Read Wano YAYA 9 Bible Online

YAYA 9 - Wano bible

YAYA 9

¹Ti'nuk, peebi nen at Yetut tu paga nage logonet, aap ambi iitok enegen mbuk ndarak nogo kagagerak.

²Kage mbareegi, at oone waganggwi mendek nen, ”Ngguru wae! Aap yi nogo, at maluk eereegerak paga enegen mbuk nda'nagagerak a, at agalo-ogoba maluk eereegwaarak paga enegen mbuk nda'nagagerak a?”

³Yogo mbareegwa, at Yetut nen, ”Lek o. At maluk eereegerak paga inom, ndi, agalo-ogoba maluk eereegwaarak paga inom, enegen mbuk nda'nagagerak ti lek o. Ata, at Ala eeke menggerak at paga pagak yuwak nduk, enegen mbuk aret nda'nagagerak o.

⁴Oonikiya paga yabu eeriyak meek me, o kiip ariyak abu panggo yi wage kwe, awo waga'lek kagak, at nappani wagagerak eeke menggerak nogo o eya paga mbet-mbet aret eeko logowok o.

⁵An nggween paga yime logonet, aakumi abok eya eeginake minggirak an aret o.”

⁶Ti yorage nagagirik, at awoori nggween paga lenggek togon wuppunuk, amok mbangge nagagirik, aap nogo enegen me nabembereegerak.

⁷Nabembege nagagirik, ”Wulaga! Kat yi yenggenak Tilowam koori nak o.” Yoge mbareegi, koori nage nagagirik, enegen obeelom a'nuk wagagerak. (Yi yenggenak Tilowam yereegerak nogo ti, nit ninoone paga, Nappereegim, aret o.)

⁸Aap nogo wage mbareegi, at oreewi inom, it ando at aa'nduk ambe nggino ari kogo nogogwaarak nogo inom, yogo logonet, ”Aap yi kwi'ndak logonet, ambe nggino ari nagaarak nogo yi aret lek?”

⁹Yogo logonet, it ando nen, ”Nogo yi aret o,” yogwe, ndi, ando nen, ”Lek o. Ti at pogom aap alik aret o,” yogwe, eeko mbareegwa, at nogo nen, ”Yogotak nogo ti, an aret o,” yoragagerak.

¹⁰Yorage mbareegi, it nen, ”Wulaga! Kat kenegen nonggop togon obeelom agaarak o?”

¹¹Yogo mbareegwa, at nen, ”Aap ambi endage Yetut nen nggween amok mbanogo nenegen me nabembanege nagaarik. Yi yenggenak Tilowam koori nak o, yo'nege mbaki, koori nage nagarik, nenegen obeelom agaarak o.”

¹²Yorage mbareegi, it nen, ”At eebe ngge o?” Yogo mbareegwa, at nen, ”An neenggo'lek o,” yinuk, yoragagerak.

¹³Yorage mbareegi, it aakumi nen aap enegen mbuk wonagagerak nogo wonok it aap Pariti inowagam nogogwaarak.

¹⁴At Yetut nen nggween amok mbanogo aap enegen obeelom eereegerak nogo ti, it Yakuri tamban eekwi paga aret eereegerak.

¹⁵Tamban eekwi paga eereegerak me, it aap Pariti mendek nen aap nogo yogo logonet, ”Kenegen nonggop togon obeelom agaarak o?” ambinom yogo mbareegwa, aap nogo nen, ”Nggween amok mbanogo nenegen me nabembanege mbaki, niyo koori nage nagarik, yogondak nenegen obeelom agaarak o,” yinuk, yoragagerak.

¹⁶Yorage mbareegi, it aap Pariti mendek ando nen, ”Aap yi tamban eekwi paga mage yugu kagak eeke me, at Ala wonage me nen wagagerak abu lek o.” Yogwi iigak, it ando nen perak, ”Aap maluk eeke menggerak nen nineenu ariyak ninagabiti warak mendek yogop eeriyak op mbakop?” Yogo logonet, it ogoorak ka'let eekkologogwaarak.

¹⁷Ogoorak ka'let eekkologo nogogwaarik, at enegen mbuk wonagagerak nogo ambinom yogo logonet, ”Wulaga! At aap kat kenegen obeelom eekkakerak nogo abok nonggop yumunggun o?” Yogo mbareegwa, at nen, ”At Ala wone yorage menggerak nabi-nabi nogo mendek aret o.”

¹⁸Yoragagerak kwe, it aap Yakuri mendek nogo nen aap aa'nduk enegen mbuk wonagagirik, peebi obeelom agagerak nogo abet mbaka'lek logonet, agalo-ogoba wiirogo nogogwaarik, wogo mbareegwa, yorage logonet,

¹⁹”Kit kinapuluk-kinaagaluk enegen mbuk nda'nagagerak yogotak nogo, yi aret ilik? Ndi, enegen mbuk nda'nagagerak me, yogondak nonggop togon enegen obeelom agaarak o?”

²⁰Yorogo mbareegwa, agalo-ogoba nogo nen, ”Lek o. Aap yi, nit ninapuluk-ninaagaluk aret. Ndi, at enegen mbuk nda'nagagerak ti, nineenu aret kwe,

²¹yogondak nonggop togon enegen obeelom agaarak nogo inom, ndi, aap ta nen at enegen obeelom eekerak nogo inom, nit kunduk nineenggo'lek o. At aap koleewak aret me, at nen aret yokkiraawak nduk, yo'nip o,” yinuk, yorogogwaarak.

²²Yorogogwaarak nogo ti, it aap yakuri mendek nen koonggo logonet, ”Aakumi nen, Aap yi, Ala nen leenogo mippereegerak Keritut aret o, yinuk paganggwi iinok, tamban eeko menggam nen wumbiyaawok o,” yinuk, kooneegwaarak me, aap nogo agalo-ogoba aap Yakuri mendek inagabiti nen, ”Nit nineenggo'lek o.

²³At aap koleewak aret me, yo'nip o,” yinuk, yorogogwaarak.

²⁴Togop yorogo mbareegwa, it Yakuri mendek nen aap enegen mbuk wonagagerak nogo ambinom wiigo nogogwaarik, wage mbareegi, yogo logonet, ”Wulaga! Aap nogo maluk eeke menggerak nit nineenu me, Ala enggaanom paga koone mondok abet aret yu o.”

²⁵Yogo mbareegwa, at nen, ”At maluk eeke menggerak ilik, lek a? ti, an neenggo'lek kwe, maan nenegen mbuk wonagagirak. Ndi, yogondak perak, nenegen kage yi mban neenu o.”

²⁶Yorage mbareegi, it nen, ”At nonggop eekkakerak o? Nonggop eeppaganuk, kenegen obeelom eekkakerak?”

²⁷Yogo mbareegwa, at nen, ”Muk yokkiragarak kwe, koneniyak kineebi mbako logonet, Ambinom yo'niret o, mban yo'nugwi ti, nonggop nduk, yo'nogo ogotik. Kit kunduk at oone waganggwi mendek aruwok nduk yogo ogotik ilik?”

²⁸Yorage mbareegi, it nen aap oone nogo mondok meek eerogo pogo logonet, ”Kat at oone wagangge mendek aret keego o. Nit perak, Muta oone waganggwi mendek ogoorik.

²⁹At Ala nen Muta wone yoge nagagerak ti, nineenu aret kwe, aap yi perak, ngga nen wagagerak ti, nit nineenggo'lek o,” yinuk, yoreegwaarak.

³⁰Yogo mbareegwa, at nen, ”Wologwe! Kit yogwe tira, wigirage agarik o. Aap yi ngga nen wagagerak kineenggo'lek kwe, an nenegen obeelom ee'nakerak ti!

³¹It aap maluk eeko menggaarak inoone Ala aruk konenggeelik ti nineenu o. Aakumi Ala ayuk wuppunuk, at eeriyak mbake nogo eekwi iinok, inoone Ala aruk konengge menggerak.

³²O maan aa'nduk nen nok yogondak yi kuli paga aap ambi nen aap enegen mbuk nda'nagagerak ambi enegen togop obeelom eereegerak abu konenggulik me,

³³aap yi, Ala nen nappi woraanetak lek nen, yi eekak ndi eekak abok eeriyak mondok meek aret kanetak.”

³⁴Yorage mbareegi, it onggo yogo logonet, ”Kat mondok kiitok maluk lombok nda'nagagindak nen yogondak wone nit mamunninaburak nduk eeke agandik ya?” yinuk, eebe endekem mugogo wumbereegwaarak.

³⁵Wumbereegwaarak at Yetut aruk konengge nagagirik, ti'nuk, peebi imbirak lambumbunuk, ”Wulaga! At aap aret nda'nagagerak nogo kiniki oba panggombunuk, abet mbake agandik a, lek a?”

³⁶Yoge mbareegi, aap nogo nen, ”Nogoba o. Niniki at oba panggombunuk abet mbarikit nen at eebe ngge o? Yo'niru.”

³⁷Yoge mbareegi, at Yetut nen, ”Kenegen muk neegendak nimbirak wone mbanggwi neebe yi aret o.”

³⁸Yoge mbareegi, aap nogo nen, ”Ai nogoba o. Niniki koba panggombunuk, abet kombake agarik o,” yinuk, ayuk wureegerak.

³⁹Ayuk wuke mbareegi, at Yetut nen, ”It inigen mbuk kenok inigen obeelom eeginake, inigen obeelom kenok inigen mbuk eeginake, eeke logonet, kinowak loonogo pinagakit nduk, an o nggween paga yime wambi wagagirak o,” yinuk, yoragagerak.

⁴⁰Yoragagerak nogo it Pariti mendek inom wonogogwaarak nogo inaruk konenggo nogogwaarik, ”A puk! Nit kunduk ninigen mbuk ninombakendak ya?”

⁴¹Yogo mbareegwa, at Yetut nen, ”Kit kinigen mbuk logonetak en, maluk kinoba lenggenak logonetak lek kwe, kit nen, Nit ninigen obeelom o, yogwe me, maluk kinoba aret wonage o,” yinuk, yoragagerak.