Read Wano NAPPIYAREEGERAK 4 Bible Online

NAPPIYAREEGERAK 4 - Wano bible

NAPPIYAREEGERAK 4

¹It Peterut Yaya imbirak it aakumi nogo awo yorogwe iigak, it Ala unde inom, Ala awi wurik me arum menggaarak inowe nogo inom, it Taruki mendek inom, wogogwaarak.

²At Yetut aakumi kanggo menggam nen eenik eerogo mippereegerak me, Peterut Yaya imbirak nogo nen aakumi kanggwi ineenik agago mippiyoorak wone nogo mamunirogo mbareegwa, inanini nen

³ineebe pigiren nogogwaarak. Ineebe pigiren nogo nogogwaarik, o kiyoma age mbareegi, ko'lu nen yorawok nduk aap keele maarogo mambiigo menggam mambiyareegwaarak.

⁴Ndi, it wone yorogwe iigak koneneegwaarak nogo aap mban ineebe ambik 5000 aret abet mbareegwaarak.

⁵Nogo yippunuk, it Yakuri inoweewi inom, inanggok inom, it Ala wone liiru mbanak unde inom, at Ala unde inowe endagembogut Kanat inom, Kayapat inom, Yaya inom, Alekandet inom, Ala unde inowe nogo owe-awot inom nogo abok aret o Yerutalem kuwak eeppunuk,

⁷it Yetut nen nappiyareegerak nogo imbirak inowagam piya wogo nogogwaarik, yorogo logonet, ”Kit nen aap obeelom eekotak nogo, ta endage agago obeelom eekotak o? Ta omaawi paga eekotak o?” yinuk, ineegwa'me waganeegwaarak.

⁸Ineegwa'me waganggo mbareegwa, at Peterut nogo Aberiniki inikime lik ari mbareegi, ”Noreewi, nogobamini o.

⁹Aap endop maluk obeelom agaarak nogo, ti nano paga obeelom eekotak? yinuk, kit yogondak yo'nirogwe ti,

¹⁰kit inom, Iterali mendek inom, kit abok kineenu arubagip nduk alom liirogon yokkira o. At aap obeelom agaarak kinowagam mi'ndak wonage yi, at Yetut Keritut Nataret mendek kit eyo paga nabenogo wako mbakop, at Ala nen kambunuk nogo menggam nen eenik agago mippegerak nogo endage paga obeelom eekoorak o, yinuk, yokkirogo ogoorik.

¹¹Ala nen, Kit yugum o wuko monggotak yi, o wuko logonet, yugum ambi mbo pereegutak nogo, yugum ogowa ndoonnaga o, yinuk, yereegerak ti, at Yetut aret nduk yereegerak o.

¹²Ala nen, Kit aakumi yi awi ndi awi abok aret aap alik endage paga kinagap ndakkinabigin o, yinuk, yo'niroolik me, at nen mban aret ninagap nda'ninaburak op o,” yinuk, yoragagerak.

¹³Yorage mbareegi, it kuwak ogogwaarak nogo nen it Peterut Yaya imbirak nogo, tekola eerulik weelek negen wonogogwaarak kwe, inagabiti lek logonet, yorogwe yelok iigo nogogwaarik, ”Wi!” yinuk, ”Yetut inom nugu nogogwaarik yi aret kogo o,” yinuk, pi wareegwaarak.

¹⁴Aap obeelom eereegwaarak nogo inowagam mi'ndak wonage kogo nogogwaarik, ”Wone onggo ngge yoraawi?” yinuk, puk ogogwaarak.

¹⁵Puk ogo nogogwaarik, ”Endekem wundi nanip o,” yorogo mbareegwa, wundi nogwe iigak, inalik nen wone mbanggo logonet,

¹⁶Aap yi nonggop eeginabuwi? Eerubok mendek eekaarak nogo it Yerutalem mendek inenggaanom paga abok pagak yegerak me, nit nen lek yuurak ti meek aret kwe,

¹⁷wone ti ambinom wigak yukwak, aakumi ando yoroorak lek puk aruwak nduk, mberiraawok o,” yinuk, yereegwaarak.

¹⁸Yogo nogogwaarik, wiirogogwaarak wogo mbareegwa, yorogo logonet, ”At Yetut endage ambinom yorogwe, mamunirogwe, eerit noorak mondok mage o,” yinuk, mberirogogwaarak.

¹⁹Mberirogo mbareegwa, Peterut Yaya imbirak nogo nen it yorogo logonet, ”At Ala oone koneniyak ilik, kit kinoone koneniyak a? Ala enggaanom paga kit mban kooninip o.

²⁰Ninaruk konenggwi, ninigen kogwe, eekoorak wone ti yoraga'lek puk ariyak meek ee'ninake me, yorogo logogun aret o,” yorogo mbareegwa,

²¹aap nogo obeelom eereegwaarak kenok, it aakumi abok nen Ala wogoppugwi iinok, inagabiti nen, ”Alom nano paga yilinogo maluk aganabuwi?” yinuk, inoone omaawi paga mberirogo nogogwaarik, keele piinogo wumbiyareegwaarak.

²²Ndi, at aap eerubok mendek agago obeelom eereegwaarak nogo, eebe 40 tahun negen wonagagerak o.

²³Piinogo wumbiigo mbareegwa, Peterut Yaya imbirak nogo inoreewi wonogwe me nogo nogogwaarik, it Ala unde inoweewi nogo inom, it aap inanggok inom nogo nen yorogogwaarak wone nogo mbininogo inoreewi yorogogwaarak.

²⁴Yorogwe nogo it inaruk konenggo nogogwaarik, it inom lambunna'nuk tamban eeko logonet, ”Ala ninogoba o. Mbogut-nggween inom, yi yenggenak inom, yi mendek ndi mendek abok kat nen mban wakkagagindak o.

²⁵Ninombo Ndawut kat kayeloman nogo Aberiniki inikime lik ari mbareegi, kat Ala yoge keegak at nen ari logonet, It aakumi endekem konenggulik mendek, nonggop nduk inanini ambik agaarak o? It inanebunu lombok, nonggop nduk wone aanom warogo koonggaarak o?

²⁶It yi awi ndi awi inoweewi inendagembogut, nonggop nduk ninogoba Ala inom, at nen leenogo mippereegerak nogo inom, imbirak inooruwok nduk kuwak eeppunuk, aap aago anggut-nggut wakkogo nagaarak o? yinuk, yereegerak.

²⁷Yereegerak nogo, o Yerutalem tini nggwok yime it Keroret togon, Pondiyut Pilatut togon, it endekem mendek inom, it Iterali mendek inom, kat kayeloman maluk eekeelik obeelom mban menggerak leenogo mippereegindak Yetut nogo, at waruwok nduk abet aret kuwak eekaarak o.

²⁸Kat keenggi omaawi paga yi eekak ndi eekak eeriyak aa'nduk koonogo pereegindak nogo, eeruwok nduk eekaarak o.

²⁹Ninooriyak nduk eekwi yi iyet o, ninogoba. Ninagabiti lek logonet, kat koone yorogo logowak nduk niniki nu'lek eeppinanu o.

³⁰It kugi andi wonogwe iinok, lek eeruwak nduk keenggi piginabu o. Ndi, kat kayeloman Yetut maluk eekeelik obeelom mban menggerak nogo endage paga eerubok mendek inagabiti warak mendek eeke menggerak eeruwok nduk ee'ninabu o,” yinuk, tamban eereegwaarak.

³¹Tamban eeko mbareegwa, o it wonogwe nogo nuk ari logonet, Aberiniki inikime unggwage mbareegi, inagabiti lek logonet, Ala wone yorogo nogogwaarak.

³²Nogome logonet, it wone abet mbareegwaarak nogo iniki ambit eeppunuk wonogo logonet, yi mendek ndi mendek, ”Yi kat mendek o. Yi an mendek o,” yaga'lek, we, ”Nit abok ninamendek o,” yogo nogogwaarak.

³³It Yetut leenogo nappiyareegerak nogo inoone omaawi paga yogo logonet, inogoba endagembogut Yetut eenik a'nuk mi'nagagerak wone nogo paganogo yorogo nogogwaarak. Ndi, Ala nen ale'nggen ambik inoba piige nagagerak.

³⁴It inanggween ege, it inawi wurik ege, onggo nggerembogo nagaatik, it Yetut leenogo nappiyareegerak nogo inowagam pi nagaatak me, it ambi inamendek lek kenok tumburirogwe, eeko nogogwaarak me, it inamendek lek ambi logolik o.

³⁶Togop eekwi wonogwe me, aap ambi endage Yutup, anebunu Leewi, awi Kiperut mendek me, inom logonet, it Yetut leenogo nappiyareegerak nogo, endage ambi Mbaranabat yogo nogogwaarak. (Ti, nit ninoone paga, ”Iniki Yanggongga o,” yogo nogogwaarak.)

³⁷Ndi, at aap nogo anggween ambi unde me, onggo nggerengge nagagirik, wu nogo wonok it nappiyareegerak inowagam pi naagerak.