Read Wano NAPPIYAREEGERAK 24 Bible Online

NAPPIYAREEGERAK 24 - Wano bible

NAPPIYAREEGERAK 24

¹Nogo 5 yippunuk, Ala unde inowe endagembogut Ananiyat inom, it Yakuri inoweewi inom, wone amburu mbangga endage Terutulut inom, nogo nen inowe endagembogut nggubereno nogo owagam wogo nogogwaarik, ”Pawulut togop eekerak o,” yinuk, yoreegwaarak.

²Yogo mbareegwa, at Pawulut woraawak nduk ayonggo pereegerak wage mbareegi, at Terutulut nen oone pilit Pawulut oba lenggembunuk, nggubereno yoge logonet, ”Ai! Pelikit ninogoba wae. Kat ninarum logonet, lambunninake nagagindak me, niniki ugun tayenak aret ogoorik o. Kat wone obeelom koongge menggendak paga, o yime apit ninake obeelom eerogo pinaneegindak o.

³Yi awi ndi awi yi eekak ndi eekak eeke keenok, Ninogobarogon, wa! yokkogo ogoorik.

⁴An wone nggorek lek o. Kat wone yanggorogon ari menggendak me, karuk keegak ambi yikit nen, Yu, yo'niru o.

⁵At aap yi, aakumi lale-pale eeginabit nage logonet, it Yakuri yi awi ndi awi abok inikime worarit nege at aret kogoorak o. Aap Nataret mendek oone waganogo menggaarak inowe at aret o. Ndi, at Ala awi wurik me maluk eerogo pikit nduk eekerak mendek, pigogo nappogoorak.

⁸At nen yogop eekerak, ndogop eekerak, yinuk, oba pogoorak nogo, kat eegwa'me wagangge logomenggendik, abet aret eekerak mbarumunggun o,” yoge mbareegi,

⁹it Yakuri kuwak ogogwaarak nogo inom, ”Togop eekerak abet aret kogo o,” yinuk, yereegwaarak.

¹⁰Yogo mbareegwa, it inowe endagembogut nggubereno nogo eenggi titik paga, ”Kat yu o,” yoge mbareegi, at Pawulut nogo yoge logonet, ”Kat o muk togon nit aakumi Yakuri mendek abok aret ninawone amburu mbangge menggendak me, nagabiti lek logonet, an noba lenggenggaarak wone nogo paganogo yokkiri o,”

¹¹yoge nagagirik, ”An o Yerutalem tamban eerikit nduk nage nagarik, nogo 12 paga yigirak me, kat nen it aakumi kin wogiyoorak mbakendak kenok, op aret o.

¹²An time logonet, ninom wone wake neegaarak ti lek o. Ndi, Ala awi wurik me nen, Yakuri tamban eeko menggam nen, o Yerutalem nen, time aap kuwak aago nogo inikime manake neegaarak ti lek mban aret o.

¹³An noba lenggenggaarak nogo alom lek aret kaamunggun o, nogoba.

¹⁴Ndi, Ala wone lengganak inom, it Ala wone yorogo nogogwaarak nabi-nabi liiru mbaneegwaarak wone nogo inom, abok aret abet mbake minggirak me, it nen, Kit Yetut wone mugurok nogwe ti, wone alik aret o, yinuk, yogwe kwe, an wone ti ndak-ndak aret mugurok nage logonet, ninombomini inogoba Ala alut eeke minggirak ti abet aret paganogo yokkege agarik o, nogoba.

¹⁵It maluk eeko menggaarak inom, obeelom eeko menggaarak inom, kambunuk nogo menggam nen Ala nen ineenik agago mippiyaagin niniki aberak wonage ti, it kunduk iniki aberak wonogo agaarik.

¹⁶Togop me, Ala inom, aakumi inom, maluk eeppiiga'lek, niniki teeluk obeelom logorak ti mban liippunuk eeke minggirak o.

¹⁷Ndi, oonegen lagangge-wangge eeke kagak wonagagirik, an noreewi Yakuri mendek inabuwa nen we wogoroorak inom, Ala ake pugu inom, wonok, o Yerutalem wogora nagarak.

¹⁸Wogora nage nagarik, Ala awi wurik me aakumi kuwak aago ninom wonage, naalop-kaalop eeke, eeka'lek, we ugun noba mbeenggolage nagarik, wonage neegak, it aap Yakuri Atiya mendek ando wagaarak,

¹⁹Ta wonogwe, iigirak nogo nen an ambi eeke neegaarak kero, inoone noba paninuk, kenggaanom paga nenggali wappani woraawak lak, ineebe wagaabok o.

²⁰Yi wone ndi wone yoragarak paga lek o. Ata, it apit inenggaanom paga, Nit kambunuk nineenik agago mi'nariyak ti, niniki luunik kenok, nawone amburu mbanuwok nduk wogwe kigi o, yinuk, wone mbuuluk ti aret noone panggok togon yoragarak paga wo'neren wagaarak ti neenu kwe, ambinom eeke neegaarak kero, it nen mban paganogo yokkiruwak o,” yoreegerak.

²²Yoge mbareegi, at Pelikit nogo nen Yetut mugurok noorak wone yogwe nogo liirogon eenu negen wonage me, ”Peebi at Litiyat it yigin unde ambik aago inowe nogo wage kenok, awone an amburu mbanigin me, mbaganinip o,”

²³yorage nagagirik, at yigin unde inowe nogo yoge logonet, ”At Pawulut ti inaani porogo logonet, oreewi nen ake wogori wogwe iinok ti, mberiroorak lek o. Ti op aret o,” yinuk, aruk wareegerak.

²⁴Nogome wonagagirik, ti'nuk, at Pelikit at akweeluk Ndurutila kwe Yakuri mendek me, imbirak wogogwaarak. Wogo nogogwaarik, Pawulut woraawak nduk ayonggo pege mbareegi, wage nagagirik, Yetut Keritut abet ombakwi wone ari inaruk koneneegwaarak.

²⁵Ndi, at Pawulut nen obeelom eeko logorak wone inom, iniki nen eeriyak eeginake kwe, tebenogo puurak wone inom, peebi nen owak loonninaburak wone nogo inom, yorage mbareegi, at Pelikit nogo iniki nen agabiti age nagagirik, ”Abu yogoorak me, nak o. Ne ambi paga yuurak age kenok, woraanok nduk kayonggo pege neyaamunggun o.”

²⁶Ti yoreegerak ti, ”Keele maarak nogo piinggoorak onggo wo'niruwak,” mbake nagagerak me, ayonggo pegetak wage kenok, imbirak wone mbanggak eeke nagagerak.

²⁷O lagangge-wangge eeke kagak, 2 tahun age mbareegi, at Pelikit obaane'me Perikiyut Petut mippereegwaarak. Ndi, at Pelikit nen, ”It Yakuri inikilom nombaruwak o,” yinuk, Pawulut keele maarak aret teppereegerak.