Read Wano NAPPIYAREEGERAK 27 Bible Online

NAPPIYAREEGERAK 27 - Wano bible

NAPPIYAREEGERAK 27

¹O Italiya wo'niren noorak nduk wone mbambunuk, at Pawulut inom, aap ando keele maarak inom, at Yuliyut, Kayitat abu'me mendek yigin unde ambik aago inowe nogo nen wogoren nawak nduk, yoreegwaarak.

²Yogo mbareegwa, yiiro Araramitiyum mendek unde nogo time wonage me, o Atiya ene paga yi yenggenak aa'nggi paga o tini nggwok me time yanggwagak noorak eeka me, ka unggwogogurak. Aap Aritarakut Makeroniya mendek o Tetalonika nen wagagerak nogo ninom ka unggwogo nogogurik, nogo logonet,

³nogo ambi yippunuk, ko'lu nen o Tiron ari nogogurak. Ari nogo nogogurik, at Yuliyut nogo nen Pawulut abuwa nen, ”Koreewi yi mendek ndi mendek wokkiruwak nen pegiinet nage logomenggendik, woroorak op o,” yoreegerak.

⁴Time nen yiiro ene paga wundawok nduk unggwogo nogogurik, wiya nen yiiro ogobak panggonggage logonet, nomonniren nage me, o Kipurut nina wunggagak eraaninu o wiya lek me, time nogogurak.

⁵Nogo nogogurik, o Kilikiya inom, Pambiliya inom, nina wunggagak eerit nogo logonet, ene o Likiya Mira time wunda nogogurak.

⁶Time wunda nogo nogogurik nogome nen, aap yigin unde inowe nogo nen yiiro ambi o Alekandiriya nen wage nagagirik, o Italiya noorak eeke kage nagagirik, yiiro time mambinanege mbareegi, nogogurak.

⁷Nogo logonet, yiiro nogo wiya nen panggoninuk wagak eeke logonet, abu meek ee'ninake kagak, nogo ambik yit, o Kinirut panggo yi nogogurak. O wiya nogo nabenak togop mban eeke kenok, wanggi'nuk nogo logonet, o Kereta eraaninu time o Talomone nina wunggagak nogogurak.

⁸Nogo nogogurik, abu meek ee'ninake kagak, o endage Abolok Lek Obeelom yogo menggam nogome o Lateya o tini nggwok nogo koorok panggorogon time ari nogogurak.

⁹Time elambirik niigak, mbi mbo punuk, inambe mage negen logonet, eeko logorak eyom abu lek age mbareegi, o tero nggu-nggu eeke minggim aret me, ”Nit maluk ee'ninake kero, noorak meek o,” yogo mbareegwa, at Pawulut nen ineenu eeruwak nduk yorage logonet,

¹⁰”Noreewi o. Nit nagun kenok, abu maluk ee'ninabigin kagi o. Ninamendek inom, yiiro inom nogo mban lek arigin ti lek o. Ata, nineebe inom aret maluk ee'ninabigin kagi o,” yoragagerak mendek,

¹¹at yigin unde nogo nen at Pawulut yereegerak meek mbake nagagirik, at yiiro ogobak koongge menggerak nogo inom, at yiiro unde inom, it yogwe mban mugurok nogo nogogwaarik,

¹²o wiya wake paga time logorak meek age mbareegi, it ando apit nen nok-nok o Penikit noorak koonggo logonet, O Penikit ti, o Kereta yi yenggenak kup mbanak me oonegen kilu yi nage minggim selatan pa'nggwe inom, utara pa'nggwe inom, ilin me time, ”O wiya tokkogwe a nawi o,” yinuk, koombunuk wonogwe me,

¹³selatan pa'nggwe nen wiya eeroget nabu-nabak wake mbareegi, ”Nit koonggoorak nogo yi aret age me, nawi o,” yinuk, yiiro nage kero, keele mbuti pugunik nogo awiirogo yonggoppunuk nogo nogogurik, o Kereta koorok aa'nggi paga time nina wunggagak nogogurak.

¹⁴Nogwe me, aberak lek me, puurom kup mbanak me oonegen wundi wage minggim utara pa'nggwe nen wiya nabuk togon ee'nuk wage kagak,

¹⁵nawok nduk eereegurak mendek, yiiro nogo ogobak nomoninuk nagak mban eeke mbareegi, ”Wo'niren nawak aret o,” yinuk, yogo nogogurik, yiiro nogo piyak-lenggak eerit nage kagak, lambek puk ogogurak.

¹⁶Nok, wo'niren nggween oolo kup mbanak endage Kawura logonak mbuuluk kenom me eraanu nogo nogogurik, wiya en meek ee'ninake kagak, yiiro mbuuluk nogo nggwok nogo nen keele niikkenok nogo monggoorak me alik age kero,

¹⁷piyanogo yiiro nggwok me mambereegwaarak. Mambogo nogogwaarik, yiiro eebe telak ari kero, keele omaawirogon maappunuk, o Tiritit eraanu time nen yiiro ogobak lik yi nage kero, mbogoyum pugunik irip awiiko mbareegu, wiya nen mban wo'niren nagagerak.

¹⁸Wiya nen yiiro nogo mondok piya-lenggak lombok ee'ninake mbareegi, nogo ambi yippunuk, ko'lu nen yi mendek ndi mendek kilirogo yiime mbo wuppugwi, ti'nuk, nogo ambi yippunuk,

¹⁹yi mendek ndi mendek yiiro ogobakkigiko menggaarak nogo mendek ineenggi paga kilirogo yiime mbo wuppugwi, eereegwaarak.

²⁰Nogo apit yogo logonet, oonegen inom, laaluguragan inom, wundi waga'lek kagak, wiya mban nabuninuk eeke mbareegi, ”Nit niyo nen ndonggonninabigin kogo o,” yinuk, mbareegurak.

²¹It abok mbi nengga'lek nogo ambik yit wogogwaarak me, at Pawulut oolo mi'nage nagagirik, ”Noreewi o. O Kereta nen noorak lek yagarak ngo koneninetak nen perak, ninamendek lek age, maluk ee'ninake, togop ee'ninabenetak lek enaani logonetak kwe,

²²kineebi ambi niyo abu-abu wambumunggup lek o. Yiiro mban maluk eerigin me, kiniki nu'lek logobagip nduk, yokkirage agarik o.

²³An Ala aput me, abu'me logonet, at obalombok eeke minggirak nogo nen yonggo nappiige menggerak melaikat ambi kii'me oonikiya neya wage nagaarik,

²⁴Pawulut wae. Kagabiti yugun o. Kat Kayitat owagam aret mi'namunggun. At Ala kabuwa nen kat kinom yiiro paga wonogwe yi, abok inagap ndarigin o, yinuk, yo'negerak me,

²⁵nggween kup mbanak ambi paga yiiro ogobak lik yemenggerak kwe, at Ala yo'negerak a'me arigin abet mbake me, kiniki nu'lek logonip o, noreewi,” yinuk, yoragagerak.

²⁶

²⁷Yi yenggenak endage Areriya o wiya nen piya-lenggak ee'ninabit nage kagak, nogo 13 yit nogogurak me, ndi, 14 paga nogo iniki mbere eeke kagak, it yiiro ndegenggo menggaarak nogo, iniki nen, ”Aa'nggi paga abu panggo yi wogo o,” yinuk, mbako nogogwaarik,

²⁸yugum keele mbarenogo, ”Yi alobok kaamun ilik, lek a?” yinuk, wakkagak nogo wuppogo nogogwaarik, 20 depa paga agagerak kogogwaarak. Ti'nuk, peebi wakkogo nogogwaarik, 15 depa paga agagerak kogogwaarak,

²⁹Kogo nogogwaarik, yugum paga panggok ari logonet, ogobak lik ari kero, inagabiti nen yiiro puk aruwak nduk, mbuti aaninggin warak mendek keele yiiro akom me mbarenogo yi inikime wuppogo nogogwaarik, o mbet-mbet weeruwak nduk, tamban eeko nogogurak kwe,

³⁰it yiiro ndegenggo menggaarak ando nogo mbaganiyak mbako logonet, yiiro mbuuluk nogo niyoome yindinogo wuppogo nogogwaarik, yi kilaarak mogonik eeke me nogome mbuti aaninggin mendek pugunik nogo yiiro ogobak me nen yi inikime wuppugwi yuwak eereegwaarak mendek,

³¹”Yiiro ndegenggo menggaarak nogo to inikime logorak lek kenok ti, ninagap ndakkolaagun lek o,” yinuk, at Pawulut nen at yigin unde awuri inom yoragagerak.

³²Yorage mbareegi, it nogo nen yiiro mbuuluk nogo keele nggaruk togon agago wuppogo nogogwaarik, yi wonok nawak nduk, teppereegwaarak.

³³O wikit nduk eeke kagak, at Pawulut nen it nogo mbi nawak nduk iniki eyak wappiige logonet, ”Mbi nengga'lek kiniki piirik logonet, nogo 14 paga yogotak me, mbi nanip o.

³⁴Kinomaawi paga kinagap ndakkoloorak mbi yi aret nanip o. Kineeruwak ambit iluk ambi lek arigin lek o,”

³⁵yorage nagagirik, at Pawulut nen mbi ambi wagangge nagagirik, it inenggaanom paga, ”Ala wa,” yinuk, karerogo nengge mbareegi,

³⁶it iniki ale'nggen mbako nogogwaarik, abok aret inom mbi nunggugwaarak.

³⁷Nit aakumi yiiro paga nogogurak nogo, nineebe lambuk togon 276 paga aret me,

³⁸mbi ndonggorogon nonggo nogogwaarik, yiiro teeluk aruwak nduk, gandum parum negen kilirogo yiime mbo wuppereegwaarak.

³⁹O wege mbareegi, o time ineenggo'lek kwe, ilin me mbini niyanak ina nakkogo nogogwaarik, ”To paga time luk togon nawok o,” mba'nuk,

⁴⁰yiiro abu'me mbuti keele mbarenak nogo mbanogo teppugwi, to ogobak koongge menggerak tugunik nogo piinggwi, eeppunuk, wiya nen wo'niren mbini niyanak me nawok nduk, mbogoyum pugunogo ogobak me nippogo mbareegwa, nogogurak mendek,

⁴¹yi nogo omaawi nen to nogo mbini me panggok togon nonggok yi nage mbareegi, niyo akom me panggonggagak eeke logonet, yiiro nogo yiginage kagak,

⁴²it yigin unde nogo nen, ”It keele maarak nogo ngguu'mo paga mbaganggwi iyo, abok inooruwok,” mbareegwaarak mendek,

⁴³inowe nogo nen, ”Pawulut enaani wonok naakit,” mbake nagagirik, ”Inoorugup o,” yinuk, inaruk wappege nagagirik, ”Kit ngguu'mo kineenu kenok, kinaa'nduk yi inikime time ku'mbo wura nanuk, aa'nggi paga time wundi nanip o.

⁴⁴Ndi, kit ando ngguu'mo kineenggo'lek kenok ti, kobat inom, eyo minik inom, ti paga kineenggi piganok, inambokan nanip o,” yinuk, yorage mbareegi, nit abok obeelom aret aa'nggi paga wunda nogogurak.