Read Wano NAPPIYAREEGERAK 19 Bible Online

NAPPIYAREEGERAK 19 - Wano bible

NAPPIYAREEGERAK 19

¹At Apolot o Korindut wonage kagak, at Pawulut nogo o Nggalatiya-Perigiya nggelok-nggebok me nage nagagirik, o Epetut unggwi nagagerak. Unggwi nage nagagirik, Yetut wone waganggwi ando time iya nage nagagirik,

²”Kit Yetut wone abet mbako mbareegup, Aberiniki wokkiragagerak ilik, lek a?” Yorage mbareegi, it nen, ”Lek o. Aberiniki ti wonage ilik, lek a? Nit nineenggo'lek ogoorik o.”

³Yogo mbareegwa, ”Ti kenok, nano wone konembunuk, yiime wuppinagagerak o?” Yorage mbareegi, it nen, ”Lek o. At Yaya wone yo'nirogogwaarak koneneegurak nogo paga yiime wuppinaneegwaarak o,” yoreegwaarak.

⁴Yogo mbareegwa, at Pawulut nen, ”At Yaya nogo ti, inomaluk mbo pugwi iinok, yiime wuppiige nagagerak o. At nen aakumi ambik yorage logonet, At an nambokan woroorak ti, kiniki oba panggombunuk abet mbako logonip o, yorage nagagerak ti, Yetut aret o.”

⁵Yinuk, yoragagerak nogo konenggo mbareegwa, ninogoba Yetut endage paga yiime wuppiyareegwaarak.

⁶Yiime wuppiigo mbareegwa, at Pawulut eenggi inanobak tebembiige kagak, Aberiniki inoba wambi wage mbareegi, aakumi alik inoone lalin negen wappunuk yogwe, Ala wone yorogwe eereegwaarak.

⁷It aap Aberiniki inoba wambi wagagerak nogo ti, aap ineebe lambuk togon, 12 aret.

⁸Inoba wambi wage mbareegi, at Pawulut nen it Yakuri tamban eeko menggam unggwage nagaatik, agabiti lek logonet, aakumi Ala abu'me piyoorak wone iniki abet mbaruwak nduk piinogombo yoragak mban eeke kagak, tut kenagan peneneegerak.

⁹Yorage nagagerak kwe, it ando inogogumbuk a'nuk, abet mbaka'lek logonet, it aakumi ambik kuwak ogogwaarak nogo inenggaanom paga Yetut wone miyuk-meya eerogo pogo mbareegwa, it lambembiinok, at apuri eeginabeegerak nogo mban wogoren, aap Tiranut tekola awi wureegim time unggwi nage nagagirik, ko'lu-kii'me inom wone yorage, it nen kin wakkogwe, eeko nogogwaarak.

¹⁰Eekwi iigak, o lagangge-wangge eeke logonet, 2 tahun eereegerak me, it Yakuri mendek inom, it Yunani mendek inom, it aakumi o Atiya abok aret ninogoba Yetut wone konenggo nogogwaarak.

¹¹Ala nen eeppege kagak, Pawulut nen eerubok mendek mondok iya tit eeke nagagerak.

¹²Iya tit eeke nagagerak ti, at ayum nibinik liigak kookak inom, ambogoyum oba pereninuk nege menggerak inom, wonok nogo nagaatik, it aakumi kugi andi nogo, inoba labumbiigwi iigak, kugi nogo lek age, kugi inikime unggugetak nogo nggiginogo wumbiige, eeko nogogwaarak.

¹³Eekwi iigak, it aap Yakuri kugi eeka nogo nen aakumi kugi inikime unggugetak nogo inoba ineenggi pippiinok, Yetut owak mbanggo logonet, ”Pawulut yorage menggerak Yetut nogo endage paga wundi nak o,” yinuk, yoraawok nduk eereegwaarak.

¹⁴Yoraawok nduk eereegwaarak nogo ti, it aap Yakuri Ala unde inowe Tekewa apuri ineebe 7 nen togop eereegwaarak.

¹⁵Togop eereegwaarak mendek, kugi nogo nen, ”Yetut ti neenu, ndi, Pawulut neenu aret kwe, kit yi perak, taani o?”

¹⁶Yorage nagagirik, aap kugi ogole warak inikime wonagagerak nogo nen worak togon inoba luk ari nagagirik, tebenogo piinok, inooke mbareegi, it nogo oome nogome nen inagap mbelanak inamiya tene agan kole mbaganit nogogwaarak.

¹⁷Eereegerak nogo, it Epetut wonogwe Yakuri mendek inom, Yunani mendek inom, abok aret konembunuk inagabiti ogo nogogwaarik, ninogoba Yetut endage tiyappereegwaarak.

¹⁸Aakumi ambik abet mba'nuk wogo nagaatik, ”Nit togon togop aret eeko monggoorak,” yinuk, mbinuk-mbenak agago paganogo yori wogo nogogwaarak.

¹⁹It kugi unde ando kunduk kugi eeruwok nduk mbuku mbanak pekkagak eeko nogogwaarak nogo, aakumi abok inenggaanom kani kuneegwaarak. Ndi, inambuku kani kuneegwaarak onggo ineenggi lingginggo logonet, wu ambik, 50,000 ndak-ndak negen aret kogowaarak.

²⁰Ninogoba Yetut wone wappunuk togop aret eeko nogogwaarak me, wiganinuk nage logonet, mondok nggwok aret agagerak.

²¹It aap Epetut nogo togop eeko mbareegwa, at Pawulut nogo o Makeroniya o Akaya inom yanggwagak eerit o Yerutalem naakit nduk, iniki koongge logonet, ”O time nage logominggirik, o Oroma kunduk ka nagin aret o,” ari nagagirik,

²²yeenggwaarit nogo menggaarak ineebe mbere Timotiyut Eratut imbirak inaa'nduk o Makeroniya nappiige nagagirik, at o Atiya logonuk, naakit nduk puk agagerak.

²³Nogo ti eyom aret ninowe endagembogut Yetut wone waganggo nogogwaarak nogo wone waruwok nduk abo pilak yereegerak.

²⁴Aap mbuti perak ogobakkigike menggerak ambi endage Ndemeteriyut nen inowogolo Aretemit awi mbuti perak ogut ogobakkigike menggerak me, onggo nuukkoloorak nduk awuri ambik lengganinaketak ogobakkigikwi iinok, onggo nggwok wogorage nagagerak.

²⁵It at awuri nogo inom, it aa ando yabu ti mendek eeko menggaarak inom, kuwak eeppiinok, yorage logonet, ”Noreewi o. Nit eekwi yi paga onggo nggwok kologwe kineenu kwe,

²⁶at Pawulut nogo nen, Kuguwak aakumi nen ogobak-kigikwi ti, abe mendek lek o, yinuk, o Epetut yime nen mban lek o. Ata, o Atiya yi awi ndi awi time abok aret aakumi apit inikime manabit nege logonet, nomoninabit nage kinigen kogwe, kinaruk konenggwi, eeko ogotik o.

²⁷Togop me, nit onggo koloorak eekwi yi mban lek arigin lek kwe, nit o Atiya yime monggoorak abok inom, it yi awi ndi awi menggaarak apit inom, ninowologo kwe nggwok Aretemit nit abok aret alut eeko monggoorak nogo, at awi wurik meek mbako logonet, at ayuk lek, teeluk aret agaarak kogo o, yinuk, yogwe iyo, nagabiti mbaki o,” yinuk, yoragagerak.

²⁸Yoragagerak inaruk konembogo nogogwaarik, inanini wu agan nage mbareegi, ”Nit Epetut mendek ninowogolo Aretemit nogo endagembogut aret o,” yinuk, keekok yereegwaarak.

²⁹Keekok yogo mbareegwa, o tini lombok time nggigi-nggigi wundi wogo nogogwaarik, noonekoone yogo logonet, it aap o Makeroniya mendek Pawulut inom nugu menggaarak, Nggayut Aritarukut imbirak pigiren, inogut ogobakkigirik pekkogo menggam o wurik nogome puu'nuk piya unggwogogwaarak.

³⁰Piya unggwogogwaarak wonogwe me, at Pawulut nogo, aap ambik inenggela'na unggwi naakit nduk eeke mbareegi, it Yetut wone waganggwi nogo nen, ”Puk o,” yinuk, tebemborogo wonogwe me,

³¹it o Atiya mendek inoweewi at Pawulut inom kunik menggaarak nogo nen, O ogut ogobakkigirik pekkogo menggam time unggwage kero, yoruwak nduk, inawuri nappiya wogogwaarak.

³²Yogwe iigak, it kuwak ogogwaarak ando ambik nen, nonggop nduk kuwak eekaarak ineenggo'lek me, ambi yagak, ambi yagak eeko logonet, naalop-kaalop yogwe me,

³³it Yakuri nen aap endage Alekandet nogo waganogo oolo pi unggwogogwaarak me, it aakumi ando nen, ”At yo'niraawak o,” yogo mbareegwa, wone onggo liirogon yoraakit nduk eenggi paga, ”Puk logonip o,” yoragagerak mendek,

³⁴at aap Yakuri mendek yelok kogo nogogwaarik, ”Nit Epetut mendek ninowogolo Aretemit endagembogut aret o,” yinuk, keekok kunik aret yogwe iigak, 2 jam agagerak.

³⁵2 jam age mbareegi, it aap o Epetut mendek wone koonggaatak liiru mbangga nogo nen, ”Kinoone mage o,” yorage mbareegi, puk iigak, yorage logonet, ”Kit aap Epetut mendek yi, ambi yokkira o,” yorage nagagirik, ”At ninowogolo aganggenggwi Aretemit awi wurik unde nit aret me, ogogwi yugum ogobakkigirik mbogut paga nen wambi wagagerak porogo monggoorak nogo, nit Epetut mendek aret me, yi aakumi ndi aakumi ineenggo'lek me, yogo ogotik?

³⁶Lek o. Wone yi pilit lek, abet aret me, kit kiniki lek negen mbet-mbet yi eekak ndi eekak eerugup o. Yanggorogon puk logonip o.

³⁷It aap yi, ninowogolo awi wurik me maluk eekwi, miyuk-meya eerogo pugwi, eerulik iigak, wogoren wogotak me,

³⁸it wone amburu mbangga inom, it ninoweewi o Oroma mendek inom, wonogwe aret me, at Ndemeteriyut at awuri inom wone looniyak mbakwi iinok, it inowagam time aret looni nawak o.

³⁹Wone ti it nen koonumenggaarak kwe, meek kenok, peebi nit abok kuwak eeppunuk amburu mbanuwok o.

⁴⁰Wone yogondak abo wa'nagaarak yogwe yi, nonggop nduk noonekoone yogo logonet, maluk eekotak o? Yo'nirogwe iinok, alom lek kagak, wologwe yi wogoren wogoorak me, nit onggo ngge yoroobok ariyak me,

⁴¹mbaganipip o,” yoragagerak.