Read Wano NAPPIYAREEGERAK 11 Bible Online

NAPPIYAREEGERAK 11 - Wano bible

NAPPIYAREEGERAK 11

¹It Yetut leenogo nappiyareegerak inom, inoreewi o Yureya time mendek inom, it nogo nen aap endekem mendek kunduk Ala wone waganggwi inaruk koneneegwaarak me,

²at Peterut o Yerutalem nage mbareegi, it inagabolo mbanak mendek ando nen at Peterut yogo logonet,

³”Kat nonggop nduk it inagabolo mbanak lek mendek iya nage nagandik, kinom lambunik mbi nenggendak o?” yinuk, inom wone wareegwaarak.

⁴Wone wako mbareegwa, at Peterut nogo nen wone alom abok mbininogo yoragagerak.

⁵Yorage logonet, ”Lek o. An o tini nggwok Yope nogome tamban eeke wonage me, nabinggaanggo negen kage logonet, mbogoyum tabak mbogut paga nen irip peenok-peenok pigogo nowagam wuppi wogwe nenegen kagarak.

⁶Nenegen maloppege nagarik, towe-pagi inom, ndiimbu-nggwiya inom, weret-mbonon inom, abok aret yonggolak kagarak.

⁷Kage mbaki, oone yo'nege logonet, Peterut wae. Mi'na'nuk, yi ambi warogo namen o, yo'nege naruk konenggirak.

⁸Yo'nege naruk konenggirak kwe, A, lek, o, nogoba o. Nunggulik-nunggoorak yogop yi, an abu nenggeelik me, noorak neebi o, yoge mbaki,

⁹at mbogut paga nen peebi oone yo'nege logonet, At Ala ugun nonggo logorak nduk pereegerak nogo, kat nen noorak mage yugun o.

¹⁰Ne kenagan paga togop yo'nege nagaarik, yi mendek ndi mendek yonggolak nogo, yum ambe nggerok togon wonok mbogut paga laganggerak

¹¹Wonok lagangge kagak, an oome wonage me, aap kenagan an mu'neren o Kayitareya nen nappiya wagaarak endekem iigak,

¹²Aberiniki nen, Kiniki yungguppegak eerugun o. Kat kinom mbet-mbet aret nak o, yo'nege mbaki, noreewi ineebe 6 yi, ninom nogo nogoorik, aap Koreneliyut ame aret unggwi nogoorak.

¹³Unggwi nogo mbako, at nogo nen wone mbininogo yo'nirage logonet, Aap mbogut paga yonggo nege menggerak melaikat ambi an name unggugerak mi'ndak wonage nenegen kage mbaki, yo'nege logonet, Aap Timon endage peebi toonak Peterut woraawak nduk mugurok o Yope nappiyet o. Nappiyamenggendak yori nogwe iinok, wage logominggirik,

¹⁴kat kaakkapuri kinom kinagap ndaruwak nduk wone yokkira woraagin o, yogerak wone nogo an yo'negerak.

¹⁵Yo'nege mbaki, an yoraakit nduk eeke neegak, aa'nduk Aberiniki ninoba wuppinani wagagi kwak, it kunduk inoba wuppiya wage mbaki,

¹⁶ninogoba Yetut nen ari logonet, At Yaya yiime wuppiige nagagerak kwe, peebi an Aberiniki kinoba wuppinagi woraagin o, yereegerak wone nogo aret niniki abekirak.

¹⁷Nit niniki ninogoba Yetut Keritut oba panggombunuk abet mbako mbareegu, Aberiniki we aret wo'niragagi kwak, it nogo wogoragaarak me, Ala nen eeriyak koonggerak kagak, Wogoroorak mage o, yinuk, nonggop togon yoriyak mbakop?” yinuk, Peterut nen inagabolo mbanak mendek yoragagerak.

¹⁸Yorage nogo inaruk konembunuk, inoone lek puk aret wonogogwaarik, ”Ti kenok, Ala nen it endekem mendek nogo kunduk it maluk eeko menggaarak iniki koombunuk mbo pugwi iinok, ineenik logorak nduk koonogo piyareegerak kogo o,” yinuk, Ala wogoppereegwaarak.

¹⁹At Tepanut yugum toguurit wako nogogwaarik, it ando inooruwok nduk ale-pale eeginabit nogo mbareegwa, ma'nogo nogogwaarik, o nda time yanggwagak nogo logonet, o Penitiya inom, Tipurut inom, Andiyokiya inom, it Yakuri mendek mban wone konenuwak nduk, yoranet nugu nogogwaarak kwe,

²⁰it ando o Tipurut mendek inom, o Kirene mendek inom, o Andiyokiya unggwogo nogogwaarik, it aap Yakuri mendek kwe, Yunani inoone yogo menggaarak mendek nogo inom konenuwak nduk, ninowe endagembogut Yetut wone obeelom wone nogo yorogo nogogwaarak.

²¹Nogo, ninogoba omaawi paga yorogogwaarak me, aakumi ambik iniki koombunuk, abet mbako nogogwaarik, ninogoba Yetut wone waganggo nogogwaarak.

²²It Ala apuri o Yerutalem kuwak aago nogo nen eereegwaarak nogo konembogo nogogwaarik, at Mbaranabat o Andiyokiya nappi wogogwaarak.

²³Ndi, at Mbaranabat iniki kwi'ndak me, iniki abet mbake logonet, yungguppegak eeke logolik Aberiniki imbirak wonage me, nappi wogogwaarak wage nagagirik, at Ala inabuwa nen eeppiige nogo enegen kage nagagirik, iniki ale'nggen ambik a'nuk, ”Kit kiniki mondok nu'lek logonet, ninogoba Yetut oba abeko logonip o,” yinuk, inaruk wareegerak. Inaruk wappunuk, inom wonage me, ambi nabek unggwagak mban eeko logonet, Ala apuri ambik aret ogogwaarak.

²⁵Ti'nuk, peebi, at Mbaranabat nogo nen at Tawulut kwaarikit nduk o Taratut nage nagagirik,

²⁶kwaappunuk wonok, o Andiyokiya wagagerak. Wonok wage nagagirik, Ala apuri inom kuwak eekwi, aakumi ambik wone mamunirogwe, eekwi iigak, tahun ambit aret eereegerak. It Yetut wone waganeegwaarak, ”Keritut Apuri o,” yogwe nogo ti, aa'nduk o Andiyokiya nen aret yogo nogogwaarak.

²⁷Time mamunirogwe iigak, it Ala wone yorogo menggaarak ando o Yerutalem nen o Andiyokiya lagi wogogwaarak.

²⁸Lagi wogo nogogwaarik, aap ambi endage Agabut mi'nage nagagirik, ”Yi awi ndi awi mbi noogelo ambik arigin o,” yinuk, Aberiniki nen iniki nggaganogo yoge kagak, yoragagerak. (Ti yoragagerak nogo ti, at Kelawuriyut awo mi'ndak wonage kagak, a'me aret agagerak.)

²⁹”Yi awi ndi awi mbi noogelo ambik arigin o,” yoragagerak kenok, it Yetut wone waganeegwaarak nogo nen iniki koonggo logonet, ”Nit ninalitak ninamendek wonage kenok, kuwak eeppunuk, ninoreewi Ala apuri o Yureya wonogwe nogo inake nappiyawok o,”

³⁰yinuk, kuwak eerogo punuk, Mbaranabat Tawulut imbirak nappiigo mbareegwa, wonok, it Ala apuri o Yerutalem inarum menggaarak nogo ira nogogwaarak.