Read Wano NAPPIYAREEGERAK 10 Bible Online

NAPPIYAREEGERAK 10 - Wano bible

NAPPIYAREEGERAK 10

¹Aap ambi o Kayitareya mendek me, aap yigin unde Italiya mendek ambi aago inowe endage Koreneliyut aret wonagagerak.

²Aap nogo aagapuri inom at Ala inagabiti warak logonet, Ala wone liippunuk eeko nogogwaarak. At aap koowarak aret me, it Yakuri inamendek lek kenok, amendek tumburirage, tamban mban eeke, eeke nagagerak me,

³ne ambi paga kiyoma jam 3 paga ari nage kagak, abinggaanggo kage logonet, mbogut paga mendek Ala yonggo nappiige menggerak melaikat ambi wage nagagirik, ame unggunuk yoge logonet, ”Koreneliyut wae,” yoge mbareegi,

⁴at Koreneliyut andit nage nagagirik, agabiti nen enegen looge logonet, ”Nogoba wae. Kat nonggop yo'nirikit nduk ari agandik o?” Yoge mbareegi, ”Lek o. Aakumi ineenggilek kenok kamendek tumburirage, tamban eeke, eeke nagandak nogo ti, at Ala enegen liippagagerak me, iniki koba aberak wonage o.

⁵Koba aberak wonage me, yogondak aap ambi endage Timon, endage peebi toonak Peterut nogo, aap endage Timon wam agabolo mbilanak ogobakkigika awi yi yenggenak aa'nggi paga wurik nogo, imbirak time wonage me, woraawak nduk kawuri yonggo o Yope nappiyet o,” yinuk, abinggaanggo paga yoge kagagerak.

⁶

⁷Ndi, at melaikat nogo nen at yo'nuk nage kagak, at Koreneliyut ayeloman mbere inom, at awot yigin unde Ala agabiti mbake logonet, ake eeke menggerak mendek ambi inom, ”Woraawak o,” yinuk, wiiragagerak wogo mbareegwa,

⁸abinggaanggo yoreegerak wone abok aret mbininogo yorage nagagirik, o Yope nappiyareegerak.

⁹It nappiyareegerak nogo, nogo ambi yippunuk, ko'lu nen nogo logonet, o Yope koorok panggo yi nogwe iigak, at Peterut nogo, o liingge jam 12 paga tamban eerikit nduk, yugum o wurik kirin paga time lagi nagagerak.

¹⁰Time tamban eeke logonet, mbi abu age mbareegi, ”Nano na?” ari nagagirik, mbi lakwi iigak, abinggaanggo negen kagagerak.

¹¹Abinggaanggo kage logonet, mbogut keyaappunuk, mbogoyum tabak, irip peenok-peenok pigaganggo nogogwaarik, towe-pagi inom, ndiimbu-nggwiya inom, weret-mbonon inom abok aret yum nogo ndoonak paga enaani nggween paga wurabi wage kagagerak.

¹²

¹³Kage me, ”Peterut wae. Mi'na'nuk, yi ambi warogo namen o,” yinuk, oone ari aruk koneneegerak.

¹⁴Aruk konembege nagagirik, ”A, nogoba o. Nunggulik-nunggoorak yogop yi, an abu nenggeelik me, noorak neebi o.” Yoge mbareegi,

¹⁵ti'nuk, ambinom yoge logonet, ”Lek o. At Ala nen we ugun nonggo logorak nduk pereegerak me, kat nen noorak mage yugun,” yinuk,

¹⁶ne kenagan paga yoge nagagirik, yum ambe nggerok togon wonok, mbogut paga lagangge kagagerak.

¹⁷Ndi, at Peterut nogo abinggaanggo kage nagagirik, ”Nonggop yo'nigi?” yinuk, iniki kobak a'nuk wonage me, it Koreneliyut nappiyareegerak nogo, ”Timon awi ngge o?” yinuk, kin wagiinet nda'nggi paga ari nogo nogogwaarik,

¹⁸”Wologo wae. Aap Timon endage peebi toonak Peterut yime wonage a, lek a?” Yinuk, yorogwe iigak,

¹⁹at Peterut nogo nen, ”Nabinggaanggo nonggop kagi o?” yinuk, iniki awo koongge wonage me, at Aberiniki nen at yoge logonet, ”Aap kenagan mukkeren wagaarak endekem wonogwe me,

²⁰kat mi'na'nuk wambi nage logomenggendik, aap yi an nen nappiya wagarak me, kiniki yungguppegak eerugun o. Ata, kinom mbet-mbet aret nak o,”

²¹yoge mbareegi, it inowagam wambi nage nagagirik, ”Mu'neren wogotak nogo an aret me, nonggop eeriyak nduk mu'neren wogop o?”

²²Yorage mbareegi, it nogo nen, ”Lek o. Aap Koreneliyut aap yigin unde inowe nogo nen nappinani waga o. At nogo iniki koonak Ala agabiti warak kenok, it Yakuri mendek abok aret wogoppugwi me, Ala nen melaikat ambi nappi wagaarak nogo nen Koreneliyut yoge logonet, Peterut nen wone yokkiri woraawak nduk, wone yonggo nappiyet o, yoge mbaki, yonggo nappinani wagaarak mukkeren wogo o,” yinuk,

²³yogo mbareegwa, ”Ti kenok, unggwi woraanip,” yorage mbareegi, unggwogo nogogwaarik, inom nogo yereegwaarak. Nogo yippunuk, ko'lu at Peterut nen, ”Nawok o,” yorage nagagirik, at oreewi Yope mendek inom, it nogogwaarak nogo inom, wogogwaarak.

²⁴Wogo nogogwaarik, tu paga nogo ambit yippunuk, o Kayitareya unggwi wogogwaarak. At Koreneliyut nogo at owe-awot inom, oreewi inom, it wogwe iyo, kuwak eepiinok, inigen wonogwe me,

²⁵at Peterut oore'nggam unggwi nage mbareegi, at Koreneliyut nogo abu'me wanduk yi nage nagagirik, alut eeke mbareegi,

²⁶at Peterut nogo nen, ”An kunduk we aap aret me, mi'naru o,” yinuk, eenggi pigogo mippereegerak.

²⁷Mippege nagagirik, imbirak wone mbanit unggwi nogo nogogwaarik at Peterut nogo aakumi ambik kuwak ogogwaaraak iige nagagirik,

²⁸yorage logonet, ”Nit Yakuri kit endekem mendek nogo ninom lambunggwi, kiya nogwe, Eeriyak mage o, yogwe nogo kineenu kwe, It aakumi ando maluk mendek yugun o, yinuk, Ala nen naruk wakerak me,

²⁹an mu'neren nogo mbakop, an neebi yuulik, nok-nok aret wagi o. Nonggop eeriyak nduk, mu'neren nogotak o?”

³⁰Yoge mbareegi, at Koreneliyut nogo nen, ”Lek o. Ne ambi paga kiyoma-kiyoma jam 3 yogop paga ndak-ndak an oome tamban eeke wonage me, nabinggaanggo kage nagarik, nogo 4 yigirak nogo yokkiri o. Nabinggaanggo kage logonet, aap ambi mbogoyum abinak kwiindele aago nggarek togon an nowagam mi'nari wage nagaarik,

³¹Koreneliyut wae. Kat tamban eekendak nogo Ala aruk konengge, ndi, aakumi ineenggilek kamendek tumburirage menggendak nogo, Ala enegen liippagage, eeke nagaarik, koba aberak wonage me,

³²aap Timon endage peebi toonak Peterut nogo, o Yope wonage me, woraawak nduk yonggo nappiyet o. At nogo aap Timon wam agabolo mbilanak ogobakkigika nogo awi yi yenggenak aa'nggi paga wurik nogo imbirak time wonage o, yinuk,

³³yo'nege mbaki, yonggo nappiigirak neya wagandak me, nore wa. Neya wagandak me, yogondak kogoba endagembogut nen, Togop yoranu, yokkegerak nogo abok yo'niraanok nduk Ala enggaanom kuwak eeko o,” yinuk, yoreegerak.

³⁴Yoge mbareegi, at Peterut nogo nen, ”Yokkira o,” yorage nagagirik, ”At Ala nen mbake logonet, Aap ambi neebi, ndi, ambi ninikilom, mbakeelik ti, abet aret mbaki o.

³⁵Nit yi aakumi ndi aakumi abok nen at oone ninagabiti warak logonet, obeelom mban eekwi niinok, at Ala nen inikilom ninombake menggerak.

³⁶Yi aakumi ndi aakumi abok ninowe endagembogut nogo ti Yetut Keritut aret me, Yetut Keritut eereegerak paga Ala ninom lambunninakerak o, yinuk, wone obeelom wone it Iterali ineenu aruwak nduk, nappi wagagerak nogo, kineenu aret o.

³⁷At Yaya yiime wuppiyoorak wone nogo yoranet nage mbareegi, o Nggalileya nen Yureya yi awi ndi awi abok eerit nage aakumi inigen kogo nogogwaarak nogo kit kunduk kineenu aret o.

³⁸At Ala nen Yetut Nataret mendek Aberiniki oba wuppi wage nagagirik, leenogo mippege, omaawi wogoge, eereegerak paga obeelom eeginake, it kugi Ibilit aakumi inikime logonet molok iranet nege menggerak nogo mugogo wumbiige, Ala imbirak logonet me, eerit nege nagagerak.

³⁹Ndi, at aap Yakuri iname time inom, o Yerutalem inom, ninenggaanom eeginabit nege nagagerak nogo ninigen kenok, yokkirogo ogoorik o. At Yetut nogo eyo karo-karo paga nabenogo wareegwaarak kambeegerak mendek,

⁴⁰nogo mbere yippunuk, Ala nen eenik agago mippereegerak eebe ninigen kawak nduk ni'niyareegerak.

⁴¹It aakumi we ugun inigen kawak nduk nigiyoolik o. Ata, at eenik a'nuk mi'nage nagagirik, nit aa'nduk at oone yorogo logowak nduk leenogo pinaneegerak nogo ninom logonet, mbi nunggwi, yi nunggwi, eereegurak nogo mban ninigen kawok nduk ni'niyareegerak.

⁴²Eenik agago mippege mbareegi, at Yetut nogo nen, It ineenik wonogwe inom, kambeegwaarak inom, inowak looninaburak nduk Ala nen miirogo mippereegerak nogo Yetut aret o, yinuk, liirogon paganogo yoranet nugu logonip o, yinuk, yo'niragagerak.

⁴³It Ala wone yorogo nogowaarak nogo apit aret at abok mban paganggo logonet, Kiniki at oba panggombunuk abet mbakwi kiinok, kinomaluk lek eerogo pinagagin o, yinuk, yorogo nogogwaarak o,” yoragagerak.

⁴⁴At Peterut awo togop yorage kagak, it wone koneneegwaarak nogo abok aret Aberiniki inoba wuppiya wagagerak.

⁴⁵Aberiniki inoba wuppiya wage logonet, Ala nen it endekem mendek nogo kunduk Aberiniki inom ndak-ndak aret wogorage, inigen kogo nogogwaarik, it aap inagabolo mbanak abet mbareegwaarak Peterut inom wogogwaarak nogo nen, ”Wi!” yinuk, pi wareegwaarak.

⁴⁶It aap inoone alitak lombok lalin negen wappunuk yogwe, Ala endage wogoppugwi, eekwi nogo inaruk konembunuk, ”Wi!” yinuk, pi wareegwaarak. Pi wako nogogwaarik, at Peterut nogo nen yorage logonet,

⁴⁷”Ala nen Aberiniki nit wo'niragagi kwak it wogoragaarak me, yiime wuppiyoorak ti, mage mbakop?”

⁴⁸Yorage nagagirik, ”Lek o. Yetut endage agago yiime wuppiyanip o,” yinuk, yorage mbareegi, ”Ninom mbuuluk logonuk nanok o,” yinuk, yoreegwaarak.