Read Wano NAPPIYAREEGERAK 22 Bible Online

NAPPIYAREEGERAK 22 - Wano bible

NAPPIYAREEGERAK 22

¹”Noreewi, nogobamini o. Kit wone noba lenggenggotak nogo alom mbininogo yokkira o,” yinuk,

²Iberani inoone paga yorage inaruk konembogo nogogwaarik, inoone abu nggobok yogo mbareegwa, at Pawulut nen yorage logonet,

³”An yi, aap Yakuri aret, o Kilikiya Tarutut nda'nagagirak kwe, aap Nggamaliyen nen naruk wake, ninombomini eeko nogogwaarak wone luunik nogo yo'nege, eeke kagak, o yime logonet aret, tawe agagirak o. Kit yogondak kiniki aganggen togon Ala ake eeko monggotak kwak, an togop aret eeke nagagirak.

⁴It Yetut wone mugurok nogwe nogo, inoorikit nduk neebi-neeba eeginake logonet, kumi nen, aap nen, keele maappiinok, mambiigo menggam mambiige, eeke nagagirak.

⁵An eeke nagagirak ti, aap Ala unde ninowe endagembogut inom, ninogobamini wone amburu mbanggo menggaarak inom, inigen neego nogogwaarak me, it nen yokkiraawak o. Ndi, it nogo nen ninowe-ninawot inigen kawak nduk, liiru mbanogo wo'nogo mbareegwa, wonok it o Ndamitik time wonogwe nogo keele maarogo o Yerutalem yime inooriyak wogora woraakit nduk, muguren nagagirak.”

⁶”Muguren nage logonet, o Ndamitik panggo yi nage mbareegi, o liingge aberak lek me, mbogut paga nen abinak kwindagalan agago noba wuppi wage mbareegi,

⁷an nggween paga nete wanduk ngginnagagirak. Nggween paga nete wanduk ngginnagagirak wonage me, Tawulut wae. Tawulut wae. Kat nonggop nduk keebi-keeba agago noorit nage menggendak o? ari naruk konembege nagagirik,

⁸Ai, nogoba. Kat ta? yoge mbareegi, Lek o. Kat keebi-keeba agago nooke menggendak nogo, an Yetut Nataret mendek aret o, yo'nereegerak.

⁹An ninom nogogurak nogo abinak mban kogogwaarak kwe, at oone yo'nege perak, konenulik o.

¹⁰Yo'nege mbareegi, Nogoba o. An nonggop eeri? yoreegirak. Yoge mbareegi, Lek o. Mi'na'nuk, o Ndamitik time nak o. Time unggwi nage keenok, at Ala nen kat yi eekak ndi eekak eeke logorak wone koonogo pereegerak nogo yokkirigin o, yo'nereegerak.

¹¹Yo'nege mbareegi, abinak pindanggagagerak mo kik-kik negen eereegerak paga nenegen apit agagerak me, an ninom wagagirak nogo nen pi'neren Ndamitik pani nogogwaarak.

¹²O Ndamitik time aap endage Ananiyat, Ala agabiti warak logonet, Ala wone lengganak liirogon eeke nagagerak me, it aap Yakuri time menggaarak abok aret at wogoppogo nogogwaarak nogo,

¹³an neya wage nagagirik, an nowagam logonet, Tawulut wae, nore. Kenegen pagak yu o, yo'nege mbareegi, pagak ari nagagirik, eebe aret kagagirak.

¹⁴Kage mbareegi, at nen yo'nege logonet, Ninombomini inogoba Ala nen iniki koonogo pereegerak wone keenu age, at abu'me maluk eekeelik obeelom mban menggerak nogo kenegen kage, ndi, at wone ari nogo karuk konengge, eeke logonok nduk leenogo pagagerak o.

¹⁵Kat konembege nagandik, kagandak nogo at endage nggwok aruwak nduk, yi aakumi ndi aakumi abok yoranet nege logonok nduk, leenogo pagagerak o.

¹⁶Ndi, yogondak Yetut nen yi maluk ndi maluk eeke nagagindak nogo kookkabuwak nduk, mbet-mbet yoru o. Kat nonggop nduk puk agandik o? Yiime wuppagawam o, yinuk, yo'nereegerak.”

¹⁷”Yo'nege mbareegi, niyok paga o Yerutalem yime wage nagagirik, Ala awi wurik me tamban eeke logonet, nabinggaanggo negen

¹⁸kage logonet, An nabok paganogo yoramenggendak nogo konenugun lek me, o Yerutalem mbo punuk, mbet-mbet o alik me nak o,

¹⁹yo'nege mbareegi, Nogoba o. It Yakuri tamban eeko menggam lombok aap iniki koba panggombunuk abet mbakaarak nogo, keele maarogo mambiigo menggam yawi inooke, eeke nagaarak ti, ineenu o.

²⁰At Tepanut kat koone yorage nagagerak nogo, wakwi iigak, an taati logonet, Kit wa'nip o, yoraanok, inambogoyum endekem mendek nggoorak porogo puk aret wonagagirak o, yinuk, paganogo yoge mbareegi,

²¹It aap endekem wonogo menggam o nda time nappagarak mbakirak me, nak o, yo'nege kagagirak o,” yinuk, yoragagerak.

²²It aakumi nogo at Pawulut wone ti ari konembunuk, ”Aap yogop mendek yi, eenik logorak lek o. Enggaawak mondok lek eerogo puwok o,” yinuk, inoone ya-mba yereegwaarak.

²³Inoone ya-mba yogo logonet, inambogoyum ineyak paga nibinogo nagakwi, nggween kabelogo yumbunik-telenak eerogo nagakwi, eekwi iigak,

²⁴it aap yigin unde inowe nogo nen, ”Alom ngge eekerak paga waruwok nduk ya-mba yogo agaarik mbakop? Wonok oome unggunuk paganuwak nduk muun yawi mbanak paga wa'nip o,” yinuk, yoragagerak.

²⁵Yorage mbareegi, wonok nogo nogogwaarik, keele maako mbareegwa, at inowe abu'me mendek nogo taati wonage me, at Pawulut nogo nen, ”Kit Oroma mendek ambi maluk eekerak liippegapok logonet, yawi wariyak op mbakop?”

²⁶Yoge nogo aruk konembunuk, inowe owagam nage nagagirik, ”At aap yi Oroma mendek me, kat nonggop eeppuurak nduk ari agandik?” yoge mbareegi,

²⁷at Pawulut owagam wage nagagirik, ”Kat Oroma mendek abet aret ilik? Yo'niru o.” Yinuk, kin wagangge mbareegi, ”Abet aret o,” yoreegerak.

²⁸Yoge mbareegi, it inowe nogo nen, ”Nanebunu Oroma mendek arikit nduk onggo nggwok pereegirak o.” Yoge mbareegi, at Pawulut nogo nen, ”Kat Oroma mendek arikit nduk onggo pereegindak kwe, an perak, aap Oroma iname nda'nagagirak me, an aap Oroma mendek aret o,” yoreegerak.

²⁹It at eegwa'me wawok nduk yereegwaarak mendek, yoreegerak nogo konenggo nogogwaarik, ”Mbo puwi a?” yinuk, puk arit nogogwaarak. Ndi, at yigin unde inowe nogo nen, ”Pawulut o Oroma mendek kagak, keele maakirak me, iya!” yinuk, agabiti agagerak.

³⁰Nogo yippunuk, ko'lu nen aap nogo nen, It Yakuri nen nonggop nduk inoone at oba lenggenogo pegaarak liirogon neenu arikit mba'nuk, at Pawulut piinogo teppege nagagirik, it Ala unde inoweewi inom, it wone amburu mbangga inom, kuwak eeruwak nduk inayonggo pege mbareegi, kuwak eereegwaarak me, Pawulut nogo wonok, inowagam oolo mippi nagagerak.