Read Wano NAPPIYAREEGERAK 21 Bible Online

NAPPIYAREEGERAK 21 - Wano bible

NAPPIYAREEGERAK 21

¹It time lambembiinok, yiiro paga unggwogo nogogurik, time nen, nok, o Kot aret wunda wogo nogogurik, ko'lu nen o Ororot inom, Patara inom, yanggwagak wogogurak.

²O Patara nogome wonogwe me, yiiro alik Penikiya wunda nawok nduk eeko mbareegwa, ninom aret unggwogo nogogurik, wogogurak.

³Wogo nogogurik, O Tipurut nineebe kwaare'nggan nina wunggagak nogo logonet, ”O Tiriya nawok o,” yinuk, yi mendek ndi mendek yiiro me yonggolak nogo o Tirut kilirogo wumbegak nawok nduk, time unggwi nogogurak.

⁴Time unggwi nogo nogogurik, Yetut wone waganggwi pegiinet wogo logonet, nogo 7 yereegurak. Aberiniki nen yorage kagak, it time mendek nen Pawulut nogo yogo logonet, ”Kat Yerutalem nagun o,” yoreegwaarak.

⁵Time logonuk nawok nduk eekwi me, it time menggaarak nogo inakuwilogwe inom, inapurilogwe inom, it abok o tini lombok mbo punuk, wo'niren yi aa'nggi paga ari nogo nogogurik, ninendobanggun yindumbunuk tamban eereegurak.

⁶Tamban eeppunuk, ninom keyage wappiigo nogogurik, it iname nogwe iigak, nit nen yiiro paga unggwi nogogurak.

⁷O Tirut time nen nogo nogogurik, o Potolemayit unggwogo nogogurik, time Yetut apuri keyage wappiinok, ninom nogo ambi yereegurak.

⁸Nogo yippunuk, ko'lu nen o Kayitareya unggwi nogogurak. Unggwi nogo nogogurik, it aap 7 leeninabeegwaarak ambi obeelom wone yoranet nege menggerak Piliput nogo ame unggwi nogo nogogurik, ninom wonogogurak.

⁹At apurilogwe komologwe tawe ineebe 4 aap waganaka'lek logonet, Ala wone yorogo nogogwaarak.

¹⁰Ninom logonet, nogo mbere negen yugwi me, aap Ala wone yorage menggerak ambi endage Agabut o Yureya nen niya wagagerak.

¹¹Niya wage nagagirik, at Pawulut agabee'le piinogo at eenggi-iyok keele maakkolage nagagirik, ari logonet, ”At Aberiniki nen an kebee'le paga maakkolagarak yi kwak, it Yakuri o Yerutalem menggaarak nen aap agebee'le yi unde nogo togop aret keele maarogo, it endekem mendek wogoraagun o, yinuk, yo'nege kenok, yokkirage agarik o,” yo'niragagerak.

¹²Yo'niragagerak nogo ninaruk konembunuk, it time menggaarak inom, nit inom, ”O Yerutalem time nagun o, ninore,” yinuk, abuwa nen yogo mbareegwa,

¹³at Pawulut nen, ”Kit an nale yogwe paga niniki aaninggin aruwak nduk yogo ogotik? Lek o. An Yerutalem naminggirak me, nogoba Yetut ake keele maa'nakwi, nookwi, ee'naburak nduk mondok punik aret me, kit nonggop nduk yogo ogotik o?” yo'niragagerak.

¹⁴Yo'nirage mbareegi, yogak mban eereegwaarak kwe, konengga'lek mbareegi, ”Ala iniki nen mban koonuwak o,” yinuk, puk ogogurak.

¹⁵Time wonogogurik, ninayum ndegenggo'nok, Yerutalem wambi nogogurak.

¹⁶At Manaton o Tipurut mendek aa'nduk Yetut wone waganeegerak nogo Yerutalem wonage me, ame luulu ninom logowok nduk, it Kayitariya mendek Yetut wone waganeegwaarak nogo nen wo'niren nogogwaarak.

¹⁷O Yerutalem unggwi nogo mbareegu, it Yetut apuri nogo nen iniki ale'nggen agago wo'ninabeegwaarak.

¹⁸Wo'ninabeegwaarak nogo yippunuk, ko'lu at Pawulut ninom Yakobut pekka nogogurak me, it Ala apuri inarum menggaarak inom wonogwe me, iya nogo nogogurik,

¹⁹at Pawulut nogo nen keyage wappiinok, Ala nen eeppege kagak, it endekem mendek eeginabit nagagerak nogo mbininogo yoragagerak.

²⁰Mbininogo yoragagerak nogo inaruk konembogo nogogwaarik, Ala wogoppereegwaarak. Wogoppogo nogogwaarik, Pawulut yogo logonet, ”Pawulut wae, ninore. It Yakuri mendek yi aap ndi aap abok aret Yetut wone abet mbareegwaarak kwe, it abok aret Ala wone lengganak nogo iniki ti mban luunik logonet, eerit nogwe yi, iige agandik?

²¹Kat yorage menggendak nogo, it muk konenggaarak o. Kat nen it Yakuri mendek kwe-aap endekem mendek inenggela'me menggaarak nogo mamunirage logonet, At Muta nen yereegerak wone nogo mbo pinip o, ari logonet, Kit kinapuri inagabolo mbanggwi, kit aap Yakuri eeko menggaarak eekwi, eerugup o, yinuk, yorage menggendak nogo inaruk konenggaarak me,

²²kat wagandak inaruk konenugun me, nit nonggop eeruwok o?

²³yinuk, koonggo logonet, nit yokkugwi wone ti aret eerumunggun. Aap ineebe 4 nen ambi eeriyak koonogo Ala yogaarak ninom wonogwe me,

²⁴yogondak kat kinom nage logomenggendik, kinoba mbeenogo patinuk, it ineeruwak mbanuwak nduk, onggo kat nen pi nanu o. Onggo pi nage ti paga Ala wone lengganak wone kat kunduk eeke keenok, Pawulut eeke menggerak konenggoorak nogo, alom lek kogo, mbaruwak nduk, pi nanu o.

²⁵Ndi, it endekem mendek nen Yetut wone abet mbareegwaarak nogo ti, Kugi aanggo warak noorak mage o. Amiya noorak mage o. Yi mendek ndi mendek amiya wungga'lek kagak warak nogo noorak mage o. Mbabi eeriyak mage o, yinuk, niniki koombunuk, liiru mbanogo nappiyareegurak o,” yinuk, yogo mbareegwa,

²⁶at Pawulut nen aap ineebe 4 nogo wogoren, nage nagagirik, nogo yippunuk, ko'lu at inom inoba mbeenogo patinuk, Ala awi wurik me unggwi nogo nogogwaarik, it inoba mbeenogo patinuk wonogogwaarik, ne ti paga inalitak Ala ake warogo puurak yoragagerak.

²⁷Nogo 7 yuurak age kagak, it Yakuri Atiya mendek at Pawulut eebe Ala awi wurik me unggwage inigen kogo nogogwaarik, it aakumi nggwok kuwak aago abok inikime manako logonet, eebe kok pippunuk,

²⁸”Iterali mendek wae! Aap yi, yi awi ndi awi mamuniranet nege logonet, nit ninabok mbangge, Ala lengganak wone nogo tagangge, o wurik yi lek eeriyak ari, eeke menggerak yi, pi'niraanip o. At nogo nen aap Yunani mendek wogoren, Ala awi wurik me unggwi wage nagaarik mage minggim maluk eerogo pegerak o,” yinuk, inoone ya-mban yorogogwaarak.

²⁹(At Toropimut o Epetut mendek nogo Pawulut imbirak o Yerutalem nugwi iigo nogogwaarik, Pawulut nen wonok, Ala awi wurik me unggugerak mba'nuk, yereegwaarak.)

³⁰Yorogo mbareegwa, o nogome aakumi abok oonebu kuwak ari wogo nogogwaarik, at Pawulut ineenggi pippunuk, Ala awi wurik me nen niigogo wumbunuk, tu nareegwaarak.

³¹Tu nappunuk, waruwok nduk eekwi iigak, ”O Yerutalem abok naalop-kaalop eekwi o,” yinuk, at yigin unde apit aago inowe nogo yonggo yori nogo mbareegwa,

³²at nogo nen awuri yigin unde inom, it inoweewi inarum menggaarak nogo inom wogoren, puu'nuk inowagam nagagerak. It aakumi nen it yigin unde menggaarak inowe inom wogwe inigen iigo nogogwaarik, it Pawulut wakwi nogo puk ogogwaarak.

³³Puk ogo mbareegwa, inowe nogo wage nagagirik, eenggi pigogo, ”Mbuti keele mbere paga maa'nip o,” yinuk, yorage nagagirik, ”Aap yi ta o? Ndi, at ngge eekerak kenok wako ogotik o? Yinip o,” yinuk, ineegwa'me waganeegerak.

³⁴Ineegwa'me wagangge mbareegi, it aakumi ambik kuwak aago nogo ambi yagak, ambi yagak, yogo nogogwaarik, inoone naalop-kaalop yogwe iigak, alom kwaariyak meek age mbareegi, ”Wonok oome nanip o,” yoragagerak.

³⁵Yoragagerak, wonok nda'nggi paga ari nogwe me, it aakumi ambik kuwak aago nogo waruwok nduk ninggi'nuk nggobok irit nogo mbareegwa, it yigin unde menggaarak nogo nen Pawulut eebe piyanogo oome mambi nawok nduk, wonok nogwe iigak,

³⁶it aakumi ambi kuwak aago nogo mugurok ya-mba agan wogo logonet, ”Mondok enggaawak lek eerogo puwok o,” agan wogogwaarak.

³⁷Oome mambuwok nduk eekwi iigak, at Pawulut nen inowe nogo yogo logonet, ”Nowe o. Wone an ambi yokkiri o.” Yoge mbareegi, ”Kat Yunani inoone keenu keegi o.

³⁸Ti kenok, at aap Metit mendek ambi nen, Nowe ninarum logorak neebi o, yinuk, aakumi iniki nggagangge nagaarik, aakumi ambik 4000 wogoren, karume aakumi lek me piya nagaarak nogo ti, kat lek keegi o,” yoreegerak.

³⁹Yoge mbareegi, at Pawulut nogo nen, ”Ti an lek o. An Yakuri mendek aret me, o Kilikiya o tini nggwok me Tarutut aret nda'nagagirak o. It aakumi an wone ambi yoroorak op ilik?” Yoge mbareegi, ”E o. Yoret o,”

⁴⁰yoge mbareegi, at Pawulut nda'nggi paga wogorogo lagangge nagagirik, eenggi paga, ”Puk logonip o,” yorage nagagirik, inoone nggobok yogo mbareegwa, Yakuri inoone paga yorage logonet,