An inom, an nogoba inom, kit kineenggo'lek aret ogotik. An neebe kineenu a'netak nen, an nogoba kunduk kineenu a'netak o,” yinuk, yoragagerak.

²⁰Ti yoragagerak nogo Ala awi wurik me wu pogo menggam time logonet, mamunirage nagagerak kwe, at wariyak eyom awo panggoni waga'lek me, Yetut pigagangga'lek aret wonogogwaarak.

²¹Peebi, at Yetut nen ambinom it yorage logonet, ”An nagin aret o. Kit nen an kwaa'nabit namonggotak kwe, an nawam time kit noorak meek me, maluk kinikime logonet aret kambumunggup o.”

²²Yorage mbareegi, it Yakuri mendek nen, ”At nen, An nawam time kit noorak meek o, yegerak ti, at nen aret wakkoloorak nduk ari ilik?”

²³Yogo mbareegwa, at nen, ”Kit yime mendek, ndi, an perak, agi mendek aret o. Kit aap nggween paga mendek kwe, an perak, nggween paga mendek lek o.

²⁴Kit maluk kinikime wonage kagak aret kambumunggup o, yokkiragarak nogo ti, at iitok menggerak nogo eebe an aret abet nombaka'lek kiinok, maluk kinikime wonage kagak, abet aret kambumunggup o.”

²⁵Yorage mbareegi, it nen, ”Kat ta o?” Yogo mbareegwa, at nen, ”Aap ndogop o, yokkirage minggirak nogo ti an aret o.

²⁶Kit eerit nogwe nogo paga maluk kinoba pinagage logonet, yi wone ndi wone ambik yokkiroorak nduk agarik o. At nappani wagagerak nogo abet aret ari menggerak me, an at oone konembunuk mban kit nggween paga monggotak nogo yokkirage minggirak o,” yinuk, yoragagerak.

²⁷It wone yoragagerak nogo ti, ”At ogoba abok yo'nirage kogo,” yinuk, mbaka'lek aret wonogogwaarak.

²⁸Mbaka'lek wonogwe me at Yetut nen, ”Kit nen an aap aret nda'nagagirak mippanugwi kiinok, at iitok menggerak nogo eebe an aret kineenu ogwe, ndi, an mbake paga eekeelik nogoba nen mamunnake nogo mban yokkirage minggirak kit kineenu ogwe, eerumunggup o.

²⁹At nappani wagagerak nogo nimbirak aret wonage o. At inikilom mbake nogo mban eeke minggirak me, mbo panegeelik o,” yinuk, yoragagerak.

³⁰Wone togop yorage kagak, aakumi ambik iniki Yetut oba panggombunuk, at abet mbareegwaarak.

³¹Ti'nuk, Yetut nen it aap Yakuri mendek iniki at oba panggombunuk, abet mbareegwaarak nogo yorage logonet, ”Kit nen an noone mondok mugurok nogwe kiinok, an noone waganggwi mendek abet aret logomunggup o.

³²Ndi, Ala ndogop menggerak wone nogo kineenu arumunggup o. Ndi, kineenu arumonggotak paga pilanogo wondet eerogo pinagagin o.”

³³Yorage mbareegi, it nogo nen, ”A puk! Nit Abarakam omboologwe niigak, aap ambi nen abu'me mondok tebenogo pinanulik me, kat nen, Pilanogo wondet eerogo pinagagin o, yagandak ti, nonggop yo'nirage agandik o?”

³⁴Yogo mbareegwa, Yetut nen, ”Ayeloman ambi ogoba abu'me logonet, aruk konok mban eeke minggi kwak, kit maluk eekwi kiinok, maluk eeriyak mban eekkinake kaamunggup o.

³⁵Aap inayeloman nogo nen ogoba eeketak nogo imbirak mondok-mondok wonogolik. At lombok aput kenok perak, ogoba imbirak mondok-mondok menggaarak.

³⁶Ala aput an lombok nen pilanogo wondet agago pinagage neenok, kit mondok abet aret wondet aago aret logomunggup o.

³⁷Kit Abarakam ombowologwe, an neenu aret kwe, an noone kinikime wagangga'lek me, an mondok nooriyak nduk eekwi kiigi o.

³⁸An nogoba nimbirak logonet, nenegen kagagirak nogo yokkirage minggirak kokwak, kit togop kinogoba nen yokkiragagerak koneneegutak nogo eeko monggotak kiigi o, yinuk, mondok abet aret yokkiragi o.”

³⁹Yorage mbareegi, it nen, ”Nit ninombo ti, Abarakam aret me tit ari!” Yogo mbareegwa, Yetut nen, ”Kit Abarakam ombowologwe abet aret logonetak en, at eeke nagagerak nogo kit ndak-ndak aret eeko logonetak.

⁴⁰Ala nen, An ndogop minggirak o, yo'nereegerak nogo mban yokkirage minggirak kwe, kit an mondok nooriyak nduk eeko ogotik. At Abarakam togop abu eeke logolik kwe,

⁴¹kit perak, kinogoba ambi eeke menggerak nogo ndak-ndak aret eekwi kiigi o.” Yorage mbareegi, it nen, ”A puk! Nit terak ndarak lek o. Ninogoba ambit Ala lombok aret o.”

⁴²Yogo mbareegwa, at Yetut nen, ”Kit kinogoba Ala abet aret logonetak en, an Ala wonage me nen wage nagagirik, yime wonage me, ninom kiniki kunik aret logonetak o. An niniki mba'nuk nen woroolik o. Ata, at nen aret nappani wagagerak kwe,

⁴³an nen yokkirage nogo ti, nonggop nduk liippega'lek aret ogotik? Kit an noone woorak abu meek me, liippega'lek aret ogotik o.

⁴⁴Kit yi, kinogoba Ibilit aret me, at eeriyak mbake menggerak nogo mban, Eeruwok, mbako monggotak. At o aa'nduk nen nok yogondak kuli aakumi inooka aret menggerak o. Ala ndogop menggerak wone nogo at inikime wonage lek me, Ala ari menggerak nogo at mondok eeka'lek aret agaarik o. At pilit pugungge menggerak iitok aret me, pilit-pilit iyagalo at aret logonet, at iniki nen wone ugun-ugun koombunuk, pilit-pilit pugunit nege menggerak.

⁴⁵Ala ndogop menggerak wone yokkirage minggirak ti paga kit abet nombaka'lek ogotik o.

⁴⁶Kit yi ambi nen an maluk eeke neegotak kero, yo'ninip o. An nen, Ala ndogop menggerak, wone yokkirage neegak, kit nonggop nduk, an abet nombaka'lek ogotik?

⁴⁷It Ala apuri ti, Ala wone konenggo menggaarak o. Ndi, kit Ala apuri lek me, noone konenggulik monggotak o,” yinuk, yoragagerak.

⁴⁸Yorage mbareegi, it Yakuri mendek nen, ”Lek o. Kat aap Tamariya mendek kugi kinikime lik yegerak yokkogoorak nogo ti abet aret nogo lek a?”

⁴⁹Yogo mbareegwa, Yetut nen it yorage, ”Lek o. An kugi ninikime wonage lek aret o. An nogoba tiyappege minggirak kwe, kit nen an tebembanugwi kiinok, yokkiragi o.

⁵⁰An tiyappatiyak nduk eekeelik o. At ambi perak, an tiyappanege me, at nen nowak loonogo nawone amburu mbanigin o.

⁵¹Kit an noone mondok mugurok nogwe kiinok, kambumunggup mondok lek o, yinuk, mondok abet aret yokkiragi o.”

⁵²Yorage mbareegi, it Yakuri mendek nen, ”Wone yagandak ti paga kugi kinikime liinik abet aret keego o. At Abarakam inom, Ala wone yorogo nogogwaarak nabi-nabi inom, kambeegwaarak kagak, kat nen ari logonet, Kit an noone mondok mugurok nogwe kiinok kambumunggup mondok lek o, yagandak ti,

⁵³nit ninogoba Abarakam kambeegerak nogo at mbuuluk. Ndi, kat nggwok me nduk yagan ya? It aap Ala wone yo'nirogo nogogwaarak nabi-nabi nogo kunduk kambeegwaarak kwe, kat ta me nduk ari agandik?”

⁵⁴Yogo mbareegwa, at Yetut nen, ”An tiyappake neenok ti, we aanom warogo aret koongge o. Kit nen, Ninogoba Ala o, yogo monggotak nogo ti, an nogoba aret me, at nen mban tiyappanege menggerak o.

⁵⁵Kit at eebe kineenggo'lek kwe, an perak, at eebe neenu aret o. At eebe neenggo'lek yenetak en, kit pilit pugunggo monggotak kwak, an togop aret pilit puguninetak o. At eebe neenu me, oone an eeke minggirak aret o.

⁵⁶At kinombo Abarakam nogo nen an eeri woroorak nogo neyoorak ale'nggen ambik mbareegerak me, peebi neege nagagirik, iniki ale'nggen aret mbareegerak.”

⁵⁷Yorage mbareegi, it Yakuri mendek nen, ”A puk! Kat keenik logonet, 50 tahun awo eeka'lek kwe, at Abarakam kenegen kagagindak me yagan ya?”

⁵⁸Yogo mbareegwa, at Yetut nen, ”Abarakam nda'naga'lek kagak, an niitok aret minggirak o, yinuk, mondok abet aret yokkiragi o.”

⁵⁹Yorage mbareegi, it yugum waganogo Yetut waruwok nduk eereegwaarak mendek at Yetut nogo, Ala awi wurik me nen eenggi-iyok lek aret wundeegerak.