Read Wano NAPPIYAREEGERAK 26 Bible Online

NAPPIYAREEGERAK 26 - Wano bible

NAPPIYAREEGERAK 26

¹Yorage mbareegi, at Agiripa nen Pawulut yoge logonet, ”Kat eekendak wone ti liirogon yo'niru o,” yinuk, yoge mbareegi, at Pawulut nogo yikit nduk, eenggi paga keyage wake logonet,

²”Ai, nogoba Agiripa. It Yakuri nen, Yogop eekerak, ndogop eekerak, noba lenggenggaarak ti, o yogondak yi paga kat kenggaanom lombok mbeenogo yokkirigin ti, niniki ale'nggen aga o.

³Nit Yakuri eeko monggoorak inom, wone wako monggoorak inom, kat abu keenu me, kat kiniki liippenok nduk yokkiri o.

⁴O maan wulaga mbuuluk paga nen nowe-nawot ninom o Yerutalem logonet eeke nagagirak nogo, it Yakuri mendek abok ineenu aret o.

⁵Nit wone waganggo monggoorak nogo, it ando mondok inalilakwi waganggo menggaarak Pariti nogo mendek ninom logonet, o maan togon wagangge nagagirak nogo, it o maan nen ineenu me, paganogo yokkiriyak mbakaarak kenok ti, yokkiraawak o.

⁶Ndi, yogondak Ala nen ninombomini abok yoragagerak nogo wone niniki luunik minggirak ti paga wo'niren nawone loonuwok nduk, pani wogotak kiigi o.

⁷Nit Yakuri ninanebunu 12 paga miirogo leeninabeegerak nogo nen, Wo'niraagin, ao! yinuk, liingge nen, oonikiya nen, Ala alut eeko monggoorak ti'nogo niniki luunik minggirak ti paga it Yakuri nen nooruwok nduk, noba lenggenggaarak me, nogoba, ao!

⁸Noweewi o. Kit nonggop nduk at Ala nen aakumi kanggwi ineenik agago mippiyoorak meek mbako ogotik o?

⁹An aa'nduk togon nen at Yetut Nataret mendek ti, at endage miyuk-meya eerogo pikit mbake nagagirik,

¹⁰o Yerutalem logonet, togop eeke nagagirak. Eeke logonet, it Ala unde ninoweewi nogo nen yo'nereegwaarak paga it Yetut apuri ambik keele maarogo mambiigo menggam piya nage nagagirak. Ti mban eereegirak lek o. Ata, it nen, Inooruwok ilik, lek a? yogwe iinok, an nen, Inooruwok aret o, yorage nagagirak.

¹¹It Yakuri tamban eeko menggam lombok it abet mbakwi mbo puwak nduk, inoorit nage nagagirak. Nanini wu agan nage kenok, aakumi inambik iname o nda lombok time aret inoorikit nduk, muguren-magaren lombok nege nagagirak o,” yinuk, yoragagerak.

¹²Yorage nagagirik, ”Togop eerit nege me, ne ambi paga Ala unde inoweewi nen, Togop ee'nu o, yinuk, mippanogo mbareegwa, o Ndamitik tu paga nage logonet,

¹³o liingge aret noreewi ninom nage me, mbogut paga nen abinak ndelenak-wolenak eeke kage nagagirik,

¹⁴nit abok aret nggween paga ninete wandu ngginnogogurak. Oonegen abinak ti mbuuluk. Ndi, ti eereegerak nogo ti, abinak mondok iya negen kage nagagirik, nggween paga ngginnogo mbareegu, Iberani wone paga yo'nege logonet, Tawulut wae. Tawulut wae. Kat nonggop nduk an keebi-keeba agago nooke menggendak o? Wam yinumo-yanumo ari kenok, yawi lomba agago wako mengga kwak, kat togop eekkaburak nduk ari agandik ya? yinuk, ari naruk konengge nagagirik,

¹⁵Ai, nogoba. Kat ta o? yoge mbareegi, Lek o. Kat nen keebi-keeba agago nooke menggendak nogo, Yetut an aret o.

¹⁶An nayeloman a'nuk, kat yogondak neegendak inom, peebi neyoorak inom, ti wone yoranet nege logonok nduk, leenogo pagakit nduk, nikkeya wagarak me, mi'naru o.

¹⁷It aap Yakuri yi inom, it endekem konenggulik mendek inom, inowagam nappagaminggirak me, time an nen kagap ndake logogin o.

¹⁸It nogo iniki o apit negen wonogwe me, eya negen agago piige, at Ibilit abu'me piyareegerak nogo Ala abu'me piige, ee'nok nduk nappagagin o. It nogo iniki noba panggombunuk abet nombakwi iinok, inomaluk Ala nen lek agago piinok, at apuri miirogo leenogo piyareegim nogome inom nabenogo piyaawak nduk, nappagagin o, yinuk, yo'nereegerak.”

¹⁹”Ti kenok, nogoba Agiripa. Mbogut paga nen an nabinggaanggo paga yo'nege kagagirak nogo, an eeka'lek minggirak ti lek o.

²⁰Yo'nereegerak nogo aa'nduk lombok o Ndamitik inom, o Yerutalem inom, ti'nuk, o Yureya enaagan-ambokan inom, it endekem konenggulik mendek inom yorage logonet, Kit Ala wone mban waganggo logonet, kiniki koonogo punuk, kinomaluk paganogo mbo pogo logonip o Yi eekak ndi eekak eeko logonet, Ala wone waganggo nagaarik, inomaluk mbo pegaarak abet aret kinombaruwak nduk, eeko logonip o, yinuk, yorage nagagirak,

²¹Togop yoranet nege nagagirak ti paga it Yakuri nen Ala awi wurik me time nen pippaninuk, nooruwok nduk eereegwaarak mendek,

²²Ala nen yeenggwanereegerak me, nok, yogondak yi neenik logonet, kit aap yo'nggok inom, inabu'me mendek inom, yokkirage agarik o. Yokkirage yi, wone alik mendek yokkirage lek o. Ala wone yogo nogogwaarak nabi-nabi nogo inom, at Muta inom, it apit nen, Togop eerigin o, yinuk, abok yogo nogogwaarak wone nogo aret paganogo yokkirage agarik o.

²³At Ala nen leenogo mippereegerak nogo nit Yakuri mendek inom, it endekem mendek inom, o eya eerogo piige logowak nduk, yagan warogo kangge logominggirik, kambunuk nogo menggam nen aa'nduk at aret eenik a'nuk mi'narigin o, yinuk, yogo nogogwaarak nogo aret yokkirage agarik o,” yinuk, yoragagerak.

²⁴At Pawulut nen wone ti abok yorage mbareegi, at Petut nogo oone nggwok paga ari logonet, ”Pawulut wae. Kat kumili nen ari agandik ilik? Kat yi wone ndi wone wagangge menggendak paga kumili kinikime lik yegerak keegi o.”

²⁵Yoge mbareegi, at Pawulut nen, ”Nogoba Petut. An kumili lek o. An niniki worak nen abet aret yokkege agarik o.

²⁶Nogoba Agiripa. Wone mina paga yugu lek o. Wone yogoorak nogo abok keenu kagi o. Wone ti abok keenu me, nagabiti lek logonet, yokkege agarik o.

²⁷Nogoba Agripa Ninombomini Ala wone yorogo nogogwaarak wone nogo abet mbake menggendak ilik? Abet mbake menggendak an neenu aret o.”

²⁸Yoge mbareegi, at Agiripa nen, ”Kat nen mban Keritut waganggerak agago panege kiraap!” yinuk, at Pawulut nogo yoreegerak.

²⁹Yoge mbareegi, at Pawulut nen, ”Nogoba o. Kat mban waanok nduk yokkege lek o. Kat inom, it yogondak konenggwi abok aret inom, an keele maa'nakerak kwak maakkinaburak lek kwe, an Keritut wone waganeegirak kwak, yogondak kenok, yogondak aret waganggwi, ndi, peebi kenok, peebi waganggwi, eerubagip nduk, an kinake Ala yoge agarik o,” yinuk, yoreegerak.

³⁰Yoge mbareegi, at inowe endagembogut nogo inom, inowe nggubereno nogo inom, kwe Mberinike inom, it aakumi kwi'ndak wonogogwaarak nogo inom, it abok aret mi'na'nuk,

³¹wundi nogo nogogwaarik, ”Maluk eekwi iinok, o keele maarogo mambiigo menggam mambiigwi, inookwi, eeko menggaarak mendek at togop ambi eerulik kogo o,” yinuk, ambi yogak eeko nogogwaarik,

³²at Agiripa nen Petut nogo yoge logonet, ”At ap ti, Nogoba Kayitat nawone amburu mbanuwak o, yenetak lek nen, yogondak keele maarak wonage nogo piinogo penetak o,” yinuk, yoreegerak.