Read Wano NAPPIYAREEGERAK 2 Bible Online

NAPPIYAREEGERAK 2 - Wano bible

NAPPIYAREEGERAK 2

¹It Yakuri Pendakota eeriyak eyom age mbareegi, it abet mbareegwaarak mendek Ala apuri nogo abok ambit me kuwak eeppunuk,

²oome ambit me nogome wonogwe me, wiya oonebu agan nage minggi kwak, abera'lek me mbogut paga nen oome nogome yagabit ari unggwagagerak.

³Unggwage nagagirik, kani moonuk yenan-menan agan it abok inoba nabek ari kogogwaarak.

⁴Nabek ari nagagirik, it abok aret Aberiniki inikime unggwage nagagirik, yorage kagak it aakumi nogo abok alitak lombok inoone lalin negen wappunuk yogo nogogwaarak.

⁵Nogo, it Yakuri mendek Ala inagabiti mbako menggaarak kero yi awi ndi awi nen Yerutalem wogogwaarak wonogwe me,

⁶oonebu ari nogo inaruk konembogo nogogwaarik, aakumi ambik kuwak eeppunuk, inoone alitak lombok yogwe nogo inaruk konenggo logonet, ”Iya! Nonggop togon yogo agaarik kwe?” yinuk, kobak wonogogwaarak.

⁷It abok aret inagabiti nen. ”Wi!” yinuk, pi wako logonet, ”It Nggalileya mendek nen mban wone yogwe yi lek a? It Nggalileya mendek aret kwe,

⁸nit ninoone paga lombok yogwe konenggwi yi, nonggop togon wappunuk yogo agaarik mbakop?

⁹Nit Paratiya mendek inom, Meriya mendek inom, Elam mendek inom, Metopotamiya monggoorak inom, Yureya Kaparokiya nen, Pondut Atiya nen,

¹⁰Perigiya Pambiliya nen, Metit nen, o Libiya tini Kirene enaagan-ambokan time nen, it Oroma mendek niya wagaarak inom,

¹¹nit Yakuri mendek inom, endekem mendek Yakuri eeko menggaarak waganeegurak inom, Kereta mendek togon, Arap mendek togon, nit abok aret Ala eerubok mendek nggwok lombok eekerak nogo ninoone lombok paga mbininogo yo'nirogwe abok konenggo ogoorik o,” yinuk,

¹²inagabiti nen, ”Yi nonggop eeriyak me yogo agaarik o?” Yinuk, at ambi yogak eeko mbareegwa,

¹³it ando nen, ”Lek o. It eyoonggen amburu nonggo nagaarik, kumili-kumili negen agan nugwi, aa!” yinuk, inagi'ndok kambeegwaarak.

¹⁴Nogo, inagi'ndok kanggo mbareegwa, at Peterut awuri 11 inom mi'na'nuk, oone nggwok togon yorage logonet, ”Kit noreewi Yakuri mendek inom, kit o Yerutalem monggotak inom, wone ambi yokkiraagin me, kinaruk konenggo logonet, liippogo logonip o.”

¹⁵Yorage nagagirik, ”Mo awo pi wage kagak, jam 9 paga aret me, it yi, eyoonggen amburu nenok kumili-kumili negen agan nugwi mbakotak ti lek o.

¹⁶At Ala wone ari nagagerak nabi Yowen nen yereegerak nogo aret arit wage yi o. At Yowen nen,

¹⁷Ala nen ari logonet, Peebi o age yobok paga yi aakumi ndi aakumi abok aret Aberiniki inoba wuppi woraagin o. Kinapurilogwe komologwe inom, wologwe inom nogo nen Ala wone yoranet nogwe, it kinapurilogwe tawe nogo nen inabinggaanggo negen kogwe, kinogobamini inanggok nogo nen inabi kogwe, eeko logogun o.

¹⁸Peebi ti eyom paga, it an nayeloman kumi inom, aap inom nogo kunduk abok aret Aberiniki it inoba wuppi woraminggirak paga, Ala wone yorogo logogun o.

¹⁹An peebi agi mbogut paga nen tam warak negen eeke, ogu nggween paga nen eerubok mendek eeke, eeke logonet, inamiya inom, kani inom, kaluk aagi inom, eerigin o.

²⁰An kinogoba nendagembogut pi wa'nakwi iigak, namendek li'luk ee'nuk woroorak eyom panggo yi wage kagak, oonegen apit age, tut inamiya negen age, eerigin o.

²¹Eeke mbariminggi, it aap nen, Nogoba wae, yo'nirumenggaarak kenok, ti paga nen inagap ndarigin o, yinuk, at Yowen nen yereegerak nogo arit wage yi aret o.

²²Kit aap Yakuri mendek yi, an yokkirage yi liirogon konenggo logonip o. Ala nen at Yetut Nataret mendek leenogo nappi wagagerak nogo kit liippatubagip nduk, at kinom logonet eerubok mendek eeke, inagabiti warak mendek eeke, tam warak eeke, Ala nen omaawi eeppege kagak aret eeke nagagerak kineenu nogo o.

²³At Ala nen peebi eeriyak abok eenu logonet, Yetut nogo pigogo wokkiroorak nduk koonogo pereegerak me, kit nen it endekem konenggulik mendek waruwak nduk wogorogo mbakop, eyo paga nabenogo pegaarak ti kit nen aret wakotak.

²⁴Wakotak yagan warogo kanggerak kwe, at kanggo menggam time mondok tebenak logorak meek me, Ala nen eenik agago wumbi wagaarak.

²⁵Ndi, at Ndawut nen ari logonet, An nogoba kulinik-kalinik nenggaawak paga menggerak o. Nogoba nimbirak wonage me, niniki piirik eerigin lek o.

²⁶Ti kenok, niniki ale'nggen logonet, keyage ambik wake agarik o. An kambuurak aret kwe, an nogoma kambunuk nogo menggam time neegak, kat teppanumunggun lek me, niniki koba panggombunuk, nabolok lek puk aret agarik o. An kaput obeelom mban eeke minggirak nogo, an neebe kambiminggirak pili age neegak, teppanumunggun lek o.

²⁷

²⁸Neenik logorak tu yo'nereegindak me, kat nimbirak wonage logonet, kale'nggen ambik ee'nake logomunggun o, yinuk, at Ndawut nen yereegerak wone nogo ti eebe Yetut nen eeriyak nduk aret yereegerak o.

²⁹Nowe-nawot o. Nit ninombo Ndawut eeke nagagerak wone an paganogo yokkira o. At nogo kambeegerak ndoome mambereegwam nogome owak nenenak mban wonage kogo ogoorik o.

³⁰At Ndawut nogo nen Ala wone yorage nagagerak me, Ala nen kumbuk mbangge logonet, Ndawut wae. Kat inowe endagembogut wonage ti kwak, kat kombowologwe ambi kobaane'me mippigin o, yinuk, yoreegerak wone nogo eenu wonagagerak me,

³¹at Ndawut nen, Nogoma kambunuk nogo menggam time neegak, teppanumunggun lek o. An neebe kambiminggirak pili age neegak, teppanumunggun lek o, yinuk, yereegerak nogo ti, at Ala leenogo pereegerak nogo kambunuk mi'narigin eenu logonet, yereegerak o.

³²Ti, Yetut kanggerak Ala nen eenik agago mippegerak wone nogo, nit abok ninigen kogoorak nogo paganogo yokkirogo ogoorik.

³³Ala imbirak logorak nduk tiyappereegerak me, ogoba nen, Aberiniki wokkiraagin, yereegerak nogo kolage nagaarik, wu'nira wagaarak nit eekwi niigwi, konenggwi, eeko ogotik.

³⁴At Ndawut nogo mbogut paga lagi noolik kwe, at nen ari logonet, At ninogoba endagembogut nen an nogoba yoge logonet, It kinom wim mbanak menggendak aan lebenogo kabu'me piiga'lek neegak, neenggi abe'nggam logonok nduk neya mok o, yinuk, yereegerak.

³⁵

³⁶Ndawut nen togop yereegerak paga kit Iterali mendek abok at Yetut eyo karo-karo paga nabenogo wakotak nogo, Ala nen aret leenogo pereegerak me, kinogoba endagembogut aruwak nduk mippegerak liirogon liippubagip nduk yokkirage agarik,” yinuk, yoragagerak.

³⁷Yorage nogo konembunuk, iniki wakkologo nogogwaarik, Peterut inom, it leenogo nappiyareegerak ando inom, kin wagiigo logonet, ”Ai, noreewi o. Nit nonggop eeruwi o?”

³⁸Yorogo mbareegwa, at Peterut nogo nen, ”Kinomaluk lek eerogo pinagawak nduk, kit kinalitak lombok maluk eeko monggotak nogo kiniki koombunuk mbo pinip o. Mbo pugwi kiinok, Yetut Keritut endage paga yiime wuppinagarak o. Ti eekwi kiinok, Ala nen Aberiniki nogo onggo lek we aret wokkiraagin o.

³⁹Ala nen, Wokkiraagin o, yinuk, abok yokkiragagerak nogo ti, kit inom, kit kinapurilogwe inom, it aap nda menggaarak inom, peebi ninogoba Ala nen wiigiraagin nogo abok kinake aret yokkiragagerak o,” yinuk, yoragagerak.

⁴⁰Yorage nagagirik, ti'nuk, wone ando ambik yorage logonet, ”It aap o yogondak maluk eekwi ti, kinom maluk eekkinabukwak kinagap ndakkolabagip nduk, kinom mondok ogoorak logonip o,” yinuk, inaruk wareegerak.

⁴¹Inaruk wake mbareegi, it aakumi nen at oone waganggo mbareegwa, yiime wuppiyareegerak. Ne ti paga iya unggwogo mbareegwa, yiime wuppiyareegerak nogo ti, ineebe lambuk togon aap ambik ineenggi 3000 aret Ala apuri ogogwaarak.

⁴²Ala apuri ogogwaarak nogo nen iniki ambit eeppunuk lambunik logonet, it leenogo nappiyareegerak nen wone mamunirogwe iinok, liirogon konenggwi, inom mbi larogo nunggwi, tamban eekwi, togop mban eeko nogogwaarak.

⁴³It Yetut nappiyareegerak nogo nen eerubok mendek eekwi, inagabiti warak mendek eekwi, eekwi iinok, it nogo abok nen, ”Iya! Ninagabiti o,” yinuk, pi waganako nogogwaarak.

⁴⁴It at oone abet mbareegwaarak mendek nogo abok iniki ambit lambunik logonet, yi mendek ndi mendek nogo, ”Nit abok ninamendek aret o,” yinuk,

⁴⁵it inamindik-inamendek nogo, onggo nggerembunuk, it ambi inamendek lek kenok, tumburirogo nogogwaarak.

⁴⁶It nogo iniki ambit a'nuk, ko'lu-kii'me Ala awi wurik me kuwak ari unggwogwe, iniki mot-mot logonet, ale'nggen paga iname logonet mbi karerogo punuk nunggwi, eeko nagaatik,

⁴⁷it nogo Ala alut eekwi iigak, it Ala apuri nogo aakumi abok nen iniki kunik aganako nogogwaarak. Ndi, ninogoba endagembogut nogo nen ko'lu-kii'me it aakumi inagap ndarogo ambi nabek kuwak eeppiige nagagerak.