Read Wano NAPPIYAREEGERAK 25 Bible Online

NAPPIYAREEGERAK 25 - Wano bible

NAPPIYAREEGERAK 25

¹At Petut nogo mippogo mbareegwa, wage nagagirik, nogo 3 yippunuk, o Kayitareya nen o Yerutalem nagagerak.

²Yerutalem nage nagagirik, wonage me, it Ala unde inoweewi nogo inom, it Yakuri inoweewi nagowan-nagowan nogo inom, nogo nen at Pawulut oba lenggeneegwaarak wone nogo paganogo yoreegwaarak. Tu paga wage me, enaappunuk, Pawulut waruwok nduk koombogo nogogwaarik, at Pelikit, ”E o,” yuwak nduk, ambokan laganggo logonet, ”Nogoba o. At Pawulut o Yerutalem woraawak nduk, ayonggo pu o,” yinuk, yogo mbareegwa,

⁴”Lek o. At Pawulut nogo, o Kayitareya porogo wonogwe me, an ne ambit iluk logonuk time nagin me,

⁵aap kinoweewi ando wone koongga kero, ando ninom nogo logomonggoorik, abet aret maluk eekerak kenok, time nen mban yoruwak o,” yinuk, yoragagerak.

⁶It inom wonage logonet, nogo we 8 kwak, 10 kwak yippunuk, o Kayitareya iyok paga wage nagagirik, ko'lu nen wone looniyak me, owak loonggo menggam unggwi nage nagagirik, at Pawulut woraawak nduk ayonggo pereegerak.

⁷Ayonggo pereegerak wage mbareegi, at eebe oolo kagak, it Yakuri Yerutalem nen wogogwaarak nogo, ina'nuk wanggeppunuk logonet, at eereegerak alom lek kagak, ”Yogop eekerak, ndogop eekerak,” yinuk, wone iya lombok oba lenggenogo pereegwaarak.

⁸Oba lenggenggo mbareegwa, at Pawulut nogo nen, ”Lek o, noreewi. Ala wone lengganak it Yakuri eeko menggaarak nogo tagangge, Ala awi wurik me maluk eeke, ninogoba Kayitat wone tagangge, eeke nagarak ti abu lek o,” yinuk, mbeenogo yoragagerak.

⁹Yorage mbareegi, at Petut nogo nen it Yakuri inikilom ombaruwak nduk, at Pawulut nogo yoge logonet, ”Kat togop eekendak yogwe yi, Yerutalem nage logomenggendik, an nenggaanom paga time owak looni noorak op ilik?” yinuk, yoreegerak.

¹⁰Yoge mbareegi, at Pawulut nen, ”At Kayitat ninogoba endagembogut abu'me mendek nen wone amburu mbangge minggim yi aret me, an noba lenggenggaarak yi, yime aret wone owak looniyak op o. An nen tiaap Yakuri mendek maluk ambi eeppiiga'lek wonagarak nogo kat keenu aret me,

¹¹maluk eekwi iinok, inooko menggaarak nogo mendek ambi abet aret eekirak kenok ti, nooriyak op aret kwe, noba lek kagak yogwe me, it nooruwak nduk, neebe wogoroorak mondok lek aret o. At Kayitat nen mban nawone amburu mbanuwak o,” yoreegerak.

¹²Yoge mbareegi, at Petut nogo nen at awuri wone amburu mbanggo menggaarak nogo inom inalik nen wone mbambogo nogogwaarik, ”Kayitat nen mban nawone amburu mbanuwak o, yinuk, yo'negendak me, Kayitat wonage me aret nappagagin o,” yinuk, at Pawulut nogo yoreegerak.

¹³Ti'nuk peebi, it Yakuri inowe endagembogut Agiripa nogo inom, kwe Mberinike inom, o Kayitareya unggwi wogo nogogwaarik, at Petut keyage waruwok nduk, pekka nogogwaarak.

¹⁴Pekka nogo nogogwaarik, time nogo ambik yippunuk, at Petut nogo nen, ”Aap ambi Pelikit nen keele maarak teppegerak yime agaarik o,” yinuk, at Pawulut awone it Yakuri inowe endagembogut nogo paganogo yoreegerak.

¹⁵Yoge logonet, ”An o Yerutalem wonage me, it Ala unde inoweewi nogo inom, it Yakuri inanggok nogo inom nogo nen, Togop eekerak me, oba lenggembunuk, kat nen paganogo enggali wa'nu o, yo'nogo mbaka,

¹⁶an nen it yorage logonet, Nit Oroma mendek yi, it inoba lenggenggaatak nogo inom owak loongga'lek kagak, nit ninalik nen inaane'le mbanggulik me, eebe wogoroorak lek o, yinuk, yorage mbaki,

¹⁷it abok yime kuwak eeppunuk wonogwe me, an elambirik lek nogo ambi yippunuk, ko'lu wone owak loonggo menggam unggwi nage nagarik, Eebe woraawak nduk ayonggo pigirak.

¹⁸Ayonggo pigirak wage mbaki, it oba lenggeneegwaarak nogo nen mi'na'nuk, Maluk ndogop eekerak o, yogwe iigirak nogo ndak-ndak ambi yorugun mbakirak mendek, yorulik eekaarak.

¹⁹We it waganggo menggaarak wone inom, ambi endage Yetut abu kambeegerak kwe, Pawulut nen, Lek o. Mondok eenik wonage o, yinuk wone inom, yogo logonet, nawone-kawone yagaarak me,

²⁰wone ti mendek ti an liippega'lek me, nonggop togon alom kwaarigin mbake nagarik, Kat koba lenggenggaarak yogwe ti, o Yerutalem nen kawone mbanuwok nduk nappagarak op ilik? Yu o, yogirak.

²¹Yoge mbaki, at Pawulut nogo nen, At Kayitat nen nawone mbanuwak nduk, keele maarogo mambiigo menggam yime aret logokit o, yo'nege mbaki, an nen, Peebi Kayitat owagam nappuurak me, porogo logonip, yoragarak o,” yinuk, mbininogo yoreegerak.

²²Mbininogo yoge mbareegi, at Agiripa nogo nen, ”At Pawulut eeke nagaarak wone ari ti, an konenikit o.” Yoge mbareegi, Petut nogo nen, ”Ko'lu nen at nen ari kenok, konenumunggun o,” yoreegerak.

²³Yoge mbareegi, ko'lu nen Agiripa Mberinike imbrak inom, it yigin unde inoweewi inom, it o time mendek inoweewi inom, inayuk wuppunuk inoone lek iigak, o wone mbanggo menggam nogome unggwogo nogogwaarik, at Petut nogo nen, ”Pawulut wonok pi woraanip o,” yorage mbareegi, pi wogogwaarak.

²⁴Pi wogo mbareegwa, at Petut nogo nen, ”Ninogoba Agiripa inom, kit yime ninom kuwak eekoorak inom, abok aret wone ambi yokkira o. It Yakuri o Yerutalem nen, o yime nen, ya-mba yogo logonet, Aap yi eenik logorak lek o. Wa'nip o, yo'negaarak nogo eebe yi kanip o.

²⁵Wa'nip o, yo'negaarak kwe, maluk eekwi iinok, inooko menggaarak ti mendek ndak-ndak ambi eerulik kagarak kwe, at nogo nen, Kayitat nawone mbanuwak o, yo'nege mbaki, owagam nappuurak koonggirak kwe,

²⁶at eekerak ambi an liiru mbanogo nogoba Kayitat ake nappuurak lek aret me, at eekerak ambi abu liirogon yogwe kiinok nen perak, liiru Kayitat ake mbanogo nappuurak nduk, at eebe wonok kit abok kinowagam wagi o Abe iyagalo ti, kat ninogoba Agiripa nen alom kwaa'nok nduk kowagam wonok wagi o.

²⁷Wone oba lenggenggaarak nogo paganogo yoga'lek kagak, eenggi keele maarak aret nappuurak ti meek kagi o,” yoragagerak.