Read Wano NAPPIYAREEGERAK 18 Bible Online

NAPPIYAREEGERAK 18 - Wano bible

NAPPIYAREEGERAK 18

¹Ti eeke nagagirik, at Pawulut nogo o Atena teppunuk, o Korindut nagagerak.

²O Korindut nage nagagirik, time logonet, aap Yakuri mendek ambi endage Akwila, o Pondut nda'nagagerak nogo, akweeluk endage Peritikila imbirak aap Kelawuriyut nen, ”It Yakuri mendek o Oroma yime logorak lek o,” yinuk, wone lengganogo yoragagerak paga, awo ngget iluk o Italiya teppunuk, o Korindut wogo nogogwaarik, time wonogo logonet,

³mbogoyum o wuriyak penggaakwi me, Pawulut iya nage nagagirik, at kunduk inom penggaakwi nogo eenu me, inom logonet, penggaako nogogwaarak.

⁴Eeko logonet, at Pawulut nogo kulinik-kalinik hari Sabtu it Yakuri tamban eekwi paga it tamban eeko menggam it Yakuri inom, it Yunani mendek inom, it iniki abet mbaruwak nduk, Ala wone piinogo yorage nagagerak.

⁵Eekwi me, Timotiyut inom, Tilat inom, o Makeroniya nen wogo nogogwaarik, inom logonet, at Pawulut nen, ”Lek o. Ala leenogo mippereegerak nogo, Yetut aret o,” yinuk, it Yakuri nogo, Ala wone mban nggwiirit-nggwaarit yorage nagagerak.

⁶Yorage me, it nogo inom ogoorak logonet, miyuk-meya eerogo pogo mbareegwa, ”Kit lek eerogo pinagarak ti, an nobalombok lek o. Kit kinobalombok eekkolamonggotak paga lek eerogo pinagagin o. An yogondak nen it aap endekem mendek yoranet nege logogin o,” yinuk, ineraaket nen mbogoyum liirubu lengganak nogo yumbunogo inoba nappereegerak.

⁷O time mbo punuk, aap Ala agabiti warak endage Titiyut Yutut ame it Yakuri tamban eeko menggam koorok me ka wagagerak.

⁸It Yakuri tamban eeko menggam unde menggerak Keritiput nogo inom, at inom menggaarak inom, iniki ninogoba Yetut oba panggombunuk abet mbareegwaarak. Ndi, it Korindut mendek ambik at Pawulut nen yoragagerak nogo konembunuk, abet mbako mbareegwa, yiime wuppiyareegerak.

⁹Ne ambi paga nogo iniki paga ninogoba Yetut nen at Pawulut abinggaanggo paga yoge logonet, ”An nimbirak wonage me, aakumi nen koorugun lek o. Yime an napuri ambik wonogwe me, kat kagabiti nen puk logogun o. Yorage logot o,” yinuk,

¹¹yoreegerak me, oonegen lagi nage, wambi wage, eeke kagak, tut 18 penengge kagak, Ala wone mamunirage nagagerak.

¹²Ala wone mamunirage wonage me, at Nggaliyo aakumi Akaya mendek inowe endagembogut ngguberenor mi'ndak wonage kagak, it Yakuri mendek abok inom mi'nogo nogogwaarik, Pawulut eebe wonok, wone amburu mbanggo menggam pi nogogwaarak.

¹³Pi nogo nogogwaarik, ”At aap yi, Ala alut eeko logorak wone lengganak nogo kagak, alik eeko logowak nduk, aakumi iniki nggaganabit nege kenok, wonok wogo o.” Yorogo mbareegwa,

¹⁴at Pawulut nogo yoraakit nduk eeke kagak, at Nggaliyo nen it Yakuri nogo yorage logonet, ”At abu maluk naalop-kaalop ee'netak nen, kit aap Yakuri yogwe naruk liirogon konenikit lak kwe,

¹⁵wone lengganak mbuulogwe-mbaalogwe eeko monggotak nogo paga wone wakwi me, an nen wone amburu mbanogo yokkiroorak neebi o. Kit kinalik mban koonubagip nduk,

¹⁶wundi nanip o,” yinuk, wone amburu mbanggo menggam time nen mugugo wumbiyareegerak.

¹⁷Wumbiige mbareegi, it nen it Yakuri tamban eeko menggam unde menggerak at Totenet nogo pigogo, wone amburu mbanggo menggam ta'nogo nen yawi wakwi iigak, at Nggaliyo nen, ”Inobalombok,” mba'nuk, puk agagerak.

¹⁸At Pawulut time logonet, nogo ambik yege nagagirik, ti'nuk, at oreewi Yetut apuri time lambembiinok, it Akwila akweeluk Peritikila imbirak inom o Tiriya wunda nawok nduk eeke logonet, at Pawulut nen ambi eeriyak Ala enggaanom yoreegerak nogo ndak-ndak aret eeke nagagirik, o Kenggereya taati eeruwak mbaneegerak.

¹⁹Eeruwak mbangge nagagirik, o Epetut wunda wogogwaarak. At Pawulut nen Peritikila Akwila imbirak time piinok, at alik it Yakuri tamban eeko menggam unggwi nage nagagirik, Ala wone piinogo yoragagerak.

²⁰Yorage mbareegi, ”Ninom yime ambinom logowok o,” yoreegwaarak kwe, ”Lek,” ari nagagirik,

²¹”At Ala nen, Woroorak, mbake kenok, peebi kiya woraagin o,” yinuk, keyage wappiinok, o Epetut time nen yiiro paga wagagerak.

²²O Kayitareya wage nagagirik nogome nen, at Pawulut o Yerutalem wambi nage nagagirik, it Yetut apuri time keyage wappiinok, o Andiyokiya lagi wagagerak.

²³Time wonagagirik, ti'nuk, peebi o time lambembunuk, yi awi ndi awi o Nggalatiya inom, o Perigiya inom, yanggwagak nege logonet, Yetut wone waganggwi nogo iniki nu'lek logowak nduk, yoranet nege nagagerak.

²⁴Aap Yakuri mendek ambi endage Apolot, awi alom me Alekanderiya nogo, at Ala wone irip-unggut abok eenu logonet, oone amburu lombok yorage menggerak me, o Epetut nagagerak.

²⁵Nage nagagirik, ninogoba Yetut wone yogwi iinok, liirogon waganeegerak me, Yetut eeke nagagerak wone abet aret mamunirage, iniki aganggen kerek togon yorage, eeke nagagerak kwe, we Yaya yiime wuppiige nagagerak wone nogo mban eenu me yorage nagagerak.

²⁶At agabiti lek logonet, it Yakuri tamban eeko menggam nogome wone yorage nagagerak. Yorage me, it Peritikila Akwila imbirak inaruk konembogo nogogwaarik, wonok, iname nogo nogogwaarik, Ala eeke menggerak wone nogo liirogon mbinuk-mbenak eerogo yoreegwaarak.

²⁷At nogo nen o Akaya wunda naakit nduk, eeke mbareegi, it Yetut apuri time nen it Yetut wone waganeegwaarak nogo at keyage warogo wawak nduk, liiru mbanogo nappiyareegwaarak. Nappiigo mbareegwa, wonok, ene paga wunda nage nagagirik, Ala inabuwa nen eeppiyareegerak paga abet mbareegwaarak nogo inom logonet, mondok iya lombok yeenggwaarage nagagerak.

²⁸It Yakuri inom nggwok me wone wako logonet, at Apolot nen Ala wone mbanak paga, ”Ala nen leenogo mippereegerak ti, Yetut aret o,” yinuk, onggo yoriyak lek mondok lok kunik yorage nagagerak.