Read Wano NAPPIYAREEGERAK 14 Bible Online

NAPPIYAREEGERAK 14 - Wano bible

NAPPIYAREEGERAK 14

¹O Ikoniyum time o Andiyokiya eereegwaarak nogo ndak-ndak eereegwaarak. It Pawulut kunduk, Mbaranabat kunduk aap Yakuri tamban eeko menggam unggwogo nogogwaarik, wone abe liirogon yorogogwaarak paga Yakuri mendek inom, Yunani mendek inom, aakumi ambik aret iniki abet mbareegwaarak.

²Abet mbako mbareegwa, it Yakuri ando, ”Wone nineebi o,” yinuk, wagangga'lek nogo nen, it endekem mendek nen Yetut apuri inom ogooruwak nduk iniki nggagani nogo mbareegwa,

³at Pawulut Mbaranabat imbirak time elaambirik negen logonet, iniki ninogoba Yetut oba panggombunuk inagabiti lek logonet, wone yorogo nogogwaarak. Ndi, yorogo logonet, Ala inabuwa nen obeelom eeginake menggerak wone abet mbaruwak nduk, Pawulut Mbaranabat imbirak nen Ala omaawi wogoragagerak paga, inagabiti warak mendek eekwi, eerubok mendek eekwi, eeko nogogwaarak.

⁴It o tini time menggaarak nogo inom ogooppunuk logonet, it ando Yakuri inoone waganggwi, ndi, it ando it nappiyareegerak nogo inoone waganggwi, eereegwaarak.

⁵Eeko logonet, it endekem mendek nogo inom, it aap Yakuri mendek inom, it inoweewi nogo inom, Pawulut Mbaranabat imbirak ale-pale eerogo yugum paga toguurit inooruwok nduk eereegwaarak.

⁶Eeruwok nduk eekwi inaruk konembunuk, kole o Likawoniya nogo nogogwaarik, o tini Litera inom, o tini Nderebe inom, yi awi ndi awi time yanggwagak nogo nogogwaarik,

⁷wone obeelom wone time yoranet nugu nogogwaarak.

⁸O Litera time aap ambi endop maluk itok nda'nagagerak tu negeelik, iyok yunggunik mban menggerak nogo,

⁹at Pawulut wone yorage aruk konengge wonage me, at Pawulut nen enegen looge logonet, aap yi obeelom eeruwak nduk, iniki Ala oba panggombunuk abet mbake yelok kage nagagirik,

¹⁰”Kiyok nggik togon mi'naru o,” yinuk, oone nggwok paga yoge mbareegi, at nogo pilak togon mi'na'nuk, nege nagagerak.

¹¹Mi'na'nuk nege kagak, it aakumi ambik nen at Pawulut eereegerak nogo inigen kogo nogogwaarik, it Likawoniya inoone paga, ”Kugi aakumi negen a'nuk, niya wambi waga o,” yinuk, ina'mit yereegwaarak.

¹²Ina'mit yogo nogogwaarik, at Mbaranabat endage Tewut toonggwi, ndi, at Pawulut wone mbangga kenok, endage Keremet toonggwi, eereegwaarak.

¹³Eeko mbareegwa, kugi Tewut awi wurik o tini endekem nggwe wonagagerak unde nogo nen, ”Aakumi ninom nen o tini tu unggwogo menggam ta'nogo it nappiyareegerak inaanggo warogo wogoraawok o,” yinuk, wam sapi inom, iri'ngga-kale'ngga laambu mendek inom, wonok wage nagagirik, wogoraawok nduk eekwi

¹⁴it nappiyareegerak Mbaranabat Pawulut imbirak inaruk konembogo nogogwaarik, inagabiti nen inambogoyum endekem nggwe mendek nibinogo punuk, puu'nuk aap ambik aago wonogwe me unggwi nogo nogogwaarik,

¹⁵”Wologo wae. Nit kit kokwak abe aakumi aret me, kit nonggop nduk yogop eeko ogotik? Kit yi eekak ndi eekak aanom warogo eeko monggotak yi, mbo punuk, at Ala eenik menggerak nogo nen mbogut inom, nggween inom, yi nggwok yenggenak inom, yi mendek ndi mendek abok wakkagagerak nogo woge wabagip nduk, obeelom wone wonok yokkiraawok nduk wogoorak kwe, eeko ogotik o.

¹⁶O maan nen, yogondak kuli yi paga yi aakumi ndi aakumi iniki mba'nuk eerit nogwe iigak, Ala nen teppiige menggerak kwe,

¹⁷at nogo eebe yelok kaabagip nduk, eeppinagageelik ti lek o. Kinabuwa nen obeelom eeppinagage logonet, yi mendek ndi mendek kole eeruwak nduk, mbogut paga nen mayu wokkirage, kiniki ale'nggen mbaruwak nduk mbi ka'let eerogo wokkirage, eeke menggerak o,” yinuk, inoone omaawi paga yorogogwaarak kwe,

¹⁸kagak, inaanggo waruwok nduk, eereegwaarak mendek, mage nabenak yorogo mbareegwa, nggininogo teppereegwaarak.

¹⁹Teppogo mbareegwa, it aap Yakuri mendek o Andiyokiya inom, o Ikoniyum inom, time nen wogo nogogwaarik, it inom aruwak nduk, aakumi inikime manabi nogo mbareegwa, it aakumi nogo nen Pauwulut yugum toguurit wappogo nogogwaarik, ”Abu kanggi o,” yinuk, niigogo o tini endekem nggwe mbo wumbereegwaarak.

²⁰Mbo wumbogo mbareegwa, it Yetut wone waganeegwaarak nogo nen at eebe oolo kagak, ninggippunuk wonogo mbareegwa, mi'nage nagagirik, o tini nogome unggwi nagagerak. Unggwage nagagirik, nogo yippunuk, ko'lu Mbaranabat imbirak o Nderebe wogogwaarak.

²¹Aakumi o tini time mendek nogo obeelom wone yorogogwaarak paga abet mba'nuk Yetut wone waganeegwaarak. Waganggo mbareegwa, it wogogwam o Andiyokiya iniyok paga nogo logonet, o Litera unggwogwe, Ikoniyum unggwogwe, eerit o Andiyokiya unggwi nogogwaarak.

²²O nogome yanggwagak nugu logonet, ”At Ala abu'me unggwi noorak ti, andi-pandi kagak unggwi noorak me, kit Yetut wone abet mbakotak kenok, nu'lek eeppunuk logonip,” yinuk, it iniki eyak wappiinet nugwi,

²³ndi, Aal apuri kuwak eeko menggam lombok inarum logorak nduk, leenogo mippiigo nogogwaarik, mbi nengga'lek inambe mage negen logonet, ”Nogoba o. It aap yi iniki koba panggombunuk abet mbakaarak me, eerit nugwi iigak, liirogon inarum logomunggun o,” yinuk, nogogwaarak.

²⁴Eerit nogo nogogwaarik, o Pitiriya yungguninuk, o Pambiliya unggwi wogogwaarak.

²⁵O Perega nogome wone yorogo nogogwaarik, o Ataliya unggwi wogo nogogwaarik,

²⁶time nen yiiro paga o Andiyokiya wunda wogogwaarak. ”Ala eyabu eeri nawak nduk, Ala kinom namunggup o,” yinuk, nappiyareegwaarak eerit nogo nogogwaarik, abu nggobok togon eeppunuk, nappiyareegwam nogome aret wogogwaarak.

²⁷O Andiyokiya unggwi wogo nogogwaarik, it Ala apuri nogo kuwak eeppiinok, it Ala inom eeginabit nogogwaarak nogo inom, Ala nen it endekem mendek ninogoba Yetut wone abet mbaruwak nduk tu paarogo piyareegerak nogo inom, wone mbininogo yorogo nogogwaarik,

²⁸it o Andiyokiya Yetut wone waganeegwaarak nogo inom logonet, nogo apit yereegwaarak.