Read Wano NAPPIYAREEGERAK 16 Bible Online

NAPPIYAREEGERAK 16 - Wano bible

NAPPIYAREEGERAK 16

¹Yoranet nege logonet, o Nderebe Litera unggwi nage nagagirik, aap ambi Yetut wone waganeegerak endage Timotiyut kagagerak. At agalo Yakuri mendek kwe, Yetut wone abet mbareegerak, ndi, ogoba ti, Yunani mendek aret o.

²It Yetut apuri o Litera mendek inom, o Ikoniyum mendek inom, nen Timotiyut aap obeelom wonage kogo nogogwaarak me,

³at Pawulut nen, ”Timotiyut nimbirak nege logokit o,” mbake nagagirik, it Yakuri o time menggaarak abok aret Timotiyut ogoba aap Yunani mendek ineenu me, Pawulut nen agabolo mbaneegerak.

⁴It Pawulut Timotiyut imbirak yi awi ndi awi o tini lombok nugu logonet, it leenogo nappiyareegerak inom, o Yerutalem Ala apuri inarum menggaarak inom nen wone kooneegwaarak nogo it eeko logowak nduk yoranet nugu nogogwaarak.

⁵Togop yoranet nugu nogogwaarak paga, it Ala apuri abet mbareegwaarak nogo iniki nu'lek age mbareegi, ko'lu-kii'me ambi nabennagak, ambi nabennagak eeko logonet, Ala apuri ambik aret ogogwaarak.

⁶Ti'nuk, at Aberiniki nen, ”O Atiya time yora nagup o,” yorage mbareegi, o Pirigiya nen, o Nggalatiya nogo nogogwaarik,

⁷o Mitiya tu ndogon me panggo yi nogo nogogwaarik, Mbitiniya ungguwok nduk eereegwaarak mendek, at Yetut Aberiniki nen unggwi noorak yorulik me,

⁸o Mitiya unggwogo nogogwaarik, nok-nok o Torowat unggwi nogogwaarak.

⁹O Torowat unggwi nogo nogogwaarik, time nogo yogo logonet, at Pawulut abinggaanggo paga aap Makeroniya mendek ambi mi'ndak logonet, ”Wulaga wae. Nit yeenggwaniranok nduk, o Makeroniya yime wunda mok o,” yinuk, oone nabek togon yoge kagagerak.

¹⁰Kage nagagirik, ”Ala nen nit obeelom wone aap Makeroniya mendek yora nawak nduk, ninayonggo pegerak kogo o,” yinuk, mbet-mbet wunda nawok nduk eereegurak.

¹¹O Torowat nen yiiro paga unggwogo nogogurik, nok-nok aret o Tamotarake wunda nogo nogogurik, ko'lu nen, o Neyapolit wunda nogogurak.

¹²Wunda nogo nogogurik, o Makeroniya o tini aa'nduk wureegwam Pilipi nogome, it aap Oroma mendek nen inabu'me piirogo wonogwam unggwi nogo nogogurik, time logonet, nogo mbere negen yereegurak.

¹³Nogo mbere negen yippunuk, it Yakuri tamban eekwi paga o tinime nen wundi nogo nogogurik, ”Yi aa'nggi paga tamban eeko menggam time wonage,” mba'nuk, nogo nogogurik, it kumi kuwak aago wonogome ninom kwi'nogo nogogurik, wone yorogogurak.

¹⁴Yorogogurak koneneegwaarak nogo, kwe ambi o Tiyatira mendek mbogoyum merah kigirikwe lombok kungge menggerak ndage Liriya nogo nen Ala alut eeke menggerak me, at ninogoba nen Pawulut yereegerak wone wawak nduk iniki kooneegerak.

¹⁵Kooneegerak paga wone wagangge mbareegi, kwe nogo at ame menggaarak inom yiime wuppiyareegerak. Yiime wuppiige mbareegi, at kwe nogo nen, ”Kit nen an Yetut wone abet mba'nuk mugurok nage neegotak kenok, an name ninom logowok nduk woraanip o,” yinuk, nabenak mban ari mbareegi, ”E o,” yinuk, ame aret unggwi nogogwaarak.

¹⁶Ne ambi paga tamban eeko menggam nawok nduk nogwe me, kolaga aap inayeloman ambi kugi inikime unggwagagerak me, tili pagangge paga wu nuurogo ogobamini wogorage menggerak me, tu paga ninom lambumbunuk,

¹⁷at kolaga nogo nen, ”At Ala tiyanak lombok menggerak ayeloman kinagap ndariyak wone yokkira wogwe yi iyaanip o,” yinuk, kwa kunik agan, Pawulut ninom ninambokan mu'neren wagagerak.

¹⁸Togop mban agan wage kagak, nogo apit yege mbareegi, at Pawulut iniki eebi mba'nuk, ena nomorogon kolaga nogo pekkage nagagirik, kugi nogo yoge logonet, ”Yetut Keritut endage paga wundi nak o,” awo yoge kagak, kugi nogo nggigik togon wundeegerak.

¹⁹Wungge mbareegi, kolaga nogo ogobamini nen, ”Wu nuurogo wo'nirage logorak kwe, lek aga o,” mbako nogogwaarik, at Pawulut Tilat imbirak Pippiinok, niigiren, wone owak loonggo menggam inoweewi inowagam piya nogogwaarak.

²⁰It inoweewi inendagembogut inowagam piya nogo nogogwaarik, yorogo logonet, ”Nit aap Oroma mendek nen eekulik mendek kagak, it aap Yakuri yi eeko menggaarak mamunnirogo logonet, o yime naalop-kaalop eekwi iigo o,” yinuk,

²²yorogo nogogwaarik, aap apit aago wulak yogo logonet, inooruwok nduk eeko mbareegwa, inoweewi inendagembogut nogo nen inambogoyum nibinogo nappunuk, ”Yawi inoo'nip o,” yorogo mbareegwa,

²³yawi nggwi eerogo inooppunuk, niigogo o keele maarogo mambiigo menggam mbo mambiigo nogogwaarik, aap inarum menggerak nogo, ”Inarum mondok liirogon logot o,” yinuk, aruk wareegwaarak.

²⁴Yoreegwaarak nogo aruk konembunuk, o ko ogoorak oolo time mbo mambiige nagagirik, iniyok eyo paga mbettebenogo piyareegerak.

²⁵Mbettebenogo piyareegerak time wonogogwaarak kwe, oonikiya nogo iniki paga it ando keele maarak nogo konenggwi iigak, it Pawulut Tilat imbirak tamban eekwi, Ala alut eeko logonet ndawi yogwe, eekwi me,

²⁶mi nggwok nuk ari logonet, o wurik keele maarogo mambiigo menggam nogome o eyak panggonak abok nuk ari, tu paa'nage, mbuti keele maarak nogo piyo-piyo nage, eereegerak.

²⁷At aap keele maarak inarum menggerak nogo nen eenik a'nuk, keele maarogo mambiigo menggam tungga paa'narit nagagerak enegen kage nagagirik, ”It keele maarak abu mbaganggaarak kagi,” mba'nuk, tege wooluwak nggigik togon agago wakkolaakit nduk eeke me,

²⁸at Pawulut nen, ”Wulaga. Wakkolaagun o. Nit abok aret wonogo ogoorik,” yinuk, oone nggwok paga yoreegerak.

²⁹Yoge mbareegi, at keele maarak inarum menggerak nogo nen, ”Ndi wonok wa'nip o,” ari nagagirik, agabiti nen aganak nugirit nggarek togon Pawulut Tilat imbirak inabu'me ngginnari nagagerak.

³⁰Ngginnari nage nagagirik, imbirak wogoren endekem wumbiige nagagirik, ”Wologo wae. An nagap ndaruwak nduk, nonggop eeri o?” Yoge mbareegi,

³¹it nogo nen, ”Lek o. Kiniki ninogoba Yetut oba panggombunuk abet mbake keenok, kat inom, kaakkapuri inom, kinagap ndarigin o,” yoreegwaarak.

³²Yogo nogogwaarik, at inom, it aakumi at ame inom menggaarak inom, Ala wone yorogogwaarak.

³³Oonikiya ti eyom paga aret it nogo wogoren nage nagagirik, inagabolo mbannarit nagagerak nogo koorinake mbareegi, at inom, at akwe-apuri inom, yiime wuppiyareegwaarak.

³⁴Yiime wuppiigo mbareegwa, wogoren at ame unggunuk mbi wogorage nagagirik, at inom at aagapuri inom, iniki Ala oba panggombunuk abet mbareegwaarak me, iniki ale'nggen ogogwaarak.

³⁵O wege mbareegi, it aakumi Pilipi mendek inoweewi nen, ”Aap keele maarak inarum menggerak nen aap mbere keele maarak nogo keele piinogo wumbiyaawak nduk, yori nanip o,” yinuk, it aap politi nappiya wogogwaarak.

³⁶Yori wogo mbareegwa, aap nogo nen Pawulut yoge logonet, ”Ninoweewi inendagembogut nen, Keele piinogo wumbiyet o, yo'negaarak me, wundi nogo logomonggotik, obeelom aret kiname nanip o.”

³⁷Yoge mbareegi, at Pawulut nen it politi nogo yorage logonet, ”Lek o. Nit Oroma mendek aret kwe, alom kwaaka'lek logonet, tena'me yawi ninooppunuk, keele maarogo mambiigo menggam mbo mambinanegaarak me, nit yogondak kote negen wumbinaniyak nduk yagaarak? Lek o. It wogo logomenggaarik en, nit wumbinani woraawak o.”

³⁸Yinuk, yoragagerak nogo, it politi nogo nen it Pilipi mendek inoweewi yora nogo mbareegwa, inaruk konembogo nogogwaarik, ”Pawulut Tilat imbirak Oroma mendek iigak eekoorak, iya!” yogo nogogwaarik, inagabiti ogogwaarak.

³⁹Inagabiti ogo nogogwaarik, it ineebe inowagam wogo nogogwaarik, ”Ai, ninoreewi! Maluk eekkinakoorak o,” yorogo nogogwaarik, wogoren, keele maarogo mambiigo menggam nen wundi nanuk, ”O yime logorak lek o. Nanip o,” yorogo mbareegwa, nogome nen,

⁴⁰wundi nogo nogogwaarik, kwe Liriya ame nogome unggwi nogogwaarak. Unggwi nogo nogogwaarik, time inoreewi ando inom lambunggo nogogwaarik, iniki eyak wappiinok, nogogwaarak.