Read Wano NAPPIYAREEGERAK 3 Bible Online

NAPPIYAREEGERAK 3 - Wano bible

NAPPIYAREEGERAK 3

¹Ne ambi paga o kiyoma negen jam 3 paga tamban eeko menggaarak me, tamban eeruwok nduk, it Peterut Yaya imbirak Ala awi wurik me nogogwaarak. Tungga'nggi obeelom tooneegwam nogome aap ambi endop maluk nda'nagagerak nogo nen it aakumi Ala awi wurik me unggwogwe iinok, ambi nggino ari kenok, yi mendek ndi mendek wogogo logowak nduk, ko'lu-kii'me wonok pi nagak mban eeko nogogwaarak nogo, muk pi nogogwaarak time wonage me,

³it Peterut Yaya imbirak Ala awi wurik me unggwogwe enegen iige nagagirik, ”Wo'ninip o,” yinuk, ambe ngginoorage mbareegi,

⁴aap nogo inigen pik-pak ugu logonet, at Peterut nen, ”Kat kenegen pe'niyet o,” yoge mbareegi,

⁵”Nano wo'nirumengga?” yinuk, enegen pegiyareegerak.

⁶Enegen pegiige mbareegi, at Peterut nogo nen, ”Wu abu lek o. An unde minggirak perak, ambi wonage me, wokkiri o,” yoge nagagirik, ”Yetut Nataret mendek endage paga mi'na'nuk nege logot o.”

⁷Yoge nagagirik, at Peterut nogo nen eenggi abee'nggan pigogo awo mippege kagak, aap nogo iyok inom, endop enegen inom, mondok omaawi age mbareegi,

⁸pilak togon mi'nage nagagirik nogome nege-wege nagagerak. Nege-wege nagagirik, ku'mbo wanggak agan Ala alut eerit Peterut Yaya inom Ala awi wurik me unggwi nagagerak.

⁹Ala alut eerit ku'mbo wanggak agan nege aakumi inigen kogo nogogwaarik,

¹⁰”Ala awi wurik me tungga'nggi endage Obeelom tooneegwam nogome logonet, yi mendek ndi mendek ambe nggino ari nagaarak nogo obeelom agaarak yi, iya!” yinuk, pi wareegwaarak.

¹¹At aap nogo nen Peterut Yaya imbirak pippiirogo wonage me, it aakumi abok Ala awi wurik awe aago endage Talomo yogo menggam nogome puu'nuk kuwak ari wogo logonet, ”Wi!” yinuk, pi wareegwaarak.

¹²Kuwak ari wogwe nogo at Peterut enegen iige nagagirik, it nogo yorage logonet, ”Kit Iterali mendek yi wologo wae. Obeelom agaarak ti, nonggop nduk pi wako ogotik? Nit obeelom eeko monggoorak me, ninomaawi paga aap yi obeelom eekaarak nduk, kinigen pe'niigo ogotik ya?

¹³Abarakam inom, Itak inom, Yakup inom, inombomini inogoba Ala ayeloman Yetut nogo, at Pilatut nen teppuurak mbake kagak, kit nen, Nit mendek ti lek o, yinuk, waruwak nduk, wogorogotak kwe, Ala nen muk tiyappegerak o.

¹⁴At aap maluk eekeelik iniki mondok koonak menggerak nogo, At nit mendek lek o, yinuk, at obaane'me aap inooke menggerak mendek ambi teppuwak nduk yogotak nogo, kit aret o.

¹⁵Nineenik ee'ninake menggerak alom nogo at aret kagak wakotak kwe, Ala nen kanggo menggam nen eenik agago mippegerak nogo ninigen kogoorak me, paganogo yokkirogo ogoorik.

¹⁶Nit niniki Yetut oba panggombunuk abet mbakoorak nogo paga aap kineenu yi nogo, obeelom agago omaawi eeppegerak wonage o. Niniki Yetut abet mbakoorak paga aret obeelom agaarak kinom wonage yi, kit abok kinigen kogop o,” yinuk, yoragagerak.

¹⁷Yorage nagagirik, ”Ai, noreewi. Kinoweewi kinom eekotak nogo ti, kobak logonet eekotak an neenu aret o.

¹⁸Maan Ala nen, An naput Keritut andi-pandi yagan warigin o, yinuk, it at oone yorogo nogogwaarak nabi-nabi yorage kagak paganogo yereegwaarak nogo a'me lik yegerak me,

¹⁹kinogoba endagembogut nen kit maluk eeko monggotak nogo kookkinake logominggirik, kiniki ale'nggen eeruwak nduk kiniki koombunuk kinomaluk mbo pinip o. Ti eekwi kiinok, kinake leenogo pereegerak Yetut nogo nappi woraagin o.

²¹At Ala nen, Togop eerigin o, yinuk, o maan togon it at oone yorogo nogogwaarak nabi-nabi nogo, yorage kagak yereegwaarak nogo a'me lik yuwak nduk, yi mendek ndi mendek abok aret alik ngget mendek awo aga'lek kagak at Ala nen Yetut mbogut paga tebemborogo logogin o.

²²At Muta nen ari logonet, Kinogoba Ala nen an nappani wagagi kwak, at oone yokkiraawak nduk, aap nabi kit mendek ambi kinake kinowagam nappi woraagin. Nappi woramenggerak nogo nen yi wone ndi wone yokkirage kenok, konenggo logonu o.

²³At Ala nen yoge kagak yokkiramenggerak nogo kinenggela'me ambitak konengga'lek logomenggaarak kenok, leenogo pinaganuk, maluk eeginabigin o, yinuk, yereegerak.

²⁴Aap nabi Temuwen yorage nagagerak kuli nen, at ambokan wone yorogo nogogwaarak nogo nit yogondak eekwi abok aret agan wundi wogogwaarak.

²⁵It Ala wone yorogo nogogwaarak nabi-nabi nogo, inombowologwe kit aret o. At Ala nen at Abarakam yoge logonet, Kat ndaganabemenggendak paga yi awi ndi awi yi aakumi ndi aakumi abok ale'nggen inoba piyaagin o, yinuk, abok wone kinombomini yoragagerak nogo, kit kinake aret yoragagerak o.

²⁶Ti kenok, at Ala nen at ayeloman eenik agago mippege nagaarik, kit maluk eekwi nogo mbo pugwi kiinok, ale'nggen kinoba pinagawak nduk, aa'nduk kinowagam nappi wagaarak o,” yinuk, at Peterut nogo nen yoragagerak.