Read Wano NAPPIYAREEGERAK 17 Bible Online

NAPPIYAREEGERAK 17 - Wano bible

NAPPIYAREEGERAK 17

¹Nogo nogogwaarik, O Ambipolit inom, Apoloniya inom, yanggwagak eerit o Tetalonika unggwi nogogwaarak. Unggwi nogo nogogwaarik, Yakuri tamban eeko menggam o time wonage me,

²at Pawulut it Yakuri tamban eekwi paga inom eeke menggerak me, tamban kenagan paga it kuwak eeko menggam nogome inom eeke logonet, at nen Ala wone liiru mbanak paga piinogombo yorage nagagerak.

³Yorage logonet, ”At Ala nen leenogo mippereegerak nogo, andi yagan wappunuk, kambunuk nogo menggam nen eenik a'nuk mi'nariyak koonak wonagagerak me, mi'nagagerak o,” yinuk, amburu mbanogo liirogon yorage nagagirik, ”Yetut eereegerak yokkirage yi, Ala nen leenogo mippereegerak nogo, at aret o,” yinuk,

⁴yoragagerak nogo, it ando nen abet mbako nogogwaarik, it inom, it Yunani mendek Ala inagabiti warak ando ambik inom, kumi nggaganin inom, Pawulut Tilat imbirak inom eeko logorak nduk iya wogogwaarak.

⁵Iya wogo mbareegwa, it aap Yakuri inanini agaket yogo logonet, it aap maluk eeko menggaarak ineenggi lebenak nogo mendek kuwak eeppiinok, it aakumi time abok noone-koone yogo logowak nduk, inikime manako nogogwaarik, noone-koone agan, at Pawulut Tilat imbirak nggwok me wone loonuwok nduk, aap Yaton awi oonda mbaneegwaarak mendek,

⁶it imbirak ineebe lek mbareegwa, at Yaton inom, at oreewi ando inom, niigeren inoweewi inendagembogut inowagam piya nogogwaarak. Piya nogo nogogwaarik, ”O yi awi ndi awi piyaginabit nugu menggaarak nogo, ineebe yime wagaarak me,

⁷at Yaton nen waganakerak o. It aap ti, Ninowe endagembogut Yetut alik wonage o, yinuk, at Kayitat nen lengganggetak wone nogo taganggo menggaarak o,”

⁸yorogwe it inoweewi inendagembogut inom, aakumi kuwak ogogwaarak nogo inom, inaruk konembogo nogogwaarik, inanini nen inoone-koone yogo nogogwaarak.

⁹Ndi, at Yaton oreewi inom, nen keele maarak onggo pogo mbareegwa, piinogo teppiyareegwaarak.

¹⁰O kiip age mbareegi, it inoreewi time nen Pawulut Tilat imbirak, ”O Mbereya nanip,” yorogo mbareegwa, oonikiya nogo nogogwaarik, it Yakuri tamban eeko menggam unggwi nogogwaarak.

¹¹It aakumi Tetalonika mendek ti inogogumbuk kwe, it Mbereya mendek perak, iniki abu obeelom me, Ala wone yorogogwaarak nogo iniki ale'nggen paga waganggo nogogwaarik, ”Wone yo'nirage yi, abet aret ilik?” yinuk, ko'lu-kii'me Ala wone liiru mbanak malenggo nogogwaarak.

¹²Malenggo logonet, it ambik abet mbareegwaarak. It Yunani mendek, kumi nggaganin inom, aap inom, it kunduk abet mbareegwaarak.

¹³Abet mbako mbareegwa, it aap Yakuri o Tetalonika mendek nogo nen at Pawulut nen o Mbereya Ala wone yorage konenggo nogogwaarik, aakumi o Mbereya mendek wone munuurogo inikime manabi nogo mbareegwa,

¹⁴it Ala apuri o Mbereya mendek nen, Tilat Timotiyut imbirak time iigak, at Pawulut yi yenggenak ambet paga a nawak nduk nappi wogogwaarak.

¹⁵It aakumi Pawulut o Atena pi wogo mbareegwa, Pawulut nen, ”Timotiyut Tilat imbirak mbet-mbet neya woraawak nduk, nappiya woranu o,” yinuk, wone agago nappiyareegerak.

¹⁶Ndi, at Pawulut nen it Timotiyut Tilat imbirak wogwe iyo, o Atena toginake logonet, o tini time kuguwak ererengge-mboongge nggelenak ambik endekem-oome wonage kage nagagirik, inikime nen abu eebi mbareegerak.

¹⁷Abu eebi mbake nagagirik, it Yakuri inom, it aakumi Ala inagabiti mbako menggaarak inom, it Yakuri tamban eeko menggam time Ala wone piinogombo yorage, ko'lu-kii'me mbi kunggo menggam time inom abuk age nagaatik, wone yorage, eeke nagagerak.

¹⁸Eeke me, it yi wone ndi wone alom kwaako menggaarak aap Epikurot mendek inom, Towa mendek inom nogo nen, ”At wone yogwe iigetak kambok agan nege menggerak yi, nonggop mba'nuk agan nage mbakop?” yogwe, ndi, at Pawulut nen Yetut wone inom, at eenik a'nuk mi'nagagerak wone inom, yorage kenok, it ando nen, ”Lek o. At kugi wone alik negen ari kogo o,” yogwe, eekwi me, at inom wone onggo-onggo yogo nogogwaarik,

¹⁹Pawulut wonok, o Areyopagut wone amburu mbanggo menggaarak inowagam pi nogo nogogwaarik, ”Kat wone alik ngget mendek mamunnirage ti, nit nineenu aruwak nduk yo'niret o.

²⁰Kat wone alik negen agan nege konenggoorak me, Wone eebe ti aret me yigi, mbaruwok nduk, yu o,” yoreegwaarak.

²¹(Ti, it inaworak Atena mendek inom, nggiru iya wogogwaarak inom, it nogo nen wone alik ngget mendek nogo mban konenggwi, yogwe, eeko logonet, yi eekak ndi eekak eeka'lek aret wonogogwaarak.)

²²”Yu o,” yogo mbareegwa, at Pawulut nogo nen, o Areyopagut it wone amburu mbanggo menggaarak inenggela'me mi'na'nuk, yorage logonet, ”Kit noreewi o. Atena mendek yi wae. Kit kuguwak amuli kumbunuk, kiniki ti paga mban panggombunuk mugurok nogwe kiigi o.

²³An kinawoore'nggam kit kugi eerit nogo monggo'nom nenegen kenet nage logonet, kugi eeko monggo'nom ambi, Ninogoba Endage Nineenggo'lek Eeko Monggom o, yinuk, liiru mbanak pugunik nenegen kagarak. Kit kineenggo'lek logonet, eeko monggotak ti'nogo an nen yokkira o,” yorage nagagirik,

²⁴”At Ala nen nggween inom, yi mendek ndi mendek nggween paga mendek abok wakkagagerak kenok, mbogut-nggween unde at aret me, at kuguwak awi wurik me wonageelik o.

²⁵At nen mban yi aakumi ndi aakumi ineenik eeginake, yi mendek ndi mendek wogorage, eeke menggerak me, at amendek lek kenok, aakumi nen ambi at wogoriyak abu lek o.

²⁶At yi awi ndi awi abok o nenaarit nogo logowak nduk, kuli ogoorogo piige, ti'nuk, niniyom-naniyom eerit nogo logowak nduk, koonogo pege, eeke nagagirik, yi aap ndi aap inanebunu lombok yi awi ndi awi wiganuwak nduk, alom aap ambit aret wakkagagerak.

²⁷Ti eereegerak nogo ti, at eebe nda lek koorok-koorok ninom aret wonage kwe, kwaarit nogo logomonggoorik, Nogo eebe yi aret kagi, yinuk, yelok kawak nduk eereegerak o.

²⁸Ndi, aap kit mendek ambi ndawi pege logonet, Nit kunduk at ombowologwe aret o, yinuk, yereegerak nogo ndak-ndak, Nineenik wonogwe inom, yi eekak ndi eekak eekwi inom, ti at panggok mban logonet eeko monggoorak o.

²⁹Ti kenok, nit Ala ombowologwe aret wonogwe me, at eebe alom ti, aakumi iniki koonogo punuk mbuti mas inom, mbuti perak inom, yugum inom, kuguwak negen ogobakkigirik ti kwak mbarugup o.

³⁰Maan nen ti nineenggo'lek logonet eekwi niigak, Ala nen malenninaka'lek aret wonagagerak kwe, yogondak perak, nit yi aakumi ndi aakumi abok aret ninomaluk mondok mbo puwak nduk yo'nirage agaarik o.

³¹Aap ambi leenogo mippereegerak nen aakumi abok eekwi ndak-ndak owak looninaburak ne ambi koonogo pereegerak nogo, nit abok nineenu aruwak nduk at kambunuk nogo menggam nen eenik agago mippereegerak o, yinuk, yokkirage agarik o,” yinuk, yoragagerak.

³²At Pawulut nen kambunuk ineenik ariyak wone ari konembogo nogogwaarik, it ando nogo nen miyuk-meya eerogo pugwi iigak kwe, it ando nen perak, ”Wone ti ambinom ari keyaawi o,” yinuk, yogo mbareegwa,

³³at Pawulut nogo it inenggela'me nen wundeegerak.

³⁴Wungge mbareegi, at Ndiyonitiyut o Areyopagut wone amburu mbangga mendek ambi inom, kwe endage Ndamarit inom, it ando inom, at Pawulut inom lambunggo nogogwaarik, wone abet mbareegwaarak.