Read Wano NAPPIYAREEGERAK 20 Bible Online

NAPPIYAREEGERAK 20 - Wano bible

NAPPIYAREEGERAK 20

¹Wone naalop-kaalop yogo nogogwaarak nogo lek age mbareegi, at Pawulut nen at Yetut wone waganggwi nogo woraawak nduk, inayonggo piyareegerak wogo mbareegwa, iniki eyak wappiige nagagirik, ”An o Makeroniya na o,” yoraanok, nagagerak.

²Nage nagagirik, o yi awi ndi awi time yanggwagak nage logonet, iniki eyak wappiinet nage nagagirik, o Yunani aret nagagerak.

³Time wonage kagak, tut kenagan penengge mbareegi, ti'nuk, peebi nen, o Tiriya wunda woraakit nduk eeke mbareegi, it Yakuri nen wariyak koonggo mbareegwa, Niyok paga tu o Makeroniya paga naakit, mbareegerak.

⁴At inom wogogwaarak nogo, at Pirut aput Topatet awi Mbereya mendek inom, ndi, o Tetalonika nen Aritarukut Tekundut imbirak inom, at Nggayut Nderebe mendek inom, Timotiyut inom, it Atiya mendek Tikikut Teropimut imbirak inom, at inom aret wogogwaarak.

⁵It ti inaa'nduk o Torowat to'niigwi a wogogwaarak.

⁶Ndi, nit nogo roti mbi piika'lek larak nenok, o Pilipi nen yiiro paga unggunuk wogo logonet, nogo 5 aret yegak, o Torowat unggwi wogogurak. O Torowat unggwi wogo nogogurik, time nogo 7 yereegurak.

⁷Ko'lu hari minggu tamban eekwi paga mbi kareruwok nduk kuwak eereegurak me, at Pawulut ko'lu naakit nduk eeke logonet, oonikiya nen wone yorage kagak, nogo iniki agagerak.

⁸Ndi, nit kuwak eereegum o nogo amik mban-mban kenagan wurik me nogome, ndi ambik wunumbunuk abinak paga Pawulut yorage kagak,

⁹wulaga Eyutikut jendela i amik mbanak paga kwi'ndak wonage me, nogo wulamo'ndi ari logonet, uu'ngguluk wambeegerak.

¹⁰Uu'ngguluk wangge mbareegi, kanggerak nduk waganeegwaarak mendek, at Pawulut nogo wambi nage nagagirik, amborowak tebe yinuk, piyanogo ogome wagangge nagagirik, ”Kiniki piirik yugup o. Eebe eenik wonage o,” yoragagerak.

¹¹Yoraanuk, lagi nage nagagirik, roti mbi karerogo nenok, at inom wone mbanggwi iigak, o wikit nduk kilim nagake kagak, o ambime naakit nduk,

¹²nage kagak, at wulaga nogo eenik aret wonok nogo nogogwaarik, iniki ale'nggen ambik ogogwaarak.

¹³Ndi, at Pawulut nen, ”Nggween paga tu o Atot naakit,” mba'nuk, ”Kit kinaa'nduk o Atot time o nanip o. An peebi kiya woraagin o,” yo'nirage mbareegi, nit yiiro paga Atot ninaa'nduk wogogurak.

¹⁴At o Atot time ninom lambunggo nogogurik, yiiro paga ninom o Metilene wogogurak.

¹⁵Time nen wogo nogogurik, ko'lu yi yenggenak kup mbanak o Kiyot ndak-ndak ari wogo nogogurik, ndi, ko'lukwak o Tamot ari wogogurak. Obaganggwe nen o Miletut ari wogogurak.

¹⁶Ndi, at Pawulut nen, ”Laago Pendakota o Yerutalem neegak, lariyak,” mbareegerak me, ”O Atiya mban elambirik neegak panggo ari kero, o Epetut unggwaga'lek nok-nok naakit,” kooneegerak.

¹⁷O Miletut unggwi wogo nogogurik, time nen at Pawulut nogo it Ala apuri inarum menggaarak woraawak nduk, o Epetut inayonggo nappereegerak

¹⁸at owagam wogo mbareegwa, yorage logonet, ”An aa'nduk lombok o Atiya yime kiya wage nagagirik, ninom logonet wonagagirak, kineenu nogo o.

¹⁹Nogoba ayeloman a'nuk, niniki tebe yinuk, kinale ari logonet, yeenggwagirage nagagirak kwe, it Yakuri nen an nooruwok nduk koombunuk logonet, aaninggin agago noba pogo nogogwaarak kineenu nogo o.

²⁰An wone obeelom eekkinaburak wone nogo, ando kiraarogo teppake, ando yokkirage, eeke logolik o. Nggwok paga inom, kiname lombok inom, mamunggiranet nege nagagirak kineenu nogo.

²¹Mamunggirage nagagirak nogo ti, kit Yakuri mendek inom, kit Yunani mendek inom, Ala apuri arubagip nduk, kit maluk eeko monggotak kiniki koombunuk mbo pugwi, kiniki ninogoba Yetut Keritut oba panggombunuk abet mbakwi, eerubagip nduk, liirogon yokkirage nagagirak kwe,

²²yogondak perak, Aberiniki nen nimin-namoorak ari kenok, o Yerutalem nen ee'naburak neenggo'lek kagak kwe, aret nagin o.

²³Ne ambi paga o ambi me yoragak, ne ambi paga o ambi me yoragak, eerit nege me, Aberiniki nen, Keele maakkakwi, aanigin-paanigin koba pagagwi, eerugun o yinuk, paganogo yo'nege menggerak.

²⁴An neebe neenik logorak iya lek o. Ata, Ala ninabuwa nen we wo'nirage menggerak wone yorage logowak nduk, Yetut nen yabu unde paneegerak nogo mbo pega'lek worok togon eeriyak ti perak, iya o.

²⁵Ndi, yogondak perak, an nogo Ala abu'me pinagarak wone yokkiranet nege yogop yi, peebi ambi yokkiranet wage kinigen neyaamunggup lek ti, an neenu o.

²⁶An Ala iniki koonogo pereegerak wone nogo ando teppulik, abok aret yokkirage nagagirak me, kit ambi lek eerogo pinagarak kenok, an nobalombok lek o. Kit kinobalombok eekkolaamonggotak paga aret lek eerogo pinagagin o, yinuk, o yogondak yi paga abet aret yokkirage agarik o.

²⁸At ninogoba Yetut amiya paga at apuri inonggo mbaninabeegerak nogo ti at aanggumi ndomba kwak aret me, inarum logobagip nduk, Aberiniki nen mippinagagerak me, kit kiniki tum wakkologo logonet, it inom inarum liirogon logonip o.

²⁹An lambembinaganuk nage neegak, nggeewo endekem mendek anini warak kinenggela'me unggwi wogo logomenggaarik, teppinagagun lek nibingginaburak ti an neenu aret o.

³⁰Kit mendek kinenggela'me nen aret mi'na'nuk, kit Yetut wone waganggwi kiniki nomongginabuwok nduk, obeelom wone nogo abut laganogo yokkirogo logogun o.

³¹Togop me, o lagangge-wangge eeke kagak, 3 tahun paga, liingge nen, oonikya nen, puk aga'lek kinale ari logonet, kinalitak lombok kinaruk wake nagagirak nogo, beko logonet kinaket paga logonip o.

³²Ndi, yogondak perak, at Ala kinabuwa nen obeelom eeppinagarak wone ti paga, kiniki kole agago at apuri ake leenak kenok, inake punogo piyareegerak nogo kinom unde arubagip nduk, Ala abu'me pinagagi o.

³³Kit kinawu inom, kinambogoyum inom, an uugwe mbake logolik o.

³⁴An nake inom, it ninom nege nagagirak inake inom, ti an neenggi omaawi paga nen mban agago kologo nogogurak kineenu nogo o.

³⁵At ninogoba Yetut nen ari logonet, Kologwe ti meek o. Ndi, wogorogwe ti perak, ale'nggen ambik o, yereegerak nogo, abeko logonet, an eeke nagagirak nogo ti, kit nen it aakumi lebenak mendek togop eeginako logobagip nduk, kineenu eeppinagareegirak o,” yoragagerak.

³⁶Wone togop yorage nagagirik, endobanggun yindumbunuk, it abok inom aret tamban eereegwaarak.

³⁷Tamban eeppogo nogogwaarik, at Pawulut eebe panggeppunuk, ale yogwe, keyage wakwi, eereegwaarak.

³⁸At Pawulut nen, ”An peebi neyaamunggup lek o,” yoragagerak ti paga iniki abu maluk ogo nogogwaarik, ale yogwe, keyage wakwi, eeppogo nogogwaarik, wonok yiiro yi aa'nggi paga wonage me ta'nogo pi nogogwaarak.